Dios yupaychaytaqa anchatam kuyana

“Sinchitam sientini Diospa wasinmantaqa.” (JUAN 2:17.)

1, 2. ¿Imatam Jesusqa rurarqa templopi 30 kaq watapi, hinaspa imanasqa?

PREDICAYTA Jesus qallarisqanmanta 6 killa pasaruptinmi Jerusalenman rirqa Pascua tiempopi, chayqa karqa 30 watapim. Chayaruspanmi temploman rirqa, chaypim tarirurqa “bueyeskuna, ovejakuna hinaspa palomakuna rantikuq runakunata chaynataq qollqe cambiaqkunatapas”. Chaypim waskamanta latigota ruraruspan animalkunata qarqorurqa, chaymantam rantikuqkuna otaq vendeqkuna kallpaylla lloqsirqaku. Qollqe cambiaqkunapa qollqentam tallirurqa hinaspam mesankutapas wikaparurqa, palomakuna rantikuqkunatapas kamachirqam llapa imankunata horqospa lloqsinankupaq (Juan 2:13-16).

² ¿Imanasqataq Jesusqa chaynata rurarqa? Templota ancha respetasqanraykum. Rantikuqkunatam nirqa: “¡Taytaypa wasintaqa amayá qatu wasitaqa ruraychikchu!”, nispa. Chayta qawaspankum discipulonkuna yuyarirurqaku Salmos libropi achka wata puntataraq Davidpa kayna qellqasqanta: ‘Sinchitam sientini [otaq kuyani] Diospa wasintaqa’ (Juan 2:16, 17; Sal. 69:9).

3. a) ¿Imataq sientiyqa otaq anchata kuyayqa? b) ¿Imatam sapakama tapukunanchik?

³ Arí, chaynatam Jesus rurarqa Diospa wasinmanta sinchita sientisqanrayku. Sientiyqa otaq anchata kuyayqa “runamanta otaq imamantapas anchata interesakuymi”. Kunanqa chayna interesakuq cristianokunaqa 7 millon masninñam kachkanchik, ichaqa sapakamam tapukunanchik: “¿Imaynatam Dios yupaychasqayta astawan kuyayman?”, nispa. Chay tapukuyta kutichinapaqqa yachasun Diospa wasin kay tiempopi imaman tupasqanta hinaspa qawasun Diospa wasinmanta sientiq ñawpa tiempopi runakunapa ejemplonkumanta. Paykunamantaqa qellqakurqa yachananchikpaqmi, chaynapi Diosta kuyakuywan astawan servinapaq (Rom. 15:4).

Ñawpaqpi hinaspa kay tiempopi Diospa wasin

4. ¿Imapaqmi karqa Salomonpa rurachisqan templo?

⁴ Israelpiqa Diospa wasinqa karqa Jerusalenpi templom. Kaywanqa manam nichkanchikchu Jehová Dios chaypi kasqantaqa. Kikinmi nirqa: “Hanaq pachaqa gobiernaspa tiyanaymi. Kay pachaqa ñoqapa sarunaymi. ¿Maypitaq wasita rurapuwankichikman? ¿Maypitaq samarinay sitiota rurapuwankichikman?”, nispa (Isa. 66:1). ¿Imanasqataq ninchik Salomonpa rurasqan templota Diospa wasin kasqanta? Jehová Diosta yupaychanapaq hinaspa mañakunapaq sitio kasqanraykum (1 Rey. 8:27-30).

5. ¿Imamanmi tupan Salomonpa rurasqan templo?

⁵ Kunan tiempopiqa Jehová Diospa wasinqa manam runapa rurasqan wasi hinachu kachkan Jerusalenpi otaq huk llaqtapipas. Aswanqa Cristopa vidan qosqanrayku Diosta yupaychananchikpaq tukuy ima rurasqanmi. Kay temploman rikchakuqpim huñusqa kachkanku yupaychanankupaq enteron pachamanta Dios serviqkuna (Isa. 60:4, 8, 13; Hech. 17:24; Heb. 8:5; 9:24).

