Ancha valorniyoq pakam tarisqa karqa

¿HAYKAPILLAPAS tarirurqankichu mana piensasqayki sitiopi ancha valorniyoq pakata? Chaynam pasarqa 2005 watapi 27 punchaw marzo killapi Estonia nacionniyoq Ivo Laud iñiqmasinchikta, paymi Alma Vardja sutiyoq yuyaq iñiqmasinchikpa imakunapas churanan maderamanta mawka wasinta paskaysirqa. Chayta ruraspankum rikurqaku tablawan tapasqa huk qeruta. Chay tablata horqoruptinkum qerupi uchkusqata huk tablacha tapasqa, kay uchkupa sayayninqa kasqa 50 pulgada, anchonñataq 4 pulgada hinaspa ukunpas 4 pulgada. (1) ¡Mana pipapas rikunan uchkum kasqa! ¡Pakam ukunpi kasqa! ¿Ima pakataq karqa? ¿Pitaq chayman churarurqa?

 Rakta papelwan wankisqakama achkallaña qellqakunam chaypiqa kasqa. (2) Chaykunaqa karqa Jehová Diospa testigonkunapa estudianankupaq La Atalaya revistakunam (wakinqa 1947 watamanta). (3) Chay qellqakunaqa estonio idiomapim makiwan allin qellqasqa kasqa. Chaykunata qawaspankum documentokunata tarirurqaku, chaywanmi yacharqaku pi chayman churasqanta. Pasaq watakunapi Villem Vardja iñiqmasinchikta autoridadkunapa tukuy ima tapusqankumanta willakuykunam kasqa, payqa karqa Alma Vardjapa qosanmi. Tarirurqakutaqmi presochasqa kasqan watakunamanta willakuykunatapas. ¿Imanasqataq presochasqa karqa?

Estonia nacionpi Tartu hinaspa Otepää sutiyoq congregacionkunapim Villemqa punta apaq karqa. Yaqapaschá payqa cheqapmanta yacharqa allpantinpi iskay kaq guerra manaraq qallarichkaptin. Guardiakunam presocharurqaku Diosta servisqanmanta 1948 watapi 24 punchaw diciembre killapi. Paykunam hikutarqaku wakin Testigokunapa sutinta willananpaq. Cortepi defiendekunanta mana saqespankum, Rusiapa carcelninkunapi 10 wata presochasqa kananpaq sentenciarurqaku.

Villemqa wañukunankamam (06-03-1990) Diosman sonqo karqa. Señoranqa manam yachasqachu chay pakasqa qellqakunamanta. Yaqapaschá mana willarqachu guardiakuna tapuptin sasachakuypi mana kananpaq. ¿Imanasqataq pakarqa chay qellqakunata? Rusiapi kamachiqta cuidaq Guardiakunam (KGB) qonqayllata iñiqmasinchikkunapa wasinkuman yaykuqku Bibliamanta qellqakunata maskanankupaq. Guardiakuna maynataña qechuptinkupas chay qellqakunawan iñiqmasinkuna estudianankupaqchá Villemqa pakarqa. 1990 watapim Tartu llaqtapipas tarirurqaku qellqakuna pakanata, chaytapas Villemmi rurasqa.

¿Imanasqataq tarisqanku qellqakunataqa pakawan tupachinchik? Makillawan qellqasqa hinaspa allin pakasqa kasqanmi qawachin Diosmanta yachachiq qellqakunata ancha chaninchasqankuta (Mat. 24:45). ¿Chaynatachu qampas qellqanchikkunata chaninchanki? Chay qellqakuna hinam Llaqta Cuidaq revistapas Diosmanta yachachichkan 170 masnin idiomakunapi, estonio rimaypipas.