Mana uyariq iñiqmasinchikkunata kuyasun

DIOSPA llaqtanpiqa iñiqmasinchikkunam achkallaña kachkan. Paykunaqa herenciata chaskichkaq hinam Samuelpa, Davidpa, Sansonpa, Rahabpa, Moisespa, Abrahampa, Sarapa, Noeypa hinaspa Abelpa ejemplonkuta qatipakunku. Diosta tukuy sonqonkuwan serviqkunamantaqa achkam kanku mana uyariqkuna. Ejemplopaq, Mongolia nacionpi punta testigokunaqa karqa casarasqa mana uyariq iñiqmasinchikkunam. Chaynataq, Rusia nacioniyoq mana uyariq iñiqmasinchikkunapa Diosta kasukuq kasqankuraykum, Tribunal Europeo de Derechos Humanos nisqa juzgadopi vencerqanchik.

Kay tiempokunapim “allin yuyayniyoq confianza sirviente” señas rimaypi rurachichkan: videokunata, huñunakuykunata hinaspa asambleakunata (Mat. 24:45). Kaykuna rurakusqanmi mana uyariq runakunata allinta yanapachkan. * ¡Maynatachá kallpanchakunanku karqa Diosmanta yachanankupaq hinaspa iñiyninkupi ñawparinankupaq, señaspi videokuna hinaspa huñunakuykuna manaraq kachkaptinqa! ¿Imata ruraspataq mana uyariqkunata llaqtaykipi yanapawaq?

Manaraq yanapakuykuna kachkaptin

Achka wataña Diosta serviq mana uyariq iñiqmasinchikta cheqap yachayta imayna reqsisqankumanta tapuptiki, ¿imatam nisunkiman? Ichapas willasunkiman, señas rimaypi videokuna manaraq kachkaptin Diospa sutinta yachaspanku imayna tarikusqankumanta hinaspa chayllata yachaspankupas vidanku cambiasqankumanta chaynataq iñiyninkupi achka wata takyasqankumantapas. Nisunkichá señaspi huñunakuy mana kaptin otaq mana tikraptinku imayna tarikusqankumanta. Chaynataq pipas waqtanpi tiyaykuspan qellqaspanku entiendechiyta munasqankumantapas. Huk cristianom Bibliamanta 7 wata chaynata yacharqa, señas rimayman tikraqkuna manaraq kachkaptin.

Señasllata entiendeq yuyaq iñiqmasinchikkunam mana qonqankuchu, uyariy atiqkunaman predicay sasa kasqanta. Huknin makinpim hapiqku imayna predicanamanta qellqasqata, hukninpiñataq chayraq lloqsimuq Llaqta Cuidaq hinaspa ¡Despertad! revistakunata. Mana uyariqmasinman estudio qoyqa llumpay sasam karqa, yachachikuykuna qellqasqalla kaptin, chaymi mayqenninkupas allintaqa mana entiendeqchu. Chaymantapas, achkam yuyarinku mana entiendechispanku llakisqa tarikusqankumanta, chaymi sasachaq Bibliamanta hinalla yachachinankupaq. Jehová Diosta tukuy sonqonkumanta kuyaspapas, yachankum mana allinta entiendespanku imayna rurayta mana atisqankutapas.

Chayna sasachakuypi kaspankupas paykunaqa Diostam kasukunku (Job 2:3). Pacienciawanmi Jehová Diospi suyarqaku (Sal. 37:7). Chaymi kunanqa achkanpi bendecisqa kachkanku.

Piensasun mana uyariq iñiqmasinchik qosa hinaspa tayta kaspa imayna kallpanchakusqanpi. Manaraq señaspi videokuna  kachkaptinmi, ayllunwan Bibliamanta estudiarqakuña. Churinmi yuyarispan nin: “Taytayqa estudio qowanankupaqmi sasachakurqa, yachachikuykuna qellqasqalla kasqanrayku. Yaqa llapanpim qellqasqa yachachikuykunataqa mana entiendeqchu. Warma kaspaykum ñoqaykupas mana ancha yanaparqanikuchu. Mana allinta yachachiwaptinkum chaylla corregirqaniku. Chayna kaptinpas, taytayqa familiaykuwan Biblia estudiaytaqa manam saqeqchu, inglesta mana allinta entiendespan penqaypi qepaytaqa manam manchakuqchu, Jehová Diosta allinta reqsinaykurayku”.

Piensasuntaq 70 watayoq Richard sutiyoq iñiqmasinchikpipas, payqa Brooklyn (Nueva York) lawmantam. Mana uyariq hinaspa ñawsa kaspanpas huñunakuykunamanqa manam faltakunchu. Rinanpaqmi trenman sapallan qespin, hinaspam hayka kuti sayasqanta yupaspan yachan maypi bajananta. Huk kutipim llaqtan lawpi sinchita ritirurqa, chaymi huñunakuy mana kananpaq llapallanman willarqaku, Richardmi ichaqa mana yacharqachu. Maskaq lloqsispankum Salonpa punkunpi sayachkaqta tarirurqaku, kichanankutam pacienciawan suyachkasqa. Sinchi ritipi calleman imanasqa lloqsisqanmanta tapuptinkum, nirqa: “Jehová Diosta kuyasqayraykum”, nispa.

