Cristopi ‘pakasqa kaq qori-qollqetayá’ maskasun

“Payllapim pakasqa kachkan qori-qollqe hina tukuy yachayniyoq kaypas chaynataq entiendeypas.” (COL. 2: 3.)

1, 2. a) ¿Imakunam 1922 watapi tarisqa karqa, hinaspa maykunapim kunanqa kachkan? b) ¿Imata maskanapaqmi Biblia kallpanchawanchik?

ANCHA valorniyoq pakata tariruspankuqa willakachakunkum. Chaynam pasarqa 1922 watapi, faraon Tutankhamonpa pampakusqan cajonninta chunkantin wata maskasqanpi Gran Bretaña lawmanta Howard Carter yachaysapa runa tariruptin. Cajonninqa manam imanakusqachu, chaypim kasqa yaqa 5 waranqa llapa imakuna.

² Chay tarisqanqa yaqa llapanmi kachkan runakunapa makinpi otaq chaykunata waqaychana wasikunapi. Yachanapaq hinaspa qawanapaq chaykuna allin kaspanpas, kawsakuyninchikpiqa manam ancha yanapawanchikchu. Bibliam ichaqa kallpanchawanchik allinninchikpaq kaq pakata maskanapaq. Chaytaqa lliw runakunam rurachwan hinaspa tarisqanchikmanta premionchikqa qori-qollqemantapas aswan valorniyoqmi (leey Proverbios 2:1-6).

3. ¿Imaynatam yanapawanchik Jehová Diospa niwasqanchik pakakunata maskayqa?

³ Pakata hina maskananchikpaq Bibliapa niwasqanchikmanta hukninqa: ‘Dios respetaymi’, kaymi amparawanchik sasachakuy tiempokunapi (Sal. 19:9). Chaymantapas kachkan “Diospa yachayninta” maskaymi, kaywanmi atinchik Dioswan allin amistad rurayta. Diospa qowasqanchik yachayniyoq hinaspa entiendeq kayqa yanapawanchikmi sasachakuykunata atipanapaq (Pro. 9:10, 11). ¿Imaynatam tarichwan chay ancha valorniyoq pakakunata?

¿Imanasqataq tarinanchik Diospa qowasqanchik pakata?

4. ¿Imataq yanapawanchik Diospa qowasqanchik pakakunata tarinapaq?

⁴ Ñawpaq tiempopi valorniyoq kaqkunata otaq pakata maskaqkunaqa sasatam tarinku, ñoqanchikmi ichaqa yachanchik Diospa qowasqanchik pakata maypi maskayta. Bibliam mapa hina willawanchik maypi chay pakata tarinamanta. Pablom kaynata qellqarqa: “Payllapim [otaq Jesucristopim] pakasqa kachkan qori-qollqe hina tukuy yachayniyoq kaypas chaynataq entiendeypas”, nispa (Col. 2:3). Kayta leespaqa tapukunchikpaschá: “¿Imanasqataq maskananchik chay qori-qollqe hina kaqkunata? ¿Imanasqataq Biblia nin Jesuspi ‘pakasqa’ kasqanta? ¿Imaynatam tarichwan?”. Kaykunamanta yachanapaqqa Pablopa nisqanmanta astawan yachasun.

5. ¿Ima pasakuptintaq Pablo rimarqa Diospa qowasqanchik pakakunamanta?

⁵ Colosas llaqtapi iñiqmasinkunaman chaynata manaraq nichkaspanmi Pabloqa willarqa paykunarayku kallpanchakusqanmanta, chaynapi ‘chullalla hina kuyanakunankupaq’ (leey Colosenses 2:1, 2). ¿Imanasqataq Pabloqa preocupasqa karqa? Yaqachusmi yacharqa Grecia lawpi runakunapa piensasqanta wakin iñiqkuna cheqechisqankuta otaq Moisespa chaskisqan Leyta kasukunankupaq hikutasqankuta, chaymi manchakurqa wakin iñiqkuna hukmanyarunankumanta. Chaymi nirqa: “Cuidakuychikyá, amayá engañachikuychikchu yachayninkumanta  rimaqkunawanqa hinaspa yanqakunalla rimaqkunawanqa, paykunaqa manam Cristomanchu hapipakunku aswanqa runakunapa costumbrenkunallamanmi hinaspa kay pachapi yachachikuykunallamanmi”, nispa (Col. 2:8).

6. ¿Imanasqataq Pablopa nisqanqa allinninchikpaq?

