Jesuspa kasukusqantawan valorchakusqanta qatipakusun

“Kallpanchakuychikyá, kay pachapi mana allinkunataqa venceruniñam.” (JUAN 16:33.)

1. ¿Ima pasanankamam Jesusqa Diosta kasukurqa?

JESUSQA haykapipas Taytanpa munaynintam rurarqa. Payqa manam piensayllapas-piensarqachu mana kasukuytaqa (Juan 4:34; Heb. 7:26). Ichaqa kay Pachapi tukuy imata pasasqanraykum kasukuyqa sasa karqa. Predicayta qallarisqanmantapacham Satanaswan huk enemigonkunapas Diosta mana kasukunanpaq tukuyta rurarqaku (Mat. 4:1-11; Luc. 20:20-25). Paykunaqa llumpaytam ñakarichirqaku hinaspa llakichirqaku, qerupi warkuspankum wañuchirqaku (Mat. 26:37, 38; Luc. 22:44; Juan 19:1, 17, 18). Chayna kaptinpas Jesusqa ‘Diostam kasukurqa wañunankama’ (Fili. 2:8).

2, 3. ¿Imatam yachachiwanchik wañukunankama Jesuspa kasukusqan?

² Kay Pachapi ñakarisqankunawanmi Jesusqa, astawanraq yacharqa Taytan kasukuyta (Heb. 5:8). Ichaqa, ¿imataraqtaq kasukuymanta yachanman karqa? ¿Manachu payqa Taytanwan kuska millonnintin watakuna karqa hinaspa tukuy imata unanchaptin ‘ruraysiq maestron’ karqa? (Pro. 8:30.) Runa kaspan ñakarisqankunawanmi pruebasqa karqa, aguantaspanmi qawachirqa imapipas  kasukuq kasqanta. Chaykunam Diosta servisqanpi ñawparinanpaq Jesusta yanaparqa. ¿Imatam ejemplonmanta yachachwan?

³ Mana pantaq kaspanpas Jesusqa yacharqam kikinpa kallpallanwan Taytan kasukuy mana atisqanta. Chaymi yanapananpaq Taytanta mañakurqa (leey Hebreos 5:7). Ñoqanchikpas humillakuspam kasukuq kanapaq Diosta sapa kuti mañakunanchik. Pablom cristianokunata nirqa: “Jesucristopa piensasqanman hinayá qamkunapas piensaychik [. . .]. Runayaruspanmi humillakuykurqa, wañunankamam Diosta kasukurqa, qerupim wañurqa”, nispa (Fili. 2:5-8, NM). Jesuspa ejemplonmi qawachin: mana allin ruraqkunapa chawpinpi kaspapas kasukuy atikusqanta. Ichaqa, ¿imaynataq kasukuqqa kachwan pantaq runakuna kachkaspa?

Pantaq kaspankupas kasukuqkunamanta

4. ¿Ima ninantaq kikinchikmanta imatapas akllakunapaq unanchasqa kasqanchik?

⁴ Adanwan Evaqa librem karqaku imatapas akllakunankupaq. Mirayninkunapas chaynam kanchik. ¿Ima ninantaq chayqa? Librem kanchik allin kaqta otaq mana allin kaqtapas akllakunapaq hinaspa Diosta kasukunapaq otaq manapas. Ichaqa, libre kasqanchiktam allinta servichikuna, mana chayqa mana allinpim tukuchwan. Arí, imayna tanteasqanchikwanmi kawsayta otaq wañuyta tarichwan, ñoqanchikwan kaqkunapaqpas allinninpaq otaq mana allinninpaqmi kanman.

5. ¿Imapim llapallanchik sasachakunchik, hinaspa imatam rurana chayta atipanapaq?

⁵ Pantaq runakunaqa nacesqanchikmantapacham kasukunapaq sasachakunchik, chaymi Diosta kasukuyqa mana facilchu. Pablopaqpas sasam karqa, chaymi nirqa: ‘Musyakunim allin munasqaypa contranpi imapas peleasqanta, arí, chayqa presocharuwaspa huchaman pusawaqniymi’, nispa (Rom. 7:23). Arí, mana kallpanchakuna kaptinqa otaq sasachakuykuna mana kaptinqa manam sasachu kasukuyqa. Ichaqa, ¿imatam ruranchik ‘aychapa munapayayninkunawan ñawipa munarusqankuna’ huchaman tanqawaptinchik? Pantaq kasqanchikraykum hinaspa ‘kay pachapi’ mana allinkuna kasqanraykum, chaykunata atipanapaqqa sasachakunchik (1 Juan 2:16; 1 Cor. 2:12). Chaymi manaraq pruebasqa otaq tentasqa kachkaspa preparakunanchik imaña kaptinpas Diosta kasukunapaq (Sal. 78:8). Bibliapiqa tarinchikmi chayna kasukuq achka runakunapa ejemplonta, paykunam Diosman sonqo karqaku (Esd. 7:10; Dan. 1:8).

