Unanchaqninta yuyarinankupaqmi yanapan
Unanchaqninta yuyarinankupaqmi yanapan
KIMSA waranqa wata ñawpaqtaraqmi Salomon kaynata qellqarqa: ‘Mozollaraq kachkaspaykiyá Unanchaqnikita yuyariy’, nispa (Ecl. 12:1). Chay consejota mana sasachakuspa kasukunankupaqmi mozo-sipaskuna chaskirqaku Lo que los jóvenes preguntan. Respuestas prácticas (volumen 2) sutiyoq librota, “Diosmi espiritunwan yanapawanchik” sutichasqa kimsa punchaw Asambleapi (mayo 2008-enero 2009).
Libropa qallariyninpim, Jehová Diospa Llaqtanpi Punta Apaqkunapa qellqamusqanku carta rikurimun, huk partepim nin: “Diostam mañakuniku qam hina mozo-sipaskunata kay libro yanapasunaykichikpaq, sasachakuykunatawan tentacionkunata atipanaykichikpaq hinaspa Diospa munasqanman hina tanteanaykichikpaqpas”, nispa.
Tayta-mamakunaqa munankum Diospa “yachachikuyninman hina” churi-wawanku uywayta (Efe. 6:4). Ichaqa, mozo-sipasyayta qallarispankum warmakunaqa hukmanyanku hinaspa yaqa mana reqsisqanku llaqtapi hina tarikunku. ¿Imatam rurawaqchik yanapanaykichikpaq? Qawasun kay librota aswan allinta servichikunamanta.
▪ Libroykichik kachun hinaspa allinta reqsiychik. Librotaqa manam leeyllachu-leena, aswanqa entiendenam ima niy munasqanta. Manam imam allin otaq mana allin kaqllamantachu willachkan, aswanqa mozo-sipaskunatam yanapanqa ‘entiendeqña kaspanku’ allinta tanteanankupaq (Heb. 5:14). Chaynataq, achka consejokunam kachkan allinta tanteanankupaq hinaspa iñiyninkuta defiendenankupaqpas. Ejemplopaq, 15 yachachikuyninmi (“¿Cómo puedo resistir la presión de grupo?”) qawachichkan estudiaqmasinkunata manam nispankupas Bibliapa nisqanman hina ‘allin contestanankupaq’ (Col. 4:6).
▪ Libropi qellqanapaq otaq contestanapaq kaqta allinta servichikuychik. Mozo-sipaskunapaq kaptinpas, allinmi kanman qamkunapas imayna contestasqaykichikta libropi qellqayqa. * Ejemplopaq, 16 paginapim kachkan piwanpas reqsinakuymanta 2 tapuykuna. Warmaykichik hina watayoq kaspaykichik imayna kasqaykichikta yuyaychik hinaspa qellqaychik chay tiempopi imayna contestanaykichikmanta. Chaymanta kaynata tapukuychik: “¿Wata pasasqanman hina piensasqayta cambiarunichu? ¿Imakunatam yacharuni hinaspa imaynatam warmayman willayman?”, nispa.
▪ Ama leepuychikchu paykunapa qellqasqanta. Libropi qellqanapaq kaqkuna, mozo-sipaskunapa imayna kasqankumanta yachanapaq hinaspa qellqaspa otaq yuyayninkupi tapuykunata kutichinankupaq kaptinpas, manam qonqanachu 3 paginapi “Estimados padres” niqpi kayna nisqanta: “Sichu munankichik piensasqanmanta warmaykichik qellqananta, hinaspaqa manam leepunaykichikchu. Chaynata respetaptikichikqa kikinkuchá willasunkichik qellqasqankumanta”. Aswan allinqa manam qellqasqankumanta yachaychu aswanqa sonqonkupi kaqmantam.
Ancha allinmi familiawan Bibliata estudianapaq
Los jóvenes preguntan (volumen 2) libroqa ancha allinmi Familiawan Diosta Yupaychanapaq. Libropiqa manam sapa parrafomantachu tapukuynin tarikun, chaymi tayta-mamakunaqa warmankuwan imayna estudiay allin kananpaq tanteananku.
Ejemplopaq, wakinkuqa servichikunkum “Estrategia contra la presión de grupo” (132-133 paginakunapi) niqta warmankuwan ensayanankupaq. Punta kaq tapuywanmi yachanku ima tentacion astawan sasachasqanta, qatiqninwanñataq maypi chayna sasachakuy kananmanta. Chaymantam kuska qawanku compañeronkupa hikutasqanta ruraypas otaq mana ruraypas imapi tukusqanta, chaymantam ninku 3 formapi contestanankupaq. Warmaykichiktam kallpanchanaykichik allinta piensaspa tapukuykunata kutichinankupaq hinaspa chaywan allin tarikunankupaqpas. Chaynapim convencisqa hinaspa seguro kanqaku (Sal. 119:46).
Paykunawan rimanapaqmi yanapakun
Los jóvenes preguntan (volumen 2) libroqa kallpanchanmi mozo-sipaskuna mana manchakuspa rimanankupaq. “¿Cómo puedo hablar de sexo con mis padres?” (63-64 paginakunapi) hinaspa “Habla con tus padres” (189 paginapi) niq recuadrokunapim nichkan chaykunamanta imayna rimanata. 13 watayoq sipascham kaynata qellqarqa: “Kay librom kallpanchawarqa piensasqaymanta tayta-mamaywan rimanaypaq hinaspa rurasqaymanta willanaypaqpas”, nispa.
