Diosta serviq ayllukunaqa Jesustam qatipakunku

‘Cristoqa ñoqanchikraykum ñakarirqa chaynapi paypa ejemplonta qatinanchikpaq.’ (1 PED. 2:21.)

1. a) Dios tukuy imata unanchaptin, ¿imatam Churinqa rurarqa? b) ¿Imaynataq Jesusqa tarikurqa runakunarayku?

KAY Pachatawan hanaq pachata Dios unanchaptinmi ‘ruraysiq maestron’, piwi Churinqa paywan kuska llamkarqa. Paymi Taytanta yanaparqa tukuy rikchaq animalkunatawan plantakunata unanchaypi hinaspa imayna rurasqa kanankupaq tanteaypipas, chaynataq Jehová Diosman rikchakuq unanchasqan runakunapaq paraiso ruraypipas. Diospa Churin Jesusqa ‘runakunaraykum [. . .] anchata kusikurqa’ (Pro. 8:27-31; Gen. 1:26, 27).

2. a) ¿Imatam Jehová Dios qowarqanchik pantaq runakunaman? b) Willamuy Bibliapa consejonkuna imapi yanapawasqanchikmanta.

² Adanwan Eva huchallikusqankumantam,  runakunata librayqa imamantapas aswan allin karqa Jehová Diospa munaynin cumplikunanpaq. Chaymi Jehová Diosqa Churinta qomurqa ñoqanchikrayku wañunanpaq (Rom. 5:8). Chaymantapas, Palabrantam qowarqanchik pantaq kaspapas kusisqa kawsananchikpaq (Sal. 119:105). Ejemplopaq, Bibliapa consejonkunam yanapawanchik ayllunchikpi hawka hinaspa kusisqa kananchikpaq. Chaymi Genesis libropi nin: ‘Qariqa tayta-mamanta saqespanmi hukllawakunqa warminmanña chaymi iskayninku huk runa hinallaña kanqaku’, nispa (Gen. 2:24).

3. a) ¿Imatam Jesusqa yachachirqa casarakuymanta? b) ¿Imatam yachasun kay estudiopi?

³ Runakunata yachachispanmi Jesusqa qawachirqa casarakuyqa wiñaypaq kasqanta. Yachachirqataqmi, casado vidapiwan ayllupi kusisqa kanapaq imakuna ruranamanta hinaspa imayna mana kanamantapas (Mat. 5:27-37; 7:12). Kay estudiopim yachasun imaynatam casadokunata, tayta-mamakunata hinaspa wawa-churikunata kusisqa kanankupaq Jesuspa ejemplon yanapananmanta.

Cristianoqa señorantam respetan

4. ¿Imapitaq chaynalla kanku Jesucristowan cristiano qosakunaqa?

⁴ Diosmi qosata churarqa ayllupi uma kananpaq, Jesustañataq congregacionpi Uma kananpaq. Pablom kaynata nirqa: ‘Qosaqa warmipa umanmi, chaynam Cristopas llapallan iñiqkunapa uman [. . .]. Cristom iñiqkunata kuyaspan paykunapaq entregakurqa, chaynayá qosakunapas warmikichikta kuyaychik’, nispa (Efe. 5:23, 25). Jesusqa qatiqninkunawan imayna kaspanmi, qosakunapaq ejemplota churarqa señorankuwan imayna kanankupaq. Qawasunchikyá, Uma kasqanwan imayna cumplisqanta.

5. ¿Imaynam Jesusqa qatiqninkunawan karqa?

⁵ Jesusqa karqa “llampu sonqo humillakuqmi” (Mat. 11:29). Mana manchakuspanmi ima ruranantaqa haykapipas allinta cumplirqa (Mar. 6:34; Juan 2:14-17). Qatiqninkunata consejanan kaptinqa kuyakuywanmi rurarqa (Mat. 20:21-28; Mar. 9:33-37; Luc. 22:24-27). Ichaqa, manam haykapipas qaqcharqachu humillachiyta munaspanqa. Paykunataqa kuyarqam, manam nirqachu kamachisqaykunata mana ruray atiqmi kankichik nispaqa. Aswanqa alabaqmi allinkuna rurasqankumanta, kallpancharqataqmi hinalla ruranankupaqpas (Luc. 10:17-21). Kuyakuq hinaspa llakipayakuq kaptinmi qatiqninkuna respetarqa.