6, 7. ¿Ima ejemplom qawachin allinta tanteanapaq Biblia estudiay allin kasqanta?

⁶ Diosta kasukunapaqqa preparakunanchikmi, Bibliata hinaspa qellqanchikkunata allinta estudiaspa. Kaypi piensariy: sapaqchasqayki punchawpi Bibliata estudiachkawaq. Jehová Diostam mañakurqanki chuya espiritunwan yanapasunaykipaq chaynataq kasukunaykipaqpas. Hinaspam yacharuwaq qaway munasqayki pelicula televisionpi paqarinninta pasananta. Chay peliculamanta runakuna allinta rimaptinkupas, uyarirunkim wakin partenkunapi maqanakuymantawan huchapakuymanta kasqanta.

⁷ Chaymi yuyaymananki Efesios 5:3 Pablopa kayna nisqanpi: “Qamkunaqa Diosllapaqñam kawsachkankichik, chaynaqa amañayá rimayllapas rimariychikchu huchapakuymantaqa chaynataq manaña rimana huchakunamantapas nitaq qollqella kuyaymantapas”. Yuyarinkitaqmi Filipenses 4:8 nisqantapas (leey). Hinaspam tapukunki: “¿Qatikuchkaymanchu tukuy imapi kasukuq Jesusta, qawanaypaq tanteasqay peliculawan sonqoytawan yuyayniyta qachacharuspay?”, nispa. ¿Imatataq rurawaq? ¿Qawawaqchu chay peliculata?

8. ¿Imataq pasanman imayna kawsanapaq Diospa kamachisqantawan paywan amistadninchikta mana cuidaptinchik?

⁸ Televisionpi maqanakuytawan huchapakuyta qawayqa otaq mana allin amistadkuna mana imanawananchikta piensayqa manam  allinchu, ¿imanasqa? Imayna kawsanapaq Diospa kamachisqantawan paywan amistadninchiktam yanqacharuchwan. Warmanchikkunatawan kikinchikpas cuidakunanchikmi Satanaspa toqllankunaman mana wichiykunapaq. Achka runakunam cuidakunku contagiakuq onqoykunamantaqa. Hinaptinqa, ¿manachu ñoqanchikpas cuidakunanchik ‘wateqawaqninchik Diablo’ mana urmachiwananchikpaq? (Efe. 6:11.)

9. ¿Imanasqam Jehová Diosta haykapipas kasukunanchik?

⁹ Sapa punchawmi tanteananchik imatapas rurananchikpaq. Salvakuyta munaspanchikqa Jehová Diostam kasukunanchik hinaspa kamachisqankunatapas respetananchik. Iñiyninchik cheqap kasqanta qawachinapaqqa, Jesuspa ejemplonta qatikuspam kasukunanchik wañunanchik kaptinpas. Diosta tukuy sonqowan kasukusqanchikqa manam yanqapaqchu kanqa. Jesusqa nirqam: “Kay pachapa tukupayninkama ñoqapi takyaqtam Diosqa salvanqa”, nispa (Mat. 24:13). Arí, kasukunapaqqa Jesus hinam valorchakuna (Sal. 31:24).

Jesusmi valorchakunapaq allin ejemploqa

10. ¿Imakunam hikutawanchik Diosmanta karunchawananchikpaq, hinaspa imatam rurananchik?

¹⁰ Mana allin ruraq runakunapa chawpinpi kasqanchikraykum, imayna kasqankuta hinaspa rurasqankuta mana qatipakunapaq valorchakunanchik. Runakunaqa tukuy rurasqankuwan, imayna kasqankuwan, apu kasqankuwan hinaspa religionninkuwanmi hikutawanchik Diosmanta karunchakunapaq. Achka cristianokunatam familianku harkan Dios servinankuta. Achka nacionkunapim, escuelakunapi astawanraq yachachichkanku tukuy imapas kikillanmanta rikurimusqanta, Diospi mana creeq runakunapas astawanmi yapakuchkan. Chaykunata atipanapaq hinaspa Diosmanta mana karunchakunapaqqa kallpanchakunanchikmi. Jesuspa ejemplonmi yachachiwanchik imayna atipanamanta.

11. ¿Imanasqataq kallpanchawanchik Jesuspa ejemplonmanta yachayqa?

