Jesusta qatipakuspa valorwan predicay

‘Mana manchakuspam willarqaykiku Diosmanta allin noticiata.’ (1 TES. 2:2.)

1. ¿Imanasqataq Diospa Gobiernonmanta noticiaqa ancha allin?

¡MAYNA sumaqmi allin noticiakuna uyariyqa! ¿Ima noticiakunataq aswan allinqa? Diospa Gobiernonmanta Jesuspa willasqanmi. Willawanchikmi ñakariy, onqoy, nanay hinaspa wañuypas tukunanmanta. Chaynataq, qowanchik wiñay kawsanapaq suyakuyta, reqsichiwanchiktaq Diospa ima rurananmanta hinaspa yachachiwanchik Dioswan amistad rurananchikpaqpas. Chaymi piensachwan uyarispanku llapallanku kusikunankuta, ichaqa manam chaynachu.

2. ¿Imatam Jesus niyta munarqa “contranpi kananpaqmi” hamuniqa nispa?

² Jesusmi qatiqninkunata nirqa:“Ama creeychikchu kay pachaman hamusqaywanqa hawkalla kanaykichikta, aswanqa ñoqaraykum peleanqaku. Hamuniqa qaripas taytanpa contranpi kananpaqmi, warmi wawapas mamanpa contranpi kananpaqmi chaynataq llumchuypas suegranpa contranpi kananpaqmi. Chaynaqariki cheqniqninqa kanqa wasinpi kaqkunallam” (Mat. 10:34-36). Arí, yaqa llapankum allin noticia uyariytaqa mana munankuchu. Wakinkuqa allin noticia willakuqkunapa contranpim churakunku familianku kachkaptinpas.

3. ¿Imatam necesitanchik hinalla predicananchikpaq?

³ Jesuspa willakusqan noticiamantam ñoqanchikpas willakunchik, runakunapas punta pachak watapi hinam kanku. Chaynam kanan karqa, Jesusqa nirqam: “Sirvienteqa  manam aswan munayniyoqchu patronninmantaqa. Ñoqatam perseguiwarqaku, chaynaqa qamkunatapas perseguisunkichikmi”, nispa (Juan 15:20). Yaqa lliw nacionkunapi mana qatikachasqa kaspapas, despreciasqa hinaspa mana allin qawasqam kanchik. Chaymi iñiytawan valorta necesitanchik hinalla predicanapaqqa (leey 2 Pedro 1:5-8).

4. ¿Imanasqataq Pabloqa predicananpaq valorchakurqa?

⁴ Predicanaykipaq sasachakuptiki otaq Diosta servispa ima ruraypipas manchakuptikiqa, hawkayachisunkichá hukkunapa chayna kasqankumanta yachayqa. Ejemplopaq, Pablom cheqapmanta allinta entiendespa predicaytaqa mana manchakurqachu, wakin kutipim ichaqa sasachakurqa predicananpaq. Tesalonicapi iñiqmasinkunamanmi qellqarqa: “Filipos llaqtapi kamisqa ñakarichisqa kachkaptiykupas Diosninchikmi kallpanchawarqaku chaymi mana manchakuspa willarqaykiku Diosmanta allin noticiata, [. . .] runakuna contraykupi sayarichkaptinkupas”, nispa (1 Tes. 2:2). Arí, Filipos llaqtapim Pablotawan Silasta autoridadkuna kaspikunawan maqaparuspanku presocharurqaku hinaspam paykunapa chakinta cepowan hapirachirqaku (Hech. 16:16-24). Ichaqa mana manchakuspa hinalla predicanankupaqmi valorchakurqaku. ¿Imaynatam ejemplonkuta qatipakuchwan? Kay tapukuyta kutichinapaq yachasun ñawpaq tiempopi Dios serviqkunapa ejemplonkutapas hinaspa qawasun mana manchakuspa Diosmanta willakunankupaq ima yanapasqankuta.

