¿Imayna kasqaykitam orakusqayki qawachin?
¿Imayna kasqaykitam orakusqayki qawachin?
“Qamqa pipapas mañakusqanta uyariykuqmi kanki. Llapallan runakunam qanmanqa asuykamusunki.” (SAL. 65:2.)
1, 2. ¿Imanasqataq Diosta serviqkunaqa confianzawan mañakunmanku?
UNANCHAQNINCHIKQA uyarinmi kasukuq serviqninkunapa mañakusqanta. Segurom kachwan, payqa uyariwasunmi. Millonnintin testigokuna chay horallapi mañakuptinkupas, payqa llapantam uyarin.
2 Jehová Dios uyarisqanmanta seguro kaspanmi David kaynata takirqa: “Qamqa pipapas mañakusqanta uyariykuqmi kanki. Llapallan runakunam qanmanqa asuykamusunki”, nispa (Sal. 65:2). Tukuy sonqonwan Diosta servisqanraykum uyarisqa karqa. Chaymi kaynata tapukunanchik: “¿Mañakusqay qawachinchu Diospi confiasqayta hinaspa yupaychasqay ancha valorniyoq kasqanta? ¿Imatam ñoqamanta qawachin orakusqay?”, nispa.
Humillakuspa Diosman asuykusun
3, 4. a) ¿Imaynataq kananchik Diosta mañakuspaqa? b) ¿Imatam rurachwan hatun huchata ruraruptinchik ‘piensasqanchikkuna’ ñitiyta munawaptinchik?
3 Mañakusqanchikta Dios uyariwananchikpaqqa humillakuspam asuykunanchik (Sal. 138:6). Imayna kasqanchikta qawawananchikpaqmi David hina kaynata mañakunanchik: “Pruebaman churawaspaykiyá piensasqaykunata yachaykuy. Qawaykuyá mana allinta kawsaptiyqa. Wiñay kawsaypaq hinayá kawsachiway”, nispa (Sal. 139:23, 24). Diosta mañakuspapas, kasukunanchikmi Palabranwan niwasqanchikta. Payqa yanapawanchikmanmi ‘wiñay kawsayta’ tarinapaq.
4 ¿Imatam rurachwan hatun huchata ruraruptinchik ‘piensasqanchikkuna’ ñitiyta munawaptinchik? (Leey Salmo 32:1-5.) Conciencianchiktaqa kasukunam, mana allin rurasqanchikmanta piensasqanchikwanmi hukmanyaruchwan, mana para kaptin rupaypa qawichisqan sacha hina. Davidqa hucha rurasqanmantam llumpay llakisqa tarikurqa, yaqapaschá onqorurqaraq. Ichaqa Diosman willakuspanmi hawkayayta tarirqa. ¡Mayna kusisqachá tarikurqa pampachasqa kaspanqa! Huchanchikmanta David hina willaspaqa hawkayaytam tarisun. Chaymantapas, Dioswan amistadninchikta kaqllamanta tarinapaqmi ancianokuna yanapawasun (Pro. 28:13; Sant. 5:13-16).
Diosninchikta mañakusun hinaspa agradecekusun
5. ¿Imatam rurananchik imamantapas preocupasqa tarikuspa?
5 Imamantapas preocupasqa tarikuspaqa kasukunanchikmi Pablopa kayna nisqanta: “Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta qoychik” (Fili. 4:6). Tukuy sonqomanta hinaspa humillakuspam mañakunanchik. Astawanqa peligropi otaq qatikachasqa kaspam Jehová Diostaqa mañakunanchik yanapawananchikpaq hinaspa imaynata ruranapaqpas.
6, 7. ¿Imakunamantam agradecekunanchik Diosta mañakuspa?
6 ¿Imayna kasqanchiktam qawachichwan imatapas necesitaspalla mañakuspaqa? Pabloqa nirqam mañakuspanchik ‘graciasta qonamanta’. David hina Diosta agradecekunapaqqa achkam kachkan, paymi nirqa: ‘Qamqa kanki mayna hatunmi, mayna munayniyoqmi, mayna suma-sumaqmi, mayna wiñaypaqmi chaynataq mayna atiyniyoqmi. Qampamiki cielopi tukuy ima kaqpas chaynataq kay pachapi kaqpas [. . .], qamtaqmi tukuy imakunatapas gobiernanki, qamqariki tukuy imapa hawanpim kachkanki [. . .], chayraykum qamllamanña graciasta qospa suma-sumaq sutillaykita alabaniku’ (1 Cro. 29:11-13).
