Yachaywan servichikusun ‘chuya espiritupa espadanta’

‘Hapiychiktaqyá Diospa palabrantapas, chayqa chuya espiritupa espadanmi.’ (EFE. 6:17.)

1, 2. ¿Imatam rurananchik Diospa Gobiernomanta willakuqkuna necesitakusqanrayku?

ACHKALLAÑA runakuna Diosmanta mana yachasqankuta qawaspanmi qatiqninkunata Jesus nirqa: “Achkallañam kachkan cosechanapaqqa, cosechaqkunam ichaqa aslla. Chaynaqa mañakuychikyá chakrayoqta cosechaqkunata kachananpaq”, nispa. Manam chayllatachu rurarqa. Chaymantam qayarqa 12 discipulonkunata hinaspa kamachirqa lliw Israel runakunata yachachinankupaq (Mat. 9:35-38; 10:1, 5). Tiempo pasaptinmi, chayta ruranankupaq 70 runakunatapas kacharqa (Luc. 10:1, 2). *

² Kunanpas necesitakunmi Diospa Gobiernonmanta willakuqkunataqa. 2009 watapim Jesucristopa wañukusqanta Yuyarinapaq huñunakuyman rirqaku 18.168.323 runakuna, chayqa Jehová Diospa testigonkunamanta 10 millon masninmi. Achkallañam yanapanapaq kachkan yaqa cosechanapaq kawsay hina (Juan 4:34, 35). Chaymi Diosta mañakunanchik achka cosechaqkunata kachamunanpaq. Chaynata mañakuspaqa kallpanchakusunchá allinta predicanapaq chaynataq yachachinapaqpas (Mat. 28:19, 20; Mar. 13:10).

3. ¿Imaynatam chuya espiritu yanapawanchik predicacionpi?

³ Ñawpaq estudiopim yacharqanchik ‘mana manchakuspa [. . .] Diospa palabranta’ willanapaq Diospa espiritun yanapawasqanchikmanta (Hech. 4:31). Ichaqa yanapawasunmi allinta yachachinapaqpas. ¿Imatam rurananchik allin yachachiq kanapaq? Diospa atiyniyoq Palabrantam allinta servichikunanchik (2 Tim. 3:16). Chuya espiritupa yanapakuyninwan qellqasqa kasqanraykum predicaspanchikqa chay atiypa yanapayninwan ruranchik. Aswan allin yachachiq kanamanta manaraq rimachkaspa, yachasun Diospa Palabran ancha atiyniyoq kasqanmanta.

“Diospa palabranqa [. . .] atiyniyoqmi”

4. ¿Mayna atiyniyoqmi Diospa palabranqa?

⁴ Diospa nisqanqa atiyniyoqmi (Heb. 4:12). Runapa rurasqan espadamantaqa aswan filoyoqmi. Llumpay filoyoq kasqanraykum kuchuchkaq hina yaykun runakunapa chilinankama. Diosmanta cheqap yachaykunaqa runakunapa sonqonman chayaspanmi qawachin imayna kasqanta. Vidantapas cambianmanmi (leey Colosenses 3:10). ¡Ancha atiyniyoqmi cambiachinanpaqqa!

5. ¿Imaynatam Bibliaqa yanapawanchik?

⁵ Chaymantapas Bibliallapim mana tupachiy atina yachayta tarinchik, chaymi yanapawanchik kay sasachakuy tiempopi imayna kawsanapaq. Imaynam lamparapas kanchan purisqanchik ñanta, chaynam Diospa Palabranpas kunanpas hinaspa hamuq tiempopipas yanapawasun (Sal. 119:105). Sapa punchawmi yanapawanchik: sasachakuyta atipanapaq, amistadkunata, kusirikuyta, llamkayta akllanapaq hinaspa allinta pachakunapaqpas  (Sal. 37:25; Pro. 13:20; Juan 15:14; 1 Tim. 2:9). Chaynataq yanapawanchik hukkunawan allinlla kanapaq (Mat. 7:12; Fili. 2:3, 4). Bibliaqa yanapawanchiktaqmi rurasqanchikkuna imapim tukunanmanta yachanapaqpas (1 Tim. 6:9). Willawanchiktaqmi Diospa hamuq tiempopi rurananmanta, chaymi yanapawanchik munasqanman hina kawsanapaq (Mat. 6:33; 1 Juan 2:17, 18). Allin kawsakuytam tarinchik Bibliapa yachachisqanman hina ruraspaqa.

