Hinallayá kusikusun sasachakuykuna kaptinpas

‘Kusikunqakum [Jehová Diospi] amparakuy maskaq runakunaqa. Kusikuymantam wiñaypaq takinqaku.’ (SAL. 5:11.)

1, 2. a) Wakin runakunata hina, ¿imakunam ñakarichiwanchik? b) ¿Imaraqmi cristianokunataqa sasachawanchik?

JEHOVÁ DIOSPA testigonkunaqa manam librakunchikchu ñakariykunamantaqa. Wakin runakunata hinam ñakarichiwanchik suwakuna, guerrakuna, runapa mana allin rurasqankuna, desgraciakuna, wakchayay hinaspa onqoykunawan wañuypas. Pablopa nisqanman hinam ‘Diospa tukuy ima unanchasqankunaqa ñakarichkan, waqachkan [. . .] wachakuywan ñakariq warmi hina’ (Rom. 8:22). Chaymantapas pantaq kaspanchikmi ñakarinchik, chaymi Davidpa nisqanman hina ñoqanchikpas kaynata nichwan: “Mana allin rurasqaymi ñitiruwachkanña. Llasaq carga hinaraqmi ñitiruwachkanña”, nispa (Sal. 38:4).

² Llapan runakunata ñakarichiq sasachakuykunamantapas, cristianopaqqa kachkanraqmi huk sasachakuy (Luc. 14:27). Jesus hinam cheqnisqa hinaspa qatikachasqa kanchik (Mat. 10:22, 23; Juan 15:20; 16:2). Chaymi kallpanchakuspa aguantananchik Jesuspa qatiqnin kayta munaspaqa chaynataq mosoq pachapi bendicionkunata chaskinapaqpas (Mat. 7:13, 14; Luc. 13:24).

3. ¿Imaynatam yachanchik kusisqa kananchikta Diospa munasqanta?

³ ¿Llakisqallachu cheqap cristianokuna tarikunanchik ñakariykunawan sasachakuykuna kaptin? Manam. Jehová Diosqa munanmi  castiganan punchawtawan promesankuna cumplikunanta suyaspanchik kusisqa kananchikta. Bibliaqa achka kutitam nin Diosta serviqkuna kusisqa kasqankumanta (leey Isaias 65:13, 14). Ejemplopaq, Salmo 5:11 nin: ‘Kusikunqakum [Jehová Diospi] amparakuy maskaq runakunaqa. Kusikuymantam wiñaypaq takinqaku’, nispa. Arí, sasachakuykunapa chawpinpipas atichwanmi kusisqa, hawkalla hinaspa contentasqa tarikuytaqa. Qawasun imaynatam Biblia yanapawanchik sasachakuykunata kusisqa aguantanapaq.

Jehová Diosqa ‘kusisqa Diosmi’

4. ¿Imaynam Jehová Dios tarikun kamachiq kasqanta qepanchaptinku?

⁴ Jehová Diospa ejemplonmanta yachasun. Payqa tukuy atiyniyoqmi hinaspa tukuy imapi munaychakuqmi, manam imatapas nitaq pitapas necesitanchu. Chayna kaspanpas, maynatachá llakikurqa huknin angel mana kasukuspa Satanaspi rikuriruptinqa chaynataq huk angelkunapas contranpi hatariruptinkuqa. Chaymantapas, maynatachá llakikurqa admirakuypaq unanchasqan Adanwan Eva chaynataq paykunapa millonnintin churinkuna Llapallan Kamachiq kasqanta qepancharuptinkuqa (Rom. 3:23).

5. ¿Imakunam Jehová Diosta astawanqa llakichin?

⁵ Kunanmi Satanaspa mana kasukusqanqa astawan qawakuchkan. 6.000 watañam Diosqa qawan runakunapa taytacha-mamacha yupaychasqankuta, wañuchinakusqankuta hinaspa huchapakusqankutapas (Gen. 6:5, 6, 11, 12). Aguantarqataqmi contranpi llullakuna rimasqankuta hinaspa tukuy nisqankutapas. Wakinpiqa serviqninkunapas llakichirqakum, israelitakunamantam Biblia kaynata nin: “Achka kutipim Diosta mana kasukurqakuchu chunniqpi. Llakichirqakum [. . .] mana imapa kasqan purunpi. Kasqallanmi Diosninkuta piñachirqaku. Israelpa chuya Diosnintam llakichirqaku” (Sal. 78:40, 41). Jehová Diosqa anchatam llakikun llaqtan qepanchaptinqa (Jer. 3:1-10). Llakikuntaqmi mana allinkunawan serviqninkuna ñakariptinkupas (leey Isaias 63:9, 10).

