¿Maypim kananchik juicio punchaw chayaramuptin?

PIÑAKUYNIN punchawpi Jehová Dios mana allin runakunata puchukachiptin, ¿imataq pasanqa allin runakunawan? Proverbios 2:21, 22 nin: “Diospa munasqanman hina kawsaqkunaqa kay pachapim yachanqaku. Mana culpayoq kaq runakunaqa kay pachapim hinalla takyanqaku. Mana allin ruraqkunam ichaqa kay pachamanta chinkachisqa kanqaku. Traicionaqkunam ichaqa qora pilarusqa hina kay pachamanta qechusqa kanqaku”, nispa.

Hinaptinqa, ¿imaynatam allin runakuna salvakunqaku? ¿Kanmanchu salvakunankupaq huk sitio? ¿Maypitaq kananku chay punchaw chayaramuptin? Kaykunata yachanapaqyá qawasunchik ñawpaq tiempopi serviqninkunata Jehová Dios imayna salvasqanmanta.

Wakinpiqa ancha allinmi karqa maypi kasqanku

Bibliam 2 Pedro 2:5-7 willawanchik, Noeyta hinaspa Lotta Jehová Dios imayna salvasqanmanta, ninmi: “Diosqa manataqmi pampacharqachu ñawpaq runakunatapas, sinchi paratam kachaykamurqa Dios mana adoraq runakunaman hinaspam salvacionmanta willakuq Noeytawan qanchis runakunallata salvarqa. Diosqa chinkarachirqataqmi Sodoma Gomorra llaqtakunatapas uchpayanankama kañaspa chaynapi Dios mana adoraqkuna qepa punchawkunapi manchakunankupaq. Allin ruraq Lot sutiyoq runatam ichaqa librarqa, payqa mana allin runakunapa qanra vidanta qawaspanmi anchata llakikurqa”, nispa (2 Ped. 2:5-7).

¿Imaynatam Noey salvakurqa Sinchi paramanta? Diosmi payta nirqa: ‘Tantearunim llapa runakuna chinkarachiyta, kay pachaqa paykunaraykum dañanakuyllapiña kachkan. Chaynaqa kay pachamantam paykunata puchukachisaq. Cipres sachamanta ruray hatu-hatun wasi kaqlla buqueta’, nispa (Gen. 6:13, 14). Noeyqa Diospa kamachisqanman hinam buqueta rurarqa. Sinchi para chayamunanpaq qanchis punchawllaña faltachkaptinmi, Jehová Diosqa Noeyta nirqa familiantawan animalkunata buqueman yaykuchinanpaq. Chay punchaw chayaramuptinmi, buquepa punkun wichqakuruptin ‘kay pachaman tawa chunka punchaw tawa chunka tuta’ sinchita paraykamurqa (Gen. 7:1-4, 11, 12, 16). Noeywan familianmi ichaqa “yakumanta salvakurqaku” (1 Ped. 3:20). Chaypaqqa buquepim kananku karqa. Manam maypipas salvakunankupaqqa karqachu (Gen. 7:19, 20).

Lot runatam ichaqa mana Noeyta hinachu Diosqa kamachirqa, aswanmi iskay angelkunawan willachirqa salvakunankupaq yachasqanku llaqtamanta lloqsinankupaq. Puntatam Sodoma llaqtapi lliw ayllunkunata huñunanpaq kamachirqa, hinaspam nirqa: “Horqoy kay llaqtamanta. Kay lugartaqa puchukachisaqkum”, nispa. Salvakunankupaqmi Lotqa aylluntin ‘orqoman lluptinanku’ karqa (Gen. 19:12, 13, 17).

Jehová Diosqa ‘yachanmi sasachakuykunamanta serviqninkunata libraytaqa, mana allin runakunatañataqmi [. . .] juicio punchawpaq waqaychan’, chaytam qawanchik Noeytawan Lotta salvasqanpi (2 Ped. 2:9). Kaykunam qawachiwanchik, salvakunankupaq maypi kasqanku ancha allin kasqanmanta: Noeymi buqueman yaykunan karqa, Lotñataqmi Sodoma llaqtamanta lloqsinan karqa. Hinaptinqa, ¿huk sitiopipunichu kana salvakunapaq, icha maypi kaptinchikpas salvawanchikmanchu? Qawasunchikyá kay tapukuykunata kutichiq iskay willakuykunamanta.

