Allin sapichasqa hinaspa allin cimientasqa kasunchik

¿RIKURQANKICHU sinchi wayrapa kuyuchisqan hatun sachata? Manam chayllaqa kumpakunchu. ¿Imanasqa? Allin sapichasqa kasqanraykum. Ñoqanchikpas atinchikmanmi chay sacha hina kaytaqa. “Allin sapichakusqa hina hinaspa ukuneqpi cimientasqa hina” kaspaqa, aguantaytam atisun sinchi wayraman rikchakuq sasachakuykunata (Efe. 3:14-17). ¿Imataq chay cimientoqa?

Bibliaqa willawanchikmi ‘cimientopa esquinanpi hapiq rumi’ Jesucristopi congregacion takyasqanmanta (Efe. 2:20; 1 Cor. 3:11). Nintaqmi: “Payman hapipakuspa kawsaychik. Yachachisqa kasqaykichikman hinayá allin sapichakuchkaq sacha hina iñiynikichikpi sumaqta takyaychik”, nispa. Kay consejota kasukuspaqa atisunmi aguantayta, runakuna yanqakunamanta ‘suma-sumaqllataña rimaspanku’ iñiyninchikta pruebaman churaptinku (Col. 2:4-8).

Anchontawan largonta, ukuntawan hatun kasqanta yachasun

¿Imaynatam iñiyninchikpi ‘allin sapichasqa’ hinaspa ‘sumaq takyasqa’ kachwan? Jehová Diospa Palabranta sapa kuti estudiaspam sacha hina allin sapichasqa kasun. Diosqa munanmi iñiqkunawan kuska Palabranpa ‘mayna ancho, mayna largo, mayna uku hinaspa mayna hatun’ kasqan entiendenanchikta (Efe. 3:18). Chaynaqa, manam pipas contentakunanchu Diospa Palabranmanta “facil kaqkunalla” yachasqanwanqa (Heb. 5:12; 6:1). Aswanqa llapallanchikmi munananchik Bibliapi sasa entiendena kaqkuna estudiaytaqa (Pro. 2:1-5).

Kaywanqa manamá nichkanchikchu iñiyninchikpi ‘allin sapichasqa’ hinaspa ‘allin takyasqa’ kanapaq Bibliamanta achkata yachanallamantachu. Satanaspas yachanmi Bibliapa nisqantaqa. Chaymi, ‘mana tupachiy atina Cristopa kuyakuyninmantapas’ yachananchik (Efe. 3:19). Jehová Diostawan cheqap yachayta kuyaspanchik estudiaptinchikmi, Bibliamanta tukuy ima entiendesqanchik iñiyninchikta kallpanchanqa (Col. 2:2).

 Mayna entiendesqaykimanta yachay

Tapukuy: “¿Entiendechkanichu Bibliamanta sasaniraq yachachikuykunata?”, nispa. Chayna tapukusqaykiqa ichapas yanapasunkiman aswan allinta estudianaykipaq. Ejemplopaq, Efeso llaqtapi iñiqkunaman Pablopa cartasqanpi qallariq versiculokunamanta yachasun,  “Efeso llaqtapi iñiqkunaman” niq recuadromanta. Chay versiculokunata leey hinaspa yana letrawan qellqasqakunapa ima nisqanmanta entiendesqaykipi piensay. Huk-hukmanta yachasun.

Akllasqam karqaku ‘manaraq kay pacha unanchasqa kachkaptin’

Pablom iñiqmasinkunaman kaynata qellqarqa: “[Diosmi] ñawpaqmantaraq munarqa Jesucristorayku churichakuykuwananchikpaq”, nispa. Jehová Diosmi wakin runakunata churichakuykurqa hanaq pachapi paywan kanankupaq. Paykunam Jesuswan kuska sacerdotekuna hinaspa reykuna kanqaku (Rom. 8:19-23; Apo. 5:9, 10). Diospa contranpi puntata rimaspanmi, Satanasqa nirqa runa mana cabal unanchasqa kasqanta. Chaymi kay Pachapi hinaspa hanaq pachapi mana allinkunata chaynataq chaykuna rikurichiq Diablotapas puchukachiypi yanapanankupaq, wakin runakunata Jehová Dios akllarqa. Diosqa ñawpaqmantaraqmi tantearurqa runakuna hanaq pachaman rispa Cristowan kamachimunankupaq, ichaqa manam nirqachu pikuna kanankumantaqa (Apo. 14:3, 4).

“Manaraqpas kay pacha unanchasqa kachkaptinmi” Diosqa akllawarqanchikña nispa Pablo qellqaspanqa, ¿imatam niyta munachkarqa? Manam nirqachu runakuna otaq kay Pacha manaraq unanchasqa kasqan  tiempomantachu. Dios manaraq unanchachkaspan mana kasukuq kanankupaq tantearuptinqa, ¿imaynamá Adanwan Evaqa rurasqankumanta huchayoq kanmanku karqa? Chaynata ruraspanqa, mana allin ruraqchá Diosqa kanman. Hinaptinqa, ¿haykapim Jehová Dios tantearurqa kamachisqanpa contranpi kaqkunata otaq Satanasta chaynataq Adantawan Evata puchukachinanpaq? Punta tayta-mamanchikpa huchallikusqanku qepallatam, ichaqa manaraq churi-wawayoq kachkaptinku, mayqan runapas huchanmanta pampachasqa kananpaq manaraq suyakuyniyoq kachkaptin.

