“Qamkunaqa kankichik amistadniykunam”

“Qamkunaqa kankichik amistadniykunam kamachisqayta ruraspaykichikqa.” (JUAN 15:14.)

1, 2. a) ¿Imaynatam yachanchik Jesuspa amistadninkuna mana chaynalla kasqankuta? b) ¿Imanasqataq Jesuspa amistadnin kayqa ancha allin?

JERUSALENPIM Jesusqa apostolninkunawan wasipa altosninpi yuyarichkarqaku Pascuata. Paykunaqa manam chaynallachu karqaku. Pedrowan wawqen Andresqa challwaqmi karqaku. Mateoñataq impuestokuna cobraq karqa, judiokunaqa chayna llamkaytaqa manam allintachu qawaqku. Jacobowan Juanqa warma kasqanmantaraqmi Jesustaqa reqsirqaku, Natanaelmi ichaqa chayraq reqsirqa (Juan 1:43-50). Chayna kaspankupas, llapankum seguro karqaku Jesusqa Diospa Churin kasqanmanta (Juan 6:68, 69). Maynatachá sonqonkupi kusikurqaku Jesuspa kayna nisqanta uyarispanku: “Qamkunaqa amistadniyñam kankichik chaymi Taytapa niwasqankunata yachachirqaykichik” (Juan 15:15).

² Jesuspa kayna nisqanqa manam kasukuq apostolkunallapaqchu, allinmi hanaq pachaman riy suyaqkunapaqwan ‘sapaq ovejakunapaqpas’ (Juan 10:16). Cristianokunaqa manam chaynallachu kanchik, ichaqa lliwmi Jesuspa amistadnin kachwan. Kayqa ancha allinmi, Jesuspa amistadnin kaspaqa Jehová Diospa amistadninmi kachwan. Manam atinchikmanchu Dioswan amistad ruraytaqa Churinwan mana amistad kaspanchikqa (leey Juan 14:6, 21). ¿Imatam rurananchik Jesuspa amistadnin kanapaq hinaspa chay amistadninchik wiñaypaq kananpaq? Manaraq kay tapukuyta contestachkaspam, Jesus imayna amistad kasqanmanta yachasun hinaspa qatiqninkuna paywan imayna kasqankumantapas.

Jesusqa allin amistadmi

3. ¿Pikunapa amistadnintam Jesusqa maskarqa?

³ Ancha yachayniyoq rey Salomonmi qellqarqa: “Achkallaña runakunam kuyan apu runataqa”, nispa (Pro. 14:20). Chaynamá, runakunaqa imatapas chaskinankupaqmi amistadta ruranku, manam imatapas qonankupaqchu. Jesusqa manam chaynachu karqa. Payqa manam qawaqchu runakunapa reqsisqa otaq qollqeyoq kasqankutaqa. Arí, kuyarqam kamachiq apu mozota hinaspam nirqa qatiqnin kananpaq. Nirqataqmi tukuy kapuqninkunata rantikunanpaq hinaspa wakchakunata yanapananpaqpas (Mar. 10:17-22; Luc. 18:18, 23). Ichaqa, manam apu otaq reqsisqa runakunawanchu Jesusqa amistadta rurarqa, aswanqa mana allin qawasqa hinaspa wakcha runakunawanmi rurarqa (Mat. 11:19).

4. ¿Imakunatam pantaq kaspanku Jesuspa amistadninkuna rurarqaku?

⁴ Jesuspa amistadninkunaqa pantaq runakunaman karqaku. Ejemplopaq, huk kutipim Pedro rurarqa mana iñiyniyoq runa hina (Mat. 16:21-23). Jacobowan Juanmi paykunallapi piensaspanku Jesusta nirqaku kamachimuptin alleqninpi hinaspa ichoqninpi tiyanankupaq, chaymi wakin apostolkuna piñakurqaku. Achka kutitam mayqan aswan reqsisqa kasqankumanta atipanakurqaku. Jesusmi ichaqa pacienciakuq, chaymi kuyakuywan sapa kuti corregirqa (Mat. 20:20-28).

5, 6. a) ¿Imanasqataq yaqa lliw apostolninkunawan Jesuspa amistadninqa hinalla karqa? b) ¿Imanasqam Judaswanqa Jesus manaña amistadchu karqa?

