Taytapa, Churipa hinaspa chuya espiritupa sutinpi bautizasqa

‘Runakunaman rispayá [. . .] bautizamuychik Taytapa, Churipa hinaspa chuya espiritupa sutinpi.’ (MAT. 28:19.)

1, 2. a) ¿Imataq pasarqa Jerusalenpi 33 kaq watapi Pentecostes fiestapi? b) ¿Imanasqataq achkallaña bautizakurqaku?

JERUSALENPIM 33 watapi runakuna huntallaña karqaku. Chaypim admirakuypaq kaq pasarqa, Pedropas ancha allin yachachikuytam willarqa. Sonqonkuman uyarisqanku chayaruptinmi yaqa 3.000 judiokuna hinaspa paykunapa religionninman tikrakuqkunapas wanakuspanku bautizakurqaku, chaynapim chayllaraq qallariq congregacionman yapakurqaku (Hech. 2:41). ¡Mayna admirakunapaqchá karqa yakuta huñusqanku pozokunapi achka runakunapa bautizakusqankuqa!

² ¿Ima admirakuypaq pasakusqanwantaq achkallaña bautizakurqaku? Bibliapa nisqanman hinaqa puntataraqmi “cielomanta qapariyllawanña wayra hina hamuqta uyarirurqaku”, hinaptinmi huk wasipa altosninpi kachkaptinku Jesuspa 120 qatiqninkunaman chuya espiritu huntaykurqa. Ima pasasqanta qawaq riq runakunam admirakurqaku Jesuspa qatiqninkuna ‘mana yachasqanku idiomakunapi rimaptinku’. Chaymantam, Pedro willarqa kallpanchaq yachachikuyta, chaypim imam kaqta nirqa Jesuspa wañukusqanmantapas. Uyariqninkunam “sonqonkupi llumpayta llakikuruspanku” imata ruranankumanta tapukurqaku, hinaptinmi Pedro kaynata nirqa: ‘Huchaykichikmanta wanakuspaykichik Jesucristopa sutinpi bautizachikuychik [. . .], chaynapim chuya espiritutapas qosunkichik’, nispa (Hech. 2:1-4, 36-38).

3. ¿Imatam rurananku karqa Pentecostes punchawpi wanakuq judiokuna hinaspa paykunapa religionninman tikrakuqkunapas?

³ Piensarisun Pedrota uyariq judiokunapi hinaspa paykunapa religionninman tikrakuqkunapipas. Paykunaqa religionninkuraykum Jehová Diosmanta yacharqakuña Diosninku  kasqanta. Chaymantapas, hebreo rimaypi Diospa Palabranwanmi yacharqaku chuya espirituqa Diospa kallpan kasqanta, chaytam Diosqa servichikurqa unanchaspan hinaspa hukkunapipas (Gen. 1:2; Jue. 14:5, 6; 1 Sam. 10:6). Ichaqa manamá chayllatachu yachananku karqa. Reqsikunankum karqa Diospa qomusqan Jesus salvakunankupaq Mesias kasqanta. Chaymi Pedro willarqa ‘Jesucristopa sutinpi bautizakunankupaq’. Kawsarimusqan qepallatam Jesusqa Pedrotawan wakin qatiqninkunata kamachirqa ‘Taytapa, Churipa hinaspa chuya espiritupa sutinpi’ iñiqkunata bautizamunankupaq (Mat. 28:19, 20). Qawasunchikyá punta pachak watapi hinaspa kunanpas chay kamachikuypa ima ninanmanta.

Taytapa sutinpi

4. ¿Imaynañam Diosqa karqa ñawpaq Israel nacionwanqa?

