¿Taytanchikta hinachu Diosta qawanchik?

HUK kutipim Jesuspa qatiqnin kaynata nirqa: ‘Dios mañakuyta [. . .] yachaykachiwayku’, nispa. Payñataqmi nirqa: “Diosta mañakuspaqa kaynatam ninkichik: ‘Taytayku, sutiki yupaychasqa kachun’”, nispa (Luc. 11:1, 2). Jesusqa Taytantaqa ninmanmi karqa: “Tukuy Atiyniyoq”, ‘Yachachikuq’, ‘Unanchaq’, ‘Wiñaypaq Kawsakuq’ hinaspa ‘Wiña-wiñaypaq munaychakuq’, nispa (Gen. 49:25; Isa. 30:20; 40:28; Dan. 7:9; 1 Tim. 1:17). Ichaqa nirqam: ‘Taytay’, nispa. ¿Imanasqa? Yaqapaschá chaynata nirqa Tukuy Atiyniyoq Diosman asuykunanchikta munaspan, imaynam warmapas kuyakuq taytanman asuykusqanman hina.

Wakinkuqa sasachakunkum Diosta Taytankuta hina qawanankupaq. Chaynam Anata * pasarqa, paymi kaynata nin: “Bautizasqaña kaspaypas, achka watam sasachakurqani Diosman asuykunaypaq hinaspa Taytayta hina mañakunaypaqpas”, nispa. Chaymantañam imanasqa chayna kasqanmanta nirqa: “Manam yuyanichu taytaypa huk kutillatapas kuyakuywan rimapayawasqanta”, nispa.

Kay tukupay tiempokunapiqa achkam warmankuta ‘mana kuyankuchu’ (2 Tim. 3:1, 3). Chaymi Ana hina achka tarikunku. Ichaqa kanmi achka razonkuna kuyakuq Taytanchikta hina Diosta qawanapaq.

Diosqa qowanchikmi tukuy ima necesitasqanchikta

Jehová Diosta Taytanchikta hina qawanapaqqa paytam allinta reqsinanchik. Ichaqa, ¿imaynatam reqsichwan? Jesusmi kaynata nin: “Churitaqa manam pipas reqsiwanchu aswanqa Taytallaymi, manataqmi Taytaytaqa pipas reqsinchu aswanqa ñoqa Churillanmi, Churipa reqsichisqallantaqmi reqsin Taytataqa”, nispa (Mat. 11:27). Arí, hanaq pacha Taytanchiktaqa manam reqsiyta atichwanchu Cristopa yachachisqanpi mana yuyaymanaspaqa. ¿Imakunatam Cristo yachachiwarqanchik Taytanmanta?

Puntataqa reqsikurqam Dios unanchaqnin kasqanta, nirqam: ‘Ñoqatapas paymi kawsachiwan’, nispa (Juan 6:57). Ñoqanchikpas chaynatam nichwan (Sal. 36:9; Hech. 17:28). ¿Imanasqataq Diosqa unanchawarqanchik? Kuyawaspanchikmi. Chaymi ñoqanchikpas kuyananchik.

Runakunamanmi hatun kuyakuyninta qawachirqa kuyasqan Churinta rantinchikpi wañunanpaq qomuspan. Chaymi pantaq kaspanchikpas amistadnin kachwan (Rom. 5:12; 1 Juan 4:9, 10). Chaynataq, hanaq pachapi Taytanchik promesanta cumpliq kasqanraykum seguro kachwan kuyaqninkunawan kasukuqninkuna hamuq tiempopi libre kananchikmanta (Rom. 8:21).

Diosqa kuyakuynintaqa qawachintaqmi llapallanchikpaq ‘intita qespichimuspanpas’ (Mat. 5:45). Manachusmi pipas mañakunchikchu Inti lloqsimunanpaqqa. Ichaqa, ¡sumaqllañam hinaspa necesitanchikmi kanchaynintaqa! Taytanchik hina qokuqqa manam pipas kanchu chaymi imapas necesitasqanchikta qowanchik, manaraqpas mañakuchkaptinchikmi yachanña ima necesitasqanchiktaqa. ¿Manachu unanchasqanta allinta qawaspa yuyaymanachwan imayna cuidasqanpi? (Mat. 6:8, 26.)

 Taytanchikqa ñoqanchikmantam nanachikun

Isaiaswanmi Jehová Diosqa llaqtanman prometerqa: “Orqokuna suchuriptinpas, moqokuna asuriruptinpas qampaq kuyapayakuyniyqa manam cambiakunqachu. Hawkayaymanta contratoypas manam cambiakunqachu, chaynataqa llakipayasuqniki Tayta Diosmi nini”, nispa (Isa. 54:10). Jesuspas Diospa kuyakuyninmantaqa qawachirqam huk punchawllaña wañukunanpaq kachkaptin mañakusqanpi. Qatiqninkunapaqmi kaynata mañakurqa: “Paykunam ichaqa kay pachapiraq kanqaku, ñoqam ichaqa hamuchkaniña [. . .]. Chuya Taytáy, atiynikiwanyá waqaychaykuy”, nispa (Juan 17:11, 14). Mañakusqanman hinam, Diosqa cristianokunamanta nanachikurqa.

Satanaspa toqllankunamanta amparawananchikpaqmi ‘allin yuyayniyoq confianza sirvientewan’ yachachiwanchik (Mat. 24:45). Chaykunawan yanapachikuspaqa mana sasachakuspam ‘harkachikunapaq Diospa llapallan qowasqanchikkunawan pachakusun’. Hukninmi iñiyninchik, chaywanmi ‘Diablopa rupachkaq flechankunata amachachwan’ (Efe. 6:11, 16). Iñiyninchikmi harkawanchik Dios serviyta mana saqenapaq hinaspa qawachin Diospa cuidawasqanchikta.