6. Juda llaqtapi reykunamanta, ¿pikunataq sinchita sientispanku cheqap yupaychayta defienderqaku?

⁶ Cristianokunapa tiemponmanta ñawpaqtaraq 997 watapim Israelqa iskaypi rakikurqa. Juda llaqtapi 19 reykunamantam Diosmanta sinchita sientispanku cheqap yupaychayta tawalla  defienderqaku. Paykunam karqa: Asa, Josafat, Ezequias hinaspa Josias. ¿Imakunatam paykunamanta yachachwan?

Diosta tukuy sonqowan serviymanta bendicionkuna

7, 8. a) ¿Imatam rurananchik Dios bendeciwananchikpaq? b) ¿Asapa imayna kasqantam mana qatipakunachu?

⁷ Rey Asa gobiernachkaptinmi Diosqa Paymanta willakuqkunata kamachirqa llaqtanta yanapananpaq. Ejemplopaq, Bibliam willawanchik Obedpa churin Azariasmanta, paypa nisqanmi Asata yanaparqa allinkunata rurananpaq (leey 2 Cronicas 15:1-8). Kay reypa allinkuna rurasqankunam llaqtapi runakunata huk sonqollata tarichirqa. Jerusalenpim hatun asambleata rurachirqa, chaymanmi rirqaku Juda castakuna hinaspa Israelmanta huk castakunapas. Chaypim llapallanku prometekurqaku Diosta tukuy sonqonkuwan servinankupaq. Bibliam nin: “Diosmanmi hatu-hatun qapariywan juramentarqaku, chaynataqa rurarqaku cornetillakunatawan cornetakunata tocachkaptinkum. Juda nacionpi llapallan kaqkunañataqmi kusikurqaku jurasqankuwan, paykunaqa tukuy sonqonkumantam jurarqaku. Tukuy voluntadwan maskaspankum Tayta Diosta tarirqaku chaynapim pay qorqa hawkayayta tukuy hinastinpi” (2 Cro. 15:9-15). Ñoqanchiktapas Diosqa bendeciwasunmi tukuy sonqonchikwan serviptinchikqa (Mar. 12:30).

⁸ Tiempopa risqanman hinam, Diosmanta willakuq Hananipa corregisqanmanta rey Asaqa piñakururqa (2 Cro. 16:7-10). Kunanmi Diosqa consejawanchik ancianokunawan. ¿Imaynam tarikunchik Bibliawan consejawaptinchik? ¿Kasukunchikchu icha piñakunchikchu?

9. ¿Ima sasachakuypim Josafat hinaspa Juda nacionpas tarikurqa, hinaptin imatam rurarqaku?

⁹ Cristianokunapa tiemponmanta 1000 wata ñawpaqtaraqmi, Josafat kamachichkaptin, Moabpawan Amonpa mirayninkuna hinaspa Seir orqomanta kaqkunapas Judapa contranpi peleanankupaq huñunakurqaku. ¿Imatam Josafat rurarqa? Judamanta runakunatam señorankutawan wawantinta huñunachirqa Diosta templopi mañakunankupaq (leey 2 Cronicas 20:3-6). Diospa templonta Salomon rurayta tukurachispan mañakusqanman hinam rey Josafatqa kaynata mañakurqa: “¡Diosnillayku! ¿Manachum paykunataqa castiganki? Manam ñoqaykupaqa kanchu kallpayku kay achka-achkallaña atacaqniyku runakunamanta defiendekunaykupaq, manataqmi ima ruraytapas atinikuchu chaymi qamllaman hapipakamuniku”, nispa (2 Cro. 20:12, 13). Mañakuyta rey tukuruptinmi ‘huñunasqa kachkaptinku’ Leviy castamanta Jahazielman Diospa espiritun huntaykurqa runakunata consuelananpaq hinaspa kallpanchananpaq (leey 2 Cronicas 20:14-17).

