Familiawan Diosta yupaychayqa allinpunim mana wañunapaq

¡PIENSARIY, mayna manchakuypaqchá kanqa ‘tukuy atiyniyoq Diospa punchawninpi guerraqa’! (Apo. 16:14.) Willakuq Miqueasmi manchakunapaq rikchanachiywan kaynata nirqa: “Ninapi vela chulluchkaq hinam [. . .] orqokunapas chullurunqa. Waqtakunapi mastarikuchkaq yakukuna hinam qechwa wayqokunapas mastarikunqa”, nispa (Miq. 1:4). ¿Imataq pasanqa Jehová Diosta mana yupaychaqkunata? Wañuchisqam kanqaku. Bibliam nin: “Kay pachapa cantonmanta huknin cantonkamam wischurayanqaku. Tayta Diospa wañuchisqan runakunam wischurayanqaku”, nispa (Jer. 25:33).

Chayraykum lliw tayta-mamakuna tapukunmanku: “Yuyayniyoqña warmaykuna, ¿pasanqakuchu chay manchakuypaq punchawta?”. Bibliapa nisqanman hinaqa pasanqakum, ichaqa hayka watayoq kasqankuman hina Dioswan allin amistad kaspankum (Mat. 24:21).

¿Imanasqam ancha allin familianchikwan Bibliata estudiayqa?

Tayta-mamakuna, kallpanchakunaykichikmi Jehová Diospa “yachachikuyninman hina” churi-wawaykichikta uywanaykichikpaq (Efe. 6:4). Allinpunimá warmakunawan Bibliata estudiayqa. Munanchikmi warmanchikkuna Filipos llaqtapi cristianokuna hina kanankuta, paykunatam apostol Pablo alabarqa sonqonkumanta Jehová Diosta kasukusqankurayku. Nirqam: “Kuyasqay wawqe-panillaykuna, qamkunawan kaptiymi tukuy tiempo kasuwarqankichik, chaynayá karupi kachkaptiypas aswanraq kasuwaychik. Manchakuywan hinaspa respetowanyá salvasqa kasqaykichik qespichiypi riychik”, nispa (Fili. 2:12).

¿Jehová Diosta kasukunkuchu warmaykikuna sapallanku kaspanku? ¿Imaynatam escuelankupi portakunku? ¿Imaynatam yanapawaq sapallanku maypi kaspankupas Diospa kamachikuyninkunata kasukunankupaq?

Familiawan Diosta yupaychayqa, warmaykikunapa iñiynintam allintapuni kallpanchanman. Chaypaqyá qawasunchik kimsa yanapakuykunata.

Sapa semana Bibliata estudiay

Bibliam willawanchik akllasqa punchawkunapi Jehová Dios angelninkunawan huñunakusqankuta (Job 1:6). Qampas chaynatam rurawaq. Akllay ima punchawpi hinaspa ima horapi Familiaykiwan Diosta Yupaychanaykipaq, hinaspa cumpliypuni. Chaymatapas akllawaqtaqmi imapas pasaruptin chay semanallapi huk punchawpiña estudianaykichikpaq.

Ichaqa cuidakunaykim, tiempopa risqanman hinam sapa semana familiantin estudiasqaykichikta saqeruwaqchik. Ama qonqaychu, wawa-churikikunatam astawan Bibliamanta yachachispa yanapanayki, paykunatam Satanasqa astawan pantarachiyta munachkan (1 Ped. 5:8). Familiawan Diosta yupaychasqanchikpa rantinpi televisionta qawaspaqa otaq yanqa ruraykunapi kaspaqa, Satanaswanmi atiparachikusun (Efe. 5:15, 16; 6:12; Fili. 1:10).

Yanapawananchikpaq hina ruray

Familiantin estudiayqa manam yachanallapaqchu, yanapawananchiktaqmi vidanchikpi. ¿Imatam chaypaq rurawaq? Ichapas estudiawaqchik chay punchawkunallapi warmaykichikkuna ima sasachakuypi tarikunankumanta. Chaymantapas yanapawaqchikmi imayna predicanankupaq. Yuyariytaq  mozo-sipaskunataqa gustanmi imapas ruray atisqanku. Chaymi imayna predicanankupaq otaq predicaspa sasachakuykunata imayna atipanankupaq ensayaptikichikqa, confianzawanmi predicanqaku (2 Tim. 2:15).

Ensayawaqchiktaqmi wawa-churikichikkunata estudiaqmasinkuna mana allinkunata ruranankupaq hikutaptinku ima ninankupaq. Chaypaqmi yanapasunki Lo que los jóvenes preguntan. Respuestas prácticas (volumen 2) niq libropa 15 capitulon. Tarinkitaqmi 132 hinaspa 133 paginankunapi sumaq yanapakuykunatapas. Chaypim mozo-sipaskunata piensachin imapaqpas hikutasqa kaspanku ima ruranankupaq hinaspa imayna kutichinankupaqpas. Chay 133 paginanpa tukuyninpim mozo-sipaskunata kallpanchan familianwan otaq confiasqan iñiqmasinwan ensayanankupaq. Hinaptinqa allinmi kanman wakinpiqa kaykunamanta familiawan Diosta yupaychasqaykichikpi ensayayqa.

Familiawan Diosta Yupaychanapaq Tutaqa, tayta-mamakunatam yanapan wawa-churinkuna Dios servisqankupi ñawpariyninku ancha allin kasqanta yachachinankupaq. Lo que los jóvenes preguntan (vol. 2), libropa 38 capitulonpi “¿Qué haré con mi vida?” niq yachachikuypim allin yanapakuy kachkan. Chayta estudiaspaykichik yanapaychik Dios serviy aswan allin kasqanta entiendenankupaq. Kallpanchay precursor kanankupaq, Betelpi servinankupaq, Escuela de Entrenamiento Ministerial nisqaman rinankupaq otaq hukkunapipas Diosta astawan servinankupaq.

