Diospa yachachiwasqanchikqa mana tupachiy atinam

“Aswanqa Señor Jesucristota reqsinayraykum tukuy imatapas mana valeqpaqña hapini.” (FILI. 3:8.)

1, 2. ¿Imata ruranankupaqmi wakin cristianokuna tantearunku, hinaspa imanasqa?

WARMACHA kasqanmantaraqmi Robertqa allin estudiaq karqa. Pusaq watanpi kachkaptillanraqmi wasinta rispa huk profesoran nirqa ima munasqantapas tarinanmanta hinaspa doctor kananpaq estudianantapas. Mozoña kaspanpas allin estudiaqmi karqa, yaykunmanchá karqa nacionninpi allin universidadkunamanpas. Chaypiqa achkam estudiayta munarqaku, ichaqa Robertmi precursor kananrayku mana estudiarqachu.

² Robert hinam achkallaña cristianokuna tukuy imatapas saqerunku, chaytaqa ruranku Diosta servispa ñawparinankupaqmi (1 Cor. 7:29-31). ¿Imanasqataq paykunaqa tukuy kallpankuwan hinaspa tiemponkuwan Diosta servinku? Diosta kuyaspankum hinaspa paypa yachachisqan mana tupachiy atina kasqanta yachaspankum. ¿Imaynataq vidayki kanman karqa Diosmanta mana yachaptikiqa? Yuyaymanasun Diosmanta yachay tarisqanchikrayku wakin bendicionkuna chaskisqanchikpi. Chaynapim allin noticiata astawan kuyasun hinaspa tukuy sonqowan predicasun.

Mayna sumaqmi Jehová Diospa yachachiwasqanchikqa

3. ¿Imaynatam yachanchik pantaq runakunata Jehová Dios yachachiy munasqanta?

³ Jehová Diosqa sumaq sonqo kaspanmi runakuna pantaq kaptinkupas yachachiyta munan. Hanaq pachaman riy suyaqkunamanta rimaspanmi Isaias 54:13 nin: “Llapallan churikikunatam yachachisaq ñoqa Tayta Diosqa. Churikikunatam anchata hawkayachisaq ñoqa Tayta Diosqa”, nispa. Kayna nisqanqa cumplikuntaqmi ‘sapaq ovejakunapipas’ (Juan 10:16). ¿Imaynatam chayta yachanchik? Diosmanta willakuq Isaiaspa nisqan kunan cumplikusqanraykum. Revelacionninpim rikurqa Diosta yupaychanankupaq tukuy nacionniyoq achkallaña runakuna hamuqta. Willasqanman hinaqa kaynatam ninakurqaku: ‘Hakuchikyá risunchik Tayta Diospa orqonman, risunchikyá Jacobpa Diosninpa templonman. Paymi yachachiwasun paypaq hina kawsanapaq. Yachachiwasunchikmi paypa munasqanman hina kawsanapaq’, nispa (Isa. 2:1-3). Arí, Jehová Diospa yachachisqanmi kananku karqa. ¡Mayna allinmá chayqa!

4. ¿Imaynataq kananchik Jehová Dios yachachiwananchikpaq?

⁴ ¿Imaynataq kananchik Diospa yachachisqan kanapaq? Chaypaqqa humildem kananchik hinaspa munananchikmi yachaytapas. Salmos qellqaq Davidmi nirqa: “Tayta Diosqariki mayna alli-allin Diosmi [. . .]. Payllataqmi kawsachinpas munasqanman hina”, nispa (Sal. 25:8, 9). Jesuspas nirqam: “Hanaq pachapipas, kay pachapipas munaychakuq Taytáy, kay yachaykunatam pakaykurqanki yachayniyoqkunamantawan entiendeqkunamanta hinaspam qawaykachinki pisi yachayniyoqkunamanña, chayraykum alabayki”, nispa (Luc. 10:21). Humildekuna favoreceq Diostaqa, ¿manachu kuyanchikman? (1 Ped. 5:5.)

5. ¿Imanasqataq Diosta reqsirqanchik?

 ⁵ ¿Kikillanchikmantachu Diosmanta yacharqanchik hinaspa payta servinapaqpas tanteakurqanchik? Kikillanchikmantaqa manam haykapipas Dios reqsiytaqa atichwanchu karqa. Jesusqa nirqam: “Manam pipas hamunmanchu ñoqamanqa kachamuwaqniy Taytay ñoqaman mana pusamuptinqa”, nispa (Juan 6:44). Arí, qori-qollqe hina allin runakunatam otaq llampu sonqo runakunatam Diosqa llaqtanman pusamun, chaytaqa ruran predicacionwan hinaspa chuya espiritunwanmi (Ageo 2:7). ¿Manachu agradecekunki Churinman Jehová Dios pusamususqaykimanta? (Leey Jeremias 9:23, 24.)

