¿Imanasqataq Jehová Diosman qokunanchik?

“Chisi tutam rikuriykuwarqa servisqay Diospa angelnin.” (HECH. 27:23.)

1. a) ¿Imatam pipas ruranan bautizakunanpaq? b) ¿Ima tapukuykunatam qatiqninpi kutichisun?

BAUTIZAKUQKUNAPAQ discurso tukuytam iskay tapukuykuna rurakusqanmanta huknin kaynata nin: ‘Jesuscristo huchanchikrayku wañusqanman hina, ¿huchaykikunamanta wanakurunkiñachu hinaspa Jehová Diosman qokurunkiñachu Paypa munayninta ruranaykipaq?’, nispa. Ichaqa, ¿imanasqataq cristianokunaqa Diosman qokunanku? ¿Imakunapim yanapan chayna rurasqanku? ¿Imanasqataq chayta ruranankupuni servisqankuta Dios chaskinanpaq? Kaykunamanta yachanapaqqa puntatam entiendenanchik Diosman qokuy ima ninan kasqanmanta.

2. ¿Imaynatam Diosman qokunchik?

² ¿Imaynatam Diosman qokuna? Chaymanta yachanapaqmi Pablopa rimasqan yanapawasun, viajasqan buque manaraq lamar qochapi chinkaykuchkaptinmi Jehová Diosta nirqa: ‘Servisqay Dios’, nispa. Chaywanmi qawachirqa Diospaq kasqanta (leey Hechos 27:22-24). ‘Kay pachapi mana allin kaqkuna Diablopa makinpiña kaptinpas’, cristianokunaqa Diospaqñam kanchik (1 Juan 5:19). ¿Imaynatam chayta rurarqanchik? Diosman qokuspanchik otaq oracionpi payman prometekuspanchik, chaymantañataq bautizakuspanchik.

3. ¿Imatam Jesus qawachirqa bautizakusqanwan, hinaspa imaynatam cristianokunaqa ejemplonta qatipakunchik?

³ Jesusmi bautizakusqan punchawpi ejemplota churarqa, Taytanpa munayninta ruray munasqanta qawachispan. Payqa manañam qokunanchu karqa Diosman qokusqa Israel nacionpi nacesqanrayku. Bautizakuspanqa manam Leypa nisqantachu rurarqa, aswanmi Diosta nichkarqa: ‘Hamurqanim munasqaykita ruranaypaq’, nispa (Heb. 10:7; Luc. 3:21). Arí, bautizakuspanmi Taytanman presentakuchkarqa munayninta rurananpaq. Cristianokunaqa Jesuspa ejemplonta qatipakuspam bautizakunchik, ñoqanchikmi ichaqa Diosman oracionpi qokusqanchikta qawachinchik.

 Diosman qokuymanta bendicionkuna

4. ¿Imatam yachachiwanchik Davidwan Jonatan amistad kanankupaq acuerdo rurasqanku?

⁴ Diosman qokuyqa manam yanqa prometekuyllachu, aswanqa allinta tanteaspa ruraymi. ¿Imanasqataq Diosman qokuyqa ancha allin? Chaymanta yachanapaqqa yanapawasun runakunapa acuerdota rurasqanku ancha allin kasqanmanta yachaymi. Puntata rimasun amistadmanta. Amistadniyoq kanankupaqqa puntatam amistad kananku. Iskayninkum obligasqa kanku rimasqankuta cumplispa cuidanakunankupaq. Bibliapim tarinchik Davidwan Jonatan ancha allin amistad kasqankumanta, paykunam kuyanakuspanku acuerdota rurarqaku (leey 1 Samuel 17:57 hinaspa 18:1, 3). Kunanqa paykunapa amistadninku hinaqa manam ancha kanchu. Ichaqa ñawpaq tiempopi hinam, allin amistadkunaqa rimasqankuta cumplinankupaq kallpanchakunku (Pro. 17:17; 18:24).

5. ¿Imatam huk sirviente ruranan karqa kuyakuq patronninwan qepananpaq?