6. ¿Imaynatam Diosqa atiparqa runakuna mana allin rurasqankuwan llakichisqanta?

⁶ Jehová Diosqa hinallam munayninta ruran, runakuna mana allin rurasqankuwan llakichiptinpas. Imapas kaptinqa chayllam allichananpaq imatapas rurarqa, chaynapi llumpay sasachakuy mana kananpaq. Chaymantapas  tukuytam rurarqa hamuq tiempopaq, chaynapi munasqankuna cumplikunanpaq. Chaymi hinalla kusisqa tarikun chaynataq suyachkan Llapallan Kamachiq kasqan hatunchasqa kananta hinaspa kasukuq serviqninkunapa bendicionkuna chaskinankutapas (Sal. 104:31). Contranpi llullakunata rimaptinkupas payqa hinallam “kusisqa” kachkan (1 Tim. 1:11 NM; Sal. 16:11).

7, 8. ¿Imaynatam Jehová Diosta qatipakuchwan rurasqanchik mana allin lloqsiptin?

⁷ Jehová Dios hina sasachakuykunata allichayta mana atispanchikpas, ejemplontaqa qatipakuchwanmi. Imapas rurasqanchik mana allin lloqsiptinqa hukmanmi tarikunchik, ichaqa manam chayraykuchu tukuy tiempo hukmanyasqallaña kananchik. Diosman rikchakuq unanchasqa kaspanchikmi, atinchik yachaywan ima ruraytapas. Chaymi ima sasachawasqanchikmanta tanteanchik hinaspa allichanapaq kallpanchakunchik.

⁸ Chaynata ruranapaqqa kaytam yuyarinanchik: manam atichwanchu lliw sasachakuykuna allichaytaqa. Sasachakuyllapiña piensaspaqa aswan hukmanyasqam kasunchik, Jehová Diosta servispapas manañam kusikusunchu. Allichanapaq tukuy atisqanchikta ruraruspanchikqa manañam chaypiqa llumpayta piensanachu, aswanqa yanapawaqninchik allin kaqkunatañam rurananchik. Chayna rurasqankumanta ejemplokunatayá Bibliapi qawasunchik.

Entiendeqmi kananchik

9. ¿Imamantam Anaqa entiendeq karqa?

⁹ Piensasun Diosmanta willakuq Samuelpa maman Anapi. Payqa achka watañam mana wachakuq karqa, chaymi llumpayta llakikurqa, hukkunapas burlakuqkum. Llumpay llakisqa kaspanmi wakinpiqa tukuy punchaw waqaspan mana mikuqchu (1 Sam. 1:2-7). Huknin kutipim templota rispan, ‘Anaqa llumpayta waqastin llakisqallaña Tayta Diosta mañakurqa’ (1 Sam. 1:10). Imayna tarikusqanmanta Diosman willakuruspanmi, sacerdotekunapa jefen Eliywan rimarqa, payñataqmi nirqa: “Ripukuy hawkalla. Israelpa Diosninyá imam mañakusqaykita qosunki”, nispa (1 Sam. 1:17). Anaqa tukuy atisqantam rurarqa. Payqa entienderqam wawayoq kananpaq Diosmantaña kasqanta, chaymi ‘kutikuspan mikurqaña’ hinaptinmi ‘uyanpas manaña hukmanyasqachu karqa’ (1 Sam. 1:18).

10. ¿Imatam Pablo rurarqa ‘tipaqnin kichka hina’ onqoymanta mana sanoyaspan?

¹⁰ Apostol Pablopas chaynatam sasachaqninta atiparqa. Manam yachanchikchu imawan onqosqanta, ichaqa cuerponpim ‘tipaqnin kichka hina’ llumpayta ñakarichirqa (2 Cor. 12:7). Pabloqa tukuytam rurarqa librakunanpaq. Jehová Diostapas kimsa kutitam mañakurqa sanoyachinanpaq. Kimsakama mañakuruptinmi Diosqa willarqa ‘tipaqnin kichka hina’ ñakarichiq onqoyta mana chinkachinanmanta. Chayta entiendespanmi, Pabloqa Dios serviypi astawan kallpanchakurqa (leey 2 Corintios 12:8-10).

