Chuya sonqoyoqyá kasun kay sasa tiempopi

NOTICIAKUNAMANTA willaq catolico religionniyoq Vittorio Messori sutiyoqmi, Italia nacionpi catolico religionniyoq runakunapa millakuypaq huchapakusqanmanta rimaspan nirqa: “Kay tiempopim Iglesia sasachakuypi tarikun, manañam chuya sonqoyoqkuna kanchu”, nispa. Nirqataqmi: “Chayqa hinallam kanman sacerdotekunata casarakunankupaq saqeptinkupas, yaqa llapankum kanku qarimasillanwan puñuq otaq huchapakuq sacerdotekuna, chaymi qarikunata hinaspa warmachakunatapas abusanku”, nispa (La Stampa).

Runakunapa mana allin rurasqankum qawachin ‘tukupay tiempopi’ kawsasqanchikta (2 Tim. 3:1-5). Noticiakunapa willakusqanman hinaqa, chaynataqa ruranku manam Diospi mana creeqkunallachu, aswanqa Diostam servini niqkunapas rurankum tukuy rikchaq millakuypaq kaqkunataqa sonqonku qachachasqa kasqanrayku (Efe. 2:2). Chaymi Jesus nirqa: “Sonqonmanta lloqsiptinmi runaqa huchallikun tukuy mana allinkunata piensaspa, wañuchispa, hukwan pierdekuspa, huchapakuspa, suwakuspa, runamasinta tumpaspa hinaspa kamispa” (Mat. 15:19, 20). Jehová Diosqa munanmi serviqninkuna “limpio sonqoyoq” kanankuta (Pro. 22:11). ¿Imaynatam limpio sonqoyoq kachwan kay sasa tiempopi kawsaspapas?

¿Ima ninantaq ‘limpio sonqoyoq’ kayqa?

Sonqomanta Biblia rimaspanqa yaqa llapanpim mana cheqap sonqomantachu riman. Compendio del diccionario teológico del Nuevo Testamento librom nin griego rimaypi chay palabraqa “runapa ukun imayna kasqanmanta” chaynataq ‘runapi Diospa qawasqan partenmanta hinaspa imayna runa kananpaq yanapaqmanta’ rimasqanta. Arí, sonqoqa tupanmi ukunchikpi imayna kasqanchikwan. Chay libropa nisqanman hinaqa, Diosmi sonqonchikta qawan chaynataq serviqninkunatapas chaninchan (1 Ped. 3:4).

Chuya hinaspa limpio nispanmi wakinpiqa Biblia rimachkan chayna kaymanta, wakinpiñataq allin kawsakuymanta hinaspa mana qachachasqa otaq mana imawanpas qanrachasqa kaymanta. Ejemplopaq, Jesusmi Orqopi Yachachispan nirqa ‘limpio sonqoyoqkuna’ otaq ukunkupi limpio kaqkuna kusisqa hinaspa mana iskay uya kasqankumanta (Mat. 5:8). Chayna runakunapa imapas munasqanku hinaspa imapaq rurasqankupas chuyam, sonqonkuñataqmi huntasqa kachkan Diosta kuyaywan hinaspa agradecekuywan (Luc. 10:27). Llapanchikmi munanchik chuya kaytaqa.

Hinalla “limpio sonqoyoq” kayqa sasam

Diosta serviqkunaqa ‘ima ruraywan mana huchallikuspapas’, ‘piensaywanpas mana huchallikuq’ otaq limpio sonqom kananchik (Sal. 24:3, 4). Chayna kayqa sapa kutim aswan sasa, peleachkanchikmi Satanaspa hinaspa munaychakusqan mana allinkunapa contranpi chaynataq pantaq kasqanchikwanpas. Jehová Diosmanta mana karunchakunapaqqa ancha allinmi “limpio sonqoyoq” kayqa, kallpanchakunanchiktaqmi sonqota mana qachachanapaqpas. Chaynatam amparasqa kasun, Dioswan amistadninchiktapas manam yanqachasunchu. Ichaqa, ¿imatam rurananchik limpio sonqoyoq kanapaq?