Contranchikpi kaptinku aguantanapaqmi valorchakuna

5. ¿Imanasqataq valorchakuyqa ancha allin karqa Dios serviqkunapaq?

⁵ Mana manchakuspa predicanapaq aswan allin ejemploqa Jesucristom. Diosta serviqkunaqa ñawpaqmantaraqmi valorchakuq karqaku. ¿Imanasqa? Jehová Diospa nisqanman hinaqa, Edenpi mana kasukuy kasqanmantam Diosta serviqkunawan Diablopa qatiqninkuna cheqninakunanku karqa (Gen. 3:15). Qallariypiqa allin ruraq Abeltam wawqen Cain wañurachirqa. Enoctapas cheqnirqakum, huchallikuqkunata wara-waranqantin angelkunawan Dios castigananta willakuptin, payqa kawsarqa manaraq Sinchi Para kachkaptinmi (Jud. 14, 15). Predicasqantam runakunaqa mana allinpaq qawarqaku. Dios mana ‘chinkarachiptinqa’ wañurachinmankum karqa. ¡Mayna allin ejemplotam Enocqa saqewanchik! (Gen. 5:21-24.)

6. ¿Imanasqataq faraonwan rimananpaq Moisesqa valorchakunan karqa?

⁶ Kunanñataq rimarisun Moises mana manchakuspan faraonwan Egiptopi rimasqanmanta, faraonqa qawasqa karqa manam dioskunapa rantinpi gobiernaq hinallachu aswanqa dios hinam, Ra sutiyoq inti diospa churin hina. Payqa huk faraonkuna hinachá kikinpa rikchayllanta yupaycharqa. Kay hatun tukuq, rumi sonqo faraontaqa manam pipas ima ruranantaqa ninmanchu karqa. Nisqantaqa kasukunapunim karqa. Paypa qayllanmanmi mana nichkaptillan achka kutita Moisesqa rirqa, payqa manso, humilde hinaspa oveja michiq runam karqa. ¿Imatam Moisesqa nirqa faraonta? Nirqam millonninpi israelitakunata nacionninmanta lloqsichinanpaq, mana chayqa achka ñakariykunawan Egiptota Dios castigananta. Willananpaqmi Moisesqa valorchakunan karqa (Num. 12:3; Heb. 11:27).

7, 8. a) ¿Ima sasachakuykunatam pasarqaku Diosta ñawpaq tiempopi serviqkuna? b) ¿Imataq paykunata yanaparqa mana manchakuspa Dios yupaychayta defiendenankupaq?

⁷ Achka watakuna pasaruptinpas Diosta serviqkunawan paymanta willakuqkunam, Diablopa munaychakusqan pachapi mana manchakuspa Dios yupaychayta defienderqaku. Paykunamantam Pablo nirqa: ‘Wakinmi karqa rumikunawan choqapasqa, serruchasqa hinaspa espadakunawan wañuchisqa, wakinñataqmi ovejakunapa, cabrakunapa qaranwan churakuykuspanku kaypi-chaypi purirqaku, wakinñataqmi wakchayachisqa hinaspa llakichisqa  karqaku’, nispa (Heb. 11:37). ¿Imataq yanaparqa kasukuq kanankupaq? Manaraq chaynata nichkaspanmi Abelta, Abrahanta hinaspa Sarata ima kallpanchasqanmanta Pablo qawachirqa, nirqam: ‘Diospa prometesqanta manaraq chaskichkaspankupas [. . .] Diospa cumplisqanta hinaña qawaspankum creerqaku’, nispa (Heb. 11:13). Jesus manaraq nacechkaptin Diosta Eliaswan Jeremias hina serviqkunaqa, Diospa promesanpi hinalla piensaspankum aguantarqaku (Tito 1:2).