⁵ Moisespa chaskisqan Leypim tarinchik patronninwan sirviente wiñaypaq huk acuerdo rurasqankumanta. Exodo 21:5, 6 nin: ‘Sichu chay sirviente ninman: “Kuyanim patronniyta, kuyanitaqmi warmiytawan churiykunatapas. Manam libreqa lloqsiymanchu” nispa. Hinaptinqa, patronninmi Diospa qayllanman pusaspan punkuman otaq punkupa marconman asuykachispan alisnawan sirvientepa rinrinta toqorunqa hinaptinmi kawsanankama chay patronninpa sirvientenña kanqa’, nispa. Qawasqanchikman hinaqa, libreña lloqsinanpaq kachkaspanpas sirvienteqa kuyakuq patronninwanmi qepakuyta atinman karqa paywan contratota ruraspanqa, chaynapi hinalla amparasqa kananpaq.

6, 7. a) ¿Imaynatam yanapawanchik contrato rurayqa? b) ¿Imatam nichwan Jehová Dioswan amistadninchikmantawan acuerdo rurasqanchikmanta?

⁶ Casarakuqkunapas kallpanchakunankum prometekusqankuta cumplinankupaq. Casarakunapaq acuerdotaqa rurakun manam documentollawanchu, aswanqa runawanmi. ¿Imaynatam chayqa yanapan? Casarasqakunapas hinaspa churi-wawankupas amparasqa kanankupaqmi, chaytaqa manam tarinmankuchu servinakuqkunaqa. Chaynataq, casarasqa cristianokunaqa cumplinqakum rurayninkuwan hinaspa sasachakuyninkutapas kuyakuyllawanmi allichanqaku (Mat. 19:5, 6; 1 Cor. 13:7, 8; Heb. 13:4).

⁷ Kunanñataq qawasun llamkaypi contrato ruraymanta. Ñawpaq tiempomantaraqmi contrato rurayqa allin karqa (Mat. 20:1, 2, 8). Negociota ruranapaq otaq llamkanapaq contrato rurayqa ruraqkunapa allinninpaqmi. Qawasqanchikman hinaqa amistadkuna, casadokuna hinaspa negocio ruraqkunapas allinmi tarikunku acuerdo rurasqankuta cumplispankuqa. Jehová Dioswanmi ichaqa amistad kanchik payman qokuspa, chaymi mana imatapas suyaspa vidanchikta qonchik. Qatiqninpim yachasun Diosman qokuyqa imaynata ñawpaq tiempopi runakunata yanapasqanmanta, chaynataq imanasqa wakin acuerdokunamanta aswan allin kasqantapas.

Israel naciontam qokusqanku yanaparqa

8. ¿Imaynatam israelitakunaqa Diosman qokurqaku?

⁸ Israelitakunam Diosman qokurqaku payman prometekuspanku. Sinai orqopa chimpanpi huñunachispanmi Diosqa nirqa: “Nisqayta kasuspaykichikqa chaynataq contratoytapas cumplispaykichikqa qamkunamá kankichik wakin runakunamanta akllakusqay runaykuna”, nispa. Hinaptinmi llapanku huk runa hinalla nirqaku: “Diospa tukuy kamachisqantaqa rurasaqkum”, nispa (Exo. 19:4-8). Prometekusqankuqa manam wakin acuerdokuna hinachu karqa. Qawachirqakum  Jehová Diospaqña kasqankuta, paypas nirqam ‘akllakusqan runankuna’ kasqankuta.

9. ¿Imaynatam israelitakunata yanaparqa Diosman qokusqanku?

⁹ Diospaq kasqankuqa israelitakunapa allinninkupaqmi karqa. Payqa cumpliq hinaspa kuyakuqmi karqa, churinkunata hinam qawarqa. Paykunatam nirqa: “¿Ñuñusqan wawata maman qonqarunmanchu? ¿Wachakusqan wawata maman qepanchakurunmanchu? Ichapas mamanqa qonqarunman wawanta. Ñoqam ichaqa mana qonqasqaykichikchu”, nispa (Isa. 49:15). Diosqa llaqtantam Leyninwan yanaparqa, paymanta willakuqkunawan kallpancharqa hinaspa angelkunawan ampararqa. Salmos qellqaqmi nirqa: ‘[Diosqa] Jacobpa castankunamanmi palabrankunata willarqa. Israelpa castankunamanmi decretonkunatawan [. . .] reglamentonkunata willarqa. Manam chaynatachu rurarqa wakin nacionkunawanqa’, nispa (Sal. 147:19, 20; leey Salmo 34:7, 19 hinaspa 48:14). Ñawpaq tiempopi Israel nacionta hinam, kunanpas payman qokuq cristianokunata cuidan.

