Mana manchakuspa Diospa palabranmanta willasun

‘Chuya espiritu lliwman huntaykuptinmi [. . .] mana manchakuspanku willarqaku Diospa palabranta.’ (HECH. 4:31.)

1, 2. ¿Imanasqataq allinta willakuspa yachachinapaq kallpanchakunanchik?

JESUSPA wañukunanpaq kimsa punchawllaña kachkaptinmi qatiqninkunata nirqa: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa. Chaynataq, hanaq pachaman kutinanpaqña kachkaspanpas nirqa: “Llapallan nacionpi runakunaman rispayá willamuychik qatiqniykunaña kanankupaq [. . .]. Yachachimuychikyá qamkunaman tukuy ima kamachisqayta kasukunankupaq”, nispa. Prometerqataqmi: “Sapa punchawmi ñoqaqa qamkunawan kasaq kay pacha puchukanankama”, nispa (Mat. 24:14; 26:1, 2; 28:19, 20).

² Kunanpas Jehová Diospa testigonkunaqa runakuna salvakunanpaqmi willachkanchik, kay rurayqa punta pachak watapim qallarirqa. Ima ruraymantapas, runakuna salvakunankupaq yachachiymi aswan allinqa. Chaymi kallpanchakunanchik allinta predicanapaq hinaspa yachachinapaq. Kay estudiopim yachasun chuya espiritu yanapawaptinchik mana manchakuspa predicanapaq, qatiqnin iskay estudiopiñataq allinta yachachinapaq chaynataq hinalla predicanapaq imayna yanapawasqanchikmanta.

Valorchakunanchikmi

3. Predicasqanchikpi, ¿imakuna kaptinmi necesitanchik valorta?

³ Diosmi anchata favorecewarqanchik Gobiernonmanta willakunanchikpaq. Ichaqa,  chay rurayqa wakin kutipiqa sasam. Wakin runakuna willakusqanchikta uyariptinkupas yaqa llapankum Noeypa tiemponpi hina kanku, paykunamantam Jesus nirqa “sinchi para chayamuspan llapallanta chinkarachinankama” mana kasukusqankuta (Mat. 24:38, 39). Wakinkuqa ñoqanchikmantam burlakunku otaq contranchikpi churakunku (2 Ped. 3:3). Contranchikpiqa churakunmanku autoridadkuna, estudiaqmasinchikkuna, llamkaqmasinchikkuna hinaspa familianchikkunapas. Chaymantapas sasachakunchikmi penqakuq otaq manchakuq kasqanchikwan chaynataq mana uyariwananchikmanta manchakuywanpas. Arí, achka sasachakuykunam kachkan Diosmanta yachachinapaqqa. Hinaptinqa, ¿imaynatam kallpata tarichwan ‘mana manchakuspa’ chaynataq ‘valorwan rimananchikpaq’? (Efe. 6:19, 20.)

4. a) ¿Ima ninantaq mana manchakuyqa? b) ¿Imaynatam Pabloqa valorchakurqa Tesalonicapi predicananpaq?

⁴ ¿Ima ninantaq mana manchakuyqa? Griego rimaypi mana manchakuq ninanqa “seguro kay”, “valorchakuy” hinaspa “qarinchakuy” ninanmi, qallariypiqa “mana recelaspa”, “tukuy sonqomanta” hinaspa “imam kaqta” rimay ninanmi karqa. Mana manchakuq kayqa manamá mana respetoyoq kaychu (Col. 4:6). Mana manchakuq kaspapas llapallanwanmi hawka kananchik (Rom. 12:18). Diospa Gobiernonmanta predicaspanchikqa valorchakunam, ichaqa sumaqllatam willananchik mana pitapas sientichinapaq. Qawasqanchikman hinaqa valorwan predicaspapas sumaq kayniyoqmi kananchik. Chayqa manam imayna runa kasqanchikmantachu, nitaq kikinchikpi confiasqanchikmantachu. Piensasun Pablowan predicaqmasinkuna Tesalonica llaqtaman predicaq risqankupi. Paymi nirqa: ‘Kallpanchakurqanikum [. . .] mana manchakuspa willakunaykupaq’, nispa. ¿Imanasqataq necesitarqaku kallpanchakuyta? ‘Filipos llaqtapi kamisqa ñakarichisqa kasqankuraykum’. ¿Imaynatam valorchakurqaku? Pablom nin: “Diosninchikmi kallpanchawarqaku”, nispa (leey 1 Tesalonicenses 2:2). Arí, Jehová Diosqa valortam qowachwan mana manchakuspa predicanapaq.

5. ¿Imaynatam Jehová Dios kallpancharqa Pedrotawan Juanta hinaspa wakin serviqninkunatapas?