Ichaqa wakin tayta-mamakunam wawa-churinku Dios serviyninkupi ñawparinankuta munaspanku, kunan allin rurasqankumanta kallpanchayta qonqarunku. Allinmá precursor kanankupaq, Betelpi servinankupaq, misionero kanankupaq hinaspa chayman rikchakuqkunapi servinankupaq warmakunata kallpanchayqa. Ichaqa yuyariy, chaykunata haypanankupaq llumpayta hikutaptikiqa hukmanyarunmankum (Col. 3:21). Tukuy haypasqankumanta cuentata qokuspayki alabay, ama mana rurasqallantaqa qawaychu. Yuyariy paykunaqa Jehová Diostam servinanku kuyasqankurayku, manam qamraykuchu (Mat. 22:37). Jehová Diospa tukuy rurasqankunata chaninchanankupaq yanapay hinaspa Dios kuyayninku kallpanchachun servinankupaq.

Kusikunankupaq hina ruray

Chaymantapas kay estudio allinta familiaykita yanapananpaqqa, llapallankum estudiaspanku kusikuyta tarinanku. ¿Imaynatam chayta rurawaq? Yaqapaschá Jehová Diospa llaqtanpi rurasqa dramakunata familiaykiwan uyariwaq otaq videokunatapas qawawaq. Chaymantapas kuskam Bibliata leewaqchik hinaspam sapakamaman niwaq mayqan versiculokunata leenankupaq.

Llaqta Cuidaq hinaspa ¡Despertad! revistakunapim allin yanapakuykuna kachkan familiantin estudianapaq. Ejemplopaq, ¡Despertad! revistapa 31 paginanpim kachkan “¿Qué respondería usted?” niq yachachikuy. Chaynataq predicanapaq kaq Llaqta Cuidaq revistapim  wakinpiqa lloqsimun “Mozo-sipaskunapaq” niq yachachikuy, chaypim kallpanchan astawan estudianapaq, chaymantapas warmakunapaq hinam kachkan “Tayta-mamakuna warmaykichikta yachachiychik” niq yachachikuypas.

Sichu warmaykikuna mozo-sipasña kaptinqa yanapasunkim ¡Despertad! revistapi lloqsimuq “Los jóvenes preguntan” niq yachachikuykuna, hinaspa Lo que los jóvenes preguntan (vol. 2) niq libropas. Kay librota estudiaspaykiqa ama qonqaychu sapa capitulopa tukuyninpi; “Y tú, ¿qué piensas?” niq recuadrota estudiaytaqa, chayqa manam yuyarinallapaqchu kachkan, aswanmi tayta-mamakunata yanapan warmankuwan parlanankupaq.

Ichaqa amayá llumpaytaqa tapupayaychu. Amataqyá obligaychu “Tus reflexiones” nisqapi qellqasqankuta llapanku uyarinanpaq hina leenankupaqqa. Chay libropa 3 paginanpim tayta-mamakunata kallpanchan, libropi warmankupa qellqasqankuta mana leenankupaq. Chayta respetaptinkuqa yaqapaschá warmakunaqa kikinkumanta willakunqaku ima qellqasqankuta.

Amayá qonqaychu, Jehová Diosqa bendecisunkim tukuy yachamusqanchikman hina ruranaykipaq kallpanchakuptikiqa. Jehová Diosta familiantin kaynata yupaychayqa allinpunim llapallankupa iñiyninku kallpanchasqa kananpaq.

[31 kaq paginapi recuadro]

Ingeniakuspa yachachiy

“Wawaykunawan estudiaspaykum qosaywan huñunakuypaq yachachikuykunata preparakuniku, hinaspam warmachaykunatapas niniku yachasqankumanta dibujanankupaq. Wakinpiñataq Bibliapa willakuyninkunamanta actuaq kaniku otaq predicanaykupaq ensayaq kaniku. Hayka watayoq kasqankuman hinam kusirikunankupaq chaynata rurarqaniku.” (J. M., Estados Unidos.)

“Estudiachisqayku señorapa wawantam yachachiyta munarqaniku ñawpaq tiempopi wankusqa rollokunata imayna servichikusqankumanta. Chaymi computadorawan Isaias libropa lliw nisqanmanta rollota rurarqaniku, mana capituloyoqta chaynataq mana versiculoyoqta. Hinaspam chay papelkunata gomawan tupanarachispa sapa law patanman tubota laqarurqaniku. Warmachaman qospaykum nirqaniku Nazaret templopi Jesuspa rurasqanman hina rurananpaq. Lucas 4:16-21 nisqanman hinaqa, Jesusmi Isaias librota kichaykuspan maskasqanta tariruspan leerqa (Isa. 61:1, 2). Warmacham ichaqa llumpayta sasachakurqa chay rollo hatun kasqanrayku. Chayñam musyakururqa rollokunata Jesucristo allintapuni reqsisqanta. Admirakuspanmi nirqa: ‘¡Jesus hinaqa manam pipas kanchu!’, nispa.” (Y. T., Japón.)

[30 kaq paginapi dibujo]

Ensayayqa warmaykikunatam yanapanqa, mana allinkunapaq hikutaptinku ima ninankupaq

[31 kaq paginapi dibujo]

Kallpanchakuy Familiawan Diosta Yupaychanapaq Tuta kusikunapaq hina kananpaq