 ¿Salvakunapaqqa huk sitiopipunichu kana?

Jehová Diosmi chunka kaq castigowan Egipto nacionta manaraq castigachkaspan, israelitakunata kamachirqa Pascuapi wañuchina animalpa yawarninwan punkunkupa chakaqninta llusinankupaq. Chaynapi Egipto runakunata Jehová Dios wañuchinanpaq pasaspan, serviqninkunapa punkunpi yawarta rikuspan pitapas mana wañuchinanpaq. Chay tutallam Jehová Dios “wañurachirqa Egipto nacionpi llapallan piwikunata, [. . .] palacionpi gobiernaq Faraonpa piwinmanta qallarispa carcelpi kaq presopa piwinkama, wañuchirqataqmi llapa animalkunapa piwintapas”. Hinaptinqa, piwi kaq wawa-churinku mana wañunankupaqqa, israelitakunaqa manam huklawmanchu rinanku karqa (Exo. 12:22, 23, 29).

Qawasuntaqyá Jerico llaqtayoq Rahab sutiyoq chuchumika warmimantapas. Israelitakuna Prometesqa Allpaman yaykunankupaqña kachkaptinkum, Rahabqa yacharurqa llaqtan purmachisqa kananmanta. Rahabmi wateqaq runakunata wasinpi samaykachispan nirqa israelitakuna hamusqankuwan Jerico runakuna manchakuyllawanña kasqankumanta. Paykunata pakaykuspanmi prometechirqa chay punchawpi ayllunkunatawan payta salvaykunanpaq. Wateqaqkunañataqmi nirqaku ayllunkunata huñuspan murallapi yachasqan wasinpi kanankupaq. Wasinmanta lloqsiruspankum ichaqa wakin runakuna hina wañunmanku karqa (Jos. 2:8-13, 15, 18, 19). Chaymantañataqmi Jehová Diosqa Josueyta nirqa Jerico llaqtapa murallankuna tuñinanmanta (Jos. 6:5). Chaynaqa, Rahabpa yachasqan wasiqa manamá segurochu karqa salvakunankupaqqa. Hinaptinqa, ¿imaynatamá salvakunmanku karqa?

Jerico llaqtapa puchukaynin punchaw chayaramuptinmi, Israel sacerdotekuna cornetankuta tocarqaku, hinaptinmi wakin israelitakunañataqmi qaparirqaku. Josuey 6:20 nin: “Cornetapa waqasqanta uyarispankum runakuna qaparirqaku sinchi qapariywan chaymi llaqtapa murallan tuñiykamurqa”, nispa. Muralla tuñiykuptinqa manam pipas harkaruyta atirqañachu. Rahabpa wasintam ichaqa Diosqa mana tuñichirqachu. Hinaptinmi Josueyqa wateqaqkunata nirqa: “Chuchumika warmipa wasinman yaykuspaykichikyá juramentasqaykichikman hina horqomuychik payta chaynataq llapallan paywan wasinpi kaqkunatapas”, nispa (Jos. 6:22). Rahabpa wasinpi lliw kaqkunam salvakurqaku.

¿Imataq ancha allinqa?

Noeyta, Lotta, Moisespa tiemponpi israelitakunata hinaspa Rahabta Jehová Dios imayna salvasqanmanta, ¿imatam yachanchik? ¿Huk sitiopipunichu kananchik juicio punchawpi salvasqa kananchikpaq?

Noeyqa salvakurqam buquepi kasqanrayku. Ichaqa, ¿imanasqataq buquepiqa karqa?  Jehová Diospi confiasqanraykum hinaspa kasukusqanraykum. Bibliam nin: “Noeymi lliwta rurarqa Diospa kamachisqanman hina”, nispa (Gen. 6:22; Heb. 11:7). Ñoqanchikpas, ¿rurachkanchikchu Jehová Diospa lliw kamachiwasqanchikta? Noeyqa ‘salvacionmanta willakuqmi’ karqa (2 Ped. 2:5). ¿Ñoqanchikpas Noey hinachu hinalla predicanapaq kallpanchakunchik runakuna mana uyariwaptinchikpas?

