Diospa espiritunpa yanapasqanyá tukuy sonqomanta serviychik

“Amayá qellaqa kaychikchu, tukuy sonqoykichikwanyá Señorninchikta serviychik.” (ROM. 12:11.)

1. ¿Imanasqam israelitakunaqa animalkunata kañaqku hinaspa ofrendakunatapas qoqku?

JEHOVÁ DIOSQA anchatam chaninchan serviqninkunapa kuyasqankutawan munayninta ruranankupaq kallpanchakusqankuta. Ñawpaq tiempopiqa, Moisespa chaskisqan Leypa nisqanman hinam israelitakunaqa animalkunata kañaqku hinaspa ofrendakunatapas qoqku. Chaytaqa ruraqku Diosta agradecekuspanku hinaspa huchanku pampachasqa kananpaqmi. Chayna ofrendakunata Dios manaña mañawaptinchikpas, Romapi iñiqkunaman Pablo cartasqanpim 12 capitulopi qawachin ofrendata hina Diosman qonamanta. Qawasunchikyá ima kasqanmanta.

Kawsachkaq ofrendata qosun

2. ¿Imatam cristianokunaqa rurananchik hinaspa imaynata?

² (Leey Romanos 12:1, 2.) Qallariqnin capitulokunapim Pablo qawachirqa hanaq pachaman riq cristianokunata mana huchayoqpaqña Dios chaskisqanta, chaynataqa chaskirqa iñisqankuraykum manam rurasqankuraykuchu (Rom. 1:16; 3:20-24). Hinaspam, 12 capitulopi nin Diosta agradecekusqanchikta qawachinapaq cristianokuna kallpanchakunanmanta. Puntatam ichaqa piensasqanchikta ‘tikrananchik’. ¿Imanasqa? Pantaq kaspanchikmi, ‘huchallikuspa wañunchik’ (Rom. 8:2). Chaymi ‘imayna piensasqanchikta mosoqyachinanchik’ otaq mana allin ruray munasqanchikta lliwta saqenanchik (Efe. 4:23). Chayta ruranapaqqa necesitanchikmi Diospa yanapakuyninta hinaspa chuya espiritunta, ichaqa kikinchikpas kallpanchakunanchikmi, piensaq kasqanchiktapas allintam servichikunanchik. Runakunapa millakuypaq rurasqankuta, mana allinkunawan kusikusqankuta hinaspa mana allin piensasqankuta mana qatipakunapaqmi kallpanchakunanchik (Efe. 2:1-3).

3. ¿Imanasqataq Diospa nisqankunata ruranchik?

³ Pabloqa kallpanchawanchiktaqmi piensaq kasqanchikta allinta servichikuspa “Diospa munasqanta, imam allin rurayta, imam agradonpaq kasqanta” yachanapaq. ¿Imanasqam Bibliata leenchik hinaspa leesqanchikpi sapa punchaw yuyaymananchik? ¿Imanasqam Diosta mañakunchik, huñunakuykunaman rinchik hinaspa Diospa Munaychakusqanmanta willanchik? ¿Ancianokuna niwaptinchikchu? ancianokuna yanapawaptinchik. Ichaqa, chaykunataqa ruranchik Dios kuyasqanchikta qawachinapaq espiritun yanapawaptinchikmi. Chaymantapas kikinchikmi yacharunchik chay rurayqa Diospa munasqan kasqanta (Zac. 4:6; Efe. 5:10). Cristiano kaspa imayna kawsasqanchik Diospa agradonpaq kasqanmanta yachaspam kusikunchik.

Imapas ruray atinanchikpaqmi Diosqa qowanchik

4, 5. ¿Imatam ancianokunaqa rurananku imapas ruray atinankupaq Diospa qosqanta servichikuspa?

⁴ (Leey Romanos 12:6-8, 11.) Pablopa nisqanman hinaqa ‘Diosmi atiyta qoykuwanchik imapas ruray atinanchikpaq’. Ejemplopaq, ancianokunamanmi qoykun rimapayaspa kallpanchanankupaq hinaspa imayna kamachikuyta yachanankupaq, chayta allinta ruranankupaqmi Diosqa kamachin.