¿Imanasqataq Diosman qokunanchik?

10, 11. ¿Imanasqam Diospa familianmanta karunchasqa nacerqanchik?

¹⁰ Wakinkum ninku: “¿Imanasqam Diosman qokunay hinaspa bautizakunay payta servinaypaq?”, nispa. Chaymantaqa yachasun paypa qayllanpi imayna tarikusqanchikmanta entiendespam. Adanpa huchanraykum llapallanchik nacenchik Diospa familianmanta karunchasqa (Rom. 3:23; 5:12). Chaymi familian ukupi kaytaqa atichwan payman qokuspalla. ¿Imanasqa? Qawasunchikyá.

¹¹ Manam pipas tayta-mamanchikmantaqa chaskirqanchikchu cheqap otaq mana huchayoq kawsaytaqa (1 Tim. 6:19). Adanwan Eva huchallikusqankuraykum kuyakuq Taytanchikmanta karunchasqa nacenchik, chaymi churinkuna kaytaqa mana atinchikchu (tupachiy Deuteronomio 32:5). Chaymantapacham runakunaqa Diospa familian ukupiqa mana yacharqakuchu, aswanmi tarikurqaku paymanta karunchasqaña.

12. a) ¿Imaynatam pantaq runakunaqa Diospa familianpa parten kachwan? b) ¿Imakunatam rurana manaraq bautizakuchkaspa?

¹² Chayna kaptinpas, sapakamam Dios mañakunanchik familianpa parten kananchikpaq. * Ichaqa, ¿imaynatam pantaq kaspanchikpas chayna favorecesqa kachwan? Pablopa nisqanman hinaqa, ‘Diospa contranpi kachkaptinchikpas wañuspam Churin Jesus allinyanachiwarqanchik’ (Rom. 5:10). Chaynataq, Dios chaskiwananchikpaqqa paytam mañakunanchik allin concienciayoq kanapaq, chaytaqa rurasun bautizakuspam (1 Ped. 3:21). Ichaqa huk ruraykunataraqmi rurananchik. Puntataqa Diostam allinta reqsinanchik, paypi confiananchik, huchanchikmanta wanakunanchik hinaspa vidanchikta cambiananchik (Juan 17:3; Hech. 3:19; Heb. 11:6). ¿Imatam chaymanta rurananchik?

13. ¿Imanasqataq Diospa familian kanapaqqa payman prometekuspa qokunanchik?

¹³ Diospa familianpi yupaychaqninkuna kanapaqqa allinta tanteaspam prometekunanchik. ¿Imanasqa? Rikchanachiywan entiendesun. Llaqtapa respetasqan huk taytam wakcha mozochata reqsirunman, kuyaspanmi uywakuyta munanman. Ichaqa ninmanmi: “Prometeway taytaykita hina qawawanaykipaq, kuyawanaykipaq hinaspa respetawanaykipaq”, nispa. Chayta mana ruraptinqa manam chaskinmanchu. Allinmi taytapa chayna nisqanqa. Chaynallataqmi, Diospas familianpiqa chaskin payman  prometekuspa qokuqkunallata. Chaynatam Biblia nin: “Cuerpoykichiktaqa Diosmanyá qoychik kawsachkaq ofrendata hina hinaspayá payllapaqña kawsaychik agradowan chaskisunaykichikpaq”, nispa (Rom. 12:1).

Kuyaspa chaynataq iñispa ruraymi

14. ¿Imaynatam Dios kuyasqanchikta qawachin qokusqanchik?

¹⁴ Qokuspanchikqa Dios kuyasqanchiktam qawachinchik. Kayqa casarakuspa prometekuy hinam. Casarakusqanku punchawmi cristianoqa novian kuyasqanta qawachin imaña kaptinpas paywan kananpaq prometespan. Manam casado vidapi rurayninkuna cumplinallanpaqchu prometekuchkan, aswanqa señorallanpaq kaspa kuyananpaqmi. Yachantaqmi chaynata mana prometekuspanqa casarakuy mana atisqanta. Chaynallataqmi, Diosman mana qokuspaqa Paypa familianpaq lliw bendicionkunataqa mana chaskichwanchu. Arí, Diosmanqa qokunchik paypaq kayta munaspanchikmi, pantaq kaspanchikpas munanchikmi imaña kaptinpas tukuy sonqowan kasukuyta (Mat. 22:37).

