Amistadninchikta takyachisun mana kuyakuqkunapa kasqanpi

“Kaykunatamá kamachikichik qamkuna kuyanakunaykichikpaq.” (JUAN 15:17.)

1. ¿Imanasqataq punta pachak watapi cristianokunaqa amistadninkuta waqaychananku karqa?

MANARAQ wañukusqan tutam Jesusqa qatiqninkunata kallpancharqa paykunapura amistad kasqankuta waqaychanankupaq. Nirqataqmi kuyanakuptinku runakuna qatiqninkuna kasqanta yachanankumanta (Juan 13:35). Allinpunim karqa amistadninkuta waqaychayqa, pruebakunatam pasananku karqa hinaspa Jesuspas allin llamkaytam qonan karqa. Punta pachak watapi qatiqninkunaqa paypa nisqantam kasukurqaku, chaymi reqsisqa karqaku Diostawan iñiqmasinkuta kuyasqankupi.

2. a) ¿Ima ruranapaqmi kallpanchasqa kachkanchik, hinaspa imanasqa? b) Ima tapuykunatam kay estudiopi contestasun?

² ¡Maynatam kusichiwanchik chayna cristianokunapa kasqan llaqtapi tarikuyqa! Ñoqanchikpas kallpanchasqam kachkanchik Jesusta kasukuspa iñiqmasinchikta kuyanapaq. Paykunata kuyayqa manam facilchu, kay tukupay tiempopi kuyakuywan allin ruray manaña kasqanrayku (2 Tim. 3:1, 3). Achka runakunam amistadta ruranku interesraykulla. Cheqap cristianokunaqa manam chaynachu kananchik. ¿Imapim cheqap amistadqa sapichasqa kanan? ¿Imatam rurananchik allin  amistad kanapaq hinaspa amistadninchikta takyachinapaq? ¿Ima pasaptinmi manaña amistadñachu kachwan? Kay estudiopim kaykunamanta yachasun.

¿Imapim sapichasqa kanan allin amistadqa?

3, 4. ¿Imapim sapichasqa kanan allin amistadqa, hinaspa imanasqa?

³ Jehová Diostam kuyana amistadninchik takyananpaqqa. Salomonmi qellqarqa: “Vencerachikunmanmi chullalla runaqa ichaqa defiendekunmankum iskay runaqa. Manam facillataqa tipirunmankuchu kimsa pata qaytutaqa”, nispa (Ecl. 4:12). Imaynam kawchusqa waskaman huktawan yapanchik, chaynam Jehová Dioswan kimsa kaptinchikqa amistadninchik takyanqa.

⁴ Arí, Jehová Diosta mana kuyaqkunapas allin amistad tariytaqa atinmankum. Ichaqa, Diosta kuyaspa amistad kaymi wiñaypaqqa takyan. Ejemplopaq, mana acuerdopi kaptinkupas Bibliapa nisqanmi yanapan allichanankupaq. Diospa contranpi kaqkuna rakinayta munaptinkupas, amistadninkum yanapan mana saqenakunankupaq. Tukuy tiempopim, Jehová Diosta serviqkunaqa wañunanku kaptinpas iñiqmasinkuta mana qepancharqakuchu (leey 1 Juan 3:16).

5. ¿Imanasqam Rutwan Noemiy allin amistad karqaku?

⁵ Allin amistadqa kachwan Jehová Diosta kuyaq runakunawanmi. Yuyarisun Rutwan Noemiy imayna kasqankumanta, paykunapa amistadninku allin kasqanmantam Biblia willakun. ¿Imanasqataq amistadninku allin karqa? Rutmi contestan: “Maymi yachasqaykipim ñoqapas yachasaq [. . .], Diosnikipas ñoqapa Diosniymi kanqa [. . .]. Sichu kawsananchikkama qanmanta rakikuptiyqa Tayta Diosyá llumpayta castigawachun”, nispa (Rut 1:16, 17). Iskayninkum Jehová Diosta anchata kuyarqaku, chayraykum chayna sumaq amistad karqaku. Chaymi Dios bendecirqa.

¿Imaynatam allin amistadta rurana?

6-8. a) ¿Imatam rurananchik amistad rurasqanchik takyananpaq? b) ¿Imaynatam yanapawanchik amistadta ruranapaq ñoqanchikpa qallarisqanchik?

⁶ Allin amistad takyananpaqqa Diostam kuyana. Rutwan Noemiy imayna kasqankum, qawachin kaykunatawan ruranamanta: iskayninkum allin amistad kasqankuta waqaychananku hinaspa kikinkupa munasqankutapas saqenanku. Manam Diosta serviq familiapurapas kikillanmantachu amistadqa kanku, paykunapas kallpanchakunankum allin amistad kanankupaq. Qawasunchik allin amistad ruranapaq imakuna yanapawananchikmanta.