 ⁵ Pablom nin Diosmanta yachachinankupaq hinaspa yanapanankupaqpas ancianokuna kallpanchakunankuta. ¿Maypi yanapanankumantam rimachkan? Chay capitulopi qallariq versiculokunam qawachin congregacionpi ‘yanapanankumanta’, chaypim congregacionta Pablo tupachin achka parteyoq ‘huk cuerpowan’ (Rom. 12:4, 5). Apostolkunam yaqa chayna yanapaymanta Hechos 6:4 nirqaku: “Ñoqaykuñataqmi Diosta chaylla-chaylla mañakuspa palabranta yachachisaqku”, nispa. Iñiqmasinkuta kallpanchaspankum ancianokunaqa yanapakunku. Arí, ancianokunaqa congregacionpi kaqkunatam ‘yanapanku’ Bibliawan yachachispanku. Paykunata yachachinankupaq hinaspa qawanankupaqmi yanapanqa estudiasqankuwan orakusqanku. Kallpanchakunankum imapas ruray atinankupaq Diospa qosqanman hina iñiqkunata ‘kusikuywan’ cuidanankupaq (Rom. 12:7, 8; 1 Ped. 5:1-3).

6. Kay estudiom horqosqa kachkan Romanos 12:11, ¿imatam rurananchik nisqanta kasukunapaq?

⁶ Pabloqa nirqataqmi: “Amayá qellaqa kaychikchu, tukuy sonqoykichikwanyá Señorninchikta serviychik”, nispa. Qallariypi hina kusikuywan Diosta manaña servisqanchikmanta cuentata qokuspaqa, imayna estudiasqanchikpim piensana hinaspa espiritunta Dios qowananchikpaq tukuy sonqonchikwan aswan mañakuna. Chaynapim Diosta kuyasqanchik chiriyaptinqa kaqmanta kusisqa servisunchik (Luc. 11:9, 13; Apo. 2:4; 3:14, 15, 19). Chuya espiritum punta cristianokunata kallpancharqa “Diospa admirakuypaq rurasqankunamanta” willanankupaq (Hech. 2:4, 11). Kunanpas yanapawasunmi tukuy sonqomanta Diosta servinapaq.

Humilde hinaspa kikinchikpi mana llumpay piensaq kasun

7. ¿Imanasqam humilde hinaspa kikinchikmanta mana llumpay piensaq kananchik?

⁷ (Leey Romanos 12:3, 16.) Imatapas ruraytaqa atinchik ‘Dios favorecewaptinchikmi’. Corinto llaqtapi iñiqmasinkunamanmi Pablo nirqa: “Tukuy ima rurasqaykuqa Diosmantam hamun”, nispa (2 Cor. 3:5). Chaymi rurasqanchikmantaqa haykapipas mana alabakunachu. Reqsikunanchikmi congregacionpi ima llamkay chaskisqanchikpas Diospa bendicionninwan kasqanta, manam ima ruray yachaq kasqanchikraykuchu (1 Cor. 3:6, 7). Pablom nirqa: “Amayá pipas piensachunchu kikillanmanta hatun tukuspaqa”, nispa. Allinmi kikinchikmanta allin piensayqa hinaspa Dios servisqanchikpi kusisqa tarikuypas. Ichaqa reqsikunanchikmi atisqanchikta otaq mana atisqanchiktapas, chaynapi rurasqallanchik allin kasqanta mana piensanapaq. Rurasqanchik allin kananpaqmi ‘yuyaymanaspa’ piensananchik.

8. ¿Imaynam kananchik mana ‘llumpay yachayniyoq’ kasqanchikta piensanapaq?

 ⁸ Manam alabakunachu imapas haypasqanchikmantaqa, chaytaqa ‘Diosmi [. . .] wiñachin’ (1 Cor. 3:7). Pablom nirqa Dios sapakamaman iñiyta ‘qowasqanchikmanta’. Chaymi wakinkumanta aswan allin kasqanchikta piensanamantaqa, yachananchik chayna iñisqankurayku imatapas haypasqankuta. Pablopa nisqanman hinaqa hukkunapaqpas ñoqanchikpaq hina piensaspam ‘huk sonqolla kawsananchik’. Huk cartanpipas nirqam: “Amayá envidiakuspaqa nitaq altotukuspaqa imatapas ruraychikchu, aswanqa humillakuspayá kikikichikmantapas aswan allinpaqraq wakinkunata hapiychik”, nispa (Fili. 2:3). Humildem kananchik iñiqmasinchikkuna aswan allin kasqankuta reqsikunapaqqa. Chayna kaspanchikmi mana piensasunchu ‘llumpay yachayniyoq’ kasqanchiktaqa. Diosta astawan serviqkunaqa aswan allin qawasqachá kanqaku, ichaqa llapanchikmi kusisqa tarikunanchik runakunapa qawasqanman hina mana ancha valorniyoq kaqkunata “humillakuspa” ruraspanchikqa (1 Ped. 5:5).

Congregacionpi huñulla kasun

9. ¿Imanasqataq hanaq pachaman riy suyaq cristianokunata Pablo tupachirqa cuerpopa partenkunawan?