Manam chaynata rimanallapaqchu servikun. Sapa yachachikuypa tukuyninpim “Y tú, ¿qué piensas?” niq recuadro rikurimun, chayqa manam yachachikuyta yuyarinallapaqchu, aswanqa familiawan rimanapaqmi. Kachkantaqmi “¡Manos a la obra!” niqpas, chayqa kachkan mozo-sipaskuna libropi yachasqankuman hina ima ruranankuta qellqanankupaqmi. Kay partepa tukuyninpim nin: “¿Imatam kaymanta tapuyman tayta-mamayta?”, nispa. Chayqa kachkan pikuna allin consejo qonanmanta yachanankupaqmi.
¡Sonqonman chayaychik!
Qamkunaqa wawa-churikichikpa sonqonmanmi chayayta munankichik. Los jóvenes preguntan (volumen 2) librom chaypaq yanapasunkichik. Qawasun imaynatam kay librota huk tayta servichikurqa warmi churinwan sapa kuti rimananpaq.
Paymi nin: “Rebekahwanmi achka sumaq sitioman riniku: chakiwan, bicicletawan otaq carrowanpas. Cuentatam qokuni chayna risqaykuqa piensasqanmanta willawananpaq allin kasqanta.
“Puntataqa leerqanikum Jehová Diospa Llaqtanpi Punta Apaqkunapa cartanta hinaspa ‘Estimados padres’ niqta. Munarqanim libropa 3 paginanpi nisqanman hina mana manchakuspa qellqananta, qellqananqa karqa mana leepunaymanta seguro kaspanmi.
“Mayqan yachachikuynintapas akllakunanpaqmi saqerqani. Puntataqa akllakurqa ‘¿Tienen algo de malo los videojuegos?’ niqtam. Qallariypiqa manam entienderqanichu imanasqa chaymanta akllasqanta, chaymantañam entienderqani: estudiaqmasinkunam wañuruqkuña huk millakuypaq pukllaymanta, chaypiqa dañanakuyllañam qawakuq hinaspa qacha rimaykuna uyarikuq. ¡Manam piensarqanichu chayna pukllaykuna kasqanta! ‘¡Manos a la obra!’ (251 paginapi) niq recuadroman chayaruptiykum chaykunamanta willawarqa. Chay parteqa yanaparqam estudiaqmasinkuna pukllananpaq niptinku imayna contestananpaq.
“Kunanqa libropi tukuy ima qellqasqanmantam willawan. Estudiaspaykuqa achkatam rimaniku: iskayniykum leeniku, paymi tukuymanta rimayta munan, recuadrokunamanta hinaspa dibujokunamantapas. Willanim pay hina watayoq kaptiy imayna vida kasqanmanta, payñataqmi willawan kunan imayna kasqanmanta. ¡Munanmi tukuy piensasqanmanta willawayta!”
Tayta-mamakuna, segurochá kusisqa tarikurqankichik kay libro lloqsimuptinqa. Kunanmi tiempo allinta servichikunaykichikpaq. Jehová Diospa Llaqtanpi Punta Apaqkunaqa munankum kay librowan familiakuna yanapachikunanta. Confianikum lliwta yanapawananchikmanta, astawanqa mozo-sipaskunata ‘chuya espiritupa munasqanman hina kawsanankupaq’ (Gal. 5:16).
[Willakuy]
^ par. 6 Wakinqa lliwpaqmi qellqasqa kachkan. Ejemplopaq, “Controla tu reacción” (221paginapi) niq recuadroqa qamkunatawan warmaykichiktam yanapasunkichik. Chaynallatam nichwan “Estrategia contra la presión de grupo” (132-133 paginakunapi), “Presupuesto mensual” (163 paginapi) hinaspa “Mis metas” (314 paginapi) niqkunamantapas.
[30 kaq paginapi recuadro]
¿Imatam ninku wakin mozo-sipaskuna?
“Kay librotaqa estudiana ancha cuidadowan hinaspa lapizta hapispam. Qellqanapaq kaqkunam allinta yanapakun yuyaymananapaq chaynapi aswan allin ñanninta hinalla purinapaq.” (Nicola)
“Allinta munaspankupaschá wakinpiqa sapa kuti hikutawanku novioyoq kanaypaq. Ichaqa qallariyninpi yachachikuykunam convencechiwarqa imataña niptinkupas chaypaq manaraq preparasqa kasqaymanta.” (Katrina)
“‘¿Estás pensando en bautizarte?’ niq recuadrom allinta tanteaspa bautizakunaypaq yanapawarqa. Chaynataq aswan allinta estudianaypaq hinaspa orakunaypaqpas.” (Ashley)
“Tayta-mamay cristiano kaptinpas hinaspa taksachaymanta cheqapmanta yachaptiypas, kay librom yanaparuwan kikiypuni yuyaymananaypaq hinaspa allinta tanteanaypaqpas. Mana sasachakuspaymi paykunaman willani imayna tarikusqaymanta.” (Zamira)
[31 kaq paginapi dibujo]
Tayta-mamakuna, allinta reqsiychik kay librota
[32 kaq paginapi dibujo]
Kallpanchakuychik warmaykichikpa sonqonman chayanaykichikpaq