⁴ Qawasqanchikman hinaqa, Pedropa nisqanta kasukuqkunaqa Diostam servirqakuña hinaspa amistadninñam karqaku. Chaymantapas kallpanchakurqakum Leyta kasukunankupaq. Huk lawmanta hamuqkunapas Jerusalenpim kachkarqaku huknin kamachikuyta cumplispanku (Hech. 2:5-11). Diosmi ichaqa Israel nacionwan manaña ñawpaqpi hinachu karqa: manañam akllasqan llaqtanñachu karqa. Chaymi Leypa nisqanta ruraspankupas favornin tariytaqa manaña atirqakuchu (Mat. 21:43; Col. 2:14). Diospa amistadnin hinalla kayta munaspankuqa manam chayllatachu rurananku karqa.

5, 6. ¿Imatam rurarqaku judiokunawan paykunapa religionninman tikrakuq runakuna Dioswan amistad kanankupaq?

⁵ Diosmanta vidanku kasqanraykum paymantaqa mana karunchakunankuchu karqa (Hech. 4:24). Chaynapim astawan entienderqaku Diosninku llakipayakuq kasqanmanta. Paymi salvakunankupaq Mesiasta kachamurqa, pampachaytapas munarqam Pedropa kayna nisqanta uyariqkunata: “Israelpa llapallan mirayninkuna, yachaychikyá, qamkunapa chakatarusqaykichik [“warkurusqaykichik”, NM] Jesustam Israel nacionpi Cristo hinaspa Señor kananpaq Dios churaykun” (Hech. 2:36). Pedropa nisqanta kasukuqkunaqa aswanraqchá agradecekunanku karqa Diosman asuykuy munaqkunapaq tukuy rurasqanmanta (leey Hechos 2:30-35).

⁶ Judiokunawan paykunapa religionninman tikrakuq runakunaqa reqsikurqakum Jesusnintakama Dios salvananta, chaynallatam Taytankuman asuykunmanku karqa. Kunanmi entiendenchik yachaspa otaq mana yachaspa Jesusta wañuchiypi yanapakusqankuta hinaspa huk huchankumanta wanakusqankutapas. Entiendenchiktaqmi qatiqnin punchawkunapi ‘apostolkunapa yachachisqanta’ uyarisqankumantapas (Hech. 2:42). Confianzawanmi asuykunmanku karqa ‘favoreceqninku Diosman’ (Heb. 4:16).

7. Manaraq Taytapa sutinpi bautizakuchkaspanku, ¿imakunatam Diosmanta achka yacharunku?

⁷ Kunanqa tukuy nacionmanta millonnintin runakunam qaripas warmipas Bibliata estudiaspanku Diosmanta yacharunku (Isa. 2:2, 3). Wakinkum Diospi mana creerqakuchu otaq creespankupas unanchasqankunapi mana interesakusqanta piensarqaku, ichaqa yacharunkum Dios kasqanta hinaspa paywan amistad ruray atikusqantapas. Wakinkuqa creerqakum Tayta, Churi hinaspa chuya espiritu huk Dioslla kasqanta otaq taytachakunata yupaychaqku, ichaqa yacharunkum Jehová Dioslla tukuy atiyniyoq kasqanta hinaspa sutinta rimaspa asuykuyta qallarirqaku. Chaymanta yachasqankum yanaparqa Jesusta kasukuspa Taytapa sutinpi bautizakunankupaq.

8. ¿Imata Dios rurananmantam yacharunku Adanmanta hucha chaskisqankuta mana yachaqkuna?

⁸ Yacharunkutaqmi Adanpa miraynin kaspanku huchayoq kasqankuta (Rom. 5:12). Imayna tarikusqankumanta yachanapaqqa piensasun imawan onqosqanmanta mana yachaq runapi. Ichapas wakin kutillapi imanpas nanan, hinaptin doctorman mana risqanrayku piensan allin tarikusqanta. Ichaqa  doctorman riptinmi qawaykuspan imawan onqosqanmanta willaykunman (tupachiy 1 Corintios 4:4). ¿Manachu allin kanman imayna hampichikunanmanta yachaspa allin hampichikuynin? Yaqa chaynam pasan huchayoq kasqankumanta yachaqkunawanpas. Doctorwan qawachikuchkaq hinam Bibliawan yacharunku pantaq kasqankuta hinaspa Dioslla “hampinanmantapas”. Arí, Diosmanta karunchasqa kaqkunam payman asuykunanku hampisqa kanankupaq (Efe. 4:17-19).

