Achka rurayniyoq kaspapas, kusisqam Dios serviypiqa

JEHOVÁ DIOSQA munanmi serviqninkuna kusisqa kananchikta (Sal. 100:2). Ichaqa, Diosta servisqanchikpiqa mana tiempoyoqmi kanchik. Manaraq bautizakuptinchikqa ichapas tiemponchik achka karqa, kunanmi ichaqa yapakurun Diospaq rurayninchikkuna. Yaqapaschá llasaq qepiyoq hina otaq hukmanyasqapas kachkanchik lliw munasqanchikkunata mana rurayta atispa. ¿Imaynatam lliw rurayninchikta cumplichwan ‘Diospa kusikuy’ qowasqanchikta mana chinkachispa? (Neh. 8:10.)

Sasa tiempopi kawsasqanchikraykum, tiemponchikta allinta rakina. Pablom Dios yanapaptin qellqarqa: “Allintayá qawakuychik imaynam kawsasqaykichikta. Amayá kawsaychikqa mana yachayniyoqkuna hinachu aswanqa yuyayniyoqkuna hinayá. Tiempoykichiktapas amayá usuchiychikchu, kay punchawkunaqa mana allinllañam”, nispa (Efe. 5:15, 16).

¡Mayna allinmi chayna nisqanqa! Chaymi allin kanman kaynata tapukuyninchik: “¿Imata ruraspataq tiempochakuyman estudianaypaq, familiaypaq, predicanaypaq, llamkanaypaq hinaspa huk ruraykunapaqpas?”, nispa.

Yuyachkankichá Diosman qokuspa chaynataq bautizakuspa kusisqallaña tarikusqaykita. ¿Imanasqam kusisqa karqanki? Diosmantawan munayninmanta yachaspam. Ichapas unay tiempopi Bibliamanta entienderqanki, kallpanchakusqaykiqa allinmi karqa, chaymi vidaykita cambiarqa hinaspa kusichisurqanki.

Kusisqa kanapaqqa hinallam estudiana. Chaymi Bibliata leenaykipaqwan estudianaykipaq mana tiempota tarispaqa, tiempoyki imayna servichikusqaykita cambianayki. Sapa punchaw asllatapas estudiasqaykiwan yuyaymanasqaykim, Diosman asuykachisunki hinaspa kusisqata tarichisunki.

Yaqa lliw cristianokunam huk rurayninkumanta tiempota horqonku Dios serviypi rurasqankuta cumplinankupaq. ¿Chaynatachu qampas ruranki? Tapukuy: “¿Hayka tiempotaq revistakunata otaq periodicota leeni, televisionta  qawani, takikunata uyarini hinaspa imapas gustawasqanta rurani?”, nispa. Chaykunaqa allinmi kanman, ichaqa manam chaykunallamanqa qokurunachu (1 Tim. 4:8). Chaykunarayku tiempoyki mana haypasuptikiqa, tiempoykitam allinta rakinayki.

Adam sutiyoq ancianom 3 churiyoq, paymi imaynata lliw rurayninkunata cumplisqanmanta nin: “Manam tukuy imayoq kaytachu maskani. Imawanpas kusirikunayqa hinaspa kapuqniykunaqa manam achka tiempopaqchu. Chaynaqa kani manam vidaypi mana kusikuyta munaspachu aswanqa mana sasachakunaypaqmi”, nispa.

¿Manachu chaynata kawsakunanchikpaq tanteasqanchik anchata yanapawarqanchik? Chaykunapi yuyaymanaspaqa kusisqam tarikusunchik. Chaytam qawachin Mariuszpa ejemplon, payqa 3 churiyoq ancianom. Paymi nin: “Biblia estudiayta qallarispaymi kusikuyta tarirqani. Wakinpiqa sasachakuyniyqa kanmi, chaykunamanta wakintaqa Diosllam yachan. Ichaqa pay yanapawaptinmi hamuq tiempota kusikuywan suyani”, nispa.

Kusisqa kaptinchikpas preocupakuyqa kanqam, ichaqa kusisqa kaspam allin tarikusun hinaspa sasachakuykunatapas vencesun. Bibliam nin: “Ñakariq runakunapaqqa sapa punchawmi ñakariy punchawkunalla. Kusisqa sonqoyoq runapaqmi ichaqa punchawkunaqa fiesta punchawkuna hinalla”, nispa (Pro. 15:15). Diospa kuyawasqanchikpi yuyaymanaspaqa astawanmi payta kuyasun hinaspa kusikusun (Mat. 22:37).

Diosta familiakuna puntapi churaspankuqa aswan kusisqam kanqaku. Diospa nisqanta llapallanku kasukuspankuqa manam ancha sasachakunqakuchu, aswanmi huñulla hinaspa kusisqa kawsakunqaku. Familiaqa kanqa rupaypi samaykunapaq llantu hinam (Sal. 133:1).

Allintaqmi familiakunapa kuskanku Diosta serviyninkuqa. Mariuszqa nintaqmi: “Ñoqapaqqa ancha allinmi familiaywan kuska kayqa. Señoraymi tukuypi yanapawan. Kallpanchakunikum predicacionman kuska lloqsinaykupaq, atiptinqa kuskam riniku asamblea rurakunanpaq estadio pichaq hinaspa congregacionkunapi discurso qoy tupawaptinpas. Kallpanchawanmi yanapawasqan”, nispa.