¿Imatam rurawaq?

Yachasqayki lawpi mana uyariqkuna kaptinqa, ¿yaqachu señaspi huk-iskay rimayllatapas yachawaq? Paykunaqa kuyakuq hinaspa pacienciakuqmi kanku señasta yachachispankuqa. ¿Imatam rurawaq predicaspa otaq mana uyariqwan maypipas tuparuspa? Paykunawan rimanaykipaq kallpanchakuy. Uyaykiwan otaq makikiwan señasta ruraspa otaq dibujokunata hinaspa fotokunata servichikuspa rimapayay. Diosmanta yachaytaqa manam munanichu nisuptikipas, mana uyariq otaq señaswan rimaq Testigotam niwaq paywan rimananpaq. ¿Imanasqa? Señaspi rimaptinkuqa munanqapaschá yachayta.

Yaqapaschá señas rimayta yachachkanki hinaspa huñunakuymanpas richkanki. ¿Imatam rurawaq allinta yachanaykipaq? Uyariq iñiqmasikikunawan rimanayki kaptinpas, ¿manachu kallpanchakuwaq señasllapi rimanaykipaq? Chayta ruraspam señaspi imaynata rimanaykipaq piensanki. Wakinpiqa mana sasachakunaykipaqchá munanki uyariqkunawan rimayta. Ichaqa wakin idiomakunapi hinam, señaspi rimanapaqqa kallpanchakuna.

Señas rimayta yachanapaq kallpanchakuspaqa qawachinchikmi mana uyariq iñiqmasinchikkunata kuyasqanchiktawan respetasqanchikta. Mayna llakisqachá tarikunku llamkaqmasinkupa otaq estudiaqmasinkupa rimasqankuta mana entiendespanku. Hukninmi kaynata nirqa: “Sapa punchawmi runakunaqa qayllaypi rimanku. Mana  uyarispaymi sapallay hinaspa hukmanyasqa tarikuni, wakinpiqa piñakuniraqmi. Manam entiendewaqchikchu imayna tarikusqaytaqa”, nispa. Chaynaqa, mana uyariq iñiqmasinchikkunapaq atisqanchikta rurasun huñunakuyninchik mana yakupa kasqanpi yaku hina kananpaq, chaynapim Bibliamanta yachaspankupas huk iñiqmasinchikkunawan rimanqaku hinaspa amistadninkuwan kusisqa kanqaku (Juan 13:34, 35).

Manataqmi qonqananchikchu rimaq iñiqmasinchikkunawan kuska huñunakuq mana uyariqkunatapas. Paykunapaqmi señas rimayman tikrananku. Huñunakuypi yachachisqanta allinta entiendenankupaqmi, Salonpiqa puntapi tiyanku chaynapi mana sasachakuspa señaspi tikraqta hinaspa discurso qoqta qawanankupaq. Chaywanpas, uyariqkunaqa manam unaychu sasachakunku atencionwan uyarinankupaqqa. Chaynallatam ruranku asambleapi señasman tikraptinkupas. Señasman tikraqkunaqa kallpanchakunkum allinta tikranankupaq, chaynapi mana uyariqkuna entiendenankupaq.

Congregacionnikipi ichapas mana uyariqkuna huñunakunku hinaptin señasman tikranku. ¿Imatam rurawaq mana uyariq iñiqmasikikunapi interesakusqaykita qawachinaykipaq? Wasikimanmi invitawaq hinaspa atispaykiqa señaspi huk otaq iskay rimayllatapas yachawaq. Señasta mana rimasqaykiraykuqa amayá saqeychu chaykuna ruraytaqa. Atinkipunim paykuna kuyasqaykita qawachiytaqa, chaynapim ancha kusisqa tarikunki (1 Juan 4:8). Achkatam yachachwan mana uyariq cristianokunamantaqa. Señaspi rimay munaqmi kanku, allintam tanteanku hinaspapas kusikuqmi kanku. Huk cristianopa tayta-mamanmi mana uyariq, paymi nin: “Warma kasqaymantapacham mana uyariqkunawan karqani, paykunam achkata yachachiwarqa ñoqa yachachinaymantaqa. Paykunamantaqa achkatam yachachwan”, nispa.

Diosqa kuyanmi kasukuq serviqninkunataqa, uyariq otaq mana uyariq kaptinkupas. Mana uyariq iñiqmasinchikkunapa iñiyninku hinaspa aguantasqankum Jehová Diospa llaqtanta apuyachin. Chaynaqa, ¡paykunatayá anchata kuyasun!

[Willakuy]

[31 kaq paginapi dibujo]

Mana uyariqkunaqa munanqakum Diospa Gobiernonmanta yachayta señas rimaypi willaptinchikqa

[32 kaq paginapi dibujokuna]

Huñunakuykunaqa mana yakupa kasqanpi yaku hinam kanan, chaynapim mana uyariq iñiqmasinchikkuna kallpanchasqa tarikunqaku