10. a) ¿Piwanmi Diosqa Josafatta hinaspa Juda naciontapas yanaparqa? b) ¿Imaynatam qawachinchik Jehová Diospa yanapawasqanchik kuyasqanchikta?

¹⁰ Qawasqanchikman hinaqa Diosmi Josafatta hinaspa Juda naciontapas Jahazielwan yanaparqa. Kunanqa ‘allin yuyayniyoq confianza sirvientewanmi’ Diosqa consuelawanchik hinaspa yanapawanchik. Chaymi, congregacionpi ancianokunata kasukunanchik hinaspa respetananchik, ñoqanchikmantam nanachikunku hinaspa confianza sirvientepa kamachisqankunata ruranku (Mat. 24:45; 1 Tes. 5:12, 13).

11, 12. ¿Imatam yachanchik Josafatpa hinaspa kamachisqan runakunapa rurasqankumanta?

¹¹ Imaynam Josafat hinaspa Juda nacionpi kaqkuna Diospa yanapakuyninta maskanankupaq huñunakurqaku, chaynam ñoqanchikpas iñiqmasinchikkunawan sapa kuti huñunakunanchik. Llumpay sasachakuypi tarikuspayki mana ima ruraytapas atispaykiqa, Josafat hinaspa Juda nacionpi runakuna hina Jehová Diosta yanapasunaykipaq mañakuy hinaspa tukuy sonqoykiwan paypi hapipakuy (Pro. 3:5, 6; Fili. 4:6, 7). Chaynapim sapayki tarikuspaykipas ‘kay pachapi iñiqmasikikunawan’ kuska tarikunki (1 Ped. 5:9).

¹² Josafat hinaspa kamachisqan runakunapas  kasukurqakum Jahazielnintakama Jehová Diospa nisqankunata. Chaymi vencerqaku hinaspam “kusisqallaña” kutispanku “arpakunata hinaspa cornetillakunata tocastin Tayta Diospa templonman yaykurqaku” (2 Cro. 20:27, 28). Kunanqa ñoqanchikpas Diostam alabananchik hinaspa llaqtantakama kamachiwasqanchikkunata kasukunanchik.

Cuidasun huñunakunanchik wasita

13. ¿Imakunatam Ezequias rurarqa gobiernayta qallarisqan tiempopi?

¹³ Kunanñataq qawasun rey Ezequiasmanta. Payqa Jehová Dios yupaychay kuyasqantam qawachirqa gobiernasqan punta kaq killapi templota mosoqmanta kichaspan chaynataq allichaspanpas. Sacerdotekunatawan Leviypa castankunatam Diospa templonta chuyanchanankupaq nirqa, chaymi 16 punchawllapi tukururqaku (leey 2 Cronicas 29:16-18). Kaymi yuyarichiwanchik huñunakusqanchik Salonta chuyanchaypi chaynataq allichaypipas ganasllawanña rurasqanchikta. ¿Haykapipas uyarirqankichu iñiqmasinchikpa kusisqallaña rurasqankuwan pipas admirakusqanmanta? Hinaptinqa, Jehová Dios yupaychaypi tukuy sonqomanta rurasqanchikmi Paytaqa hatunchan.

14, 15. ¿Ima ruraymi Jehová Diosta hatunchan? Ejemplokunawan willamuy.

¹⁴ Inglaterra nacionpa norte law llaqtapim iñiqmasinchikkuna Huñunakunanku Salonta allichanankupaq tantearqaku. Ichaqa Salonpa waqtanpi wasiyoqmi mana munarqachu. ¿Imatam rurarqaku? Salonpa perqanwan tupaq chay runapa perqan mana allin kaptinmi, iñiqmasinchikkunaqa kuyakuyllawan nirqaku mana qollqellapaq allichanankupaq. Achkatam llamkarqaku yaqa enteron perqata kaqmanta hatarichispanku. Allinta tanteaspa imatapas rurasqankuraykum chay runaqa imayna piensasqanta cambiarurqa, chaymi Salontapas cuidaysinña.