⁵ Yuyarisunchik, Pedropa hinaspa Juanpa contranpi “judiokunapa jefenkuna, kamachikuqkuna” hinaspa “Diospa leynin yachachiqkuna” hatarisqankumanta. Iskaynin apostolkunam nirqaku: “Kikikichikpuni tanteaspa niwayku: ¿Diospaq allinchu kanman payta mana kasukuspa qamkunataña kasukuyniyku? Ñoqaykuqa manam upallaymankuchu rikusqaykumantawan uyarisqaykumanta willakuytaqa”, nispa. Manaña qatikachasqa kanankupaq orakunankumantaqa wakin cristianowan kuskam kaynata mañakurqaku: “Taytayku kunanqa qawayá imaynam amenazawasqankuta, [. . .] kallpanchawayku mana manchakuspa qanmanta rimanaykupaq”, nispa (Hech. 4:5, 19, 20, 29). ¿Imaynatam Jehová Dios mañakusqankuta contestarqa? (Leey Hechos 4:31.) Manaña manchakunankupaqmi espiritunta qorqa. Kunanpas qowanchikmanmi. Ichaqa, ¿imatam rurananchik chuya espiritunta chaskinapaq hinaspa predicacionpi yanapawananchikpaq?

¿Imaynatam valorchakuchwan?

6, 7. ¿Imatam rurananchik Diospa chuya espiritunta chaskinapaq? Ejemplokunawan willamuy.

⁶ Diospa espiritunta chaskinapaqqa orakunanchikmi. Uyariqninkunatam Jesus nirqa: ‘Mana allin runakuna kachkaspam churikichikmanqa allin kaqkunata qonkichik, ¿chaychu mañakuqkunamanqa hanaq pachapi kaq Taytaykichik mana qosunkichikman chuya espirituta?’, nispa (Luc. 11:13). Nisqanmi kallpanchawanchik espiritunta qowananchikpaq Diosta sapa kuti mañakunapaq. Astawanqa mañakuchwan Diosmanta: callekunapi, negociokunapi hinaspa maypipas predicanapaq manchakuspam (1 Tes. 5:17).

⁷ Chaynatam rurarqa Rosa. * Huk punchawmi  llamkasqan escuelapi warmachakuna maltratasqa kasqankumanta huk profesorapa leesqanta rikurqa. Leesqanwan llumpayta hukmanyaruspanmi profesora nirqa: “¡Imapiya kayqa tukunqa!”, nispa. Iñiqmasinchikqa chayllam predicarqa. ¿Imatam rurarqa valorchakuspa predicananpaq? Ninmi: “Diostam mañakurqani espiritunwan yanapawananpaq”, nispa. Allintamá willarqa hinaspapas huk punchaw kaqmanta rimanankupaqmi qeparqaku. Rimasuntaq 5 watachayoq Milane sutiyoq warmachamanta, payqa Nueva York llaqtamantam, ninmi: “Manaraq escuelayman richkaspaymi mamaywan sapa kuti orakuniku”, nispa. ¿Imatam mamanqa mañakun? Milaneman kallpata qoptin, allinta rurananpaq hinaspa Diosninmanta rimananpaqmi. Mamanmi nin: “Chayna rurasqaykum warmayta yanaparqa santokuymantawan fiestakunamanta Bibliapa ima nisqanta yachachinanpaq, kallpanchasqataq tarikurqa chaykunapi mana chaqrukunanpaqpas”, nispa. Kay ejemplokunam qawachin valorchakunapaq orakuyqa allin kasqanta.

8. ¿Imatam yachachiwanchik Jeremiaspa ejemplon?

⁸ Piensasuntaq manchakusqanta Jeremias atipananpaq ima yanapasqanpi. Nacionkunaman predicananpaq Jehová Dios kamachiptinmi nirqa: “[¡]Ancha warmaraqmi kallani! Manaraq rimaypas yachaqmi kallani”, nispa (Jer. 1:4-6). Tiempo risqanman hinam ichaqa mana manchakuspa hinaspa tukuy kallpanwan Jehová Diospa juicionkunamanta willarqa, chaymi hukkunaqa nirqaku mana allin pasanallanmanta rimaq kasqanta (Jer. 38:4). 65 wata masninmi mana manchakuspa willakurqa. Chayna predicasqanwanmi Israel nacionpi reqsisqa karqa, chaymi 600 watakuna pasaytapas Jesus allinta yachachiptin nirqaku Jeremias kasqanta (Mat. 16:13, 14). ¿Imataq Jeremiasta yanaparqa manchakuynintawan iskayrayasqanta atipananpaq? Nirqam: “Palabraykiqa nina hinaraqmi sonqoypi ruparichkan [. . .], munarqanim harkayta. Ichaqa manamá atirqanichu”, nispa (Jer. 20:9). Diospa Palabranpa atiyniyoq kasqanmi rimananpaq kallpancharqa.