7 Jesusqa Taytantam agradecekurqa mikuymanta. Ejemplopaq, wañukusqanta Yuyarinapaq huñunakuypim tantamantawan vinomanta agradecekurqa (Mat. 15:36; Mar. 14:22, 23). Ñoqanchikpas agradecekunanchikmi: mikuymanta, tukuy ima rurasqanmanta, ‘reglamentonkunamantawan’ Palabranpi tarikuq willakuykunamantapas (Sal. 107:15; 119:62, 105).
Hukkunapaq mañakusun
8, 9. ¿Imanasqataq mañakunanchik iñiqmasinchikkunapaq?
8 Ñoqanchikpaq mañakuspapas, reqsisqanchik otaq mana reqsisqanchik iñiqmasinchikkunapaqpas mañakunanchikmi. Colosaspi iñiqmasinkunata Pablo mana llapanta reqsispanpas nirqam: “Qamkunapaq mañakuspaykum graciasta qoniku Señorninchik Jesucristopa Taytan Diosninchikman. Jesucristoman iñisqaykichikmantawan iñiqkuna kuyasqaykichikmantam uyarirqaniku”, nispa (Col. 1:3, 4). Tesalonicapi iñiqmasinkunapaqpas mañakurqam (2 Tes. 1:11, 12). Chayna mañakuymi qawachin ñoqanchikmantawan hukkunamanta ima piensasqanchikta.
9 Hanaq pachaman riqkunapaqwan ‘sapaq ovejakunapaq’ mañakusqanchikmi, qawachin ñoqanchikpaq Diospa llaqtan ancha allin kasqanta (Juan 10:16). Pablom Efeso llaqtapi cristianokunata nirqa paypaq mañapunankupaq, chaynapi Dios yanapaptin ‘pakasqa kaqmanta allin noticiata willakunanpaq’ (Efe. 6:17-20). ¿Mañakunkichu iñiqmasikikunapaq?
10. ¿Imakunapim yanapawasun hukkunapaq mañakusqanchikqa?
10 Hukkunapaq mañakuspaqa paykunata imayna qawasqanchiktam cambiachwan. Mana allin qawasqanchik iñiqmasinchikpaq mañakuspaqa, manachá mana allintaqa rurasunchu (1 Juan 4:20, 21). Chayna mañakuyqa ancha allinmi hinaspa huk sonqollatam tarichiwanchik. Chaynataq, Jesus hina kuyakuq kasqanchiktam qawachin (Juan 13:34, 35). Chayna kuyakuyqa chuya espiritupa rurunmi. ¿Jehová Diosta mañakunchikchu espiritunta qowananchikpaq? ¿Mañakunchikchu: kuyakuq, kusisqa, hawkalla, pacienciakuq, sumaq sonqo, kuyapayakuq, iñiyniyoq, llampu sonqo hinaspa imapipas controlakuq kananchikpaq? (Luc. 11:13; Gal. 5:22, 23.) Chayna kaptinqa, rimaspapas ruraspapas qawachisunmi chuya espirituman hina kawsasqanchikta (leey Galatas 5:16, 25).
11. ¿Imanasqataq allin kanman ñoqanchikpaq mañakunankupaq hukkunata niyqa?
11 Ancha allintaqmi wawa-churinkupaq tayta-mamakunapa mañapuyninkuqa. Ejemplopaq, churinkuna examenta qonankupaq cuadernonkumanta copiay munasqankuta taytan yacharuspanqa, atinmanmi paykunapaq mañakuyta hinaspa chay ruray mana allin kasqanta chaynataq mana ruranankupaq Bibliawan yanapaytapas. Pablom Corinto llaqtapi kaq iñiqmasinkunata nirqa: “Diostam mañakuchkaniku mana allin kaqkunataqa ama ruranaykichikpaq”, nispa (2 Cor. 13:7). Humildadwan hukkunapaq mañakuyqa Diospa agradonpaqmi hinaspapas imayna runa kasqanchiktam qawachin (leey Proverbios 15:8). Pablo hinam hukkunatapas nichwan ñoqanchikpaq mañakunankupaq. Paymi qellqarqa: “Ñoqaykupaqyá Diosta mañakuychik. Tukuy imapi allinta portakuyta munaspaykuqa allin concienciayoqmi kachkaniku”, nispa (Heb. 13:18).
Orakusqanchikmi qawachin imayna kasqanchikta
12. ¿Imakunamantam mana qonqanachu mañakuspanchik?