 Hebreos 3:12 nin: “Wawqe-panillaykuna, cuidakuychikyá, yanqañataq mayqannikichikpas mana iñiq kaspa hinaspa mana allin sonqoyoq kaspa kawsaq Diosmanta rakikurunman”, nispa. ‘Mana iñiyniyoq kaspaqa’ manam chuya sonqoyoq kaytaqa atinchikmanchu. Chaymi Satanasqa Diospi iñisqanchikta yanqacharuyta munan. ¿Imaynata? Pantay yachachikuykunata cheqechispan. Ejemplopaq, runakunatam creechin tukuy imapas kikillanmanta rikurimusqanta, kawsakuyninchikpiwan religionpi imam allin otaq mana allin kaqmanta mana yachasqankutapas, iskayrayachintaqmi Diospa yanapayninwan Biblia qellqasqa kasqanmanta. Manam intuchikunanchikchu chayna yachachikuykunawanqa (Col. 2:8). Chaykunawan mana pantarunapaqmi yanapawasun Bibliata sapa punchaw leespa yuyaymanay. Bibliamanta allinta yachaspam, Jehová Diosta astawan kuyasun hinaspa runakunawan imayna kasqantapas aswan entiendesun. Chaynata ruraspallam llulla yachachikuykunawan mana engañachikusunchu hinaspa iñiyninchikpas qaqa hina kaptin limpio sonqo kasunchik (1 Tim. 1:3-5).

¿Imatam rurananchik tentacionkuna kaptin?

“Limpio sonqoyoq” kanapaqqa sasachawanchiktaqmi aychanchikpa hinaspa kapuqniyoq kay munasqanchikpas (1 Juan 2:15, 16). Qollqe kuyayqa otaq apu hinaspa kapuqniyoq kanapaq afanakuyqa sonqonchiktam yanqacharunman, hinaptinmi Diospa contranpi kaqkunata ruraruchwan. Wakinkuqa llamkayninkupim manaña confianza runañachu kanku, chaymi qallaykunku llullakuyta hinaspa qollqetawan hukkunapa imantapas apakuyta (1 Tim. 6:9, 10).

Limpio sonqoyoqkunam ichaqa allin ruraykunata kuyanku, Jehová Diosta kuyaspankum respetanku hinaspa limpio concienciayoq kanankupaq tanteakunku. Chaymi ‘tukuy imapi allinta portakunku’ (Heb. 13:18). Chayna rurasqankutam hukkuna allinta qawanku, chaytam qawachin Emiliopa rurasqan, payqa Italia nacionpi Testigom, llamkanmi runakuna apaq carrota manejaspan. Huk  punchawmi billeterapi tarirurqa qollqeta (470 eurota otaq 680 dolarta) hinaspam patronninman qoykurqa, payñataqmi dueñonman kutichipurqa. Emiliopa rurasqanmanta admirakuspankum wakin llamkaqmasinkuna Biblia estudiayta qallarirqaku. Kunankamaqa 2 familiamanta 7 runakunam cristianoña kanku. Arí, limpio sonqoyoqkunapa allinkuna rurasqankuwanmi huk runakunapas Diosta alabanmanku (Tito 2:10).

Kunanqa achka runakunam allinpaq hapinku manaraq casarasqa kachkaspa puñuyta, hukwan pierdekuyta hinaspa qarimasillanwan otaq warmimasillanwan puñuytapas, chaymi cristianopas chayna piensayta qallaykunman. Chaynapim sonqonta qachachanman. Huchapakuqqa huchanta pakananpaqmi iskay uya rikurirunman, chayna kaspaqa manam ‘limpio sonqoyoqñachu’ kanman.