⁶ Satanaspa chaynataq munaychakusqan mana allin ruraqkunapa contranpim kunanpas churakunanchik. Runakunapa kikillanmanta imapas ruray atisqanta hinaspa imapas kikillanmanta rikurimusqanta yachachisqankum, cambiarachin runakunapa imayna piensasqanta, kawsasqanta hinaspa imakuna ruranankutapas. Hatun fiestakunapas religionkunapa pantasqa yachachisqankuwan chaqrusqam kachkan. Kusikunapaq kaqkunapas aychapa munasqallanta maskanapaqmi kallpanchan, Internetpi rikurimuqpas yaqa llapanmi mana allinchu mozo-sipaskunapaq hinaspa yuyayniyoqkunapaqpas. Kaykuna hinaspa huk mana allinninchikpaq kaqkunapas, Diospa yanapakuyninta imayna qawasqanchiktam chaylla cambiarachinman. Chaynataq, qonqarachiwachwan cheqap kawsakuy suyasqanchiktapas (leey 1 Timoteo 6:17-19). Chaynaqa, Satanaspa sacrellawanña churasqan toqllankunaman mana wichinapaqqa, entiendenanchikmi Colosas llaqtapi iñiqkunaman Pablopa nisqanta, kasukunanchiktaqmi consejo qosqantapas.

7. ¿Imakunataq Pablopa nisqanman hinaqa Colosas llaqtapi iñiqkunata yanapanman?

⁷ Kaqmanta rimasun Colosaspi iñiqkunaman Pablopa qellqasqanmanta. Preocupasqa kasqanmanta rimaruspanmi, Pabloqa nirqa huk sonqolla chaynataq kallpanchasqa kanankupaq imakuna yanapananmanta. Puntataqa rimarqa ‘tukuy allin kaqta entiendenankumantam’. Kayna nisqanmi Colosas llaqtapi kaqkunata qawachirqa Diospa Palabran entiendesqankumanta convencisqa kanankuta, chaynapi iñiyninku allin takyasqa kananpaq (Heb. 11:1). Rimarqataqmi Diospa “pakasqa” yachayninmantapas. Cristianokunaqa facil yachanapaq kaqkunata reqsispankupas, yachanankum karqa Diosmanta sasa entiendena kaqkunata (Heb. 5:13, 14). ¡Mayna allin yachachikuymi paykunapaq hinaspa ñoqanchikpaqpas! ¿Imaynatam convencisqa kachwan chaynataq Diospa pakasqa yachayninta tarichwan? Pablopa nisqanpim chaymantaqa yachasun, nirqam: “Payllapim [otaq Cristopim] pakasqa kachkan qori-qollqe hina tukuy yachayniyoq kaypas chaynataq entiendeypas”, nispa.

Cristopi pakasqa kaq qori-qollqe

8. ¿Ima ninantaq qori-qollqe hina yachayqa Cristopim “pakasqa” kachkan nisqanqa?

⁸ Tukuy yachaywan entiendey Cristopi qori-qollqe hina “pakasqa” kaptinpas, tariytaqa atichwanmi. Tarinapaqqa anchatam kallpanchakuna. Chaymantapas, Jesucristopim maskananchik. Chayna kasqanmantam payqa kaynata nirqa: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa (Juan 14:6). Chaynaqa, Diospa yachayninta tarinapaqqa Jesucristopa yanapaynintam servichikuna.

9. ¿Ima rurayniyoqkunam Jesusqa?

⁹ Diosman runakunata asuykachisqanraykum Jesusqa nirqa “ñan” kasqanta, nirqataqmi “cheqap” chaynataq ‘kawsay qokuq’ kasqantapas. Kaykunamanta huk rurayninkunapas kanmi, chaykunam yanapawanchik Bibliata entiendenapaq hinaspa wiñay kawsayta haypanapaqpas. Arí, paypim pakasqa kachkan qori-qollqe hina Diosmanta yachaykuna, chaykunatam yachanmanku Bibliata estudianankupaq kallpanchakuqkuna. Qawasunchikyá wakinta, chaykunam yanapawasun Dioswan amistadninchikpi hinaspa suyakuyninchikpipas.

10. ¿Imatam Jesusmanta yachachwan Colosenses 1:19 hinaspa 2:9 nisqanta leespa?

 ¹⁰ “Diospi tukuy ima tarikuqmi” Cristopi kachkan (Col. 1:19; 2:9). Taytanwan millonnintin watakuna kaspanmi, Jesusqa pimantapas astawan reqsirqa Taytanpa imayna kasqanta hinaspa munaynintapas. Kay Pachapi kachkaspanpas runakunamanmi yachasqankunamanta willarqa. Chaynataq, imayna kawsasqanwanmi qawachirqa Taytanpa yachachisqanta. Chaymi nirqa: “Ñoqata rikuqniyqa Taytatapas rikuykunñam”, nispa (Juan 14:9). Diospa tukuy yachaynin hinaspa entiendeq kasqanmi Cristopi pakasqa kachkan. Chaymi Diosta reqsinapaqqa Jesusta reqsinanchik.