⁵ ¿Imanasqataq Jesusqa amistad karqa  apostolninkunawan? Manam pantasqankuta mana qawaspanchu nitaq munasqankuta ruranankupaq saqespanchu, aswanqa allinkuna rurasqankuta hinaspa imanasqa rurasqankuta yachasqanraykum. Ejemplopaq, Jesuspa wañukunan tutam payta yanapanankupaq rikchasqalla kananku karqa Pedro, Jacobo hinaspa Juan, ichaqa puñururqakum. Jesusqa llakikurqam, ichaqa entienderqam pantaq kaspanku rurasqankuta. Chaymi nirqa: “Allin rurayta munaptikichikpas cuerpoqa mana kallpayoqmi kachkan”, nispa (Mat. 26:41).

⁶ Judas Iscariotewanmi Jesusqa manaña amistadchu karqa. ¿Imanasqa? Allin amistadman Judas rikchakuptinpas, Jesusqa cuentatam qokurqa mana allinllaña sonqonpi kasqanta. Kay pachapi kaqkunallata kuyaruspanmi Judasqa Diospa enemigonña rikurirurqa (Sant. 4:4). Chaymi Jesusqa 11 apostolninkunata amistadnin kasqanmanta manaraq nichkaspan, Judasta nirqa lloqsinanpaq (Juan 13:21-35).

7, 8. ¿Imaynatam Jesus qawachirqa amistadninkuna kuyasqanta?

⁷ Jesusqa amistadninkunapa pantasqallankuta qawananmantaqa, paykunapa allinninpaqmi imatapas rurarqa. Ejemplopaq, Taytantam mañakurqa pruebakunapi kaptinku waqaychananpaq (leey Juan 17:11). Piensarqataqmi ima necesitasqankupipas (Mar. 6:30-32). Manam payllachu rimarqa, paykunatapas uyarirqam chaynataq yachaytapas munarqa piensasqankumantawan imayna sientekusqankumanta (Mat. 16:13-16; 17:24-26).

⁸ Jesusqa amistadninkunapaqmi kawsarqa hinaspa wañurqapas. Payqa yacharqam Taytanpa allin ruraq kasqanman hina vidanta qonanmanta (Mat. 26:27, 28; Heb. 9:22, 28). Chaytaqa rurarqa kuyakuq kaspanmi. Nirqam: “Hatu-hatun kuyakuyniyoqqa amistadninkunapa rantinpi wañuqmi”, nispa (Juan 15:13).

¿Imaynataq qatiqninkuna karqaku Jesuspa amistadninwan?

9, 10. ¿Imaynataq runakuna karqaku Jesuspa kuyasqanwan hinaspa qokuykuq kasqanwan?

⁹ Jesusqa runakuna kuyasqantam qawachirqa tiemponta hinaspa kapuqninkunata qospan, chayraykum paykunapas asuykurqaku hinaspa pay hina qoyta munarqaku (Luc. 8:1-3). Kikinpa rurasqanman hinam Jesusqa kaynata nirqa: “Qoychikyá runamasikichikman chaynapi Dios qosunaykichikpaq. Qoptikichikqa chanin tupupim ñiti-ñitirispa hinaspa taspi-taspirispa llimparichkaqta kutichipusunkichik. Runakunawan imapas rurasqaykichikman hinam Diospas qamkunawan ruranqa”, nispa (Luc. 6:38).

¹⁰ Arí, wakin runakunaqa Jesustam maskarqaku imatapas chaskinallankupaq. Huk kutipim  amistadninman rikchakuq runakuna, confiananku kachkaptin nisqanta mana entiendespanku hinaspa mana allinta piensaspanku Jesusta saqerurqaku. Apostolkunam ichaqa mana saqerqakuchu. Jesuswan amistadninku achka kutita pruebasqa kaptinpas, paykunaqa kallpanchakurqakum allin otaq mana allin tiempopipas yanapanankupaq (leey Juan 6:26, 56, 60, 66-68). Manaraq wañukusqan tutam Jesusqa amistadninkuna kuyasqanmanta kaynata nirqa: “Sasachakuypi kaptiypas qamkunaqa ñoqawanmi karqankichik”, nispa (Luc. 22:28).

11, 12. a) ¿Imaynatam qatiqninkunata Jesus hawkayachirqa pantaruptinkupas? b) ¿Imatam qatiqninkunaqa rurarqaku?

¹¹ Jesusqa nirqam apostolninkuna mana saqesqankumanta, ichaqa nisqan qepallantam saqerurqaku. Huk ratollam kuyakuyninku manaña puntata hinachu karqa runata manchakusqankurayku. Jesusmi ichaqa kaqmanta pampachaykurqa. Wañukusqanmanta kawsarimusqan qepatam paykunaman rikuriykurqa, hinaspam amistad kasqankuta qawachirqa. Chaymantapas, nirqam ‘llapallan runakunata qatiqnin kanankupaq’ yachachinankuta hinaspa “kay pachapa cantonkama” predicanankutapas (Mat. 28:19; Hech. 1:8). ¿Imatam qatiqninkuna rurarqaku?