⁷ Ñoqanchik qallarisunchik. Romapi amistadninkunatam Pablo kallpancharqa ‘allinta chaskinakunankupaq’ (Rom. 12:13). ¿Imaynatam chayta rurachwan? Chaypaqqa hukkunapaqmi sapa kuti allinkunata rurananchik, mana ancha valorniyoqman rurasqanchik rikchakuptinpas. Manam chaytaqa pipas ruranmanchu ñoqanchikpa rantinchikpiqa (leey Proverbios 3:27). Chaskiykuq kasqanchiktaqa  qawachichwanmi iñiqmasinchikman imallatapas invitaykuspa. ¿Kallpanchakuwaqchu iñiqmasinchikkunata sapa kuti chaskiykunaykipaq?

⁸ Amistadtaqa ruranchikmantaqmi predicanapaq iñiqmasinchikkunata invitaspapas. Iñiqmasinchik predicaspan huk runaman tukuy sonqonmanta Jehová Dios kuyasqanta qawachiptinqa, ¿manachu astawan payta kuyanchik?

9, 10. ¿Ima ejemplotam Pablo qowarqanchik, hinaspa imaynatam qatipakuchwan?

⁹ Sonqonchikta kicharisun (leey 2 Corintios 6:12, 13). ¿Manachu pipas congregacionpi kanman amistadta ruranaykipaq? Chayna kaptinqa yaqapaschá amistad ruranaykipaq maskachkanki munasqayki runakunallata. Pablopa ejemplonpi piensariy. Payqa manachá piensarqachu mana judio kaqkunawan amistad ruraytaqa. Tiempopa pasasqanman hinam ‘mana judio kaqkunapaq [. . .] apostolnin karqa’ hinaspa sonqonta kicharirqa achka runakunaman willananpaq (Rom. 11:13).

¹⁰ Chaymantapas, Pabloqa manam wiñaymasillanwanchu amistadtaqa rurarqa. Huknin allin amistadninqa Timoteom karqa, paymantaqa aswan mozo hinaspa huk llaqtayoqmi karqa. Kay tiempopipas, achka mozo-sipaskunam allin amistadta rurarunku mayornin iñiqmasinkunawan. 20 watayoq Vanessa sutiyoq cristianam nin: “Kuyasqay amistadniyqa 50 wata masniyoqmi, paymanmi tukuyta willakuni wiñaymasiypas kanman hina. Payqa imayna kasqaypim haykapipas preocupakun”, nispa. ¿Imaynatam Vanessaqa chayna amistadta rurarurqa? Paymi nin: “Manam tiyaspachu suyarqani kikillan rikurinanta, chaypaqqa kallpanchakurqanim”, nispa. ¿Munanchikchu mana wiñaymasinchikkunawanpas amistad rurayta? Kallpanchakuptinchikqa Diosmi bendeciwasun.

11. ¿Imatam yachachiwanchik Jonatanpa Davidwan amistad kasqanku?

¹¹ Sonqomantam kuyananchik. Salomonmi kaynata qellqarqa: “Tukuy tiempopim cheqap amigoqa kuyakun. Sasachakuy tiempopipas wawqe hinaraqmi kuyakun”, nispa (Pro. 17:17). Kaynata qellqaspanqa, piensachkarqachá rey Saulpa churin Jonatanwan taytan Davidpa amistad kasqankupi (1 Sam. 18:1). Saulqa munarqam paypa rantinpi Jonatan rey kananta, paymi ichaqa respetarqa David rey kananpaq Diospa akllasqanta. Jonatanqa manam taytan Saul hinachu Davidta cheqnirqa. Manataqmi piñakurqachu David imayna atiendesqa kasqanmantaqa nitaq creerqachu paymanta llullakuspa Saulpa nisqantapas (1 Sam. 20:24-34). ¿Jonatan hinachu kanchik? ¿Kusikunchikchu amistadninchikkuna congregacionpi ima  llamkaytapas chaskiptinku? ¿Yanapanchikchu hinaspa consuelanchikchu sasachakuypi tarikuptinku? ¿Imaynam tarikunchik paykunamanta ima cuentotapas uyarispa? ¿Chayllachu creerunchik icha Jonatan hinachu kuyaspanchik defiendenchik?

¿Haykapim manaña amistadchu kananchik?