Runakuna allinta kawsanankupaqmi yachachin

6. ¿Imaynatam runakunata yanapan Jehová Diosta ‘reqsisqanku’?

⁶ Sumaqta tupachispanmi Isaiasqa willakurqa kay tiempopi runakunapa vidan imayna cambiananmanta. Manchakuypaq ruraq runakunam llampu sonqoña rikurirunku (leey Isaias 11:6-9). Chaynataq, huk rikchayniyoq, llaqtayoq, costumbreyoq otaq nacionniyoq kasqankurayku cheqninakuqkunapas hawka kawsakuytam yacharunku. ‘Paykunaqa espadankutapas rejakunamanñam tikrarunku’ (Isa. 2:4). ¿Imanasqataq chaynata cambiarunku? Jehová Diosta ‘reqsispanku’ hinaspa nisqanta kasukuspankum. Pantaq kaspankupas Diosta serviqkunaqa enteron nacionpim aylluntin kanku. Allin noticiamanta willakusqanchik sumaq kasqan hinaspa runakunata yanapasqanmi qawachin Diospa yachachisqan mana tupachiy atina kasqanta (Mat. 11:19).

7, 8. a) ¿Imakunataq kanman Diospa yachayninpa tuñichinan ‘murallasqa llaqtakunaqa’? b) ¿Ima ejemplom qawachin runakunata yachachispan kikin Jehová Dios alabasqa kasqanmanta?

⁷ Cristianokunapa yachachisqankutam Pablo tupachirqa peleaywan. Paymi qellqarqa: ‘Armaykuqa manam aychaman hina armallachu, aswanqa Diospa atiynin hina armam, chayna armaqa tuñichinmanmi murallasqa llaqtakunatapas. Tuñichintaqmi Dios reqsiypa contranpi piensaqkunatapas chaynataq paypa contranpi hoqarikuqkunatapas’ (2 Cor. 10:4, 5). ¿Imakunataq kanman Diospa yachayninpa tuñichinan ‘murallasqa llaqtakunaqa’? Wakinqa kanmanmi: religionkunapa llulla yachachisqanku hinaspa creenciakuna chaynataq runapa yachayninpas (Col. 2:8). Diospa yachachikuyninkunaqa runakunatam yanapan mana allin rurasqankuta saqenankupaq hinaspa Diospa munasqanman hina kawsanankupaqpas (1 Cor. 6:9-11). Chaymantapas, ayllupi allin kawsakuytawan cheqap kawsakuytam tarichin. Chayna yachachikuytam kunanqa astawan necesitanchik.

⁸ Jehová Dios yanapaptinmi runakunaqa allinkunata ruranman, chaymantam qatiqninpi qawasun (Heb. 13:18). India nacionpim, Biblia estudiaq huk señora manaraq bautizakuchkaspan predicaqña karqa. Huk punchawmi, Salon rurasqankuman llamkaq risqanmanta kutimuspa, carrokunapa sayananpi tarikurqa qorimanta cadenata. Wakcha kaspanpas hinaspa 800 dolarpa chanin chay cadena kaptinpas guardiakunamanmi aparqa, riysinanpaqmi congregacionpi ancianota nirqa. Atiendeqnin guardiaqa admirakurqam. Chaymantam huk guardiapas tapurqa imanasqa cadenata kutichisqanmanta, hinaptinmi pay nirqa: “Bibliapa yachachisqanmi vidayta cambiarun. Kunanqa allinkuna ruraqñam kani”, nispa. Admirakuspanmi guardiaqa ancianota nirqa: “Kay lawpiqa kachkan 38 millon runakunam. 10 runallata kay señora hina kananpaq yanaparuptikiqa mayna allinchá kanman”, nispa. Jehová Diospa yachachiyninqa millonnintin runakunatam vidankupi yanaparun. Hinaptinqa, Jehová Diostayá alabasun chayna yanapasqanmanta.

9. ¿Imanasqataq cheqapmanta yachaq runakunaqa vidankuta cambianmanku?