6. a) ¿Imatam qosakunaqa Jesusmanta yachanmanku? b) ¿Imatam Pedro nirqa qosakunata?

⁶ Jesuspa ejemplonmi qosakunata yanapan señorankuta mana ñakarichinankupaq, aswanqa respetanankupaq, kuyanankupaq hinaspa mana kikillanpi piensanankupaqpas. Pedrom qosakunata nirqa Jesuspa kuyakuq kasqanta qatipakuspa señorankuta respetanankupaq  (leey 1 Pedro 3:7). ¿Imaynatam qosaqa señoranta kamachispan respetasqanta qawachinman?

7. ¿Imaynatam cristianoqa señoranta respetanman? Huk ejemplowan willarimuy.

⁷ Señoranta respetasqantam cristianoqa qawachinqa familianpaq manaraq imatapas tanteaspan payta tapuspan hinaspa imayna kasqanta entiendespan. Ejemplopaq, qosaqa ichapas tanteanman huk llamkayniyoqña kananpaq, huklawpiña yachanankupaq otaq kusirikunankupaq mayman rinankupaq hinaspa tukuy imapa precion wicharisqanrayku mana llumpayta gastanankupaqpas. Kaykunaqa familiantam sasachanman, chaymi respetasqanta qawachinqa chaykunamanta tapuspan. Kaynata ruraspanqa allintam tanteanqa, señoranpas mana hukmanyaspanmi yanapanqa (Pro. 15:22). Señoranta cristiano respetaptinqa paypas kuyasqa hinaspa respetasqam kanqa, Jehová Diospas favorecenqam, chaymi aswan allinqa (Efe. 5:28, 29).

Cristianaqa qosantam anchata respetan

8. ¿Imanasqataq Evaqa mana allin ejemplo?

⁸ Jesusqa Taytanpa kamachisqantam anchata respetarqa, chaynapi casada warmikuna ejemplonta qatikunankupaq. ¡Evaqa manam Jesus hinachu karqa! Mana allin ejemplotam saqerqa llapallan warmikunaman. Jehová Diosmi Adanta churarqa ayllunpi uma kananpaq, paywanmi imatapas willanan karqa. Evam ichaqa mana kasukurqachu Adanpa kamachikuy chaskisqanta (Gen. 2:16, 17; 3:3; 1 Cor. 11:3). Arí, Evaqa engañasqam karqa, culebrapa nisqanmanta yachananpaqqa qosantam tapunan karqa. Chayna rurananmantaqa kikinmi tantearurqa (Gen. 3:5, 6; 1 Tim. 2:14).

9. ¿Imanasqam kasukuypiqa Jesusqa allin ejemplo?

⁹ Jesusmi ichaqa allin ejemplota qowarqanchik, payqa Taytantam haykapipas kasukurqa. Imayna kasqanwanmi qawachirqa ‘Dios [hina] kasqanta valechiyta mana munasqanta, aswanqa kikinmi menoschakururqa sirviente hinaña kananpaq’ (Fili. 2:5-7). Kunanqa Rey kaspanpas hina chaynallam. Humilde kaspanmi Taytanta haykapipas kasukun (Mat. 20:23; Juan 5:30; 1 Cor. 15:28).

10. ¿Imaynatam cristianaqa qosan respetasqanta qawachinman?

¹⁰ Cristianaqa Jesusta qatipakuspanmi qosanta respetanan (leey 1 Pedro 2:21 hinaspa 3:1, 2). Ejemplopaq, huk warmam tayta-mamanta permiso mañakunan kachkaptin mamallanta mañakunman. Qosanwan manaraq rimasqanraykum allinqa kanman wawanta kayna tapuynin: “¿Rimarunkiñachu taytaykiwan?”, nispa. Manam niptinqa, qosantam tapunan hinaspam iskayninku tanteananku. Paywan mana acuerdopi  kaspanqa iskayllankum chaymantaqa rimananku. Manam wawanpa qayllanpiqa qosanwan mana acuerdopi kasqanmantaqa rimananchu (Efe. 6:4).