11. ¿Imaynatam Diosta mañakusqanchikqa yanapawanchik sasachakuykunata atipanapaq?

¹¹ Chaynaqa, ¿nichkanchikchu sasachakuyninchikkunata Jehová Diosman manaña willakunamanta? Manam (Sal. 86:7). Aswanqa Bibliam nin: “Amayá imamantapas afanakuychikchu, aswanqa orakuspaykichikyá lliwta Diosman willaychik hinaspayá payman graciasta qoychik. Hinaptinqa Diosninchikmi hawkayachisunkichik runakunapa mana entiendey atinan hawkayaywan. Chaynapim imamantapas mana preocupakunkichikchu nitaq llakikunkichikchu”, nispa (Fili. 4:6, 7). Sasachakuyninchikta Dios mana chinkachispanpas, mañakusqanchiktam uyarinqa hinaspa piensasqanchiktapas waqaychanqa. Chaymi sasachakuyninchikta willakuruspanchikqa, hawkayayta tarinchik hinaspa cuentata qokunchik hukmanyasqa tarikuyqa mana allin kasqanta.

 Diospa munaynin ruraypi kusikusun

12. ¿Imanasqam mana allinchu unay tiempo hukmanyasqa tarikuyqa?

¹² Bibliam nin: “Sasachakusqayki punchawpi hukmanyaruspaqa pisi kallpayoqñam rikurirunki”, nispa (Pro. 24:10). Nintaqmi runapa ‘sonqon llakisqa kaptin’ hukmanyasqa kananmanta (Pro. 15:13). Chaymi wakin cristianokunapas llumpay llakisqa kaspanku Biblia leeyta hinaspa leesqankupi yuyaymanayta saqerunku. Chaynataq, manañam tukuy sonqonkuwanchu mañakunku hinaspa iñiqmasinkumantapas karunchakunku. Chaymi mana allinchu unay tiempo hukmanyasqa tarikuyqa (Pro. 18:1, 14).

13. ¿Ima ruraykunataq kusichiwanchik hinaspa kallpanchawanchik?

¹³ Ichaqa, imaña kaptinpas mana hukmanyaymi yanapawasun allin kaqkunapi piensaspa hawkayaytawan kusikuyta tarinapaq. Ejemplopaq, rey Davidmi kaynata qellqarqa: “Diosnilláy, munachkanim munallasqaykiman hina rurallayta”, nispa (Sal. 40:8). Hinaptinqa, sasachakuypi tarikuspaqa amayá Diospa niwasqanchikkuna ruraytaqa saqesunchu, chay ruraymi yanapawasun llakisqa kasqanchikta atipanapaq. Jehová Diosqa niwanchikmi Palabranta sapa kuti estudiaspa kusisqa kananchikmanta (Sal. 1:1, 2; Sant. 1:25). Bibliata leespa chaynataq huñunakuyman rispam, ‘miel hina miskillaña’ rimaykunamanta yachanchik chaymi kusichiwanchik hinaspa kallpanchawanchik (Pro. 12:25; 16:24).

14. ¿Jehová Diospa ima prometewasqanchiktaq kusichiwanchik?

¹⁴ Diosmi achka razonkunata qowanchik kusisqa kanapaq. Puntataqa prometewanchikmi salvasqa kanapaq (Sal. 13:5). Yachanchikmi kay tiempopi imaña pasawaptinchikpas Jehová Diosta mana saqespaqa bendicionkuna chaskinamanta (leey Eclesiastes 8:12). Diosmanta willakuq Habacucmi convencesqa kaspam kayna sumaqllataña nirqa: ‘Manaña higos sachakuna waytaptinpas, manaña uvas plantakuna ruruptinpas, manaña aceitunas sachakuna ruruptinpas, chakrakunapi kawsaykuna manaña kaptinpas, kanchakunapi  ovejakuna manaña kaptinpas, corralkunapi vacakuna manaña kaptinpas, ñoqaqa [. . .] salvaqniy Diosraykum kusikusaq’, nispa (Hab. 3:17, 18).

“¡Mayna kusisqam Tayta Dios yupaychaq runakunaqa!”

15, 16. ¿Imakunam kusichiwanchikña hamuq tiempopi bendicionkunata suyaptinchikpas?