9. ¿Imaynatam Diospa Palabranqa kallpanchawachwan Jeremiasta hina?

⁹ Hebreos libropim Pablo qellqarqa: “Diospa palabranqa kawsachkanmi hinaspapas atiyniyoqmi. Iskay lawnin filoyoq espadamantapas aswan kuchukuqraqmi. Runamanpas yaykun almankamaraqmi hinaspa espiritunkamaraqmi. Tullunpa piezankunatawan chilinankunata kuchuq hinaraqmi hinaspapas piensasqankunatawan munapayasqankunata reqsichiqmi”, nispa (Heb. 4:12). Diospa nisqankunam Jeremiasta hina ñoqanchiktapas kallpanchawanchik. Cheqapmá Bibliataqa runakuna qellqarqaku, ichaqa manam piensasqankuman hinachu aswanqa Diospa yanapakuyninwanmi. Chaymantam 2 Pedro 1:21 nin: ‘Paykunaqa qellqarqa manam runapa munasqanman hinallachu, aswanqa chuya espiritupa guiasqanman hinam’, nispa. Chaymi  sonqomanta Bibliata estudiaspaqa, yuyayninchikta huntachinchik chuya espiritupa yanapayninwan qellqasqa willakuykunawan (leey 1 Corintios 2:10). Chay willakuykunam sonqonchikpi ‘nina hinaraq ruparin’, chaymi upallalla kaytaqa mana atinchikchu.

10, 11. a) ¿Imaynatam Bibliata estudiananchik valorwan predicanapaq? b) Willarimuy imatam rurayta piensachkanki sapakama estudiasqanchik aswan allin kananpaq.

¹⁰ Bibliata sapakama estudiasqanchik yanapawananchikpaqqa, Diospa nisqankunam sonqonchikman chayanan hinaspa vidanchikta cambianan. Ezequielpi piensasun, revelacionninpim Dios nirqa wankusqa huk librota mikunanpaq, chaypim qellqasqa karqa mana kasukuq llaqtapaq Diospa juicionkuna. Mikuywan yanapachikuq hinam Ezequielqa allintapuni entiendenan karqa willakuykunata. Chaynapim willasqanqa abejapa miskin hina karqa (leey Ezequiel 2:8–3:4, 7-9).

¹¹ Kunanpas Ezequielpa tiemponpi hinam tarikunchik. Sasam Diosmanta willakuyqa, achkam mana munankuchu paymanta uyariyta hinaspa rimaytapas. Hinalla predicananchikpaqqa, Diospa Palabranmanta allinta entiendenapaqmi estudiananchik. Chaytaqa sapa kutim rurana manam yuyarispallachu. Salmos qellqaqtam qatipakunanchik, paymi takirqa: ‘Dios Taytalláy qamqariki kanki rumi hina amparaykuqniymi, [. . .] tukuymanta libraykuqniymi. Rimasqaykunawan [. . .] piensasqaykunapas qampa agradoykipaqyá kachun’, nispa (Sal. 19:14). Tiempotam rakina Biblia leesqanchikmanta yuyaymananapaq, chaynapim cheqapmanta yachasqanchikkuna sonqonchikpi takyanqa. Llapanchikmi kallpanchakunanchik Bibliata sapakama estudiasqanchik aswan allin kananpaq. *

12. ¿Imanasqataq huñunakuyman rinanchik chuya espirituwan yanapachikunapaq?

¹² Chuya espiritutaqa chaskisuntaqmi kay consejota kasukuspapas: “Ama qonqaruspayá kuyanakunapaq hinaspa allin ruranapaq yanapanakusunchik. Wakinkunapa costumbrasqanman hinaqa amayá huñunakuyman riyta dejasunchu” (Heb. 10:24, 25). Huñunakuypim chuya espiritupa yanapakuyninta chaskinchik, chaymi yanapawananchikpaqqa kallpanchakunanchik rinapaq, atencionwan uyarinapaq hinaspa yachasqanchikkunata kasukunapaqpas (leey Apocalipsis 3:6).

Valorchakuyqa yanapawanchikmi

13. ¿Imatam nichwan punta pachak watapi cristianokunapa predicasqankumanta?

¹³ Chuya espirituqa mana tupachiy atina Diospa kallpanmi, serviqninkunatam yanapan munayninta ruranankupaq. Chaynatam yanaparqa punta pachak watapi cristianokunata, chaymi ‘kay pachapi llapallan runakunaman’ allin noticiamanta willarqaku (Col. 1:23). Yaqa  llapankum “mana ancha educacionniyoq” karqaku, chaymi nichwan Diospa atiyninwan willasqankuta (Hech. 4:13).

