Imapaq kawsasqaymantam yacharurqani

Kaytam willakun Gaspar Martínez

Mozo kaspay chakrapi llamkasqaymanta hatun llaqtaman rispay apuyarusqaymanta willasqaykichik. Leespaykichikmi ichaqa cuentata qokunkichik mana piensasqayta tarispa apuyasqaymanta.

WIÑARQANIM mana ancha imapas qespinan La Rioja lawpi, España nacionpi 1930 watakunapi. 10 watayoq kachkaspanmi escuelata saqerqani, ichaqa leeytawan qellqaytam yacharurqani. Chakrapi tarpuspam 6 wawqe-paniykunawan ovejakunata michiq kani.

Wakcha kaspaykum piensarqaniku apu kayqa imamantapas aswan allin kasqanta. Ñoqaykumanta aswan kapuqniyoq kaqkunatam envidiarqaniku. Chayna kaptinpas huk kutipim obispo nirqa chay lawpi llaqtakunamanta llaqtayku aswan religioso kasqanta. Payqa manam piensayllapas-piensarqachu chaypi kaqkuna catolico kasqanku saqenankuta.

Allin vidatam maskani

Llaqtamasiy Mercedeswanmi casarakururqani, casarakusqay qepallatam churiyoq karqani. 1957 watapim ripukurqaniku Logroño llaqtaman, chaymantañam familiaykunapas hamurqa. Ñoqapaqqa manam ima oficioypas karqachu, chaymi cuentata qokurqani familiayta mantienenaypaq allin sueldo tariyqa sasa kasqanta. Tapukurqanim mayta rispa yanapakuy chaskinaymanta. Puntatam rirqani librokunapa kasqan wasiman, ichaqa manam yacharqanichu ima maskasqayta.

Chaymantam radiopi uyarirurqani Bibliamanta yachachisqankuta, chaymi cartallawan estudiayta qallaykurqani, tukuruptiymi evangelistakuna watukamuwarqaku. Iskay-kimsa kutitam iglesiankuman rirqani, chaymi cuentata qokurqani chaypi punta apaqkuna cheqninakusqankuta. Chaynapim tantearurqani manaña kutinaypaq, piensarqanitaqmi lliw religionkuna chaynalla kasqantapas.

Ñawiymi kichakururqa

1964 watapim Jehová Diospa testigon Eugenio wasiyman watukamuwarqa. Manam haykapipas chay religionmanta uyarirqanichu, ichaqa munarqanim Bibliamanta yachaytaqa. Piensarqanim Bibliamanta achka yachasqayta, chaymi rimasqaykupi yachasqay textokunata servichikurqani. Pantasqa religionpa yachachisqanta defiendespaypas manam chaypiqa creerqanichu.

 Iskay kutita Eugeniowan rimaspaymi cuentata qokurqani ñoqamantaqa pisi watakuna escuelaman rispanpas Bibliamanta allintapuni yachasqanta. Admirakurqanim Bibliapa textonkunata tarispan willawasqanmanta. Bibliawanmi qawachiwarqa tukupay tiempopi kasqanchikmanta hinaspa Dios Gobiernaptin kay Pacha paraiso kananmantapas. ¡Admirasqam karqani! (Sal. 37:11, 29; Isa. 9:6, 7; Mat. 6:9, 10.)

Kusikuywanmi Biblia estudiayta qallarirqani. Tukuy ima yachasqaymi ñoqapaq mosoq karqa, yachasqaypas sonqoymanmi chayarurqa. Ñawiyta kicharichkaq hinam cuentata qokurqani imapaq kawsasqaymanta. Maskasqaytam tarirurqani. Manañam afanakurqaniñachu tukuy imayoq kanaypaq nitaq allin llamkayta maskanaypaqpas. Onqoywan wañuypas chinkanan kaptinqa, ¿imanasqamá wakin sasachakuykunaqa mana chinkanmanchu? (Isa. 33:24; 35:5, 6; Apo. 21:4.)

Chayllam yachasqayta aylluyman willarqani. Kusikuyllawanñam willarqani kay Pachata Dios paraisoman tikraptin kasukuq runakuna wiñaypaq kawsanankumanta.

Aylluymi cheqapmanta yachan

Pisi tiempollamantam sapa domingo tardenta, yaqa 12 aylluywan Bibliamanta rimanaykupaq tioypa wasinpi huñunakurqaniku. Huñunakurqanikuqa iskay otaq kimsa horatam. Achkallaña aylluykuna Bibliamanta astawan yachay munasqankuta Eugenio yacharuspanmi, sapa familiayta yachachirqa.

Wakin aylluyqa Durango sutiyoq llaqtapim karqaku, chayqa Logroñomanta 120.000 metro karupim kachkan, chaypiqa manam karqachu Jehová Diospa testigonkunaqa. Yaqa 3 killa pasaruptinmi, iskay-kimsa punchaw watukuq rirqani yachasqaymanta willanaypaq. Chaypim yaqa 10 familiaykunawan tuta huñunakurqaniku, hinaspam chawpi tuta pasanankama Bibliamanta rimarqaniku. Llapallankum kusikurqa yachachisqaywan. Saqerqanim Bibliakunata hinaspa huk qellqakunatapas, Logroñoman kutimuspaypas hinallam paykunataqa yanaparqani.

