¡Allin ñanman hamuqkuna allin chaskisqa kaychik!

‘Wañuspapas kawsaspapas Señorninchik [Jehová Diospam] kanchik.’ (ROM. 14:8.)

1. ¿Imatam Jesus yachachirqa aswan allin ñanmanta?

ACHKALLAÑA ñankuna kaptinpas hukllam allinqa, chayta akllananchiktam Diosqa munan. Bibliapa nisqankunata kasukuspa chaynataq Diospa Churinmanta yachaymi allin ñanqa, kaymanta aswan allinqa manam kanchu. Paymi qatiqninkunata yachachirqa espirituwan hinaspa cheqapwan Taytanta yupaychanankupaq chaynataq kamachirqa runakunata yachachinankupaqpas (Mat. 28:19, 20; Juan 4:24). Nisqanta kasukuptinchikqa Jehová Diosmi kusikunqa hinaspa bendeciwasun.

2. a) ¿Imatam cheqapmanta yachaspanku punta pachak watapi rurarqaku? b) ¿Imanasqataq paykunata nirqaku ‘Ñanpa parten kasqankuta’?

² ‘Wiñay kawsaypaq’ kaqkunaqa lliwmi cheqapmanta yachaspanku bautizakunku (Hech. 13:48). Chayta ruraptinkum nichwan: “¡Allin chaskisqa kaychik allin ñanman hamuqkuna!”, nispa. Punta pachak watapim achka nacionkunamanta waranqantin runakuna cheqapmanta yacharqaku hinaspam bautizakuspanku qawachirqaku Dios serviy munasqankuta (Hech. 2:41). Paykunamantam nirqaku ‘Ñanpa parten kasqankuta’ (Hech. 9:2, NM; 19:23). Chayna nisqankuqa allinmi karqa, manañam ñawpaqpi hinañachu kawsarqaku, aswanqa Jesuspi iñispankum ejemplonta qatipakurqaku (1 Ped. 2:21).

3. a) ¿Imanasqataq bautizakurqanchik? b) ¿Haykam bautizakurunku chunka wata pasaqllapi?

³ Kay tukupay tiempopiqa Jesuspa qatiqnin kanankupaq yachachiymi apakuchkan 230 masnin nacionkunapi. 10 wata pasaqkunallapim 2.700.000 runakuna bautizakurqaku, chaypaqqa sapa semanam bautizakurqaku 5.000 runakuna. Chaytaqa ruranku kuyaspanku, serviyta munaspanku, Bibliamanta yachaspanku hinaspa kasukuspankum. Huk kutillatam bautizakunchik, chayta ruraptinchikmi Dioswan amistadninchik qallarin. Chaymantapas qawachinmi ñawpaqpi serviqninkunata hina ñanninpi hinalla purinapaq  yanapawananchikpi confiasqanchikta (Isa. 30:21).

¿Imanasqataq bautizakuna?

4, 5. ¿Ima bendicionkunatam chaskinku bautizakuqkuna?

⁴ ¿Imatam qanmanta niwaq? Yaqachá Diosmanta yacharunki, vidaykita cambiarunki hinaspa predicachkankiña manaraq bautizasqa kaspapas. Chayna kaptinqa, alabaykikum. Ichaqa, ¿Diosman qokurunkiñachu hinaspa piensankichu bautizakuyta? Bibliata estudiaspaykim yacharunki vidaykipi Dios yupaychay puntapi kananta, manam munasqallayki ruraychu nitaq qollqella huñuychu (leey Salmo 148:11-13; Luc. 12:15). Chaymantapas, bautizakuspaykiqa achka bendicionkunatam chaskinki. ¿Mayqenkunataq wakinqa kanman?

⁵ Bautizakusqaykiqa manam yanqachu kanqa, kusisqam tarikunki Diospa munayninta rurasqaykimanta yachaspa (Rom. 12:1, 2). Chuya espiritum yanapasunki iñiyniyoq kanaykipaq hinaspa hawkayayta tarinaykipaq (Gal. 5:22, 23, NM). Mañakusqaykitam Diosqa uyarinqa hinaspam bendecisunki Bibliapa nisqan kasukusqaykimanta. Ancha kusisqam servinki, wiñay kawsaypi suyakuynikipas aswanmi kanqa. Astawanqa Diosman qokuspa hinaspa bautizakuspaykim qawachinki tukuy sonqomanta Jehová Diospa testigon kay munasqaykita (Isa. 43:10-12).

6. ¿Imatam qawachinchik bautizakuspaqa?