¹¹ Qatiqninkunatam Jesus nirqa: “Kay pachapiqa ñakarinkichikmi ichaqa kallpanchakuychikyá, kay pachapi mana allinkunataqa venceruniñam”, nispa (Juan 16:33). Payqa manam atipachikurqachu mana allin ruraykunawanqa. Chaykunaqa manam predicanantaqa nitaq Diospa munasqanman hina kawsanantapas harkarqachu. Ñoqanchikpas manam harkachikunanchikchu. Diosta mañakuspanmi qatiqninkunamanta Jesus nirqa: “Ñoqaqa manam kay pachallapaqchu kani chaynataqmi paykunapas mana kay pachallapaqtaqchu”, nispa (Juan 17:16). Jesusmanta yachaspa hinaspa ejemplonpi yuyaymanaspaqa kallpanchasqam tarikusunchik mana allin kaqkunamanta karunchakunapaq.

Jesus hina mana manchakuq kasun

12-14. ¿Imakunata ruraspanmi Jesusqa mana manchakuq kasqanta qawachirqa?

¹² Predicasqanpiqa mana manchakuq kasqantam Jesusqa qawachirqa. Diospa Churin  kasqanraykum temploman yaykurqa “hinaspam qarqorqa chaypi rantikuqkunatawan rantiqkunata. Wikaparurqam qollqe cambiananku mesakunatapas chaynataq paloma rantikuqkunapa sillankunatapas” (Mat. 21:12). Manaraq wañukusqan tutam soldadokuna hamurqa Jesusta presochanankupaq, hinaptinmi payqa qatiqninkunata harkaspan nirqa: “Ñoqata maskawaspaykichikqa paykunataqa dejaychikyá pasakunankupaq”, nispa (Juan 18:8). Chaymantam Pedro espadanta horqoptin Jesusqa nirqa kutiykachinanpaq, chaynatam qawachirqa armakunapi mana confiasqanta aswanqa Diospi confiasqanta (Juan 18:11).

¹³ Mana manchakuspanmi Jesusqa qawachirqa religionpi punta apaqkunapa llullakusqankutawan mana allin rurasqankuta. Nirqam: ‘¡Imaynaraq kankichik iskay uya fariseokuna hinaspa Diospa leynin yachachiqkuna! Qamkunaqa Diospa munaychakusqanman yaykuqkunatam harkaypaq-harkachkankichik, [. . .] qonqarunkichikmi allin rurayta, kuyapayakuyta hinaspa iñiyniyoq kayta. [. . .] Qamkunaqa vasotawan platotam hawallanta mayllankichik, sonqoykichikmi ichaqa huntasqa kachkan suwakuy munaywan hinaspa mana allin ruray munaywan’, nispa (Mat. 23:13, 23, 25). Jesuspa qatiqninkunapas mana manchakuqmi kananku karqa, religionpi punta apaqkunam qatikachanmanku hinaspa wakintaqa wañuchinmanku karqa (Mat. 23:34; 24:9).

¹⁴ Demoniokunatapas Jesusqa manam manchakurqachu. Huk kutipim demoniokunapa ñakarichisqan runa asuykamurqa, paytaqa cadenawan wataspankupas manam harkayta atirqakuchu. Jesusmi ichaqa mana manchakuspan chay runamanta qarqorqa ñakarichiq demoniokunata (Mar. 5:1-13). Kunanqa chayna milagrota ruranapaqqa, manam Diosqa atiyta qowanchikchu. Ichaqa, predicaspa chaynataq runakunata yachachispam Satanaswan peleachkanchik, payqa mana iñiqkunapa ‘yuyayninkutam [. . .] tutayarachin’ (2 Cor. 4:4). Jesuspa hinam armanchikqa, manam aychaman hinallachu, “aswanqa Diospa atiynin hina armam, chayna armaqa tuñirachinmanmi murallasqa llaqtakunatapas” otaq pantasqa yachachikuykunata llumpay sapichasqa kaptinpas (2 Cor. 10:4). ¿Imaynatam chay armakunata servichikuchwan? Qawasun Jesuspa imayna servichikusqanta.

15. ¿Imanasqataq Jesusqa mana manchakuq karqa?

¹⁵ Jesusqa valorchakurqa manam hukkuna admirakunanpaqchu. Diospi iñisqanraykum mana manchakuqqa karqa. Ñoqanchikpas chaynam kananchik (Mar. 4:40). ¿Imaynatam cheqap iñiyniyoq kachwan? Kaypaqpas Jesusmi ejemplota qowanchik. Payqa Bibliapa nisqantam allintapuni reqsirqa hinaspa tukuy ima nisqanpim confiarqa. Jesuspa armanqa manam cheqap espadachu karqa, armanqa Diospa palabranmi. Yachachispanqa sapa kutim Diospa Palabranmanta rimaq. Chaymi rimayta qallarispanqa niq “Bibliam nin” nispa, hinaspam willaq Bibliapa mayqan libronpi kasqanmanta. *

16. ¿Imatam rurana iñiyninchik qaqa hina kananpaq?