Jesusqa allin ejemplom tayta-mamakunapaq

11. ¿Imanasqataq Jesusqa allin ejemplo tayta-mamakunapaqpas?

¹¹ Mana casarakuchkaspan hinaspa mana churiyoq kachkaspanpas, Jesusqa allin ejemplom cristiano tayta-mamakunapaqqa. ¿Imanasqa? Kuyakuywan hinaspa pacienciawanmi rimaspapas chaynataq ruraspapas qatiqninkunata yachachirqa. Qawachirqam kamachisqanta imaynata ruranankupaqpas (Luc. 8:1). Paykunawan imayna kasqanwanmi yachachirqa paykunapura imayna kanankuta (leey Juan 13:14-17).

12, 13. ¿Imatam cristiano tayta-mamakuna rurananku Diosta wawa-churinku respetanankupaq?

¹² Wawa-churikunaqa qatipakunkum tayta-mamankupa allin hinaspa mana allin rurasqankutapas. Chaymi tayta-mamakunaqa tapukunanku: “¿Imatataq ejemplonchikwan yachachichkanchik? ¿Hayka tiempom kusirikunchik, televisionta qawanchik, predicanchik hinaspa Bibliata leenchik? ¿Imakunataq ayllunchikpi puntapi kachkan? ¿Vidanchikpiqa Diosta yupaychaychu puntapi kachkan? ¿Imapas tanteasqanchik chayman hinachu kachkan?”. Diosta wawa-churinku respetanankupaqqa, tayta-mamakunam puntataqa Diosta respetananku (Deu. 6:6).

¹³ Diospa nisqankunata tukuy imapi kasukunankupaq tayta-mamakuna kallpanchakuptinkuqa, wawa-churinkuqa paykunapa nisqankutapas kasukunqakum. Ichaqa, Bibliapa nisqanta tayta-mamanku mana kasukuptinkuqa, warmakunaqa piensanmankum mana allin otaq mana paykunapaq hina kasqanta. Chayna kaptinqa, hukkuna hikutaptinmi mana allinta rurarunmanku.

14, 15. ¿Imakunata ruranankupaqmi tayta-mamakunaqa wawa-churinkuta kallpanchananku, hinaspa imaynatam chayta ruranmanku?

¹⁴ Cristianokunaqa warmankuta allinta uywanankupaqqa, manam imapas necesitasqallantachu qonanku. Chaymi mana allinchu kanman qollqellapi piensaspa imapas rurananpaq kallpanchayqa (Ecl. 7:12). Jesusqa qatiqninkunatam yachachirqa Diospa munayninta puntata maskanankupaq (Mat. 6:33). Chaynaqa, tayta-mamakunaqa Jesusta qatipakuspankum wawa-churinkuta yanapananku Dios serviypi imatapas haypanankupaq.

¹⁵ Tayta-mamakunaqa reqsichinmankum tukuy tiemponkuwan Dios serviq cristianokunata. Mozo-sipaskunapaqqa allinmi kanman precursorkunawan, congregacionta watukuq ancianowan otaq señoranwanpas amistad rurayninkuqa. Misionerokuna, betelpi llamkaqkuna hinaspa Diosta yupaychanapaq achka nacionkunapi wasi ruraqkunaqa  willakunkum Diosta servispa kusisqa kasqankuta. Imamantapas willanankupaqqa kachkanchá. Diosta sonqomanta paykunapa kuyasqankum, mozo-sipaskunata yanapanman allinta tanteanankupaq, Dios serviypi imatapas haypanankupaq hinaspa tukuy tiemponkuwan serviypi piensaspa educakunankupaqpas.

¿Imataq wawa-churikunata yanapanqa Jesuspa ejemplonta qatikunankupaq?

16. ¿Imaynam Jesus karqa kay Pachapi tayta-mamanwan hinaspa hanaq pachapi Taytanwanpas?