11. ¿Imatam Jesusmanta yachana Bibliapi willakuykunata entiendenapaq?

¹¹ “Jesusmanta cheqap willakuqqa Diospa revelasqantam yachachin.” (Apo. 19:10.) Kayna nisqanmi qawachin Bibliapi willakuykuna Jesusmanta achkanpi rimasqanta. Genesis 3:15 willakuymanta Apocalipsis libropi willakuykama entiendenapaqqa, yachananchikmi Jesuspa hanaq pacha sapaqchasqa Gobiernopi Rey kaspan ima rurananta. Chaymi Diospa Akllasqan kasqanta mana creeqkunaqa, mana entiendenkuchu hebreo rimaypi qellqasqa Diospa Palabranpi willakuykunata. Chay rimaypi qellqasqa Diospa Palabranpi mana creesqankuraykum Jesustaqa qawanku allin reqsisqa runata hinalla, manam Diospa Akllasqanta hinachu. Cristianokunaqa hamuq tiempomanta Bibliapa willakusqantam entiendenku, Jesus pim kasqanta yachaspanku (2 Cor. 1:20).

12, 13. a) ¿Imanasqataq Jesusqa “runakunapa achkiynin”? b) Cristianokunaqa, ¿ima ruranapaqmi obligasqa kanchik pantasqa religionmanta librasqa kasqanchikrayku?

¹² “Ñoqam kani runakunapa achkiynin.” (Leey Juan 8:12 hinaspa 9:5.) Jesus manaraq nacechkaptinmi Isaias kaynata nirqa: “Tutayaypi kawsaqkunam hatun achkiyta rikururqa. Llumpay tutayaypi yachaqkunamanmi achkiy rikuriykurqa”, nispa (Isa. 9:2).  Mateopa nisqanman hinaqa, Jesusmi Isaiaspa nisqanta cumplirqa predicayta qallaykuspan hinaspa kaynata nispan: “Wanakuychik huchaykichikmanta, Diospa munaychakunanmi hichparamunña” (Mat. 4:16, 17). Arí, predicaspanmi Jesusqa runakunata horqorqa tutayaymanta hinaspa librarqa pantasqa yachachikuykunamanta. Paymi nirqa: “Ñoqaqa achkiy hinam hamurqani kay pachamanqa, pipas ñoqapi iñiqqa manañam tutayaypiñachu kanqa”, nispa (Juan 1:3-5; 12:46).

¹³ Achka wata pasaytam iñiqmasinkunata Pablo nirqa: “Ñawpaqtaqa tutayaypi hinam purirqankichik, kunanmi ichaqa Señorwan hukllaña kasqaykichikrayku achkiypiña kawsachkankichik, chaynaqa allintayá kawsaychik”, nispa (Efe. 5:8). Cristianokunaqa tutayaymantam otaq pantasqa religionmantam librasqa karqanchik, chaymi obligasqa kanchik achkiypiña kawsananchikpaq. Pablopa nisqanmi tupan qatiqninkunaman Orqopi Yachachispan Jesuspa kayna nisqanwan: “Qamkunapas achkichkaq mechero hina kaychik runakunapa qayllanpi chaynapi allin rurasqaykichikta qawaspanku hanaq pachapi kaq Taytaykichikta paykunapas alabanankupaq” (Mat. 5:16). ¿Chaninchanchikchu Diosmanta yachasqanchikta chaynapi predicasqanchiktawan imayna kawsasqanchikta runakuna qawaspanku yachayta munanankupaq?

14, 15. a) ¿Imapaqmi Diosta serviqkunaqa ovejakunata hinaspa huk animalkunatapas ñawpaq tiempopi servichikurqaku? b) ¿Imanasqataq “Diosmanta Hamuq Carneroqa” mana imawan tupachiy atina regalo?

¹⁴ Jesusmi “Diosmanta Hamuq Carneroqa” (Juan 1:29, 36). Ñawpaq tiempopim, Diosman asuykunankupaq hinaspa huchankumanta pampachasqa kanankupaq carnerokunata ofreceqku. Ejemplopaq, churinta Abraham wañuchiyta munasqanta qawaspanmi Jehová Diosqa nirqa churinta mana imanananpaq, hinaspam carnerota qorqa Isaacpa rantinpi wañuchinanpaq (Gen. 22:12, 13). Egiptomanta israelitakuna manaraq librasqa kaspankum carnerota servichikurqaku ‘Diospaq pascuata’ ruranankupaq (Exo. 12:1-13). Chaymantañam Moiseswan Ley qosqanpi kamachirqa: ovejakunata, cabrakunata hinaspa huk animalkunatapas qonankupaq (Exo. 29:38-42; Lev. 5:6, 7).