⁸ Paykunaqa hamuq tiempo allin kanantam suyarqaku. Mosoq pachapiqa pisi-pisimantam mana pantaqña kanqaku, hinaspam huchallikuymanta ‘librasqa’ kanqaku Jesucristowan 144.000 sacerdotekunapa rurasqankuwan (Rom. 8:21). Chaymantapas, ¿imapiwanraqmi kallpancharqa Jeremias hina ñawpaq tiempopi Dios serviqkunata? Jeremiasman Diospa kayna prometesqanmi: “Qampa contraykipi peleaspankuqa manam vencesunkichu paykunaqa. Qanwan kasqayraykum librasqayki. Ñoqa Tayta Diosmi chaynata niki” (Jer. 1:19). Ñoqanchiktapas kallpanchawanchikmi hamuq tiempopaq Diospa promesankunapi hinaspa paywan amistadninchik waqaychasqa kasqanpi yuyaymanayninchik (Pro. 2:7; leey 2 Corintios 4:17, 18).

Kuyakuymi Jesusta valorcharqa predicananpaq

9, 10. ¿Imaynatam Jesusqa valorchakusqanta qawachirqa a) religionpi punta apaqkunaman, b) soldadokunaman, c) sacerdotekunapa jefenman hinaspa d) Pilatomanpas?

⁹ Jesusqa tukuy ima rurasqanpim valorchakusqanta qawachirqa. Ejemplopaq, religionpi punta apaqkuna cheqnispanku piñakunanku kaptinpas manam upallarqachu, aswanqa mana manchakuspanmi imam kaqta paykunaman willarqa. Chaynatam qawachirqa iskay uya kasqankuta hinaspa llulla kasqankutapas. Jehová Diosmi paykunataqa manaña favorecerqachu, Jesusñataq mana pakaspa paykunaman chaymanta willarqa. Huk kutipim nirqa: “¡Imaynaraq kankichik iskay uya fariseokuna hinaspa Diospa leynin yachachiqkuna! Sepultura blanqueasqa hinam hawaykichikqa sumaqllaña kachkan, ukuykichikmi ichaqa wañusqakunapa tullunwan hinaspa qachakunawan huntasqa kachkan. Hawallaykichikpim runakunapaq allin ruraqman rikchakunkichik, sonqoykichikpim ichaqa iskay uya mana allin ruraq kankichik”, nispa (Mat. 23:27, 28).

¹⁰ Soldadokuna Getsemani huertapi maskaptinkupas, mana manchakuspanmi pim kasqanta willakurqa (Juan 18:3-8). Chaymantapas, sacerdotekunapa jefen tapunanpaqmi Corteman pusarqaku. Imamantapas acusaspa wañuchiyta munachkaptinkupas, mana manchakuspanmi nirqa Diospa Akllasqan hinaspa Churin kasqanta. Nirqataqmi: ‘Rikuwankichikmi atiyniyoq Diospa alleqninpi tiyachkaqta hinaspa cielomanta puyukunawan hamuchkaqta’, nispa (Mar. 14:53, 57-65). Chaymantam, Pilatopa qayllanpi tarikurqa, payqa atinmanmi karqa librayta. Tukuymanta acusaptinkupas manam rimarqachu (Mar. 15:1-5). Chaypaqqa anchatam valorchakurqa.

11. ¿Imapim tupan valorchakuyqa kuyakuywan?

¹¹ Pilatomanmi Jesusqa kaynata nirqa: “Chaypaqmi ñoqaqa nacerqani, chaypaqtaqmi hamurqani kay pachamanpas chaynapi  cheqapmanta rimanaypaq”, nispa (Juan 18:37). Taytanmi kamachimurqa allin noticiamanta willananpaq, Jesusñataqmi payta anchata kuyaspan kamachisqanta kusikuywan cumplirqa (Luc. 4:18, 19). Payqa runakunatapas kuyarqam, yacharqataqmi imakunawan sasachakusqankutapas. Ñoqanchikpas, Diostawan runamasinchikta kuyaspam valorchakuspa predicanchik (Mat. 22:36-40).

Chuya espiritum predicanapaq valorta qowanchik

12. ¿Ima pasasqanmi punta pachak watapi cristianokunata kusichirqa?