14. ¿Imataq yanapawasun mana manchakuspa yachachinapaq?

¹⁴ Cristianokunaqa chuya espiritu yanapawananchikpaq hinam kawsananchik, chaynapim kallpanchasqa tarikusun mana manchakuspa predicanapaq. Chuya espiritu yanapawananchikpaqmi Diosta mañakuna, sapakama estudiana, estudiasqanchikmanta yuyaymananapaq mañakuna hinaspa huñunakuykunamanpas rina (Rom. 12:11). Ejemplopaq, ‘Alejandria llaqtayoq Apolos sutiyoq judiom [. . .] Diospa palabranta allinta yachachiq’. ¿Imanasqataq mana manchakuspa yachachirqa? Bibliam nin: ‘Diospa espiritunwan huntasqa kaspanmi Jesusmanta imam kaqta rimaq hinaspa yachachiq’, nispa (Hech. 18:24, 25, NM). Ñoqanchikpas Diospa espiritunwan yanapachikuspaqa mana manchakuspam wasin-wasin hinaspa maypipas predicasun (Rom. 12:11).

15. ¿Imapim tukunqa mana manchakuspa predicasqanchik?

¹⁵ Mana manchakuspa predicasqanchikqa allinpim tukunqa. Puntata, rurasqanchik ancha valorniyoq kasqanmantam cuentata qokusun. Chaynataq, astawanmi kusikusun allinta yachachisqanchikrayku. Chaymantapas, kallpanchasqam tarikusun astawan predicanapaq, chaytaqa rurasun imamantapas puntata rurana kasqanta entiendespam.

16. ¿Imatam rurachwan puntata hina predicay sonqonchikpi mana kaptin?

¹⁶ ¿Imatam rurachwan puntata hina predicay sonqonchikpi mana kaptin? Imayna kasqanchikmantam yachananchik, chay ruraymantam Pablo nirqa: ‘Sonqoykichikta tapukuykuychik ¿cheqaptachu [. . .] iñichkani?’, nispa (2 Cor. 13:5). Tapukusun: “¿Munanichu Diospa espiritun yanapawaptin tukuy sonqoywan serviyta? ¿Mañakunichu chuya espiritunta qowananpaq? ¿Orakusqay qawachinchu munayninta ruranaypaq Diospi confiasqayta? ¿Agradecekunichu paymanta willakunaypaq favorecesqa kasqaymanta? ¿Allintachu Bibliata estudiani? ¿Hayka tiempotam rakini leesqaykunapi chaynataq uyarisqaykunapi yuyaymananaypaq? ¿Huñunakuykunapi rimarinichu?”, nispa. Chayna tapukuykunam yanapawasun imakunataraq rurananchikmanta yachanapaq hinaspa chayman hina rurananchikpaqpas.

Chuya espirituwan valorchakusun

17, 18. a) ¿Imaynam kachkan kunan tiempopi predicasqanchik? b) ¿Imaynatam ‘mana manchakuspa’ allin noticiamanta willakuchwan?

¹⁷ Kawsarimuspanmi qatiqninkunata Jesus nirqa: ‘Chuya espiritu qamkunaman hamuptinmi atiyta chaskinkichik. Chaymi ñoqamanta willakunkichik Jerusalen llaqtapi, lliw Judea lawpi, Samaria lawpi hinaspa kay pachapa cantonkama’, nispa (Hech. 1:8). Chay tiempopi qallariq willakuyqa kunanmi astawan rurakuchkan. Diospa Gobiernonmantam willakuchkanku 7 millon masnin Testigokuna 230 masnin nacionkunapi. Sapa watam predicanku yaqa 1.500 millon horata. ¡Kusikunapaqmi predicayqa, kunan hinaqa manam haykapipas rurakunqañachu!

¹⁸ Punta pachak watapi hinam, enteron Pachapi predicayqa chuya espiritupa yanapayninwan rurakuchkan. Yanapachikuspanchikqa ‘mana manchakuspam’ predicasunchik (Hech. 28:31). Chaynaqa, chuya espirituwan yanapachikuspayá Diospa Gobiernonmanta hinalla predicasun.

[Willakuykuna]

¿Imatam yacharunki?

• ¿Imanasqataq valorta necesitanchik Diosmanta willakunapaq?

• ¿Imam punta cristianokunata yanaparqa valorwan predicanankupaq?

• ¿Imaynatam mana manchakuspa predicachwan?

• ¿Imapim tukunqa mana manchakuspa predicasqanchik?

[Kay yachachikuypa tapukuyninkuna]

[7 kaq paginapi dibujo]

¿Imaynatam warmanchikkunata yanapachwan mana manchakuq kanankupaq?

[8 kaq paginapi dibujokuna]

Orakuymi kallpanchawasun predicanapaq