12-14. a) ¿Imata ruranankupaqmi tanteanku Biblia estudiaqkuna? b) ¿Imaynatam congregacionpi kaqkuna yanapachwan?

¹² Wakin kutipiqa, Biblia estudiaqkunam vidankupi cambiayta qallarispan tanteananku pikunam manaña amistadnin kananpaq, chayqa sasam kanman. Ichapas puntataqa amistadninkunawan achka tiempo imatapas ruraqku, ichaqa paykunapa mana allin rurasqanku mana allinninpaq kasqanmanta cuentata qokuspanmi karunchakunanpaq tantearunman (1 Cor. 15:33). Ichapas Biblia estudiaqqa chaynata ruraspan piensanman amistadnin traicionasqanta.

¹³ Chayna tarikuspaykiqa ama qonqaychu: cheqap amistadkunaqa kusikunqakum vidaykipi cambianaykipaq kallpanchakuptikiqa. Jehová Diosmantapas yachaytachá munanqaku. Ichaqa ‘mana allin rurayninkunapi manaña ruraysiptiki’ qanmanta ‘mana allinta rimaspankuqa’, qawachichkankum mana allin amistad kasqankuta (1 Ped. 4:3, 4). Chayna kaspankuqa paykunam traicionasunki, manam qamchu.

¹⁴ Paykuna qepanchasuptikiqa congregacionpim tarinki cheqap amistadkunata (Gal. 6:10). Chaynaqa, congregacionpi kaqkunam tapukunanchik: “¿Reqsinichu huñunakuyman hamuq Biblia estudiaqkunata? ¿Kallpanchanichu paykunaman asuykuspay?”, nispa.

15, 16. a) ¿Imatam rurananchik huknin amistadninchik Diosmanta karunchakuruptin? b) ¿Imaynatam qawachichwan Dios kuyasqanchikta?

¹⁵ Sasataqmi Diosmanta karunchakuspan congregacionmanta amistadninchik qarqosqa kaptinqa. Huk cristianam willawanchik kuyasqan amistadnin, Diosmanta karunchakuruptin imayna tarikusqanmanta: “Yaqa pipas wañukunman hinam hatun llakipi tarikurqani. Ñoqaqa piensarqanim Diosta servisqanpi allin kasqanta, ichaqa manam chaynachu kasqa. ¿Familianta kusichinallanpaqchu Diosta servirqa? Chaymi ñoqatapas yanapawarqa imayna kasqayta qawakunaypaq hinaspa imanasqa Jehová Diosta servisqaymanta tapukunaypaqpas”, nispa. ¿Imaynatam vencerqa chayna tarikusqanta? Paymi nin: “Jehová Diosmanmi willarqani imayna tarikusqayta. Chaymantapas Dios kuyasqayrayku servisqaytam qawachirqani, manam llaqtanpi amistadta qowasqanraykuchu”, nispa.

¹⁶ Dioswan amistadninchik hinalla kananpaqqa, manam kuskanchakunachu kay pachapi kaqkunata kuyaqkunawanqa. Santiagom qellqarqa: “¿Manachu yachankichik kay pachapi kaqkunallata kuyaruspaqa Diospa enemigon kasqaykichikta? Pipas kay pachapi kaqkunallata kuyaruqqa Diospa enemigonmi rikurirun”, nispa (Sant. 4:4). Dios kuyasqanchiktaqa qawachichwanmi payta kasukusqanchikrayku hukkunawan manaña amistad kaptinchik yanapawananchikmanta seguro kaspa (leey Salmo 18:25). Rimasqanchik cristianam nin: “Kaytam yacharuni: manam pitapas obligachwanchu Jehová Diosta nitaq ñoqanchiktapas kuyananpaqqa. Chayqa sapakamamantam”, nispa. Hinaptinqa, ¿imatam rurachwan tukuy sonqomanta Diosta serviqkunawan amistadninchikta takyachinapaq?

 Imatam rurachwan amistadninchik hinalla takyananpaq

17. ¿Imaynatam rimananku allin amistadkunaqa?

¹⁷ Amistadninchik takyananpaqqa sapa kutim rimananchik. Rutwan Noemiymanta, Davidwan Jonatanmanta hinaspa Pablowan Timoteomanta Bibliapi leespam yachanchik amistad kanankupaq respetowan rimay allin kasqanta. Hukkunawan imayna rimanamantam Pablo kaynata qellqarqa: ‘Kachiyoq [. . .] hinayá sumaqllaña kachun rimasqaykichikpas’, nispa. Kaynata qellqaspanqa “mana iñiq runakunawan” imayna rimananchikmantam Pablo nirqa (Col. 4:5, 6). Paykunata respetananchik kaptinqa, astawanraqchá congregacionpi amistadninchikkunataqa.