¹² Jesuspa wañukusqanmanta semanakuna pasaytam, qatiqninkunaqa kusikuywan qawarqaku runakunata llaqtanman Jehová Dios pusamusqanta. Huk punchawllapim bautizakurqaku 3.000 judiokuna hinaspa Pentecostesman achka nacionmanta hamuqkunapas. ¡Imaynachá judiokunaqa karqaku Jerusalenpi chayta qawaspankuqa! Bibliam nin: “Apostolkunam [. . .] admirakuypaq milagrokunata rurarqaku chaymi lliw runakuna admirasqallaña karqaku”, nispa (Hech. 2:41, 43).

13. ¿Imanasqataq cristianokunaqa mana manchakuspa predicanankupaq Diosta mañakurqaku, hinaspa imaynatam Diosqa contestarqa mañakusqankuta?

¹³ Religionpi punta apaqkunam piñakururqaku, hinaspam Pedrotawan Juanta presocharuspanku tukuy tuta cuidachispa kamachirqaku Jesusmanta manaña rimanankupaq. Librasqa kaspankum iñiqmasinkuman willarqaku ima pasasqanta. Hinaspam, qatikachasqa kasqankumanta Diosta llapallanku kaynata mañakurqaku: “Serviqnikikunata kallpanchawayku mana manchakuspa qanmanta rimanaykupaq”, nispa. ¿Imapim tukurqa? ‘Chuya espiritum lliwman huntaykurqa. Chaymi manaña manchakuspanku willakurqaku Diospa palabranta.’ (Hech. 4:24-31.)

14. ¿Imaynatam predicasqanchikpi yanapawanchik Diospa chuya espiritun?

¹⁴ Qawasqanchikman hinaqa, mana manchakuspa predicanankupaqmi Jesuspa qatiqninkuqa Diospa espiritunwan kallpanchasqa karqaku. Chaynam kunanpas, mana manchakuspam enemigonchikkunamanpas Diosmanta willanchik, ichaqa manam atiyllanchikwanchu aswanqa chuya espiritunta Dios qowaptinchikmi; chaypaqqa mañakunanchikmi. Arí, Jehová Diospa yanapakuyninwanmi aguantasun contranchikpi churakuptinkupas (leey Salmo 138:3).

Cristianokunaqa valorwanmi predicanchik

15. ¿Imaynatam Diosmanta yachachisqanchikqa runakunata rakinachin?

¹⁵ Ñawpaq tiempopi hinam, Diosmanta yachachisqanchikqa kunanpas runakunata rakinachin. Wakinkuqa uyarinkum, wakinkuñataq mana munankuchu nitaq respetankuchu Diosta imayna yupaychasqanchikta. Jesuspa nisqanman hinam, wakinkuqa cheqniwanchik, mana allinta rimanku hinaspa burlakunkupas (Mat. 10:22). Noticiakunapim wakinpiqa mana kaqta otaq llullakunata contranchikpi rimanku (Sal. 109:1-3). Chayna kaptinpas Jehová Diospa llaqtanqa hinallam valorchakuspa enteron Pachapi allin noticiamanta willakuchkan.

16. ¿Imaynatam yachanchik runakunapa imayna piensasqanta valorchakuspa predicasqanchik cambiachisqanta?