Gabriele sutiyoq cristianom 15 watanpi bautizakurqa hinaspa chaylla precursor karqa. Ichaqa tiempopa risqanman hinam, mana allin amistadkunawan kuskanchakuspan tutanpi huñunakuspa upiananku hinaspa tusunanku sitiokunaman riyta qallaykurqa (Sal. 26:4). Chaynapim huchapakuypi puriyta qallaykurqa hinaspa iskay uya runaña rikurirurqa, chaymi congregacionmanta qarqochikurqa. Corregisqankum allinta piensananpaq yanaparqa. Gabrielem nin: “Ñawpaqpi mana rurasqaykunatam rurayta qallaykurqani. Bibliatam sapa punchaw leerqani, kallpanchakurqanim Jehová Diospa niy munasqanta entiendenaypaq, qellqanchikkunatapas allintam estudiarqani. Cuentatam qokurqani estudiasqay allinniypaq hinaspa sumaqllaña kasqanta. Chaymantapas yacharurqanim Bibliata leespa hinaspa sonqomanta mañakuspa kallpa tarinamanta”, nispa. Chaykuna rurasqanmi yanaparqa huchapakuyta saqenanpaq hinaspa Dioswan allinyananpaq.

Kunanmi Gabrieleqa kaqmanta precursor kachkan, señoranwan kuskam servichkanku. Ejemplonmi qawachin chuya sonqoyoq kanapaq hinaspa mana huchapakunapaqpas, Bibliata hinaspa ‘allin yuyayniyoq confianza sirvientepa’ rurachisqan qellqakunata estudiay yanapasqanta (Mat. 24:45; Sal. 143:10).

Imaynatam hinalla “limpio sonqoyoq” kachwan sasa tiempopipas

Wakin iñiqmasinchikkunam llumpayta sasachakunku otaq llakisqa tarikunku mana iñiq ayllunkupa hikutasqanwan, qollqewan hinaspa llumpayta onqospankupas. Chaynatam rey Davidpas ñakarirqa. Nirqam: “Sonqollaymi pasaypaqta hukmanyarun. Pensamientollaymi pasaypaqta musparun”, nispa (Sal. 143:4). ¿Imataq yanaparqa chayna sasachakuykunapi? Paytapas hinaspa hukkunatapas Diospa yanapasqanmanta yuyarisqanmi. Yuyaymanarqam Diospa rurasqankunapi hinaspa chuya sutin chuyanchasqa kananpaq tukuy rurasqankunapipas (Sal. 143:5). Chaynallataqmi, Diospi hinaspa ñoqanchikpaq ñawpaqpi chaynataq kunanpas rurasqankunapi yuyaymanaspaqa, kallpata tarisun sasa tiempokunapi.

¿Haykapipas sientichiwarqanchikchu iñiqmasinchikpa rurasqan? Chayna tarikunapaq razon kaptin otaq manapas hinalla chayna kaspaqa, piñakuytam otaq mana allin piensaytam qallaykuchwan. Hukkunamantapas karunchakuytam qallaykuchwan. ¿Yaqachu chaynakunata ruraspa “limpio sonqoyoq” kachwan? Manamá. Limpio sonqoyoq kanapaqqa iñiqmasinchikkunawan imayna kasqanchikpim cuidakunanchik.

“Limpio sonqoyoq” kawsakuyta chaninchaspam, mana allin ruraqkunapa chawpinpi reqsisqa kanchik hinaspa achka yanapakuyta kawsakuyninchikpi tarinchik. Ejemplopaq, hawkam tarikunchik Diospa munaynin rurasqanchikmanta yachaspa. Aswanqa Dioswan amistadninchikmi allin kanqa, payqa kuyanmi ‘limpio sonqoyoqkunata’ (Sal. 73:1). Arí, “limpio sonqoyoq” hinalla kaspaqa, Jesuspa nisqanman hinam kusikusun hinaspa ‘Diosta rikusun’ otaq cuentata qokusun imayna yanapawasqanchikmanta (Mat. 5:8).