¹⁵ Jehová Diosqa munanmi promesankuna manaraq cumplikuchkaptin allinkuna qowasqanchikwan kusikunanchikta. Chaymantam Biblia qellqaqkunamanta huknin nirqa: ‘Runapaqa manam imapas allinqa kanchu aswanqa kusikuyllam [. . .], kawsakunankama allin rurayllam [. . .], mikukuyllam, tomakuyllam chaynataq llamkasqanmanta kusikuyllam. Tukuy chaykunapas Diosmantam hamun’, nispa (Ecl. 3:12, 13). Hukkunata yanapaspapas ‘allintam rurachkanchik’. Jesuspa nisqanman hinaqa ima chaskiqmantapas aswan kusisqaqa imapas qoqmi (Hech. 20:35). Chaymi iñiqmasinchikqa qosanwan otaq señoranwan, tayta-mamanwan, wawa-churinkunawan hinaspa ayllunkunawanpas sumaq sonqo kaspanqa Jehová Diosta kusichin hinaspa kikinpas kusikun (Pro. 3:27). Kusisqataqmi tarikunqa iñiqmasinkunata kuyaspan, wasinpi chaskiykuspan, pampachaykuspan hinaspa sonqomanta predicaspanpas (Gal. 6:10; Col. 3:12-14; 1 Ped. 4:8, 9).

¹⁶ Eclesiastes libropi leesqanchikmi qawachin mikuspa chaynataq yakuta tomaspa sapa punchaw kusikunamanta. Kaymantam yachanchik: sasachakuykuna kaptinpas Jehová Diospa tukuy ima qowasqanchikwan kusikunamanta. Chaymantapas, mana qollqellawanmi kusikunchik intipa chinkaykusqanta qawaspa, sumaqllaña sitiokunata chaynataq uchuy animalchakunapa pukllasqanta qawaspanchikpas. Chaykunapi piensaspanchikmi allinkuna qowaqninchik Diosta astawan kuyanchik.

17. a) ¿Imata ruraspam sasachakuykunamanta librasqa kasunchik? b) ¿Imamanta yachasqanchikwanmi kunan tiempo kusisqa kachwan?

¹⁷ Diosta kuyaspanchik, kamachikuyninta kasukuspa chaynataq Jesuspa wañusqanpi iñispaqa, chayllañam qawasun sasachakuyninchikpa allichakusqanta hinaspam wiñaypaq kusisqa kasunchik (1 Juan 5:3). Chay punchaw chayamunankamaqa kusikusun, llakisqa kasqanchikta Jehová Dios yachasqanmanta piensaspa. Chaynam Davidpas tarikurqa, nirqam: ‘Kuyapayawasqaykiraykum kusikusaq. Qamllam ñoqapa ñakarisqaykunataqa qawarqanki. Qamllam ñoqapa sasachakuyniykunataqa yachanki’, nispa (Sal. 31:7). Diosqa kuyawanchikmi, chaymi sasachakuykunamanta librawasunchik (Sal. 34:19).

18. ¿Imakunawanmi Diospa llaqtanpi kaqkuna kusisqa kananchik?

¹⁸ Promesankuna cumplikunanta suyaspayá, qatipakusun kusisqa Diosninchikta. Jehová Dios servisqanchiktaqa amayá harkawasunchu mana allin piensasqanchikqa. Sasachakuytapas atipasun yachaywan hinaspa allinta tanteaspa. Diosninchikqa yanapawasunmi imayna kasqanchikta controlanapaq hinaspa ñakariyta atipanapaqpas. Payta servinapaq hinaspa kawsanapaq qowasqanchikkunawan kusikusun. Paypa hichpallanpi kaspanchikqa Salmo 144:15 nisqanman hinam kusikusun, chaypim nin: “¡Mayna kusisqam Tayta Dios yupaychaq runakunaqa!”, nispa.

Yuyarisun yachasqanchikmanta

• ¿Imaynatam Jehová Diosta qatipakuchwan sasachakuy atipaypi?

• ¿Imanasqataq sasachakuykuna kaptin entiendeq kananchik?

• ¿Imanasqataq sasachakuy kaptinpas kusikunanchik Diospa munaynin ruraypi?

[Kay yachachikuypa tapukuyninkuna]

[16 kaq paginapi dibujokuna]

Kay Pachapi tukuy mana allinkunata qawaspanmi Jehová Diosqa llakikun

[Reqsikunchikmi]

© G.M.B. Akash/Panos Pictures

[18 kaq paginapi dibujokuna]

Diosqa imapas necesitasqanchiktam qowanchik hinalla kusisqa kanapaq