¹² Qatiqninkunaqa tukuy kallpankuwanmi Diospa Gobiernonmanta predicarqaku. Chaymi Jehová Diospa espiritunpa yanapayninwan pisi tiempollapi, lliw runakunata Jerusalenpi yachachirqaku (Hech. 5:27-29). Wañunankupaq amenazasqa kaspankupas hinallam Jesuspa kamachisqanta kasukurqaku. Chunkantin watakuna pasaruptinmi Pablo kaynata nirqa: ‘Kay allin noticiam willakusqa kachkan kay pachapi llapallan runakunaman’, nispa (Col. 1:23). Jesuspa qatiqninkunaqa anchatam chanincharqaku paywan amistad kasqankuta.

13. ¿Imaynatam punta cristianokuna Jesuspa yachachisqanta kasukurqaku?

¹³ Chaymantaña cristiano kaqkunapas Jesuspa nisqantaqa kasukurqakum. Achkam cambiarqaku imayna kawsasqankutawan imayna kasqankuta. Wakinkuqa saqerqakum: hukwan pierdekuyta, sinkakuyta, qarimasinwan otaq warmimasinwan kasqankuta hinaspa suwakuytapas (1 Cor. 6:9-11). Wakinkuñataq cambiarqaku huk casta runakunata imayna qawasqankuta (Hech. 10:25-28). Paykunapas Jesusta kasukuspankum, mosoqwan pachakuchkaq hina mosoq runaña karqaku (Efe. 4:20-24). ‘Cristopa piensasqanman hinam piensarqaku’ hinaspa kallpanchakurqaku ejemplonta qatipakunankupaq (1 Cor. 2:16).

Jesuspa amistadnin kasunchik

14. Tukupay tiempopi, ¿ima rurananmantam Jesus prometerqa?

¹⁴ Punta pachak watapi cristianokunamantaqa achkam Jesusta rikurqaku predicasqan tiempopi otaq kawsarimusqan qepatapas. Kunanqa manam paykuna hinaqa rikunchikchu. Hinaptinqa, ¿imaynatam amistadnin kachwan? Chaytaqa rurasun allin yuyayniyoq confianza sirvientepa niwasqanchikta kasukuspam, paykunamanta wakinqa kay Pachapiraqmi kawsachkanku. Jesusqa nirqam paykunata tukupay tiempopi nombraptin ‘tukuy kapuqninkunapiña nanachikunanpaq’ (Mat. 24:3, 45-47). Ichaqa, Jesuspa amistadnin kanankupaq kallpanchakuqkunaqa manam lliwchu hanaq pachaman riytaqa suyanku. ¿Imaynatam confianza sirvienteta kasukusqanku yanapan Jesuswan amistad kanankupaq?

15. ¿Imamantam kanqa oveja otaq cabra hina runakuna qawasqa kananpaq?

 ¹⁵ (Leey Mateo 25:31-40.) Hanaq pachaman riy suyaqkunatam ‘wawqeykuna’ nispa Jesus suticharqa. Ovejakunamantawan cabrakunamanta rikchanachiypim, Jesusqa qawachin wawqenkunapaq imatapas rurasqanchik paypaqpas rurachkanchikman hina kasqanta. Jesuspa nisqanman hinaqa, oveja otaq cabra hina runakuna qawasqa kananpaqqa: ‘huk kaqnin humilde wawqenkunapaq rurasqankumantam’ kanqa. Chaymi kay Pachapi kawsakuy suyaq cristianoqa, Jesuspa amistadnin kayta munaspanqa confianza sirvienteta kasukunan.

16, 17. ¿Imaynatam qawachisun Cristopa wawqenkunapa amistadnin kasqanchikta?

¹⁶ Dios Gobiernaptin kay Pachapi kawsakuyta suyaspanchikqa, ¿imaynatam qawachichwan Cristopa wawqenkunapa amistadnin kasqanchikta? Chaypaqqa kimsatam rurananchik. Puntataqa: allin noticiamanta willanapaqmi tukuy sonqonchikmanta kallpanchakuna. Jesusmi wawqenkunata kamachirqa enteron Pachapi willanankupaq (Mat. 24:14). Jesuspa wawqekunamanta kay Pachapi qepaqkunaqa manam achkañachu, paykunallaqa manachá kamachisqantaqa rurayta atinmankuchu kay Pachapi kawsay suyaqkuna mana yanapaptinqa. Chaymi paykuna predicaspankuqa, Cristopa wawqenkunata yanapachkanku Jesuspa kamachisqanta cumplinankupaq. Amistad kaspanku chayta rurasqankuqa ancha allinmi yuyayniyoq sirvientepaq hinaspa Cristopaqpas.