9. ¿Imatam Jehová Dios rurarun kaqmanta paywan amistad kananchikpaq?

⁹ Diosman qokuspa bautizasqa kaspanchikqa, yachanchikñam Diospa amistadnin kayqa ancha allin kasqanta hinaspa entiendenchik ancha kuyawasqanchiktapas (leey Romanos 5:8). Diospa contranpi Adanwan Eva huchallikuruptinkupas, payqa tukuytam rurarun paykunamanta miraqkuna amistadnin kananchikpaq. Chaypaqmi aguantarqa hatun nanayta: qawarqam Churin llumpayta ñakarispa wañusqanta. Chaymanta yachaspanchikmi astawan kuyanchik hinaspa reqsikunchik kamachiqninchik kasqanta chaynataq kasukunchik. ¿Imatam niwaq qanmanta? ¿Diosman qokuspayki bautizakurunkiñachu? Yachamusqanchikman hinaqa, achka razonkunam kachkan chayta ruranapaqqa.

Churipa sutinpi

10, 11. a) ¿Imamantam Jesusta debekunchik? b) ¿Imaynam tarikunki wañuymanta librawananchikpaq Jesuspa wañusqanmanta?

¹⁰ Kaqmanta rimasun Pedropa yachachisqanmanta. Paymi qawachirqa Jesusta chaskiyqa ancha allin kasqanta, chayqa tupanmi “Churipa [. . .] sutinpi” bautizakuywan. ¿Imanasqataq chay rurayqa ancha allin karqa ñawpaqpi hinaspa kunanpas? Jesusta chaskispa sutinpi bautizakuqqa reqsikuchkanmi Unanchaqninchikwan amistad kanapaq pay ancha allin rurayniyoq kasqanmanta. Piensasun qerupi wañusqanwan imayna yanapawasqanchikta. Leyrayku ñakasqa hina kasqankumantam judiokunata librarqa (Gal. 3:13). Chaymantapas, runakunatam wañuymanta librarqa (Efe. 2:15, 16; Col. 1:20; 1 Juan 2:1, 2). Chaypaqmi aguantarqa mana allin rurasqankuta, humillachisqa hinaspa ñakarichisqa karqa chaynataq wañurqa. ¿Chaninchankichu rurasqanta? Jesuspa rurasqantam astawan chaninchasun kayna pasakusqanpi piensaspa: 1912 watapim Titanic sutiyoq hatu-hatun buquepi 12 watanpi kaq warmacha viajachkan. * Qonqaymantam buque chocarun hatu-hatun rankawan hinaptinmi chinkaykuyta qallaykun. Warmacham salvakunanpaq uchuy botechaman qespiyta munan ichaqa huntay-huntayñam kachkan. Hinaptinmi botepi kaq huk runa despidekuykun señoranta muchaykuspan hinaspam botemanta hatun buqueman pawaykuspan lugarninpi warmachata churaykun. ¿Imaynataq sientekuwaq karqa chay warmacha kaspaykiqa? Ancha agradecesqachá. Chaymanta astawanraqmi Jesusqa qampaq rurarqa: wiñaypaq kawsakunaykipaqmi wañurqa.

