Leeqkunapa tapukuyninkuna

¿Imatam yachachiwanchik Proverbios 24:27 nisqan?

Mozokunatam Proverbios libro kaynata nin: ‘Wasikimanta hawapi arreglay ruranaykikunata. Tukupay chakraykipi llamkaynikikunata. Chaymantañam ruranki wasikita’, nispa. ¿Imatam kaywan nichkan? Qariqa yachananmi casado kaspan ima ruranankunata, preparasqataqmi kanan manaraq casarakuchkaspan.

Kay versiculopa ima ninanmantam wakin kutikunapi kaynata nirqaku: qosaqa familianta mantienespanpas preocupakunanmi familianta kallpanchananpaq hinaspa Diosmantawan Bibliamanta yachachinanpaqpas nispa. Qosakuna chaynata ruranankupaq Biblia kamachiptinpas, manachusmi chaymantachu kaypiqa rimachkan. ¿Imanasqataq chaynata ninchik? Qawasunchikyá.

Puntataqa, hebreo rimaypi wasikita “rurakunki” nispanqa: wasi “hatarichiymanta” hinaspa rikchanachiywanmi rimachkan casarakuymantawan warmayoq kanamanta. Chaymi wasi ruranamanta proverbios libro nispanqa, chayllaraq familiayoq kanamanta rimachkan, manam familiayoqña kaspa kallpanchanamantachu.

Chaymantapas kay versiculoqa qawachichkanmi imatapas ordenninpi ruranamanta. Kaynatapas nichkanman hina: “Puntataqa kayta ruray chaymantañam waktaqa”, nispa. Kaywanqa manam nichkanchu Dioswan allin kanamantaqa familiata mantienenapaq kaqtaraq puntata maskanamantachu.

Ñawpaq tiempopiqa wasita ruray munaq otaq casarakuyta munaq qariqa manaraq casarakuchkaspanmi tapukunan karqa: “Señoray hinaspa churiykuna kaptin, ¿preparasqachu kachkani mantienenaypaq?”, nispa. Manaraq casarakuchkaspanmi chakranpi llamkanan karqa. Chaymi La Palabra de Dios para Todos sutiyoq Bibliaqa chay versiculota kaynata tikran: “Manaraq wasikita rurachkaspa chakraykipi llamkay chaynataq ruranaykikunata arreglay”, nispa. ¿Hinallachu kasukuna Bibliapa kayna nisqanta?

Arí kasukunam. Casarakuy munaq qariqa preparasqam kanan casarakuspan rurayninkunata cumplinanpaq. Llamkananmi, onqospallachá manaqa. Chaymantapas familiantam tukuypi atiendenan, Bibliam nin qariqa familianta mantienenanpaq, kusirichinanpaq hinaspa Diosmanta yachachinanpaqpas, chaykunata mana ruraspanqa mana iñiq runamantapas aswan mana allinmi kanman (1 Tim. 5:8). Casarakuspa familiayoq kayta munaq mozoqa tapukunanmi: “¿Preparasqachu kachkani familiayta mantienenaypaq? ¿Preparasqachu kachkani familiaypi uma kaspay Diospa nisqanta cumplinaypaq? ¿Atisaqchu familiaywan Bibliata sapa semana estudiayta?”, nispa. Bibliaqa sutillatam qawachin chayna tapukuyqa ancha allin kasqanta (Deu. 6:6-8; Efe. 6:4).

Yachamusqanchikman hinaqa, casarakuy munaq qariqa allintam tanteanan Proverbios 24:27 nisqanpi. Warmipas tapukunanmi: “¿Atisaqchu casada kaspay ima rurayninkunata cumpliyta hinaspa warmakuna uywaytapas?”, nispa. Wawa-churiyoq kayta piensaspankupas tapukunankum: “¿Preparasqachu kachkanchik?”, nispa (Luc. 14:28). Casarakunapaq Diospa nisqanta kasukuymi sasachakuykunamanta harkan hinaspa yanapan ayllupi kusikuy kananpaq.

[12 kaq paginapi suti rikuylla kaq willakuy]

¿Imakunatam tapukunan casarakuyta piensaq mozo-sipas?