15. ¿Imanasqataq Diosman qokusqanchikqa iñisqanchikta qawachin?

¹⁵ Diosman qokuspaqa iñisqanchiktapas qawachinchikmi. Jehová Diosmanqa qokunchik paypi creespa hinaspa amistadnin ancha allin kasqanpi confiaspanchikmi (Sal. 73:28). Yachanchikmi payta serviy sasa kasqanta, “huchallikuq pierdesqa runakunapa chawpinpi” kasqanchikrayku. Ichaqa segurom kanchik kallpanchakusqanchikta Dios bendecinanmanta (Fili. 2:15; 4:13, NM). Yachanchikmi pantaq kasqanchikrayku huchallikuptinchik llakipayawananchikta (leey Salmo 103:13, 14 hinaspa Romanos 7:21-25). Segurotaqmi kanchik payta kasukunapaq kallpanchakusqanchikta bendecinanmantapas (Job 27:5).

Diosman qokuspaqa kusikuytam tarisun

16, 17. ¿Imanasqataq Diosman qokusqanchikqa kusichiwanchik?

¹⁶ Vidanchikta Diosman entregasqanchikraykum payman qokuyqa kusikunapaq, Jesuspa nisqanman hinaqa “ima chaskiqmantapas aswan kusisqaqa imapas qoqmi” (Hech. 20:35). Kay Pachapi kaspanmi Jesusqa chayta rurarqa hinaspam kusisqa karqa. Wakinpiqa samananta, mikunanta hinaspa paypaq imatapas ruranantam saqerqa runakunata yachachinanpaq (Juan 4:34). Taytanpa munasqanta ruraspan kusikusqanta hinaqa manam imapas kusichiqchu. Chaymi nirqa: ‘Ñoqaqa paypa agradasqantam tukuy tiempo rurani’, nispa (Juan 8:29; Pro. 27:11).

¹⁷ Jesusmi qatiqninkunata yachachirqa imaynata aswan kusisqa kanamanta, nirqam: ‘Pipas qatiwayta munaspaqa amañayá kikillanpaqqa kawsachunchu’, nispa (Mat.  16:24). Manaña kikillanchikpaq kawsaspam kuyakuq Diosman asuykunchik. ¿Allinchu chayqa kanman?

18. ¿Imanasqam Diosman qokuyqa aswan kusichiwanchik runakunaman otaq ima ruraymanpas qokuymantaqa?

¹⁸ Diosman qokuqkuna hinaspa munaynin ruraqkunaqa aswan kusisqam kanku: runaman, qollqellaman otaq ima ruraymanpas qokuqkunamantaqa. Paykunamantaqa kusisqam cristianokunaqa kawsakunku (Mat. 6:24). Kusisqataqmi kanku Diospa rurayninpi ‘llamkaqmasin’ kaspankupas, ichaqa chaninchaqnin Diosmanmi qokurqaku manam imapas ruraymanchu, chaytaqa manam qonqankuchu (1 Cor. 3:9). Manam pipas Dios hinaqa chaninchanmanchu kasukusqankutawan kallpanchakusqankutaqa. Paykunataqa mozo-sipasyachinqam hinaspa cuidanqa wiñaypaq kawsanankupaqpas (Job 33:25; leey Hebreos 6:10).

19. ¿Imaynam Dioswan kanku payman qokuqkunaqa?

¹⁹ Bibliam kaynata niwanchik: “Diosman asuykuptikichikqa paypas asuykusunkichikmi”, nispa (Sant. 4:8; Sal. 25:14). Arí, Diosman qokuqkunaqa paypa amistadninmi kanku. Qatiqnin estudiopim yachasun Diospaqña kanapaq imanasqa confianzawan payman qokunamanta.

[Willakuy]

¿Imatam niwaq?

• ¿Imaynatam Diosman qokuna?

• ¿Imaynatam yanapawanchik Diosman qokusqanchikqa?

• ¿Imanasqataq cristianokunaqa Diosman qokunanku?

[Kay yachachikuypa tapukuyninkuna]

[6 kaq paginapi dibujo]

Diosman qokusqanchikman hina kawsayqa kusichiwanchikmi