¹⁶ Lliw cristianokunapaqmi pruebakunaqa kanqa, chaymi iñiyninchik qaqa hina kananpaq Diospa Palabranta sapa punchaw leena, estudiana hinaspa huñunakuykunamanpas rina. Chaynapim iñiyninchikta takyachiq  yachachikuykuna yuyayninchikpi kanqa (Rom. 10:17, NM). Chaymantapas yuyaymanananchikmi, yachasqanchikkuna sonqonchikpi allinta sapichakunanpaq. Iñiyninchik kaptillanmi mana manchakuspa Diospa munayninta rurasunchik (Sant. 2:17). Chaymantapas Diostam mañakunanchik chuya espiritunta qowananchikpaq, iñiyqa chuya espiritupa rurunmi (Gal. 5:22, NM).

17, 18. ¿Imaynatam Kitty sutiyoq sipas valorchakusqanta qawachirqa?

¹⁷ Kitty sutiyoq sipas cristianam cuentata qokurqa valorchakunanpaq iñiynin yanapasqanta. Warmacha kasqanmantam yacharqa mana penqakuspa ‘Jesucristomanta allin noticia willananmanta’, munarqataqmi escuelanpi estudiaqmasinkunaman predicaytapas (Rom. 1:16). Sapa watam predicayta munaq, ichaqa manchakusqanraykum mana predicaqchu. Sipaschaña kaspanmi huk llaqtaman estudiananpaq rinan karqa hinaspam nirqa: “Kunanqa estudiay qallarisqaymantam mana manchakuspay predicasaq”, nispa. Diostam mañakurqa valorchakunanpaq, yachayniyoq kananpaq hinaspa predicananpaqpas.

¹⁸ Estudiaq risqanpim, qallariq punchawpi sapakama willarqaku pi kasqankuta. Wakinkum willakurqaku religionniyoq kasqankuta ichaqa nirqakum mana cumplisqankumanta. Chaymi Kittyqa cuentata qokurqa chaypi predicananmanta. Rimananpaq tupaptinmi mana manchakuspa nirqa: “Jehová Diospa testigonmi kani hinaspam kallpanchakuni Bibliapa nisqanman hina kawsanaypaq”, nispa. Rimaptinmi wakin estudiaqmasinkuna burlakurqaku, wakinkum ichaqa uyarirqaku hinaspam chaymantaña tapukuykunata rurarqaku. Iñisqan defiendeypi allin ejemplo kasqantam profesorninpas nirqa, Kittyqa kusisqam tarikurqa Jesuspa mana manchakuq kasqan qatipakusqanmanta.

Jesuspa iñiyniyoq hinaspa valorchakuq kasqanta qatipakusun

19. a) ¿Imaynam cheqap iñiyniyoqqa? b) ¿Imaynatam Jehová Diosta kusichichwan?

¹⁹ Apostolkunam cuentata qokurqaku valorchakunankupaq iñiy necesitasqankumanta, chaymi Jesusta nirqaku: “Yanapaykuwayku astawan iñiyniyoq kanaykupaq”, nispa (leey Lucas 17:5, 6). Cheqap iñiyqa manam Diospa kasqanpi creeyllachu. Paypim confiananchik hinaspa taytanwan huk warmapa allin amistad rurasqanman hina paywan allin amistadta rurana. Salomonmi Diospa yanapakuyninwan kaynata qellqarqa: “Churilláy, yachayniyoq kaptikiqa sonqoymantam kusikusaq ñoqaqa. Diospa munasqanman hina rimaptikiqa tukuy sonqoywanmi kusikusaq ñoqaqa”, nispa (Pro. 23:15, 16). Chaynallataqmi Jehová Diosqa kusikunqa valorchakuspa kamachikuyninkunata kasukuptinchik, ñoqanchikpas aswanmi valorchakusun. Jesuspa ejemplonta qatikuspayá mana manchakuspa allin ruraykunata defiendesunchik.

[Willakuy]

¿Explicayta atiwaqchu?

• ¿Imataq yanapawasun pantaq kaptinchikpas kasukuq kanapaq?

• ¿Imaynatam cheqap iñiyqa qaqa hina takyanqa, hinaspa imaynatam yanapawanchik valorchakunapaq?

• ¿Imapim tukunqa Jesuspa kasukusqantawan valorchakusqanta qatipakuptinchikqa?

[Kay yachachikuypa tapukuyninkuna]

[13 kaq paginapi dibujo]

¿Preparakuchkankichu tentacionkuna kaptin atipanaykipaq?

[15 kaq paginapi dibujo]

Diospi iñisqanraykum Jesusqa valorchakurqa, chaynam ñoqanchikpas kananchik