¹⁶ Jesusqa allin ejemplom mozo-sipaskunapaqpas. Payqa taytan Joseytawan maman Mariataqa haykapipas kasukurqam (leey Lucas 2:51). Yacharqam pantaq kaptinkupas payta cuidananpaq Dios churasqanta, chaymi paykunataqa respetanan karqa (Deu. 5:16; Mat. 15:4). Yuyayniyoq kaspanpas hanaq pachapi Taytantam kasukurqa, manam tentacionpiqa haykapipas wichirqachu (Mat. 4:1-10). Mozo-sipas, ¿imatam rurawaq tayta-mamaykita mana kasukuyta munaspaykiqa? ¿Imaynatam Jesuspa ejemplonta qatipakuwaq?

17, 18. a) ¿Imakunata ruranankupaqmi mozo-sipaskunata estudiaqmasinkuna hikutanku? b) ¿Imataq yanapanqa pruebakunata aguantanankupaq?

¹⁷ Estudiaqmasikikunaqa yaqa llapallankupaschá mana kasukunkuchu Bibliapa nisqanta. Ichapas munanqaku mana allinkuna ruranaykita, mana ruraptikiñataq burlakunmanku. ¿Imatataq rurawaq nisqankuta mana rurasqaykirayku insultasuptiki? Paykunata manchakuspa ruraruspaykiqa, tayta-mamaykitawan Jehová Diostachá llakichiwaq. Chaynataq, ¿maypitaq tarikuwaq paykunapa rurasqankuta qatipakuspaykiqa? Ichapas munachkanki precursor, betelita, siervo ministerial kayta otaq mana achka testigokunapa kasqanman rispa serviyta. ¿Yaqachu chaykunata hayparuwaq estudiaqmasikikunawan amistadta ruraspaykiqa?

¹⁸ Iñiynikita imapas pruebaman churaptinqa Jesuspa ejemplonta yuyariy. Payqa manam tentacionkunapiqa urmarqachu, sapa kutim kasukurqa hinaspam Diosmanta yachasqankunatapas defienderqa. Paypa ejemplonta yuyariymi kallpata qosunki estudiaqmasikikuna mana allinta ruranaykipaq nisuptiki “manam” ninaykipaq. Jesus hina piensay, Jehová Diosta wiña-wiñaypaq servispa chaynataq kasukuspa kusisqa kanaykipi (Heb. 12:2).

Ayllupi imayna kusisqa kanamanta

19. ¿Imatam rurananchik kusisqa kawsakunanchikpaq?

¹⁹ Jehová Dioswan Jesusqa munankum runakuna allin kanankuta. Pantaq kaspanchikpas atichwanmi kusisqa kaytaqa (Isa. 48:17, 18; Mat. 5:3). Jesusqa qatiqninkunata kusisqa kawsakunankupaq cheqapmanta yachachispanpas, qawachirqataqmi imayna allin kawsakuymantapas. Allin ejemplotam qorqa imayna kawsakunamantawan allinta tanteaspa ruranamantapas. Tayta-mama otaq wawa-churi kaspanchikpas, llapallanchikmi ejemplonmantaqa yachachwan. Chaynaqa, ¡llapallaykichikyá Jesuspa ejemplonta qatikuychik! Yachachisqanta kasukuspa hinaspa ejemplonta qatipakuspaqa, kusisqam aylluykichikpi kawsakunkichik.

¿Yuyachkankichu?

• ¿Imaynatam qosakunaqa cumplinmanku uma kanankupaq Diospa churasqanwan?

• ¿Imaynatam casada warmikuna Jesusta qatipakunanku?

• ¿Imatam tayta-mamakuna yachanmanku qatiqninkunawan Jesus imayna kasqanmanta?

• ¿Imatam mozo-sipaskuna yachanmanku Jesusmanta?

[Kay yachachikuypa tapukuyninkuna]

[8 kaq paginapi dibujo]

¿Imatam qosaqa ruranan familianpaq imatapas manaraq tanteachkaspan?

[9 kaq paginapi dibujo]

¿Imaynatam cristianaqa qosan respetasqanta qawachinman?

[10 kaq paginapi dibujo]

Wawa-churikunaqa tayta-mamankupa allin rurasqankutam qatipakunku