¹⁵ Diospa llaqtanqa enteron pachapim huñunakunanchikpaq wasikunata ruranku. Achka nacionkunaman rispanku tukuy tiemponkuwan llamkaq iñiqmasinchikkunam, congregacionpi cristianokuna yanapaptin hatarichinku Salonkunata, Asamblea rurakunanpaq Wasikunata hinaspa Betel wasikunatapas. Sam sutiyoq cristianom ingeniero kaspa yachan wasiman wayra yaykunanpaq,  qoni otaq chiri kananpaq imakuna ruraytapas. Payqa señoran Ruthwanmi Europa hinaspa África law nacionkunaman viajarqaku chayna wasikuna hatarichiypi yanapanankupaq. Chay lawkunapim iñiqmasinkunawan predicanku. Sammi willawanchik nacionkunaman rispan Salonkuna rurananpaq imanasqa ofrecekusqanmanta, ninmi: “Reqsinim Betel wasikunapi llamkaq cristianokunata. Kusisqallaña llamkasqankum paykuna hina ruranaypaq kallpanchawarqa”, nispa.

Kasukusun Diospa niwasqanchikta

16, 17. ¿Ima ruraypim cristianokuna kallpanchakurqanchik, hinaspa imaynatam rurasqanchikta Dios bendecirqa?

¹⁶ Ezequiasqa templota allichaspanpas Diosta kasukuspanmi Pascuata kaqmanta rurachirqa (leey 2 Cronicas 30:1, 4, 5). Pay hinaspa Jerusalenpi kaqkunam enteron nacionpi kaqkunata hamunankupaq invitarqaku. Carta apaqkunam lloqsirqaku enteron nacionman willamunankupaq (2 Cro. 30:6-9).

¹⁷ Achka watañam ñoqanchikpas yaqa chaynata rurachkanchik. Runakunamanmi sumaq invitacionkunata aypurqanchik Jesusta kasukuspa wañukusqanta Yuyarinapaq (Luc. 22:19, 20). Diosta Servinapaq Huñunakuypim niwarqanchik imayna ruranamanta, chaytaqa tukuy sonqonchikwanmi rurarqanchik. ¿Bendecirqachu Diosqa rurasqanchikta? Arí. Qayna wata 7 millon predicaqkuna chayna invitacionta apasqanchikraykum, huñunakuyman hamurqaku 17.790.631 runakuna.

18. ¿Imanasqataq niwaq Dios yupaychayta kuyayqa ancha allin kasqanta?

¹⁸ Bibliam nin: “Israelpa yupaychasqan Tayta Diospim Ezequias confiakurqa, Juda nacionpi reykunamantaqa manam pipas Ezequias hinaqa karqachu paypa ñawpaqnintapas nitaq qepantapas. Tayta Diosman confiakuykuspanmi paymanta mana rakikurqachu, payqa Moisesman Tayta Diospa qosqan kamachikuykunatam kasukurqa”, nispa (2 Rey. 18:5, 6). Kallpanchakusunyá ejemplonta qatipakunapaq. Dios yupaychayta kuyaymi yanapawasun ‘paymanta mana rakikunapaq’ hinaspa wiñay kawsaypi piensayta mana qonqarunapaqpas (Deu. 30:16).

Chaylla kasukusun

19. ¿Imaynatam cristianokunaqa chaninchanku Jesuspa wañukusqanta Yuyarinapaq huñunakuyta?