 ⁹ Biblia atiyniyoq kasqanrayku chaynataq Diospa chuya espiritun yanapaptinmi, runakunaqa vidankuta cambianku (Rom. 12:2; Gal. 5:22, 23). Bibliam kaynata nin: “Mosoq runa hinañam kanaykichik, chayqa kanqa cheqap yachaywanmi aswan-aswanraq mosoqyachisqa Unanchasuqnikichikman rikchakunaykichikpaq”, nispa (Col. 3:10, NM). Bibliapa yachachisqanqa atiyniyoqmi runakunapa piensasqankunatawan munapayasqankunata reqsichinanpaq hinaspa chaykunata cambiananpaqpas (leey Hebreos 4:12). Runaqa Bibliamanta allinta yachaspa hinaspa nisqanta kasukuspanmi, Diospa amistadnin kanman hinaspa wiñay kawsaytapas tarinman.

Hamuq tiempopaqmi yanapawanchik

10. a) ¿Imanasqataq Jehová Dioslla hamuq tiempopaq allinta yanapawanchikman? b) ¿Imakunapa pasananmi hichpallapiña kachkan?

¹⁰ Hamuq tiempopi ima pasananta yachaspanmi Jehová Diosqa yanapawanchikman listo kananchikpaq. Willawanchikmi runakuna hamuq tiempopi imayna kananmanta (Isa. 46:9, 10). Bibliam nin ‘Diospa castiganan hatun punchaw’ hichpallapiña kasqanta (Sof. 1:14). Chay punchawpim Proverbios 11:4 nisqan cumplikunqa: “Qori-qollqeqa manam pitapas libranqachu Diospa piñakuynin punchawpiqa. Allin ruraymi ichaqa wañuymanta libranqa”. Mana allin ruraqkunata Jehová Dios puchukachiptinqa, ancha valorniyoqqa kanqa paywan amistadninchikmi. Manam qollqeqa yanapawasunchu, Ezequiel 7:19 nisqanman hinam ‘qollqenkutapas calleman wischunqaku, wanu wischuchkaq hinam qorinkutapas wischunqaku’. Kaykunamanta yachaymi yanapawanchik imapipas allinta tanteanapaq.

11. ¿Imaynatam Diospa yachachiwasqanchikqa piñakuynin punchawpaq preparawanchik?

¹¹ Diospa yachachisqanmi preparawanchik piñakuynin punchawpaq, ¿Imaynata? Vidanchikpi imakuna puntapi kananmanta yachachiwaspanchikmi. Pablom Timoteoman kaynata qellqarqa: “Llapa apukunatayá kamachiy ama alabakunankupaq hinaspa tukuruqlla qori-qollqeman ama hapipakunankupaq, paykunaqa kawsaq Diosllamanyá hapipakuchunku”, nispa. Apu mana kaptinchikpas kay consejoqa yanapawanchikmanmi. Diospi hapipakusqanchiktaqa qawachisun ‘allinkuna ruraypi apu kaspanchikmi’, manam kay pachapi imakunatapas maskaspachu. Dios serviyta puntapi churaspaqa ‘hamuq tiempopaqmi’ allin cimientota churachkanchik (1 Tim. 6:17-19). Chaynata ruraspaqa yachayniyoqmi kasun, Jesusqa nirqam: “Runaqa ¿imatataq horqokunman lliw kay pachapi kaqkunata ganaruspan vidantañataq pierderuspaqa?”,  nispa (Mat. 16:26, 27). Diospa piñakuynin hichpallapiña kasqanraykum tapukunanchik: “¿Maypitaq qori-qollqeta huñuchkani? ¿Diostachu servichkani icha qori-qollqetachu maskachkani?”, nispa (Mat. 6:19,20, 24).

12. ¿Imanasqataq mana hukmanyananchikchu predicasqanchikta mana allinta qawaptinku?

¹² Cristianokunapa ‘allinkuna rurananchikpim’ kachkan: Diospa Gobiernonmanta runakunaman predicay hinaspa Jesuspa qatiqnin kanankupaq yachachiypas (Mat. 24:14; 28:19, 20). Ichaqa, punta pachak watapi hinam runakunaqa predicasqanchikta mana allintachu qawanku (1 Cor. 1:18-21). Chayna qawasqankuqa manam yanqachanchu, tiempo kachkaptinraq runakunaman willasqanchik allin noticiataqa (Rom. 10:13, 14). Chaymantapas, runakuna yanapachikunankupaq Diosmanta yachachispaqa achka bendicionkunatam chaskisun.