Lotpas salvakurqam Sodoma llaqtamanta lloqsisqanrayku. Allin runataqmi Diospaq karqa, hinaspam Sodoma chaynataq Gomorra llaqtapi millakuypaq kaqkunawan llakisqa tarikurqa. Kay tiemponchikpipas millakuypaq kaqkunaqa tukuy hinastinpim kachkan. ¿Lot hinachu ñoqanchikpas cheqninchik millakuypaq kaqkunata, icha amañarunchikñachu? ¿Kallpanchakuchkanchikchu ‘mana huchayoq’ hinaspa ‘hawkalla’ kawsananchikpaq? (2 Ped. 3:14.)

Israelitakunapa piwinkuna chaynataq Rahab warmipas salvakunankupaqqa wasinkupim kananku karqa, chaypaqa iñispankum kasukunanku karqa (Heb. 11:28, 30, 31). ¿Piensariwaqchu Egipto runakunapa churinkuta angelkuna wañuchiptinku ‘hatu-hatun waqaypi’ tarikusqankuwan israel tayta-mamakuna imayna sientekusqankuta? Churillankupiñachá ñawinkuqa karqa (Exo. 12:30). Rahab warmitapas, ¿musyariwaqchu wasin ukupi familiantin imayna tarikusqankuta? Arí, kasukunanpaqqa iñiyninchá allin takyasqa karqa, chaynapi llaqtapa murallan tuñisqanta uyarispan hawaman mana lloqsinanpaq.

Kunanpas as tiempollamantam Satanaspa munaychakusqan runakunaqa puchukachisqa kanqaku. Manamá yachanchikchu “Diospa piñakuynin punchawpi” imayna pakaykusqa kananchiktaqa (Sof. 2:3). Ichaqa maypi hinaspa imayna tarikuptinchikpas, Jehová Diospi iñiyninchik chaynataq kasukuyninchikmi aswan allinqa. Chaykamaqa anchatam chaninchananchik Isaiaspa niwasqanchik ‘cuartokunata’.

‘Cuartoykichikmanyá yaykuychik’

Isaias 26:20 nin: “Rispaykichikyá cuartoykichikman yaykuychik. Punkuykichikta wichqakamuspayá chaypi pakakamuychik. Tayta Diospa piñakuynin pasarunankamayá ratollapas pakakamuychik”, nispa. Kay willakuyqa yaqapaschá puntataqa cumplikurqa 539 watapi, Babilonia llaqtata Persia hinaspa Media nacionkuna puchukachiptin. Persia nacionta kamachiq Ciroqa yaqapaschá Babiloniaman yaykuruspan runakunata nirqa wasinkumanta mana lloqsinankupaq, chaynapi tropankuna mana wañuchinankupaq.

Chaynaqa kunan tiemponchikpi ‘cuartokunaqa’ kanmanmi Jehová Diospa testigonkunapa enteron pachapi pachak waranqa masnin congregacionkuna. Congregacionkunaqa otaq wawqe-paninchikkunaqa Jehová Dios serviyninchikpim yanapawanchik, chaynallataqchá yanapawasunchik ‘hatu-hatun ñakariy’ punchawpipas (Apo. 7:14). Jehová Diospa llaqtantam kamachin ‘cuartonkuman yaykunankupaq’ hinaspa ‘Diospa piñakuynin pasarunankama’ pakakunankupaq. Chaymi wawqe-paninchikkunata anchata chaninchananchik hinaspam ima kaptinpas huñulla kananchik. Apostol Pablopa kayna nisqantayá kasukusunchik: “Ama qonqaruspayá kuyanakunapaq hinaspa allin ruranapaq yanapanakusunchik. Wakinkunapa costumbrasqanman hinaqa amayá huñunakuyman riyta dejasunchu aswanqa Señorpa chaylla kutimunanta yachaspayá kallpanchanakusunchik” (Heb. 10:24, 25).

[7 kaq paginapi dibujokuna]

¿Imatam yachachwan ñawpa tiempopi serviqninkunata Jehová Dios imayna salvasqanmanta?

[8 kaq paginapi dibujo]

Bibliapa nisqan ‘cuartokuna’, ¿imawanmi kunan tiemponchikpi tupanman?