Bibliaqa ninmi qosakuna familianta mantienenanpaq (1 Tim. 5:8). Ichaqa, llamkaynin achka tiemponta hinaspa kallpanta qechuptinqa, Diosta servispam manaña kusikunmanchu. Chayna kaptinqa Diostam mañakunan (Sal. 55:22). Wakinkuqa huk llamkaytañam maskanku Diospa Munaychakuyninta puntapi churanankupaq. Manam mayqanninchikpas qollqepaq achka tiempo llamkasqanchikraykuqa, Dios servinapaq rurayninchikkunataqa saqerunanchikchu (Pro. 22:3).

Chayna tarikuspaykiqa, qellqawaqmi kunan llamkayniki hinaspa huk llamkay munachisusqaykipa ima sasachakuykunatawan ima allinkunata tarichisunaykimanta. Llapanchikmi munanchik allin pagawananchikta hinaspa kusisqa kaytapas, ichaqa ¿kanchu tiempoyki familiaykiman Diosmanta yachachinaykipaq? Kaykunapi allinta piensaspa llamkayta akllay hinaspa ima rurasqaykipipas qawachiy Diospa amistadnin kuyasqaykita.

Sichu iñiynikipi ñawparinaykipaq imayna tarikusqayki mana yanapasunkichu, hinaptinqa manam chaynallachu kanayki. Achka cristianokunam llamkasqankuta cambiarqaku Jehová Diosta astawan servinankupaq. Polonia nacionniyoq cristianom nin: “Llamkasqaypim achkata viajaq kani chaymi tiempoy haypawaqchu Diosta servinaypaq nitaq familiaypaqpas. Chaymi llamkayniyta saqerurqani”, nispa. Kunanqa manañam achka tiempotachu llamkan nitaq llumpaytachu pisipan.

Hukkunata yanapaspam kusikunki

Jesusmi nirqa: “Ima chaskiqmantapas aswan kusisqaqa imapas qoqmi”, nispa (Hech. 20:35). Chayna kasqantam cristianokunaqa yachanchik. Wakinpiqa hukkunatam kusichisun kuyakuywan rimaspa, saludanapaq makita haywarispa otaq congregacionpi ima rurasqanmantapas agradecekuspa. Chayna rurasqanchikqa kusichiwasunmi.

 Pablom iñiqmasinkunata nirqa: ‘Hukmanyasqakunata kallpanchaychik, mana kallpayoqkunatapas yanapaychik’, nispa (1 Tes. 5:14). Pipas llakisqa kaspanqa piensanqachá sasachakuynin allichayta mana atisqanta. ¿Imaynatam yanapachwan? Diosta servisqanpi iñiqmasiki hukmanyaptinqa kallpanchaykuy. Qampas kallpanchasqam tarikunki. Wakin sasachakuytaqa manam mayqanninchikpas allichayta atisunchu. Ichaqa qawachichwanmi iñiqmasinchik entiendesqanchikta. Yuyarichiytaq Diospi confiaspa mana hukmanyananmanta (Sal. 27:10; Isa. 59:1).

Chaymantapas nichwanmi kuska predicanapaq. Predicanankupaq qatiqninkunata Jesus kamachispanqa ‘iska-iskaytam kacharqa’ (Mar. 6:7). Chaynapim kallpanchanakunmanku karqa. ¿Manachu hukmanyasqa iñiqmasinchikwan lloqsispaqa chaynata kallpanchanchik?

Kunanqa llapanchikpam kachkan sasachakuykuna. Chayna kaptinpas, Pablopa kayna nisqantam kasukunanchik: ‘Tukuy tiempoyá kusikuychik, huktawanraqmi nikichik: ¡Kusikuychikyá!’ (Fili. 4:4). Diosta kuyaspa, kasukuspa chaynataq kamachiwasqanchikta tukuy sonqomanta hinalla ruraspam, imapaq kawsasqanchikta yachanchik hinaspa kusisqa kanchik. Astawanqa, yanapawasunmi sasachakuykunata atipanapaq (Rom. 2:6, 7).

Iñiyninchikwanmi qawanchik Diospa prometewasqanchik paraiso hichpallapiña kasqanta. ¡Chaypiqa maynatachá kusikusun! (Sal. 37:34.) Chaynaqa, amayá hukmanyasunchu. Amataq qonqasunchu Diospa qowananchik bendicionkunataqa, kunanpas chaskichkanchikñam. Chaynata ruraspaqa Diostam “kusikuywan” servisunchik (Sal. 100:2).

[8 kaq paginapi dibujo]

(Imayna kasqanmanta yachanapaq qaway kay qellqata)

Hinalla kusisqa kanapaqqa, tiemponchiktam allinta rakina

KUSIRIKUNAPAQ

FAMILIAPAQ

LLAMKANAPAQ

HUÑUNAKUYPAQ

SAPAKAMA ESTUDIANAPAQ

PREDICANAPAQ

[10 kaq paginapi dibujokuna]

¿Kallpanchawaqchu hukmanyasqa iñiqmasikikunata?