6. ¿Imaynatam Bibliaqa yanapawanchik iñiyninchikta defiendenapaq?

⁶ Bibliapa nisqankunatam Pablo tupachirqa ‘chuya espiritupa espadanwan’, chaymi yanapawanchik iñiyninchikta defiendenapaq (leey Efesios 6:12, 17). Chaywanmi librayta atichwan Satanaspa presochasqan runakunata. Chay espadaqa mana tupachiy atinam, runata wañuchinanmantaqa salvanmi. Chaymi kallpanchakuna allinta servichikunapaq.

Allinta servichikusun

7. ¿Imanasqataq allinta servichikunanchik ‘chuya espiritupa espadanta’?

⁷ Soldadokuna peleasqankupi vencenankupaqqa, armankutam reqsinanku hinaspa sapa kuti preparakunanku. Chaynatam rurananchik ‘chuya espiritupa espadanta’ servichikuqkunapas. Pablopa kayna nisqantam kasukunanchik: “Kallpanchakuyá Diospa chaskisqan kanaykipaq, allin llamkaq hinayá mana imamantapas penqakuspa Diospa cheqap palabranta allinta yachachiy [otaq servichikuy]” (2 Tim. 2:15).

8, 9. ¿Imam yanapawasun Bibliapa mayqan partentapas allinta entiendenapaq? Huk ejemplowan willarimuy.

⁸ ¿Imam yanapawasun “Diospa cheqap palabranta” allinta servichikunapaq? Bibliamanta imam kaqta yachachinapaqqa, ñoqanchikraqmi allinta entiendenanchik. Chaymi ima ninanmanta entiendenapaqqa ñawpaqninpi hinaspa qatiqninpi kaq textokunatapas leenanchik.

⁹ Chaynatam rurananchik Bibliapa mayqan partentapas entiendenapaqqa. Ejemplopaq, qawasun Galatas 5:13 Pablopa kayna nisqanta: “Wawqe-panillaykuna, Diosqa qayasurqankichik libre kanaykichikpaqmi. Ichaqa: ‘Librem kani’ nispaqa amayá runapa mana allin munasqantaqa ruraychikchu aswanqa kuyakuywanyá yanapanakuychik”. ¿Imamantam chay tiempopi cristianokunaqa libre karqaku? ¿Huchamantawan wañuymantachu? ¿Pantasqa religionmantachu? Manam. Chay textopa ñawpaqnin capitulokunata leespam yachanchik: Pabloqa rimarqa ‘Leyrayku ñakasqa’ kasqankumanta libreña tarikusqankumantam (Gal. 3:13, 19-24; 4:1-5). Libreña kasqankuta chaninchaqkunaqa hukkunatam kuyakuywan servinanku karqa, ‘animalkuna hina  kachunakuspa mikunakunankumantaqa’ (Gal. 5:15).

10. ¿Imakunamantaraqmi yachananchik Bibliapa mayqan partentapas entiendenapaq, hinaspa ima qellqakunapim chaymanta tarichwan?

¹⁰ Bibliapa mayqan partenta leespaqa kaykunatawanmi yachana: pim qellqasqanmanta, haykapi, imanasqa hinaspa imayna tarikuptinku qellqasqanmantapas. Chaynataq allinmi kanman chay tiempopi costumbrekunamanta, imayna kawsasqankumanta hinaspa runapa creesqankumanta yachaypas. *

11. ¿Imaynatam Diospa Palabranmanta yachachinanchik?

¹¹ “Diospa cheqap palabranta” allinta servichikunapaqqa imam kaqta willaspapas cuidadowanmi yachachina. Imaynam Jesuspas Diablo tentaptin Bibliata servichikurqa chaynam ñoqanchikpas cheqap yachachikuyta defiendenapaq servichikunchik, manam manchachinapaqchu (Deu. 6:16; 8:3; 10:20; Mat. 4:4, 7, 10). Kasukunchikmi Pedropa kayna nisqanta: “Aswanqa Señorninchik Cristo chuya kasqantayá sonqoykichikwan reqsikuychik, hinaspayá tukuy tiempo listolla kaychik imam creesqaykichikmanta tapusuptikichik clarota contestakunaykichikpaq, chaytaqa ruraychik humillakuspayá hinaspa respetowanyá” (1 Ped. 3:15).

