“Warmaqa derechoyoqmi kikin iñinanpaq”

CHAYNATAM suticharqaku Suecia nacionpi, Warmakunapa Derechonmanta rimanankupaq huk Academiapa yanapakuyninwan huñunakuy rurakusqanta. Chayqa rurakurqa 2008 watapa 9 punchaw diciembre killapim, chaypim karqaku Suecia Iglesiamanta, Islam religionmanta hinaspa huk religionkunamantapas.

Religionpi kamachiqmanta hukninmi nirqa: “Rimaspallaqa manam niyta atichwanchu Diosmanta warmachakuna yachanankupaq Bibliapa yachachisqan ancha allin kasqanmanta”, nispa. ¿Imaynatam Bibliapa willakuyninkuna warmakunata yanapan kikinku iñinankupaq?

Kikinmi nirqa: “Bibliapi willakuykunaqa ancha allinmi warmakuna kikillanku yuyaymananankupaq”, nispa. Nisqanman hinaqa “Adan, Eva, Cain, Abel, David, Goliat, Jesuspa warma kasqan, impuestokuna cobraq Zaqueo, chinkasqa churi hinaspa Samariapi allin runapa” vidankum “yanapanman confianza kanankupaq, pampachanankupaq, imatapas kutichipunankupaq, mana cheqninankupaq, allinta ruranankupaq, allinyanakunankupaq, kuyakunankupaq hinaspa huñulla kanankupaqpas”. Nirqataqmi: “Kay willakuykunam yachachin sapa punchaw imayna kawsanankupaq”, nispa.

Bibliata leeyqa ancha allinmi. Ichaqa, ¿warmakuna atinmankuchu kikillankumanta ‘yuyaymanaspa’ imatapas allinta tanteayta?

Bibliam qawachin hatun runakunapas entiendenankupaq yanapakuy necesitasqankuta. Willawanchikmi Etiopia nacionniyoq kamachiqmanta, payqa manam ‘kikillan yuyaymanaspachu’ cheqapmanta entienderqa. Bibliapa nisqanman hinaqa, Diosmanta willakuq Isaias librota leespanmi ima nisqanta mana entienderqachu, chaymi agradecekurqa Felipepa yachaykachisqanmanta (Hech. 8:26-40). Manamá payllachu yanapakuytaqa necesitarqa. Llapallanchikmi necesitanchik Diospa Palabranmanta pipas entiendechiwananchikta, astawanraqmi warmakunaqa.

Bibliam nin: “Yanqakunallapim piensan warmaqa”, nispa (Pro. 22:15). Chaymi warmataqa yachachina Diosmanta hinaspa allin kawsakuymantapas. ¿Pikunam yachachinanku? Tayta-mamakunam, chaypaqmi Bibliata hinaspa congregacionpi yachachikuykunata servichikunmanku. Warmakunaqa derechoyoqmi chaymanta yachanankupaq. Taksacha kasqankumantam Bibliapa yanapakuyninwan kikinku iñinankupaq yanapana. Chaynapim ‘paykunaqa entiendeqña kaspanku allin kaqtapas hinaspa mana allin kaqtapas reqsinqaku’ (Heb. 5:14).