¹⁷ Iskay kaq: amistadninchiktaqa qawachisuntaqmi kapuqninchikwan predicacionta yanapaspapas. Jesusmi qatiqninkunata nirqa: “Qollqekichikwan amistadta ganaychik”, nispa (Luc. 16:9). Kaywanqa manamá nichkanchu qollqeta qospa Diospa otaq Jesuspa amistadnin rantinamantachu. Kaywanqa nichkarqam qollqenchikwan Diospa Gobiernonpaq llamkayta yanapanamanta, chaynatam qawachisun kuyasqanchiktawan amistad kasqanchikta, ichaqa manam rimaspallachu aswanqa ruraspanchikmi (1 Juan 3:16-18). Ejemplopaq, qollqenchiktam servichikunchik allin noticiamanta willanapaq hinaspa enteron Pachapi predicay apakunanpaq chaynataq huñunakunanchik wasikuna rurakunanpaqwan allichasqa kananpaq sonqonchikmanta qospa. Achkatapas otaq asllatapas kusikuywan qoptinchikqa, Jehová Dioswan Jesusqa chaninchankum (2 Cor. 9:7).

18. ¿Imanasqam kasukunanchik Bibliata servichikuspa ancianokunapa niwasqanchikta?

¹⁸ Kimsa kaq: Jesuspa amistadnin kasqanchiktaqa qawachisunmi ancianokunapa niwasqanchikta kasukuspapas. Paykunaqa Cristo yanapaptin chuya espirituwan nombrasqam kanku (Efe. 5:23). Pablom kaynata qellqarqa: “Pusasuqnikichik runakunata kasukuspayá paykunaman sujetakuychik”, nispa (Heb. 13:17). Ichaqa, wakin kutipim sasa kanman Bibliata servichikuspa ancianokunapa niwasqanchik kasukuyqa. Ichapas  pantaq kasqankurayku, consejo qowasqanchikta mana valorniyoqta hina qawachwan. Chayna kaptinpas iñiqkunapa Uman Jesusqa kusikunmi paykunata servichikuspa. Chaymi Cristopa amistadnin kananchikpaqqa, ancianokunapa niwasqanchikta kasukunanchik. Pantaq kaptinkupas kamachiwasqanchikta kasukuspam, Jesus kuyasqanchikta qawachisun.

¿Maypitaq allin amistadkunata tarichwan?

19, 20. a) ¿Pikunatam tarisun congregacionpi? b) ¿Imamantam yachasun qatiqnin estudiopi?

¹⁹ Jesusqa kuyakuq ancianokunawan waqaychawaspanchikpas, qowanchikmi tayta-mamata, wawqe-panita otaq turi-ñañatapas (leey Marcos 10:29, 30). ¿Yuyachkankichu imaynam familiayki karqa Jehová Diospa testigonkunawan huñunakuyta qallariptiki? Wakinpiqa kusikurqakum. Ichaqa Jesusmi nirqa: “Cheqniqninqa kanqa wasinpi kaqkunaIlam”, nispa (Mat. 10:36). Chaymi ayllunchikmantapas congregacionpi amistadkuna aswan allin kasqanmanta yachayqa anchata kallpanchawanchik (Pro. 18:24).

²⁰ Pablopa achka amistadninkuna kasqantam qawachin, Romapi iñiqmasinkunaman cartasqanpa tukuyninpi saludo apachisqan (Rom. 16:8-16). Juanpas kimsa kaq cartanpa tukuyninpim nirqa: “Amistadninchikkunatayá sapakamata saludaykuy”, nispa (3 Juan 15). Paypas allin amistadkunatam rurarqa. ¿Imaynatam Jesuspa hinaspa punta cristianokunapa ejemplonta qatipakuchwan? ¿Imaynatam iñiqmasinchikwan allin amistadta rurachwan hinaspa takyachichwan? Qatiqnin estudiopim chaykunamanta yachasun.

¿Ima niwaqtaq?

• ¿Imanasqataq Jesusqa allin amistad karqa?

• ¿Imaynataq qatiqninkuna karqaku Jesuspa amistadninwan?

• ¿Imaynatam qawachichwan Cristopa amistadnin kasqanchikta?

[Kay yachachikuypa tapukuyninkuna]

[14 kaq paginapi dibujo]

Jesusqa yachaytam munarqa amistadninkunapa piensasqankutawan imayna kasqankutapas

[16 kaq paginapi dibujokuna]

¿Imaynatam qawachinchik Cristopa amistadnin kasqanchikta?