Piensariy, mayna kusisqachá Jehová Diospa testigonkunaqa tarikurqaku Durango llaqtaman chayraq predicaq rispankuqa, 18 runakunam Bibliata estudianankupaq suyachkarqaku. Chayllam iñiqmasinchikkunaqa sapa familiawan Biblia estudiayta qallaykurqaku.

Chay tiempokamam Mercedesqa manchakusqanrayku Bibliamanta yachaytaqa mana munarqachu. Chay watakunapim Españapiqa predicacion prohibisqa karqa, chaymi payqa manchakurqa iskay warmayku escuelankumanta qarqosqa kanankuta hinaspa llaqtapi runakuna cheqniwanankumantapas. Ichaqa, lliw aylluykuna Bibliata estudiaptinkum, paypas estudiayta qallaykurqa.

Iskay watallapim, Diosman qokuspanku 40 aylluykuna bautizakurqaku. Aylluykunaqa ñoqa hinañam piensarqaku, chaymi kusikurqani imamantapas aswan allin kaq tarisqaymanta. Diosta servisqaykupi apu kanaykupaqmi bendecisqa karqaniku.

Apu kasqaymanta

Qatiqnin 20 watakunapim kallpanchakurqani 2 warmaykunata uywanaypaq hinaspa congregacionta yanapanaypaqpas, chaypiqa achka llamkaytam chaskirqani. Logroñoman Mercedeswan chayamuptiykuqa, chaypi 100.000 runakunamantam yaqa 20 testigokunalla karqaku.

Llamkasqay fabricatam wichqarurqaku 56 wataypi kachkaptiy, chaymi mana llamkayniyoq qeparurqani. Tukuy tiempom munarqani Diosta astawan serviyta, mana llamkayniyoq kaspaymi precursorña karqani. Llamkay tarisqaypi pagawasqanqa manam haypawarqakuchu, Mercedesmi limpiaypi llamkapakuspan yanapawarqa. Qollqe tarisqaykutam haypachirqaniku, manam  haykapipas necesitasqaykuqa pisiwarqakuchu. Kunankamapas precursormi kani, señorayñataqmi wakin kutikunapi precursora auxiliar. Payqa munanpunim predicayta.

Pasaq watakunatam Merche sutiyoq sipasman señorayqa revistata apaq, warma kaspanmi payqa Bibliata estudiarqa. Sipasqa kusikuywanmi revistakunata leeq, chaymi Mercedesqa cuentata qokurqa cheqapmanta hinalla yachay munasqanta. Chaymantam Mercheqa Biblia estudiayta qallaykuspa iñiyninpi ñawparirqa. Qosan Vicentem llumpayta tomasqanrayku llamkayninmanta qarqochikuq, chaymi familianta mantieneyta mana atiqchu. Tomayman qokusqanraykum señoranwan sasachakuypi tarikurqa.

Mercedesmi Mercheta nirqa ñoqawan qosan rimananpaq. Vicentem ñoqawan rimarqa, achka kutita watukusqay qepatam Biblia estudiayta qallaykurqa. Tiempopa risqanman hinam vidanta cambiarqa: qallariypiqa iskay-kimsa punchawllamantam tomayta qallaykuq, chaymantañataq semanamanta hinaspa unay tiempomantaña, tomayta qalaypaq saqerunankama. Rikchayninpas allinyarurqam, familianwanpas hawkañam kawsakurqa. Kunanqa yachan Canarias islapim, chaypim señoranwan hinaspa churinwan kuska congregacionpi servichkanku.

Vidayqa allinmi karqa

Testigo kaq familiaykuna wakinku wañukuptinkupas, familiayqa hinalla yapakuspanmi Jehová Diospa bendicionninta chaskichkanku (Pro. 10:22). Yaqa 40 wataña Biblia estudiasqankumanta pasaruptinpas hinallam Diosta servichkanku churinkuwan hinaspa willkankuwanpas, chaymi anchata kusichiwan.

Achkam aylluyqa testigo kanku, paykunamantam achka kanku ancianokuna, siervo ministerialkuna hinaspa precursorkuna. Mayor churiymi señoranpiwan Madrid llaqtapi Betel wasipi servichkanku. Bautizakuptiyqa Españapim yaqa 3.000 testigokunalla karqaku, kunanqa kachkan 100.000 masninñam. Tukuy tiempoywan Diosta servispaymi anchata kusikuni, chaymi anchata agradecekuni payta servispa allinta kawsakusqaymanta. Mana ancha educacionniyoq kaspaypas wakinpiqa congregacionkuna watukuq ancianopa rantinpim servini.

Qayna watakunallam yacharurqani wiñasqay llaqtapi huk-iskay runakunallaña kasqankuta. Wakcha kasqankuraykum chakrankutawan wasinkuta saqeruspa achka ripukunku allin kawsakuyta maskaspanku. Achkam Diosta servispanku ñoqa hina apuyarunku. Yacharunkum imapaq kawsasqankumanta hinaspa Diosta servispa kusisqa kaytapas.

[32 kaq paginapi dibujo]

Diospa llaqtanpi kaq yaqa llapallan familiay