12 ¿Orakusqanchik qawachinchu Diosta kusisqa servisqanchikta? ¿Orakunchikchu predicacionmanta, Diospa munasqan rurasqa kananpaq, kamachiq kasqan hatunchasqa kananpaq hinaspa sutin chuyanchasqa kananpaqpas? Kaykunamanta mañakuytaqa manam qonqanachu. Imayna mañakunamanta Jesuspa yachachisqanmi kaynata qallarin: “Hanaq pachapi Taytayku, sutiki yupaychasqa kachun, munaychakusqayki hamuchun. Munasqaykiyá rurasqa kachun kay pachapipas hanaq pachapi hina”, nispa (Mat. 6:9, 10).
13, 14. ¿Imayna kasqanchiktam mañakusqanchik qawachin?
13 Mañakusqanchikmi qawachin: imapi piensasqanchikta, munasqanchikta hinaspa imanasqa imatapas rurasqanchikta. Diosqa yachanmi imayna kasqanchikta. Proverbios 17:3 nin: “Qollqetawan qoritaqa ninawan chulluchispam yachana allin kasqanta. Chaynatam Tayta Diospas prueban runapa sonqonta”, nispa. Payqa sonqonchiktam qawan (1 Sam. 16:7). Yachanmi iñiqmasinchikmanta, huñunakuymanta, predicacionmanta hinaspa hanaq pachaman riy suyaqkunamanta ima piensasqanchiktapas (Mat. 25:40). Yachantaqmi mañakuspanchik uyarisqa kayta munaspa mañakusqanchikta otaq costumbreman hina chayllata sapa kuti mañakusqanchiktapas. Jesusqa nirqam: “Mañakuspaykiqa amam mana judio kaqkuna hinachu hina nisqallaykita kutirispa-kutirispa rimanki, paykunam piensan llumpayta rimasqankurayku Dios uyarisqanta”, nispa (Mat. 6:7).
14 Mañakusqanchikqa qawachintaqmi Diospi mayna confiasqanchiktapas. Diostam David kaynata nirqa: “Qamllam kanki ñoqallayta amparaykuwaqniyqa [. . .] enemigoymanta torre hina harkaykuwaqniyqa. Ñoqallayqa munachkani karpaykipi wiñaypaq kawsakuytam, mamanpa rapranpi chiwchicha hina amparakuytam”, nispa (Sal. 61:3, 4). Bibliaqa ninmi karpanwan Dios waqaychawasqanchikta (Apo. 7:15). Diosta mañakuptinchikmi kallpata qowaspanchik tukuy sasachakuypi ‘yanapawanchik’ (leey Salmo 118:5-9).
15, 16. ¿Imaynatam mañakusqanchik yanapawachwan congregacionpi imanasqa ima ruraytapas munasqanchikmanta yachanapaq?
15 Tukuy sonqomanta orakuspaqa yachasunmi imanasqa imatapas mañakusqanchikmanta. Ejemplopaq, imanasqataq anciano kanapaq mañakunchik, ¿congregacionpiwan predicacionpi sonqomanta hinaspa humillakuspa yanapakuyta munaspachu? Icha, ¿hukkunata kamachiyta munaspachu? Diospa llaqtanpiqa manam chaynachu (leey 3 Juan 9, 10 hinaspa Lucas 22:24-27). Sonqomanta mañakuptinchikmi, Diosqa yanapawasun mana allinta munaspa mañakusqanchikmanta cuentata qokunapaq hinaspa manaraq sapichakuchkaptin sonqonchikmanta horqonapaqpas.
16 Casada cristianakunaqa, munankuchá qosanku siervo ministerial hinaspa tiempo pasaptin anciano kanankuta. Chaymanta mañakuspankupas allinta portakuspankum yanapanmanku qosanku ñawparinanpaq. Kayqa ancha allinmi, cristianopa familian imayna rimasqankumantawan rurasqankumantam congregacionpi kaqkuna allinta otaq mana allinta paymanta piensanqaku.
Achkapa qayllanpi mañakuspanchik
17. ¿Imanasqataq allin kanman sapallanchikpi kaspa mañakuyqa?
17 Jesusqa Diosta sapallan mañakunanpaqmi runakunamanta asurikuq (Mat. 14:13; Luc. 5:16; 6:12). Ñoqanchikpas chayna tarikuytam necesitanchik. Sapanchikpi orakuspaqa Diospa munasqanman hinam tanteasun chaynapi iñiyninchik aswan allin kananpaq. Runakunapa qayllanpipas Jesusqa mañakurqam. Hinaptinqa, ¿imaynatam orakunanchik hukkunapa rantinpi ruraspaqa?
18. ¿Imatam cristianokunaqa yuyarinanku hukkunapa rantinpi congregacionpi mañakuspa?