12, 13. ¿Imakunatam ‘murallasqa llaqta’ hina kaptinpas Diospa Palabranwan tuñirachichwan? Huk ejemplowan willamuy.

¹² ¿Imatam rurasun Diospa Palabranta allinta servichikuspaqa? (Leey 2 Corintios 10:4, 5.) Puntata, ‘tuñichisunmi murallasqa llaqtakunata’ otaq qawachisun pantasqa yachachikuykunamanta, mana allin ruraykunamanta hinaspa runakuna pantaq kasqankupi tukuy ima yachachisqankumantapas. Bibliaqa arma hinam yanapawanchik “Dios reqsiypa contranpi” yachachikuykuna llulla kasqanta qawachinapaq. Chaynataq, yachachisqantam servichikuchwan runakunata yanapaptinchik cheqapman hina piensanankupaq.

¹³ Rimasun 93 watayoq señoramanta, payqa India nacionniyoqmi. Huk nacionpi yachaq wawanwanmi cartawan Bibliata estudiarqa, payqa Jehová Diosmantawan promesankunamantam entiendeyta qallarirqa. Ichaqa warma kasqanmantam payqa creerqa runa wañuspanqa huk cuerpopi kaqllamanta nacesqanpi. Chaymi wañuqkuna imayna kasqankumanta wawan qellqamuptin nirqa: “Manam entiendenichu chuya textoykikunapa nisqantaqa. Lliw religionkunam ninku cuerponchikpi mana wañuq alma kasqanta. Tukuy tiempom creerqani runa wañuptin cuerponpi mana rikuy atina kaq 8.400.000 kutita huk cuerpopi kaqllamanta nacesqanta. ¿Imaynamá kayqa mana cheqapchu kanqa? ¿Kaywanqa yaqa lliw religionkuna  pantasqankutachu nichkanki?”, nispa. Señoraqa alma mana wañusqan yachachikuypim llumpayta creerqa. ¿Yanapanmanchu karqa chuya espiritupa espadanqa? Achka semanakuna pasaruptin hinaspa Bibliapa textonkunata estudiaruspanmi qellqarqa: “Entiendechkaniñam wañuqkuna imayna tarikusqankumanta. Anchatam kusikuni wañuqkuna kawsarimuptin kuyasqanchikkunawan tupaykuymanta yachaspay. Suyachkanim Diospa Gobiernon chaylla chayamunanta”, nispa.

Allinta servichikusun convencechinapaq

14. ¿Imaynatam uyariwaqninchikkunata convencechinchik?

¹⁴ Predicacionpi Bibliata allinta servichikunapaqqa, manam runakunaman leepuyllachu. Pablo hinam servichikuna convencechinapaq (leey Hechos 19:8, 9 hinaspa 28:23). Griego rimaypi convencechiy niq rimayqa runakunata imapipas mana iskayrayaspan confiananpaq yanapaymi. Chaynaqa, ¿imaynatam convencechinchik Bibliapa yachachikuyninkunapi creenanpaq? Runapa sonqonman chayaspam. ¿Imaynatam chayta rurawaq? Bibliapa nisqankuna cheqap kasqanta convencechispam.

15. ¿Imaynatam runakunata yanapachwan Bibliata respetanankupaq?

¹⁵ Bibliamantapunim leenayki chaynapi nisqanta respetananpaq. Bibliapa textonmanta manaraq leechkaspa, qawachiy rimasqaykichikmanta Diospa piensasqanta yachay allinpuni kasqanta. Tapuyta ruraspa chaynataq contestasqanta uyarispam, kaynatapas niwaq: “Qawasunchik Diospa ima piensasqanmanta” otaq “¿Imatam Dios ninman kaymanta?”, nispa. Chayna nisqanchikmi qawachin Bibliaqa Diospa yanapakuyninwan qellqasqa kasqanta, yanapantaqmi yachachisqanta runakuna chaninchanankupaqpas. Chaynatam astawanqa rurananchik Diospi creespanpas Bibliata mana ancha reqsiqwan rimaspaqa (Sal. 19:7-10).