‘Llumpa-llumpayta favorecewaspanchik’

Efeso llaqtapi cristianokunaman cartasqanpa qallariyninpim, Pablo rimarqa ‘llumpa-llumpayta favorecewaspanchik’ Diospa achka rurasqanmanta. ¿Imanasqataq chaynata nirqa? Runakunata librananpaq Jehová Dios mana obligasqa kasqanta qawachinanpaqmi.

Ima rurasqanchikwanpas manam librasqa kaytaqa atichwanchu. Ichaqa kuyawaspanchikmi Diosqa Churinta qomurqa librawananchikpaq. Pantaq hinaspa huchasapa kasqanchikpi piensaspaqa, Pablopa nisqanman hinam cuentata qokusun Dios ‘llumpa-llumpayta favorecewaspanchik’ librawasqanchikmanta.

Diospa rurananmanta pakasqa kaqkuna

Diosqa manam qallariypiqa willarqachu Diablopa tukuy mana allinkuna rurasqanta imayna allichananmantaqa, chayqa ‘pakasqam karqa’ (Efe. 3:4, 5). Tiempopa risqanman hinam 33 watapi Pentecostes fiesta pasayta, Jehová Diosqa reqsichirqa runakunapaq hinaspa kay Pachapaq munaynin imayna cumplikunanta. Pablom willawanchik “chaykunata rurananpaq” otaq qawananpaq ‘tiempo chayaramuptin’, kay Pachapi kaqkunatawan hanaq pachapi kaqkunatapas llapallanta Jehová Dios hukllawananmanta.

Chayna hukllawayqa qallarirqa 33 watapi Pentecostes fiestapim, chaypim Jehová Diosqa hanaq pachaman rinankupaq kaqkunata huñuyta qallaykurqa (Hech. 1:13-15; 2:1-4). Chaymantañam, kay Pachapi kawsanankupaq kaqkunata huñuyta qallaykurqa, paykunatam Jesucristo kamachinqa (Apo. 7:14-17; 21:1-5). “Chaykunata rurananpaq” otaq qawananpaq niq rimayqa manam Jesuspa Kamachimunanmantachu rimachkan, Munaychakuytaqa qallarirqa 1914 watapiñam. Aswanqa rimachkanmi hanaq pachapi hinaspa kay Pachapi kaqkuna huklla kanankupaq Diospa rurasqanmanta.

‘Yuyayniyoq runakuna hinayá piensasun’

Bibliata allinta estudiaspaqa cheqapmantam entiendesun ‘mayna ancho, mayna largo, mayna uku hinaspa mayna hatun’ kasqanmanta. Ichaqa, tukuy imakunawan afanasqa kasqanchiktam Satanasqa servichikunman Diospa Palabran estudiayta saqenanchikpaq. ¡Amayá saqesunchu munasqan ruranantaqa! Diospa ‘entendimiento’ qowasqanchiktam servichikuna ‘yuyayniyoq runakuna hina piensananchikpaq’ (1 Juan 5:20; 1 Cor. 14:20). Segurom kananchik imanasqa creesqanchikmanta, chaynapi ‘tapuwaptinchik clarota contestananchikpaq’ (1 Ped. 3:15).

¿Imatam rurawaq karqa Pablopa cartasqanta chayllaraq leekuptin Efeso llaqtapi kaspaykiqa? Kallpanchakuwaqchá karqa ‘Diospa Churinmanta’ astawan yachanaykipaq (Efe. 4:13, 14). Hinaptinqa, Bibliapa chayna nisqanwanyá yanapachikuy kunanpas chayta ruranaykipaq. Jehová Diosta kuyasqayki hinaspa Bibliamanta allin yachasqaykim, yanapasunki Jesucristopi allin sapichasqa chaynataq allin “cimientasqa” kanaykipaq. Chaynapim mana allinkunapa puchukaynin manaraq chayamuchkaptin, aguantayta atisun sinchi wayrawan hina Satanaspa imawanña pruebawasqanchikta (Sal. 1:1-3; Jer. 17:7, 8).

[27 kaq paginapi dibujo hinaspa recuadro]

 Efeso llaqtapi iñiqkunaman

“Diostayá yupaychasun, paymi Cristowan huklla kasqanchikrayku Espiritupa tukuy yanapakuyninkunawan favorecewarqanchik hanaq pachapiñapas kachkachwanchik hina. Manaraqpas kay pacha unanchasqa kachkaptinmi Diosqa Cristorayku akllawarqanchikña chaynapi paypa qayllanpi mana chikanpas huchayoq kaspa payllapaqña kawsananchikpaq. Kuyakuqllaña kaspanmi ancha munasqanman hina ñawpaqmantaraq munarqa Jesucristorayku churichakuykuwananchikpaq. Anchallataña favorecewaspanchik kuyasqan Churinrayku chaskiwasqanchikmantayá payta yupaychasun. Llumpa-llumpayta favorecewaspanchikmi Diosqa Churin Jesucristopa yawarninwan librawarqanchik otaq huchanchikkunata pampachaykuwarqanchik. Chay favorecewasqanchiktam llimparichirqa yachayniyoq hinaspa allin tanteaq kananchikpaq. Ñawpaqmantaraq pakasqa kaqkunatam otaq Cristontakama imam ruray munasqantam reqsiykachiwanchik. Chaykunata rurananpaq tiempo chayaramuptinmi kay pachapi kaqkunatapas chaynataq hanaq pachapi kaqkunatapas llapallanta Dios hukllawanqa, chaynataqa ruranqa chaykunapi Cristo munaychakunanpaqmi.” (Efesios 1:3-10.)