18, 19. a) ¿Imaynatam qawananchik amistadninchikkunapa consejonta? b) ¿Imatam yachachiwanchik Efesopi ancianokunapa ejemplon?

¹⁸ Qawasqanchikman hinaqa, allin amistadkunaqa respetowanmi rimananku. Ichaqa manam manchakunankuchu imam kaq rimaytaqa, allin amistadqa uyarikunqam. Yachayniyoq rey Salomonmi qellqarqa: “Miski asnaq aceitewan inciensom runapa sonqonta kusirichin. Kuyaqnin amistadninpa consejasqanmi runataqa kusirichin”, nispa (Pro. 27:9). ¿Chaynatachu qawanki amistadnikikunapa nisusqaykita? (Leey Salmo 141:5.) Sichu nisunkiman imapas rurasqaykimanta preocupasqa kasqanta, ¿imatam rurawaq? ¿Kuyasusqaykita piensaspachu agradecekuwaq icha piñakuruwaqchu?

¹⁹ Pablom allin amistad karqa Efeso congregacionpi ancianokunawan. Wakintaqa reqsirqachusmi cristiano kasqanku tiempomantaraq. Ichaqa, paykunawan manaña tupananta yachaspanmi chay kutipi huñunakusqankupi imam kaqta rimarqa. ¿Piñakururqakuchu chaypi kaq ancianokuna? Manam. Allintam chaskirqaku nisqantaqa, waqarqakuraqmi manaña tupanankumanta yacharuspanku (Hech. 20:17, 29, 30, 36-38).

20. ¿Imaynam allin amistadkunaqa kanku?

²⁰ Allin amistadkunaqa manam consejokunallatachu chaskikunku, paykunapas qonkum consejananku kaptinqa. Chaypaqqa yuyayniyoqmi kananchik, manam hukkunapa vidanpi chaqrukuytaqa munananchikchu. Cristianokunatam Bibliaqa niwanchik: “Ocupakuychik imapas ruranaykichikpi”, nispa (1 Tes. 4:11). Chaymantapas, ‘sapakamam Diosninchikmanqa cuentata qosunchik’ (Rom. 14:12). Ichaqa, wakin kutipim amistadninchikta kuyakuywan yuyarichina kanqa Diospa nisqanta (1 Cor. 7:39). Ejemplopaq, ichapas cuentata qokuwaq soltero amistadniki mana iñiqwan kayta munaspan amistad ruray qallaykusqanta. ¿Imatam rurawaq? ¿Manachu imatapas niwaq hinalla amistadniki kananrayku? Manachá. Allin amistadqa manam chaynaqa kananchu. ¿Imatam rurawaq consejasqaykita mana kasukuptinqa? Ancianokunamanmi willanayki, paykunam yachanku sasachakuypi kaqta imayna yanapayta. Chayta ruranapaqqa kallpanchakunam, ichaqa Jehová Dios kuyasqaykichikrayku amistad kaspaykichikqa manam unay tiempochu karunchasqa kankichik.

21. ¿Imatam wakinpiqa llapallanchik ruranchik, hinaspa imanasqataq congregacionpi allin amistadniyoq kayqa ancha allin?

²¹ (Leey Colosenses 3:13, 14.) Wakinpiqa amistadninchikkunam piñakurunku imapas rurarusqanchikmanta, hinaspam ñoqanchikmanta ‘quejakunku’ otaq willakunku. Wakinpiñataqmi paykuna sientirachiwanchik rurasqanwan otaq rimasqanwanpas. Santiagom nirqaña: “Llapallanchikmi achkaqpi pantaq kanchik”, nispa (Sant. 3:2). Allin amistadkunaqa manam imapipas mana pantanakuqkunachu, aswanqa pampachanakuy yachaqkunam. Arí, allin amistadkunaqa pampachanakunkum hinaspa sapa kutim rimanku. Chaynapim amistadninchikwan ‘kuyanakuyqa tukuy imatapas sumaqta allinyanachinqa’.

¿Imatam niwaq?

• ¿Imaynatam allin amistadta rurachwan?

• ¿Haykapim amistadninchikmanta karunchakunanchik?

• ¿Imaynatam takyachichwan allin amistadninchikta?

[Kay yachachikuypa tapukuyninkuna]

[18 kaq paginapi dibujo]

¿Imanasqam allin amistad karqaku Rutwan Noemiy?

[19 kaq paginapi dibujo]

¿Kallpanchakunchikchu hukkunata chaskiykunapaq?