16. ¿Imakunatam rurananchik Bibliapa texton leesqanchikmanta explicanapaq?

¹⁶ Manam Bibliamanta leepuyllachu: explicanaykim. Pablopa ejemplota qatipakuy, payqa Bibliapa nisqanta qawachispanpas explicarqam (Hech. 17:3). Leesqayki textoqa achka asuntomantam riman, chaymi wakinpiqa rimasqaykichikmanta yachachiq palabrakunata qawachinayki. Chaytaqa rurawaq chay palabrata kaqmanta otaq allillamanta leespa, chaynataq kikin tarinanpaq tapuykunata ruraspapas. Chaymanta willay leesqaykichikpa ima ninantawan imayna kasukunantapas.

17. ¿Imatam rurawaq Bibliapa nisqankunata servichikuspa convencechinaykipaq?

¹⁷ Bibliapa nisqankunata servichikuspayki convencechiy. Pabloqa “Bibliapi kaqta qawachispanmi” uyariqninkunata piensachirqa hinaspa sonqonkuman chayaqta yachachirqa (Hech. 17:2-4). Qampas kallpanchakuy runakunapa sonqonman chayanaykipaq. Runakunapi interesakuspa tapukuykunata ruraspaqa, paykunapa sonqonpi kaqtam ‘horqonki’ (Pro. 20:5). Kaynam kayqa ninamantaqa, Bibliapi tarikuq facil hinaspa convencechiq yachachikuykunata servichikuy. Aswan allinqa huk textota leeruspa allinta explicaymi, iskay-kimsata leespa mana explicaymantaqa. Allinta ‘convencechinapaqqa’ huk pruebakunatapas qawachinanchikmi (Pro. 16:23). Chaypaqqa wakinpim huk  yachachikuykunatapas maskananchik kanqa. Rimasqanchik señoraqa yachaytam munarqa imanasqa achka runakuna mana wañuq almapi otaq espiritupi creesqankumanta. Bibliapa nisqanmantaqa convencekurqa, chay yachachikuy imayna rikurimusqanta hinaspa achka religionkunaman imayna cheqerusqanta entienderuspanmi. *

Hinalla allinta servichikusun

18, 19. ¿Imanasqataq hinalla allinta servichikunanchik ‘chuya espiritupa espadanta’?

¹⁸ Bibliapa nisqanman hinam “kay pacha qawasqanchikqa” cambiachkan hinaspa mana allin ruraykunapas aswan mana allinraq kachkan (1 Cor. 7:31; 2 Tim. 3:13). Chaymi astawan kallpanchakunanchik ‘chuya espiritupa espadanwan’ otaq Diospa palabranwan ‘murallasqa llaqtakunata’ otaq pantasqa yachachikuykunata tuñichinanchikpaq.

¹⁹ Kusikunchikmi Biblia kapuwasqanchikwan hinaspa runakunapa sonqonman yachachisqanchik chayaptin chaynataq pantasqa yachachikuykunata horqoptinpas. Ima yachachikuyña allinman rikchakuspanpas, Bibliapa nisqanmanta aswan atiyniyoqqa manam kanmanchu. Hinaptinqa, kallpanchakusunyá chuya espiritupa espadanta allinta servichikunapaq chaynapi Diospa Gobiernonmanta willakuyta cumplinanchikpaq.

[Willakuykuna]

¿Imatam yacharunchik?

• ¿Mayna atiyniyoqtaq Diospa Palabranqa?

• ¿Imataq yanapawasun “Diospa cheqap palabranta” allinta servichikunapaq?

• ¿Imaynatam Bibliapa nisqankunaqa ‘tuñirachinman murallasqa’ hina kaqkunata?

• ¿Imaynatam yachachispa aswan convencechichwan?

[Kay yachachikuypa tapukuyninkuna]

[12 kaq paginapi dibujo hinaspa recuadro]

¿Imaynatam Bibliata servichikuna convencechinapaq?

▪ Bibliata respetananpaq yanapay

▪ Leesqaykimanta explicay

▪ Convencechiq yachachikuyninkunawan sonqonman chayay

[11 kaq paginapi dibujo]

‘Chuya espiritupa espadanta’ allin servichikuytam yachananchik