¹¹ ¿Imaynataq tarikurqanki Diospa Churin qamrayku wañusqanmanta chayllaraq yachaspayki? (Leey 2 Corintios 5:14, 15.) Ancha agradecesqachá. Chaymi yanapasurqanki Jehová Diosman qokunaykipaq hinaspa ‘manaña kikillaykipaq kawsaspa Cristopaqña kawsanaykipaq’. Churipa sutinpi bautizakuspaqa reqsikuchkanchikmi ñoqanchikpaq rurasqanta hinaspa ‘kawsay qowananchikpaq’ autoridadniyoq kasqantapas (Hech. 3:15; 5:31). Manaraq bautizakuchkaspaqa manam Diospa amistadninraqchu karqanchik, hamuq tiempopaq suyakuyninchikpas manam karqachu. Kunanmi ichaqa Jesuspa wañusqanpi iñisqanchikrayku Taytanpa amistadnin kanchik (Efe. 2:12, 13). Chayna kasqanmantam Pablo kaynata qellqarqa: ‘Ñawpaqtaqa Diosmanta karunchasqam karqankichik, mana allinkunata ruraspam Dios cheqniq karqankichik, kunanmi ichaqa kikinpuni qamkunawan allinyanakuykun, Chaynataqa  ruraykun Cristopa runa kayninpi wañusqanwanmi. [. . .] Mana culpayoqta hinaspa pasaypaq mana huchayoqtaña [. . .] presentasunaykichikpaq’, nispa (Col. 1:21, 22).

12, 13. Churipa sutinpi bautizasqa kaspanchikqa, a) ¿imatam yuyarinanchik pipas piñachiwaptinchik? b) ¿imatam rurananchik?

¹² Churipa sutinpi bautizakuspapas hinallam pantaq runa kanchik. Kaymanta yachaymi sapa punchaw kawsasqanchikpi yanapawanchik. ¿Imatam cristianoqa ruranan pipas piñachiptin? Yuyananmi iskayninku pantaq kasqankuta, chaymi necesitanku Dios pampachananta hinaspa pampachanakuytapas (Mar. 11:25). Chayna ruray ancha allin kasqanmantam huk rikchanachiywan Jesus yachachirqa. Huk reymi pampachaykurqa sirvientenpa achka-achka waranqa qollqe debesqanta. Kay sirvienteñataqmi pachaklla debeq sirvientemasinta mana pampachaykurqachu. Jesusqa kaytam yachachiyta munarqa: iñiqmasinchikkunata mana pampachaptinchikqa Diospas manam pampachawasunchu (Mat. 18:23-35). Churipa sutinpi bautizakuqqa paypa autoridadninta reqsikuspanpas, kallpanchakunanmi ejemplontawan yachachisqanta qatikunanpaq; hukninmi hukkunata pampachay (1 Ped. 2:21; 1 Juan 2:6).

¹³ Pantaq kaspanchikmi Jesus hina ruraytaqa mana atinchikchu, chaywanpas tukuy atisqanchiktam rurananchik chaynapi Diosman qokusqanchikwan cumplinapaq. Chaymi sapa punchaw kallpanchakunchik mosoq pachawan pachakuchkaq hina mosoq runaña kananchikpaq (leey Efesios 4:20-24). Amistadninchikpa rurasqanta admiraspaqa, ejemplontawan sumaq kayninkunatam qatipakunchik. Chaynaqa, ¿manachu Cristomanta astawan yachananchik hinaspa qatipakunanchik?

14. ¿Imaynatawanmi qawachinchik Jesuspa hanaq pachapi Rey kasqan respetasqanchikta?

¹⁴ Churipa sutinpi bautizakuy entiendesqanchiktaqa qawachinchiktaqmi, Jehová Dios ‘tukuy imatapas Cristowan saruchisqanta’ chaynataq ‘llapallan iñiqkunapa uman kananpaq churasqanta’ reqsikuspa (Efe. 1:22). Chaypaqqa qatiqninkunata kamachinanpaq Jesuspa servichikusqan runakunatam respetananchik. Ancianokunatam sapa congregacionpi churan, pantaq kaspankupas Bibliamanta allin entiendeqmi kanku. ‘Paykunatam churarqa Cristopa cuerpon iñiqkunata yanapaspa wiñachinankupaq’ (Efe. 4:11, 12). Pipas pantaptinqa, Jesusmi yachan chay sasachakuyta allinta hinaspa haykapi allichaytaqa. ¿Confianchikchu chayna rurananmanta?