18 Huñunakuyninchikpim Diosman sonqo qarikuna mañakunku llapanchikpa rantinchikpi (1 Tim. 2:8). Mañakuyta tukuptinkum llapanku “amén” ninanku, kayqa “chaynayá kachun” ninanmi. Chaynata ninankupaqqa nisqanwanmi acuerdopi kananku. Imayna mañakunamanta yachachispaqa, Jesusqa manam pitapas piñachirqachu nitaq hukmanyachirqachu (Luc. 11:2-4). Manataqmi sapakamapa sasachakuyninmantachu nitaq necesitasqanmantachu mañakurqa. Chaymi kikinchikpa kaqmantaqa sapanchikpi mañakunanchik, manam achkapa qayllanpichu. Mana yachana kaqkunamantapas manam ninanchikchu achkapa rantinpi orakuspaqa.
19. ¿Imaynam kananchik achka runapa qayllanpi huk iñiqmasinchik mañakuptin?
19 Rantinchikpi pipas mañakuptinqa, Diostam respetananchik otaq ‘manchakunanchik’ (1 Ped. 2:17). Kanmi costumbreman hina rurasqanchikkuna, ichaqa yachanam maypi hinaspa haykapi ruranata, wakinqa manam allinchu kanman huñunakuypiqa (Ecl. 3:1). Ejemplopaq, oracionpi wakinku makinkumanta otaq brazonkumanta hapinakuptinkuqa, wakinkum otaq chayllaraq hamuqkunam mana allinta piensanmanku otaq manapas oracionta uyarinmankuchu. Atinmanmi qosaqa mana suti rikuyllata señoranpa makin hapiykuytaqa, abrazaptinmi ichaqa hukkuna urmarunmanku. Wakinpiqa piensachinmanmi Dioswan allin amistadnin kananmantaqa warmi-qari kayninku aswan allin kasqanta. Chaynaqa, respetowanyá imatapas ‘rurasun Dios honrasqa kananpaq’, amataq imatapas rurasunchu hukkuna mana allinta piensanankupaq, urmanankupaq otaq hukmanyanankupaqqa (1 Cor. 10:31, 32; 2 Cor. 6:3).
¿Imatam mañakunanchik?
20. ¿Imaynatam explicawaq Romanos 8:26, 27 nisqanta?
20 Sapanchikpi mañakuspaqa manapaschá wakin kutipiqa yachasunchu imamanta mañakuytapas. Pablom nirqa: ‘Manam imayna mañakuytapas yachanchikchu, ichaqa chuya espiritum Diosta mañapuwanchik runapa mana atinan rimaykunawan. Llapa runakunapa sonqon reqsiq Diosmi yachanpuni chuya espiritupa imam nisqanta’, nispa (Rom. 8:26, 27). Diosmi runakunapa orakusqankumanta Bibliapi achkata qellqachirqa. Chaymi yachan qellqaqkunapa ima niy munasqankuta. Chaynataq, allintam reqsiwanchik. Chaymi qellqasqankuman hina mañakusqanchikta uyarin hinaspa cumplen yaqa kikinchikpa mañakusqanchiktapas hina. Diosqa uyariwanchikmi espiritun yanapawaptinchik. Bibliamanta astawan yachaspaqa manam sasachakusunchu imata mañakunapaqpas.
21. ¿Imamantam yachasun huknin estudiopi?
21 Yachamusqanchikman hinaqa, mañakusqanchikmi qawachin imayna kasqanchikta. Chaynataq Dioswan amistadninchik imayna kasqanta hinaspa Palabranta maynata reqsisqanchiktapas (Sant. 4:8). Qatiqnin estudiopim yachasunchik Bibliapi tarikuq respetowan mañakuykunamanta, chaykunamanta yachaymi yanapawasun Diosta mañakusqanchik imayna kasqanpi piensanapaq.
¿Imatam niwaq?
• ¿Imaynam kananchik Diosta mañakuspaqa?
• ¿Imanasqataq iñiqmasinchikkunapaq mañakunanchik?
• ¿Imatam orakusqanchik qawachin ñoqanchikmanta hinaspa imanasqa imatapas rurasqanchikmanta?
• ¿Imaynam kananchik achka runapa qayllanpi huk iñiqmasinchik mañakuptin?
[Kay yachachikuypa tapukuyninkuna]
[4 kaq paginapi dibujo]
¿Hatunchankichu hinaspa agradecekunkichu Jehová Diosta?
[6 kaq paginapi dibujo]
Achka runapa qayllanpi huk iñiqmasinchik mañakuptinqa Jehová Diostam respetananchik