¹⁵ Runakunapa mayqan ofrenda qosqankuqa manam pitapas wiñaypaqqa librarqachu huchamantawan wañuymantaqa (Heb. 10:1-4). Ichaqa, ‘Diosmanta Hamuq Carnerom, wañuspan runakunapa huchanta pampachan’. Chayna rurasqanmi qawachin ima paka tarisqankumantapas Jesus aswan valorniyoq paka kasqanta. Chaymi allinta estudiananchik rantinchikpi Jesuspa wañusqanmanta hinaspa iñinanchik chay sumaq regalo chaskisqanchikpi. Chayta ruraspanchikmi hatun bendicionta chaskisun: ‘aslla kaqkunam’ cielopi hatunchasqa hinaspa honrasqa kanqaku, ‘sapaq ovejakunañataq’ mosoq pachapi wiñaypaq kawsanqaku (Luc. 12:32; Juan 6:40, 47; 10:16).

16, 17. ¿Imanasqataq entiendenanchik Jesuspa ‘Iñichiwaqninchik hinaspa Qespichiwaqninchik’ kasqanmanta?

¹⁶ Jesusqa ‘Iñichiwaqninchik hinaspa Qespichiwaqninchikmi’ (leey Hebreos 12:1, 2). Hebreos libropa 11 capitulonpim, Pabloqa iñiymanta admirakuypaqta rimarqa. Paymi  qawachin iñiyqa ima ninan kasqanmanta hinaspam qellqarqa Noey, Abraham, Sara hinaspa Rahab hina iñiyniyoqkunamanta. Paykunamanta rimaruspanmi Pabloqa iñiqmasinkunata kallpancharqa ‘Iñichiwaqninchik hinaspa Qespichiwaqninchik Jesusta’ qatipakunankupaq. ¿Imanasqataq chaynata nirqa?

¹⁷ Chay capitulopi rikurimuq runakunaqa Diospa promesankunapiqa confiarqakum, ichaqa manam yacharqakuchu Jesustakama hinaspa Diospa Gobiernontakama chay promesakuna imayna cumplikunantaqa. Chaynapim iñiyninkuqa mana cabalchu karqa. Espiritunwan Dios yanapaptin Jesusmanta qellqaqkunapas manam lliwtaqa entienderqakuchu (1 Ped. 1:10-12). Ñoqanchikmi ichaqa Jesusmanta yaqa llapan willakuykuna cumplikusqanta yachanchik, chaymi iñiyninchikta cabalyachin. Arí, Jesusqa ‘Iñichiwaqninchik hinaspa Qespichiwaqninchikmi’. Hinaptinqa, ¡allintam yachananchik hinaspa chaninchananchik paypa rurasqanta!

Hinallayá maskasun

18, 19. a) ¿Ima yachachikuykunaraqtaq Jesucristopi qori-qollqe hina pakasqa kachkan? b) ¿Imanasqataq Jesuspi pakasqa yachachikuykunata hinalla maskananchik?

¹⁸ Wakillantam qawarunchik Diospa munaynin rurakunanpaq Jesuspa imakuna ruraq kasqanmanta. Jesuspiqa kachkanraqmi Diospa qori-qollqe hina yachayninkuna, tarispanchikqa achka bendicionkunatam chaskisun. Ejemplopaq, Pedrom Jesusta suticharqa ‘Kawsay Qokuq’ hinaspa “achikyaq lucero” nispa (Hech. 3:15; 5:31; 2 Ped. 1:19). Chaymantapas, Jesustam Bibliaqa nin “Amen” nispa (Apo. 3:14, NM). ¿Yachankichu imanasqa chayna sutichakusqanmanta? Hinallayá maskay, hinaspaqa Jesuspa nisqanman hinam tarinki (Mat. 7:7).

¹⁹ Manam haykapipas Jesus hinaqa pipas karqachu, paypa makinpim suyakuyninchik kachkan. Diospa yachaynin Jesuspi qori-qollqe hina ‘pakasqa kachkaptinpas’, maskaqkunaqa tarichwanmi. Munanikum tarinaykita.

¿Yuyachkankichu?

• ¿Ima pakata maskanapaqmi kallpanchasqa kachkanchik?

• ¿Imanasqataq Colosaspi kaqkunaman Pablopa nisqanqa ancha allin ñoqanchikpaqpas?

• ¿Ima yachaykunataq qori-qollqe hina “pakasqa” kachkan Jesucristopi, hinaspa ima ninantaq?

[Kay yachachikuypa tapukuyninkuna]

[5 kaq paginapi dibujokuna]

Bibliaqa mapa hinam willawanchik Jesuspi “pakasqa” qori-qollqeta tarinanchikpaq