Jehová Diosqa bendecinmi kallpanchakuqkunata

13. ¿Imakunatam Pabloqa saqerqa allin noticiamanta willakunanrayku?

¹³ Warma kasqanmantam Pabloqa allin preparasqa karqa judiokunawan allin reqsisqa kananpaq. Yaqa 13 watanpim Tarsomanta Jerusalenman rirqa, Leymanta yachaq Gamalielpa yachachisqan kananpaq (Hech. 22:3). Achkatam Pabloqa yacharqa, hinalla yachaspanqa mayna reqsisqachá kanman karqa (Gal. 1:13, 14). Ichaqa allin noticiamanta yacharuspan hinaspa predicayta qallarispanmi, tukuy chaykunata saqerurqa. ¿Ñakakurqachu chaykuna saqesqanmanta? Manam. Kaynatam qellqarqa: “Señor Jesucristota reqsinayraykum tukuy imatapas mana valeqpaqña hapini, payrayku tukuyta pierderuspaymi chaykunataqa qopata hinaña hapini”, nispa (Fili. 3:8).

14, 15. ¿Ima bendicionkunatam ‘Diospa llamkaqmasinkuna’ chaskinchik?

¹⁴ Pablo hinam, kunan tiempopi cristianokunaqa predicananchikrayku munasqanchikta qepaman churanchik (Mar. 10:29, 30). ¿Chayraykuchu imanchikpas pisipuwasun? Qawasunchik qallariypi rimasqanchik Robertmanta, wakin iñiqmasinchik hinam paypas kaynata nin: “Manam imamantapas ñakakunichu. Precursor kasqayqa kusichiwanmi. Cuentatam qokuni ‘Dios allin kasqanmanta’. Diosta astawan servinaypaq imatapas saqeptiymi, payqa saqesqaymanta astawanraq qoykuwan. Chaynapim imapas saqesqaymantaqa mana llakikunichu, necesitasqayta  Dios qowasqanrayku”, nispa (Sal. 34:8; Pro. 10:22).

¹⁵ Unay tiempoña predicaspaykiqa hinaspa Jesuspa qatiqnin kanankupaq runakunata yachachispaykiqa, cuentatachá qokurqanki Jehová Dios allin kasqanmanta. ¿Cuentata qokurqankichu Diospa chuya espiritun predicasqaykipi yanapasusqaykita? ¿Runakunapa sonqonta Jehová Dios kichaykuptin kusikuywan uyarisqankuta qawarqankichu? (Hech. 16:14.) ¿Yanapasurqankichu ima sasachakuytapas atipanaykipaq chaynapi payta astawan servinaykipaq? ¿Kallpata qosurqankichu manaña atisqaykita piensachkaspapas kallpanchakunaykipaq? (Fili. 4:13, NM.) Predicasqanchikpi Jehová Diospa yanapakuyninta qawaspam, astawan yachanchik cheqap kasqanta hinaspa payman astawan asuykunchik (Isa. 41:10). Bibliamanta yachachiypi ‘Diospa llamkaqmasin’ kayqa hatun bendicionmi (1 Cor. 3:9).

16. ¿Imatam piensanki runakunaman Diospa yachachiyninta willanaykipaq kallpanchakusqaykimanta?

¹⁶ Achka runakunam munanku imapas rurasqanku mana qonqasqa kananta. Chayna kaptinpas, yachanchikmi rurasqanku admirakuypaq kaspanpas tiempo pasaptinqa qonqasqa kasqanta. Ichaqa, Jehová Diospa sutin chuyanchasqa kananpaq serviqninkunawan rurasqanqa manam haykapipas qonqasqachu kanqa (Pro. 10:7; Heb. 6:10). Chaynaqa, chaninchasunyá Jehová Diosmanta hukkunaman yachachisqanchikta, kay rurasqanchikqa manam qonqasqachu kanqa.

¿Imatam niwaq?

• ¿Imaynam kananchik Diospa yachachisqan kanapaq?

• ¿Imaynatam yachanchik Diospa yachachiyninqa runakunata vidanpi yanapasqanta?

• ¿Ima bendicionkunatam chaskinchik Diosmanta hukkunaman yachachispanchik?

[Kay yachachikuypa tapukuyninkuna]

[23 kaq paginapi dibujo]

Jehová Diospa yachachisqan runakunaqa llapallan nacionpim aylluntin kanku

[24 kaq paginapi dibujo]

‘Diospa llamkaqmasin’ kayqa hatun bendicionmi