Leeqkunapa tapukuyninkuna

Lliw Israelpi Jesucristo predicachkaptinqa, ¿imanasqataq Pedroqa nirqa judiokunapiwan autoridadkuna ‘mana yachaspanku’ wañuchisqankuta? (Hech. 3:17.)

Jesusta wañuchisqankumanta wakin judiokuna culpayoq kasqankuta qawachispanmi, Pedroqa nirqa: ‘Ñoqaqa sumaqtam yachani, qamkunaqa Jesus pim kasqanta mana yachastinmi wañuchirqankichik autoridadkunapiwan kuska’, nispa (Hech. 3:14-17). Ichapas chaynata nirqa Jesuspa yachachisqankunatawan Diospa Akllasqan kasqanmanta wakinku mana entiendesqankurayku. Wakinkuqa manapaschá yacharqakuchu Diosta agradanankupaq mana kallpanchakuspanku otaq mana ancha reqsisqa familiamanta Jesus hamusqanrayku hinaspa envidiakuspa otaq cheqnisqankuraykupas.

Qawasun Dios serviypi mana kallpanchakuspanku judiokuna imayna kasqankumanta. Jesusqa rikchanachiywanmi yachachiq hinaspam yachay munaqkunaman ima ninanmanta entiendechiq. Wakinkuqa Jesusta uyarichkaspapas manam yachayta munarqakuchu chaymi pasakuqku. Huk kutipim huk rikchanachiyta servichikuptin qatiqninkunapas piñakururqaku (Juan 6:52-66). Manam piensarqakuchu rikchanachiywan imayna piensasqankutawan rurasqankuta cambianankupaq Jesus pruebayta munasqanmanta (Isa. 6:9, 10; 44:18; Mat. 13:10-15). Manataqmi cuentata qokurqakuchu rikchanachiywan yachachinanmanta Biblia ñawpaqmantaraq willakusqantapas (Sal. 78:2).

Wakinkuqa manam Jesuspi iñirqakuchu humilde familiamanta kasqanrayku. Ejemplopaq, llaqtan Nazaretpi huñunakunanku wasiman yachachiq riptinmi runakunaqa admirakurqaku. Diospa Akllasqan kasqanta piensanankumantaqa imayna familiamanta kasqantam aswanqa qawarqaku. Tapunakurqakum: “¿Kay runaqa maypitaq yacharqa kaykunataqa? [. . .] ¿Manachum payqa Mariapa wawan carpintero? Kay llaqtanchikpim yachan paypa wawqen Jacobopas, Joseypas, Judaspas, Simonpas chaynataq paninkunapas”, nispa (Mar. 6:1-3). Arí, yachachisqankunatam despreciarqaku humilde familiamanta kasqanrayku.

¿Imatam nichwan religionpi punta apaqkunamanta? Yaqa llapallankum mana uyarirqakuchu chaynata piensaspanku (Juan 7:47-52). Chaynataq, runakuna payman sapa kuti asuykuptinkum envidiakuqku (Mar. 15:10). Amataq qonqasunchu iskay uya kasqankutawan llulla kasqankuta Jesus qawachiptin piñakurusqankutapas (Mat. 23:13-36). Kikinkum mana yachayta munarqakuchu, chaymi Jesus nirqa: ‘¡lmaynaraq kankichik Diospa leynin yachachiqkuna! Qamkunaqa reqsinkichikmi runakunaman imam yachachinaykichikta, [. . .] ichaqa manam yachayta munankichikchu, yachay munaqkunatapas harkankichikmi’, nispa (Luc. 11:37-52).

Kimsa wata partenmi Jesusqa Israelpi predicarqa, qatiqninkunatapas yachachirqam pay hina ruranankupaq (Luc. 9:1, 2; 10:1, 16, 17). Jesuswan discipulonkunaqa allintam predicarqaku, chaymi fariseokuna nirqaku: ‘Llapallan runakunam payta qatichkanku’, nispa (Juan 12:19). Arí, judiokunaqa Jesusmantaqa yacharqakum. Ichaqa manam cuentata qokurqakuchu Diospa Akllasqan kaspan tukuy ima rurasqanmantaqa. Astawan reqsispa kuyaytaqa atinmankum karqa, ichaqa manam kuyarqakuchu. Wakinkuqa wañuchiptinkupas yanaparqakum. Chaymi Pedro yaqa llapankuta nirqa: “Chaynaqa huchaykichikmanta wanakuspayá Diosman kutirikuychik chaynapi tukuy huchaykichikta chinkachiptin hamuq punchawpi Señor [Jehová] hawkayaypi samarichisunaykichikpaq. Chaynataqa ruranqa Jesucristota kachamuspanmi”, nispa (Hech. 3:19, 20). Waranqantin judiokunam chayna nisqanta kasukurqaku, paykunawan kuskam ‘achkallaña sacerdotekunapas Jesuspi iñirqaku’. Paykunam cuentata qokuspanku wanakurqaku hinaspam Diospa favorecesqan karqaku (Hech. 2:41; 4:4; 5:14; 6:7).