⁶ Yakupi bautizakuspam qawachinchik Diosman qokusqanchikta hinaspa paypaqña kasqanchikta. Pablom nirqa: ‘Manam mayqanllanchikpas kawsachkanchikqa kikillanchikpaqchu, nitaqmi wañukuspanchikpas wañukusunqa kikillanchikpaqchu [. . .]. Chaynaqa wañuspapas kawsaspapas Señorninchik [Jehová Diospam] kanchik’, nispa (Rom. 14:7, 8). Diosmi respetawasqanchikta qawachin akllakunanchikpaq saqewaspanchik. Kamachikuyninta kasukunapaq akllakuspam kuyasqanchikta qawachinchik hinaspa kusichinchik (Pro. 27:11). Bautizakuspa payman qokusqanchikta qawachispapas, Reyninchik kasqantam reqsikunchik hinaspa Llapallan Kamachiq kasqantapas yanapanchik (Hech. 5:29, 32). Hinaptinmi Dios yanapawanchik (leey Salmo 118:6). Bautizakuspaqa kunanpas hinaspa hamuq tiempopipas achka bendicionkunataraqmi chaskisun.

Bendeciwanchikmi achka iñiqmasiyoq kanapaq

7-9. a) ¿Imatam Jesus prometerqa qatiqnin kanankupaq tukuy ima saqeqkunaman? b) ¿Imaynatam cumplikuchkan Marcos 10:29, 30 nisqanpi Jesuspa prometesqan?

⁷ Huk kutipim Pedroqa Jesusta nirqa: “Ñoqaykuqa tukuy imata saqeruspam qanwan purichkaniku ¿imataq ñoqaykupaqqa kanqa?”, nispa (Mat. 19:27). Yachaytam munarqa  paypas hinaspa Jesuspa qatiqninkunapas hamuq tiempopi ima chaskinankumanta. Paykunaqa tukuy imatam saqerqaku Diospa Gobiernonmanta willakunankupaq (Mat. 4:18-22). ¿Imatam Jesus nirqa?

⁸ Marcos libropa willakusqanman hinaqa prometerqam achka familia tarinankumanta. Paymi nirqa: ‘Pipas ñoqarayku hinaspa [. . .] allin noticiarayku saqenqa wasinta, wawqe-paninkunata, turi-ñañankunata, tayta-mamanta, warminta, churinkunata, chakrankunata hinaspaqa chaskinqam kay tiempopi pachak kuti masta wasikunata, wawqe-panikunata, turi-ñañakunata, tayta-mamakunata, churikunata hinaspa chakrakunata, chaskinqamá cheqnisqaña kaspapas, hamuq tiempopiñataqmi wiñaypaq kawsanqa’, nispa (Mar. 10:29, 30). Jesuspa nisqanman hinam punta pachak watapi qatiqninkuna iñiqmasinkunata chaskiykurqaku chaynapim ‘wawqe-paninkuna, turi-ñañankuna, tayta-mamankuna’ karqaku, wakinmi karqa: Lidia, Aquila, Priscila hinaspa Gayo (Hech. 16:14, 15; 18:2-4; 3 Juan 1, 5-8).

⁹ Kunanmi Jesuspa nisqanqa astawan cumplikuchkan. Achka misionerokuna, Betelpi llamkaqkuna hinaspa nacionkunaman rispa llamkaqkunam “chakrankunata” otaq tukuy imankuta saqerunku huk nacionkunapi astawan servinankupaq. Wakinkuqa wasinkutam saqerunku hinaspa ima necesitasqallankuwanña kawsakunku. Sapa kutim uyarinchik paykunata Jehová Dios cuidasqanmanta hinaspa servispanku kusisqa kasqankumantapas (Hech. 20:35). Llapanchikmi bautizasqakunaqa enteron Pachapi iñiqmasinchikkunawan kuska ‘Diospa munaychakusqantawan paypa munasqan allin ruraytaqa’ puntata maskananchik (Mat. 6:33).

“Alto-altopi kaqpa pakaykusqanmi” kanchik

10, 11. ¿Imataq ‘alto-altopi kaqpa pakaykusqan’ lugarqa hinaspa imaynatam chaypi tarikuchwan?

¹⁰ Diosman qokuspa bautizakuqkunaqa ‘alto-altopi kaqpa pakaykusqan [lugarpim]’ tarikunku (leey Salmo 91:1). Chayqa manam  huk sitiochu, aswanqa rimachkan imamantapas iñiyninchikta Dios waqaychananmantam. ¿Imanasqataq nin “alto-altopi” pakaykusqa lugar kasqanta? Mana iñiqkuna mana tariyta atisqankuraykum. Diospi confiaspa hinaspa qokusqanchikwan cumplispaqa kaynatapas ninchikman hinam: “Amparakuna wasi hinam qamqa kanki [. . .]. Diosnilláy, ñoqaqa qampim confiakusaq” (Sal. 91:2). Chaynapim Diosqa amparaqninchik kanqa (Sal. 91:9). ¿Imatawanraqtaq munachwanqa?