¹⁹ Rey Josiaspas Pascuata rurananpaqmi tukuyta alistarqa (2 Rey. 23:21-23; 2 Cro. 35:1-19). Ñoqanchikpas kallpanchakunchikmi asambleakunaman hinaspa Jesuspa wañukusqanta Yuyarinapaq huñunakuyman rinapaq. Huk nacionkunapiqa wañuytapas mana manchakuspankum Jesuspa wañukusqanta Yuyarinankupaq huñunakunku. Ancianokunapas tukuyta ruraspankum kallpanchakunku chay huñunakuyman yuyaq hinaspa onqoq iñiqmasinkunapas rinankupaq.

20. a) ¿Imam pasarqa Josias gobiernachkaptin, hinaptin imatam rurarqa? b) ¿Imatam yachachiwanchik chay willakuyqa?

²⁰ Rey Josiasmi kamachirqa Jehová Diospa templonta allichanankupaq. Allichachkaptinkum “sacerdote Hilcias tarirurqa Moisesnintakama Tayta Diospa qosqan yachachikuy librota” hinaspam secretario Safanman qoykurqa. Payñataq reyman apaspan leeyta qallaykurqa (leey 2 Cronicas 34:14-18). ¿Imatam reyqa rurarqa? Hukmanyaruspanmi pachanta llikiparurqa hinaspam runankunata chaylla kamachirqa Diosta tapunankupaq. Juda nacionpi millakuypaq rurasqankutam Diosqa mana allinta qawarqa chaymi ñakarinanku karqa, chaytam qawachirqa paymanta willakuq Hulda  sutiyoq warmiwan. Ichaqa, mana manchakuspan taytacha-mamachakunata chinkachisqanraykum Josiasta Diosqa favorecerqa (2 Cro. 34:19-28). ¿Imatam kaymanta yachachwan? Josias hinam Diospa kamachisqankunata chaylla kasukunanchik, hinaspapas piensananchikmi mana kasukuptinchik otaq israelitakuna hina Diosta qepancharuptinchik ima pasananpi. Josiaspa rurasqanmi kayta qawachin: Jehová Diosqa qawachkanmi tukuy sonqonchikwan servisqanchikta.

21, 22. a) ¿Imanasqataq Diosta tukuy sonqonchikwan servinapaq kallpanchakunanchik? b) ¿Imamantam yachasun qatiqnin estudiopi?

²¹ Asapa, Josafatpa, Ezequiaspa hinaspa Josiaspa rurasqankum allin ejemplo cheqap yupaychayta hinaspa Dios yupaychana wasita anchata kuyananchikpaq. Ñoqanchikpas tukuy sonqonchikwanmi Diospi confiananchik hinaspa yupaychanapaq kallpanchakunanchik. Diospa niwasqanchikta hinaspa congregacionwan chaynataq ancianokunawan corregiwasqanchikta chaylla kasukuymi kusisqa kanapaq ancha allin rurayqa.

²² Qatiqnin estudiopim yachasunchik allin noticiata tukuy sonqowan willanamanta, mozo-sipaskunatapas kallpanchanqam kuyawaqninchik Taytanchikta aswan kusisqaraq servinankupaq. Yachasuntaqmi Satanaspa mayqan toqllanpim achka urmasqankumanta hinaspa imayna cuidakunamantapas. Tukuy sonqonchikmanta Diospa kamachikuyninkunata kasukuspanchikqa Churinmanmi astawan rikchakusun, paymantam Biblia nin: “Sinchitam sientini qampa wasikimantaqa”, nispa (Sal. 69:9; 119:111, 129; 1 Ped. 2:21).

¿Yuyachkankichu?

• ¿Imaynatam Diosta servinanchik bendeciwananchikpaq, hinaspa imanasqa?

• ¿Imaynatam qawachinchik Diospi confiasqanchikta?

• ¿Imapim tupan Diosta tukuy sonqowan serviyqa kamachikuyninkunata kasukuywan?

[Kay yachachikuypa tapukuyninkuna]

[9 kaq paginapi dibujokuna]

¿Imaynatam Asa, Josafat, Ezequias hinaspa Josias qawachirqaku Dios yupaychayta ancha kuyasqankuta?