⁹ (Leey Romanos 12:4, 5, 9, 10.) Pablom hanaq pachaman riqkunata tupachirqa cuerpopa partenkunawan, paykunaqa huñullam llamkanku uma kamachiptin (Col. 1:18). Imaynam cuerpopa partenpas achka hinaspa sapakama huk rurayniyoq, chaynam paykunapas achka kanku, ichaqa Umanku ‘Cristoman hukllawakuspankuqa chullallaña kanku’. Efesopi cristianokunamanpas yaqa chaynatam nirqa: ‘Kuyanakuspayá cheqapta rimasun aswan-aswan wiñaspa Cristoman rikchakuq kananchikpaq, payqa llapallan iñiqkunapa umanmi. Llapallan iñiqkuna cuerpon kaptinchikmi Cristo hukllanchawanchik, chaynataqa ruran cuerponpa partenkunata yanapanakunanpaq tinkinachkaq hinam, sapakamam rurananchikta allinta ruraspa kuyakuywan kallpanchakuspa sumaqta wiñananchik’ (Efe. 4:15, 16).

10. ¿Imatam reqsikunanku ‘sapaq ovejakunaqa’?

¹⁰ ‘Sapaq ovejakunaqa’ Cristopa cuerponpa parten mana kaspankupas, achkatam yachanmanku (Juan 10:16). Pablom nirqa Jehová Dios ‘tukuy imatapas Cristowan saruchisqanta. Hina Cristotataqmi llapallan iñiqkunapa uman kananpaqpas churaykun’ (Efe. 1:22). Sapaq ovejakunatapas yanapananpaqmi Diosqa Jesusta churarun. Paykunaqa Jesuspa ‘kapuqninkunam’ kanku, paykunata nanachikunanpaqmi Jesusqa ‘yuyayniyoq confianza sirvienteta’ churarun (Mat. 24:45-47). Chaymi reqsikunanku Cristo Uma kasqanta. Kasukunankutaqmi yuyayniyoq confianza sirvienteta, paykunapa rantinpi Diospa Llaqtanpi Punta Apaqkunata hinaspa ancianokunatapas (Heb. 13:7, 17). Tukuy kaykunam yanapan congregacion huñulla kananpaq.

11. a) ¿Imanasqam huñulla kanchik? b) ¿Imakunatawanmi Pablo nirqa?

¹¹ Huñullaqa kanku kuyanakuspankum, kuyanakuymi ‘tukuy imatapas sumaqta allinyanachin’ (Col. 3:14). Pabloqa Romanos 12 capitulopipas nirqam ‘cheqaptapuni kuyanakunapaq’ hinaspa ‘wawqe-panintin hina lliwchanchik sumaqllataña kuyanakunanchikpaqpas’. Chayna kaspanchikmi respetanakunchik. Pablom nin: “Respetanakuspayá wakinnikichikta imapipas aswan allinpaq hapiychik”, nispa. Ichaqa, manam iñiqmasinchikta llakipayaspachu saqerusun mana allin ruranankutaqa, kallpanchakunanchikmi congregacion limpio kananpaq. Kuyanakunamanta rimaruspanmi Pablo kaynatawan nirqa: ‘Mana allin kaqkunata cheqnispayá imapas allin kaqkunata ruraychik’, nispa.

Allintayá chaskinakusun

12. ¿Imatam yachachiwanchik Macedoniapi cristianokunapa ejemplon?

¹² (Leey Romanos 12:13.) Iñiqmasinchikta  kuyasqanchikmi kallpanchawasun atisqanchikman hina ‘imam necesitasqankupi yanapananchikpaq’. Wakchaña kaspanchikpas atichwanmi qokuykuq kaytaqa. Macedoniapi iñiqkunamantam Pablo nirqa: “Ancha sasachakuykunapi kachkaspankupas hatuntam kusikurqaku, ancha wakcha kachkaspankupas tukuy sonqonkuwanmi qorqaku. Qorqakuqa manam atisqallankutachu, aswanqa mana qoy atisqankutawanmi, ñoqapunim rikurqani tukuy sonqonkuwan qosqankutaqa. Anchatam ruegawarqaku qollqe chaskinaykupaq, yanapaytam munarqaku Jerusalen llaqtapi kaq wawqe-panikunata” (2 Cor. 8:2-4). Wakcha kaspankupas qokuykuqmi karqaku. Munarqakum Jerusalenpi necesitaq iñiqmasinkuman imallankutapas qoykuyta.

13. ¿Ima ninantaq Bibliapa kayna nisqanqa: “allintayá chaskiykuychik”?