¹¹ ‘Alto-altopi kaqpa pakaykusqan’ lugarpiqa tarikunchik Diospa amistadnin kanapaq bendecisqa kaspanchikmi. Chayqa qallarin payman qokuspa bautizakuptinchikmi, yapakuntaq Bibliata estudiaptinchik, tukuy sonqowan mañakuptinchik hinaspa kasukunapaq kallpanchakuptinchik (Sant. 4:8). Jesusmi allin ejemplonchik, paymi Diospa hichpallanpi kachkan. Tukuy sonqonwanmi payqa Taytanpi confiarqa (Juan 8:29). Seguro kasunchik: Diosqa yanapawasunmi prometekusqanchikta cumplinapaq, chaytaqa atinmi hinaspa munanmi (Ecl. 5:4). Paywan amistadninchik allin kananpaq waqaychawasqanchikmi, qawachin kuyawasqanchikta hinaspa kasukuspa servinanchikta munasqantapas.

Dioswan hinaspa runakunawanmi allin tarikusun

12, 13. a) ¿Imaynam Dioswan hinaspa runakunawanpas tarikusun Payman qokuspa hinaspa bautizakuspa? b) ¿Imata ruranankupaqmi chayllaraq bautizakuqkunata yanapachwan?

¹² Diosman qokuspa hinaspa bautizakuspaqa, paywan hinaspa runakunawanpas allinmi tarikusun otaq llaqtanpim tarisun hawkayayta Jehová Dioswan hinaspa iñiqmasinchikkunawanpas (Sal. 29:11; Isa. 54:13). Runakunaqa manam chaytaqa qowanchikmanchu. Chayqa sutillam qawakun achka nacionkunamanta asambleaman riptinku, chaypiqa tukuy rimayniyoq hinaspa tukuy castamanta cristianokunam hawkalla, huk sonqolla hinaspa kuyanakuspa huñunakunku.

¹³ ¡Manam chaynachu tarikunku Diosta mana serviq runakunaqa! (Leey Isaias 65:13, 14.) Predicaspa runakunata yanapanapaqmi favorecesqa kanchik, chaynapi Dioswan hinaspa runakunawan hawkayayta tarinankupaq. Chaynataq, atichwanmi chayllaraq bautizakuqkuna yanapayta chaynapi Diosta aswan allinta servinankupaq. Chaymi paykunata yanapachwan ancianokuna niwaptinchikqa, chaynatam rurarqaku Aquilawan Priscilapas “Diospa rurasqanmanta aswan allintaraq” Apolosta yachachispanku (Hech. 18:24-26).

Hinalla Jesusmanta yachasun

14, 15. ¿Imanasqam Jesusmanta hinalla yachananchik?

¹⁴ Bautizakuspapas hinallam Jesusmantaqa yachananchik. ¿Imanasqa? Manaraq kay Pachaman hamuchkaspanmi payqa waranqantin watakunaña Taytanwan llamkaspan karqa (Pro. 8:22, 30). Yacharqam Taytanta serviywan cheqapmanta yachachiy aswan allin ñan kasqanta (Juan 18:37). Yacharqataqmi chay ñanninta purispan otaq chayna kawsasqanrayku ñakarispan wañunanta (Mat. 20:18, 19; Heb. 4:15). Ichaqa entienderqam chayta mana ruraspanqa, kikinpa munasqallanta hinaspa ñawsa hina ruray kasqanta. Rurasqanwanmi Diosta kasukunapaq ancha allin ejemplota qowarqanchik.

¹⁵ Bautizakusqan qepallatam Satanasqa tentacionkunawan Jesuspa rurasqanta saqerachiyta munarqa, ichaqa manam atirqachu (Mat. 4:1-11). Kaymi yachachiwanchik Diablo imataña ruraptinpas kasukuy atisqanchikta. Payqa astawanmi urmachiyta munan bautizakuy munaqkunata hinaspa chayllaraq bautizakuqkunatapas (1 Ped. 5:8). ¿Imaynatam chayta ruran? Chaypaqqa servichikun allin kananchikta munaq hinaspa rurasqanchikmanta mana ancha yachaq ayllunchiktam. Chaynakuna kaptinpas, atinchikmi tapukuykuna kutichiyta, predicayta hinaspa respetakuq, pacienciakuq chaynataq  huk sumaq kayniyoqkuna kaytapas (1 Ped. 3:15). Chaynapim uyariwaqninchikkunapas bendicionkunata chaskinmanku (1 Tim. 4:16).

Amayá allin ñantaqa haykapipas saqesunchu

16, 17. a) Deuteronomio 30:19, 20 nisqanman hina, ¿ima kimsa ruraykunam kachkan kawsakuyta chaskinapaq? b) ¿Imaynatam chayna kasqanta qawachirqaku Jesus, Juan hinaspa Pablopas?