15. Bibliapa nisqanman hina, ¿ima bendicionkunatam chaskinku bautizakuqkunaqa?

¹⁵ Yachamusqanchikman hinaqa, kachkanraqmi Diosman mana qokuqkunawan mana bautizakuqkunapas. Chayna kaptikiqa, ichapas yachamusqanchikkuna yanapasunki Churipa sutinpi bautizakuy allin kasqanmanta entiendenaykipaq. Chaynatam qawachinki Jesuspa rurasqanmanta reqsikusqaykita hinaspa agradecekusqaykitapas, hinaspachá bautizakunki chaynapi achka bendicionkunata chaskinaykipaq (leey Juan 10:9-11).

Chuya espiritupa sutinpi

16, 17. ¿Ima ninantaq chuya espiritupa sutinpi bautizakuyqa?

¹⁶ ¿Ima ninantaq chuya espiritupa sutinpi bautizakuyqa? Yachamusqanchikman hinaqa, Pedrota Pentecostespi uyariqkunaqa yacharqakuñam chuya espiritumanta. Qawarqakum Dios hinalla servichikuspa Pedroman  hinaspa hukkunamanpas ‘chuya espiritunwan huntaykuptin mana yachasqanku idiomakunapi rimayta qallaykusqankuta’ (Hech. 2:4, 8). ‘Chuya espiritupa sutinpi’ nisqa palabrata uyarispankum wakinku ninku runa kasqanta, ichaqa ¿allin sapichasqachu kachkan chayna piensasqanku? Manam. Ejemplopaq, wakinpim ninchik “leypa sutinpi” imapas rurakusqanta, ichaqa manam chaywanqa nichkanchikchu leypa runa kasqantachu. Chay sutipi bautizakuqqa entiendenmi chuya espirituqa Diospa kallpan kasqanta, manam runa kasqantachu, hinaspam reqsikun Diospa munasqan rurakunanpaq ancha allin kasqanta.

¹⁷ Bibliata estudiaspam yacharunchik chuya espiritumanta hinaspa Palabranta qellqachinanpaq servichikusqantapas (2 Tim. 3:16). Iñiyninchikpi ñawparispam astawan entienderqanchik Jesuspa kayna promesanmanta: ‘Mañakuqkunamanqa hanaq pachapi kaq Taytaykichikmi [. . .] qosunkichik chuya espirituta’ (Luc. 11:13). Cuentata qokurqanchikchá vidanchikpi imayna yanapawasqanchikmanta. ¿Imatam nichwan chuya espiritupa sutinpi manaraq bautizakuptikiqa? Chayna kaptinqa yuyariy Jesuspa promesanta: bautizakuspaykiqa chaskinkim chuya espirituta hinaspam tarinki achka bendicionkunata.

18. ¿Ima bendicionkunatam chaskinku chuya espiritupa sutinpi bautizakuqkunaqa?

¹⁸ Ñawpaqpi hinam kunanpas Diosqa espiritunwan llaqtanta yanapan. Chuya espiritutaqmi sapakamata imayna kawsanapaq sapa punchaw yanapawanchik. Sutinpi bautizakuqkunaqa, reqsikunanchikmi chaynataq agradecekunanchikmi vidanchikpi yanapawasqanchikmanta hinaspa chayman hinataq kawsananchik. Qatiqnin estudiopim yachasun Diosman qokusqanchikwan cumplinapaq ima rurananchikmanta hinaspa chaypaq chuya espiritu imaynata yanapawasqanchikmantapas.

[Willakuykuna]

¿Yuyachkankichu?

• ¿Ima ninantaq Taytapa sutinpi bautizakuyqa?

• ¿Ima ninantaq Churipa sutinpi bautizakuyqa?

• ¿Imaynatam qawachinchik Taytapa hinaspa Churipa sutinpi bautizakusqanchik entiendesqanchikta?

• ¿Ima ninantaq chuya espiritupa sutinpi bautizakuyqa?

[Kay yachachikuypa tapukuyninkuna]

[10 kaq paginapi dibujokuna]

Pentecostes 33 watapi, ¿imayna kaytam qallaykurqaku Jehová Dioswan Jesusta chayllaraq qatiqkuna?

[Reqsikunchikmi]

Jerusalenpi Israel Museopa permisonwan