¹³ “Allintayá chaskiykuychik” nisqanqa, griego rimaypiqa kikinchikmanta imatapas qonamantam nichkan. La Epístola a los Romanos nisqapim Cranfield sutiyoq runa chay textota kaynata tikran: “Pitapas chaskiykunapaq [. . .] maskay”, nispa. Bibliapa kayna nisqantaqa kasukuchwanmi mikunanchikpaq pitapas invitaspa, chaynatam kuyasqanchikta qawachisun. Cuenta qokuq kaptinchikqa, kanqam pitapas chaskiykunapaqqa. Ejemplopaq, mana qollqenchik kaptin otaq onqospanchik mikuy rurayta mana atispaqa, ¿yaqachu yaku timpullatapas qoykunchikman? Chayta ruraspapas chaskiykuqmi kanchik.

14. a) ¿Ima iskay rimaymantam tikrasqa kachkan “chaskiykuychik” niq rimayqa? b) ¿Imaynatam predicasqanchikpi huk nacionniyoq runakunaman kuyasqanchikta qawachichwan?

¹⁴ Pitapas chaskiykunapaqqa imayna kasqanchikmantam. Griego simipi “chaskiykuychik” ninanqa tikrasqam kachkan iskay rimaymanta: “kuyakuy” hinaspa “mana reqsisqa” niqmanta. ¿Imaynataq kanchik mana reqsisqanchikwan otaq huklaw nacionniyoqkunawan? Wakin cristianokunaqa allin chaskikuq otaq kuyakuq kasqankutam qawachinku predicasqanku lawpi huk nacionniyoq runakunata predicanankupaq huk idiomakunata yachaspanku. Manam llapanchikchu chaytaqa rurasun. Ichaqa atichwanmi Buenas nuevas para gente de todas las naciones nisqa folletowan predicayta, chaypiqa achka rimaykunapim Bibliamanta yachachikuy kachkan. ¿Haykapipas kay qellqata servichikusqayki allinpi tukurqachu?

 Hukkunapa sientisqanta sientisun

15. ¿Imaynatam Romanos 12:15 nisqanman hina Jesusqa hukkunapa sientisqanta sientirqa?

¹⁵ (Leey Romanos 12:15.) Pablopa kaypi consejo qosqanmi qawachiwanchik hukkunapa sientisqanta sientinapaq. Entiendenanchikmi hukkunapa imayna sientekusqankuta, kusikuyninkuta otaq llakikuyninkutapas. Espirituman hina kallpanchakuptinchikqa, hukkunam cuentata qokunqaku nanayninkumanta llakikusqanchikta, allinkuna pasasqankumanta kusikusqanchiktapas. Jesusmi chayna karqa. Payqa kusikurqam predicasqankumanta qatiqninkuna kusikuptinku. Predicasqanku allin kasqanmanta willakuptinkum ‘chuya espiritupa yanapakuyninwan kusikurqa’ (Luc. 10:17-21). Amistadnin Lazaro wañukuptinñataq waqaqkunawan waqarqa (Juan 11:32-35).

16. ¿Imaynatam hukkunapa sientisqanta sientichwan hinaspa pikunam aswanqa chayta rurananku?

¹⁶ Jesusta qatipakuspam iñiqmasinchikkunapa kusikuyninkumantawan llakikuyninkumanta sientinanchik. Llakisqa tarikuq iñiqmasinchiktaqa yanapanmanmi pacienciawan uyarisqanchik hinaspa pay hina kasqanchikpi piensaypas. Arí, wakin kutipim llumpay llakisqa tarikusqankuwan waqasunchik (1 Ped. 1:22). Ancianokunam aswanqa kallpanchakunanku Pablopa consejo qosqanta kasukuspa hukkunapa sientisqanta sientinankupaq.

17. ¿Imakunamantam kunankama yacharunchik Romanos 12 capitulopi? ¿Imamantam yachasunchik qatiqnin estudiopi?

¹⁷ Romanos libropa 12 capitulomanta kunankama yachasqanchikqa allinpunim kawsakuyninchikpaq hinaspa iñiqmasinchikkunawan allin kanapaqpas. Qatiqnin estudiopim yachasunchik chay capitulopa qatiqnin versiculokunamanta, chaypim qawachichkan mana iñiq hinaspa contranchikpi churakuq runakunawan imayna kananchikmanta.

Yuyarinapaq

• ¿Imaynatam qawachisun Diospa espiritunman hina rurasqanchikta?

• ¿Imanasqataq Diosta servinanchik humilde hinaspa kikinchikpi mana llumpayta piensaspa?

• ¿Imaynakunatam iñiqmasinchikpa sientisqanta sientichwan?

[Kay yachachikuypa tapukuyninkuna]

[4 kaq paginapi dibujokuna]

¿Imanasqataq Diospa nisqankunata ruranchik?

[6 kaq paginapi dibujo]

¿Imaynatam huk nacionniyoq runakunaman yachachichwan Diospa Gobiernonmanta?