¹⁶ Cristianokunapa tiemponmanta yaqa 1.500 wata ñawpaqtaraqmi, Moisesqa israelitakunata kallpancharqa chay tiempopi allin ñanta akllakunankupaq. Nirqam: ‘Kawsayta otaq wañuyta otaq bendecisqa kayta otaq ñakasqa kayta akllakunaykichikpaqmi [. . .] testigo kananpaq cielokunatawan kay Pachata kunan churani [. . .]. Kawsanaykichikpaqyá akllakuychik. Yupaychasqanchik Tayta Diosta kuyaspayá kasukuychik hinaspayá paymantaqa amapuni kacharikuychikchu’, nispa (Deu. 30:19, 20). Israelitakuna mana kasukuptinpas kawsanapaqqa hinallam Moisespa nisqan 3 ruraykunata rurana. Jesuswan huk cristianokunapas chaynatam yachachirqaku.

¹⁷ Chay 3 ruraykunamanta punta kaqqa kaymi: ‘Diostam kuyana’, chaymi kamachikuyninkunata cumplinanchik (Mat. 22:37). Iskay kaq: Diostam hinalla ‘kasukuna’ otaq uyarina. Chaytaqa ruranchik Bibliata estudiaspa chaynataq nisqanta kasukuspa (1 Juan 5:3). Chaymi lliw huñunakuykunaman rinanchik, chaypim Bibliamanta yachachiwanchik (Heb. 10:23-25). Kimsa kaq: manam Diosmantaqa ‘kacharikunanchikchu’. Imaña kaptinpas paypi iñisun hinaspa Churinta qatipakusun (2 Cor. 4:16-18).

18. a) ¿Imatam kay revista nirqa cheqap yachasqanchikmanta 1914 watapi? b) ¿Imaynam tarikunchik Diospa kanchayninpi purispanchik?

¹⁸ ¡Mayna allinmi cheqap yachasqanchikman hina kawsayqa! 1914 watapim, inglespi lloqsimuq kayna revista nirqa: “¿Manachu kusisqa hinaspa bendicionkuna chaskiq llaqta kanchik? ¿Manachu Diosninchikqa cumpliq? Sichu pipas reqsin kay ñanmanta aswan allin ñanta hinaspaqa chaynintayá purichun. Aswan allinta tariruspaqa willaykuwaykuyá. Ñoqanchikqa manam yachanchikchu Bibliamanta yachasqanchik hina allin kaqtaqa. [. . .] Manam pipas rimayta otaq qellqayta atinmanchu Diosmanta cheqap yachasqanchikwan kusisqa kasqanchikmantaqa. Diospa tukuy tiempopi allin rurasqan, yachaynin, atiynin hinaspa kuyakuyninmi yuyayninchiktawan sonqonchikta huntaykuspan yanapawanchik. Maskasqanchiktaqa tarirunchikñam. Diosmanta astawan yachaymantaqa manam huktaqa munanchikchu”, nispa (15 de diciembre 1914 The Watch Tower, 377-378 paginakunapi). Cheqap yachasqanchikmanta agradecekusqanchikqa hinallam kachkan. Kunanmi aswan kusikunchik ‘Diospa kanchayninpi’ purispanchik (Isa. 2:5; Sal. 43:3; Pro. 4:18).

19. ¿Imanasqataq chaylla bautizakunanku Diospa mañasqanwan cumpliqkunaqa?

¹⁹ ‘Diospa kanchayninpi’ puriyta munaspaqa, chayllam Diosman qokuspa bautizakunayki. Kallpanchakuy bautizakunaykipaq Diospa mañasqanwan cumplinaykipaq, chaynatam qawachinki Jehová Diospiwan Jesuspa rurasqankumanta agradecesqa kasqaykita. Diosman qoykuy imamantapas aswan allin kaqta: vidaykita. Qawachiy munaynin ruray munasqaykita hinaspa Churinta qatipakuy munasqaykitapas (2 Cor. 5:14, 15). Manam kaymanta aswan allin ñantaqa tarinkichu.

¿Imatam niwaq?

• ¿Imatam qawachinchik bautizakuspa?

• ¿Ima bendicionkunatam chaskin Diosman qokuspa bautizakuqkuna?

• ¿Imanasqam Jesusmanta yachana?

• ¿Imataq yanapawasun aswan allin ñanta mana saqenanchikpaq?

[Kay yachachikuypa tapukuyninkuna]

[25 kaq paginapi dibujo]

Bautizakuspam qawachinchik allin ñan akllasqanchikta

[26 kaq paginapi dibujokuna]

¿Amparakuchkankiñachu ‘alto-altopi kaqpa pakaykusqan’ lugarpi?