Diosninchikpa kuyakuyninmantam allinta entiendesun, kay Pachapi kaspan Cristo imayna kasqanpi yuyaymanaspa. Marcos 10:13-16 versiculokunapim Jesusqa qatiqninkunata nirqa: “Ama harkaychikchu wawakuna ñoqaman hamunanta”, nispa. Wawakuna muyuriqninpi kaptinmi, bendeciykuspan kuyakuywan abrazaykurqa. ¡Mayna kusisqachá tarikurqaku! Diospas runakunatam suyachkan Churin hina chaskiykunanpaq. ¿Imaynatam chaymanta yachanchik? Jesusmi nirqa: “Ñoqata rikuqniyqa Taytatapas rikuykunñam”, nispa (Juan 14:9).

Jehová Diospa kuyakuyninqa mana tukuyta pukyumanta toqyaq yaku hinam. Qowanchikmi imapas necesitasqanchikta, manam pipas pay hinaqa cuidawanchikchu, munantaqmi asuykunanchiktapas (Sant. 4:8). ¡Manam pay hinaqa pipas kanmanchu!

Achka bendicionkunatam chaskisun

Wiñaypaq kuyakuq Diosninchikpi tukuy sonqonchikwan confiaspanchikqa, achka bendicionkunatam tarisun (Pro. 3:5, 6). Jesuspas bendecisqam karqa tukuy sonqonwan Diospi confiasqanrayku. Chaymi qatiqninkunata nirqa: “Ñoqaqa manam sapallaychu kachkani aswanqa kachamuwaqniy Taytaypiwanmi”, nispa (Juan 8:16). Yacharqam Taytanpa haykapipas yanapasqanta. Bautizakusqan punchawpim uyarirqa Taytanpa kayna nisqanta: “Paymi kuyasqay Churiy. Payraykum kusisqa kachkani” (Mat. 3:15-17). Manaraq wañukuchkaspanmi kaynata nirqa: “Taytáy, espirituytam qomuyki”, nispa (Luc. 23:46). Chayna sasachakuy tiempopipas hinallam Diospi hapipakurqa.

Ñoqanchikpas chaynam kananchik. Ñoqanchikwan Dios kaptinqa manam manchakunanchikchu (Sal. 118:6). Qallariypi rimasqanchik Anaqa manam yanapakuyta maskaqchu sasachakuyninkunata atipananpaq. Estudiaytam qallarirqa Jesuspa vidanmantawan rurasqanmanta, astawanqa Dioswan amistadninmanta. ¿Imapim rurasqan tukurqa? Ninmi: “Yacharurqanim cheqap Taytayoq kayta hinaspa paypi confiayta. Tarirurqanitaqmi mana tupachiy atina hawkayaytawan kusikuytapas. Manam imapas kanmanchu llumpayta preocupakunapaqqa”, nispa.

¿Ima bendiciontaraqmi chaskisun Jehová Diosta Taytanchikta hina qawaspa? Imaynam yaqa llapan warmakuna tayta-mamankuta kuyaspanku munasqanta ruranku, chaynam Jesuspas hanaq pachapi Taytanta kuyarqa, chaymi nirqa: ‘Ñoqaqa paypa agradonpaqmi tukuy tiempo rurani’, nispa (Juan 8:29). Ñoqanchikpas Diosta kuyaspanchikqa, yachaywanmi kawsakusun hinaspa hukkunapa qayllanpipas ‘alabasun’ (Mat. 11:25; Juan 5:19).

 ‘Alleq makikichikmanta hapiqnikichikmi kani’

Hanaq pacha Taytanchikqa yanapawaqninchik chuya espirituntam qowarqanchik, Jesuspa nisqanman hinaqa chaywanmi ‘yachanchik tukuy imapas cheqap kaqkunata’ (Juan 14:15-17; 16:12, 13). Yanapawasunmi Diosninchikta astawan reqsinapaq hinaspa sonqonchikpi “murallasqa” hina kaqkunata tuñichinapaq otaq mana allin piensasqanchikta saqespa Cristota kasukunapaq (2 Cor. 10:4, 5). Mana iskayrayaspa Diosta mañakusun espiritunta qowananchikpaq, Jesusqa nirqam: ‘Taytaykichikqa [. . .] qosunkichikmi chuya espirituta’, nispa (Luc. 11:13). Mañakusuntaq espiritunwan yanapawaptinchik Dioswan amistadninchik aswan allin kananpaq.

Warmakunaqa taytanpa makinmanta hapipasqa purispankuqa manam manchakunkuchu hinaspapas segurom tarikunku. Taytanchikta hina Diosta qawaspaqa, confiasunmi kayna niwasqanchikpi: “Ñoqa Tayta Diosmi alleq makikichikmanta hapiqnikichik kani. ‘Ama manchakuychikchu, ñoqam yanapasqaykichik’ niqnikichikmi kani” (Isa. 41:13). Yachamusqanchikman hinaqa, Dioswan wiñaypaq purinanchikpaqmi ancha favorecesqa kanchik (Miq. 6:8). Munayninta hinalla ruraspanchikqa, Taytanchik Jehová Diospa kuyawasqanchikwan hinaspa amparawasqanchikwanmi kusikusun.

[Willakuy]