¹⁶ Mana manchakuspa predicasqanchikmi, runakunapa imayna piensasqankuta cambiachinman. Kirguistán llaqtamanta cristianam willakun: “Predicacionpim huk runa kaynata niwarqa: ‘Diospiqa creenim, ichaqa manam cristianokunapa Diosninpichu. ¡Wasiyman kutimuptikiqa allqoytam kachaykamusaq!’, nispa. Runapa qepanpim rikururqani cadenawan watasqa hatun allqota. Chayna kaptinpas Noticias del Reino número 37 ‘¡Se acerca el fin de la religión falsa!’ nisqa qellqa aypukusqan punchawkunapim chay wasita kutirqani familianwan rimayta piensaspay. Punkutam ichaqa chay runalla kichaykamurqa. Chayllam Diosta mañakurqani hinaspam chay runata nirqani: ‘¿Allinllachu? Yuyachkanim  3 punchaw pasaqllata rimasqanchikta hinaspa allqoykitapas, wasikiman mana hamuspayqa manam huk wasimanqa riyta atirqanichu, qam hinam ñoqapas sapallan cheqap Diospi creeni. ¿Yacharqankichu penqaypi qepachiq religionkunata Dios chayllaña chinkachinanta? Kay qellqam astawan chaymanta willachkan’, nispa. ¡Chay runaqa chaskiykuwarqam! Despedikuspaymi qatiqnin wasiman rirqani. Hinaptinmi payqa saqesqay qellqata aptakuruspan kallpaylla hamuchkasqa. Kasqayman chayaramuspanmi niwarqa: ‘Leeruniñam. ¿Imatam ruranay Diospa castigonta mana chaskinaypaq?’”, nispa. Biblia estudiayta qallarispanmi huñunakuymanpas rirqaña.

17. ¿Imaynatam huk cristianapa valorchakusqan estudiantenta yanaparqa?

¹⁷ Mana manchakusqanchikqa, hukkunatapas kallpanchanmanmi. Rusia nacionpi huk cristianam carropi richkaspan revistata huk warmiman qochkarqa, hinaptinmi huk pasajero tiyananmanta sayarispan revistata qechururqa hinaspam llikiruspan choqarurqa. Qaparispanmi kamiyta qallaykurqa, nirqataqmi direccionninta qonanpaq chaynataq predicayta saqenanpaqpas. Hermanaqa Diosta mañakuspanmi Jesuspa kayna nisqanta yuyarirqa: “Amayá manchakuychikchu runa wañuchiqkunataqa” (Mat. 10:28). Tiyasqanmanta hawkalla hatarispanmi runata nirqa: “Manam willasqaykichu maypi wasiy kasqanta nitaq llaqtapi predicaytapas saqesaqchu”, chaynata nispanmi carromanta bajarurqa. Payqa manam yacharqachu Biblia estudiachisqan señora chay carropi risqantaqa, paymi manchakusqanrayku huñunakuykunamanqa mana rirqachu. Hermanapa valorchakusqanta qawaspam huñunakuyman riyta qallarirqa.

18. ¿Imataq yanapawanchikman valorwan Jesus hina predicananchikpaq?

¹⁸ Diosmanta karunchasqa runakunapa chawpinpiqa, valorchakunam Jesuspa ejemplonta qatipakunapaq chaynataq predicanapaqpas. ¿Imataq yanapasunki chayna kanaykipaq? Hamuq tiempota confianzawan suyay. Jehová Diostawan runakunata astawan kuyay. Diosta mañakuy valorchasunaykipaq. Yuyariytaq, Jesusmi qanwan kanqa manam sapallaykichu kachkanki (Mat. 28:20). Diosqa bendecisunkim, yanapasunkim hinaspa chuya espiritunwanpas kallpanchasunkim. Llapanchikmi kallpanchakuspa kaynata nichwan: “[Jehová Diosmi] ñoqapa yanapawaqniyqa manam manchakusaqchu. Runapa imapas rurawanantaqa manam manchakusaqchu”, nispa (Heb. 13:6).

¿Ima niwaqtaq?

• ¿Imanasqataq Diosta serviqkunaqa valorchakunanchik?

• ¿Imatam yachanchik . . .

. . . Jesuspa tiemponmanta puntataraq Dios serviqkunamanta?

. . . Jesucristomanta?

.  .. punta pachak watapi cristianokunamanta?

. . . kunan tiempopi cristianokunamanta?

[Kay yachachikuypa tapukuyninkuna]

[21 kaq paginapi dibujo]

Jesusmi valorchakuspan religionpi punta apaqkunaman willarqa

[23 kaq paginapi dibujo]

Jehová Diosmi predicanapaq valorchawanchik