Mozo-sipas, Jehová Diosta tukuy sonqoykiwan serviyta yachay

“Mozollaraq kachkaspaykiyá unanchaqnikimanta yuyariy.” (ECL. 12:1.)

1. ¿Imata ruranankupaqmi Israelpi warmakuna invitasqa karqaku?

YAQA 3.500 wata ñawpaqtaraqmi Israelpi sacerdotekunatawan ancianokunata Moises kaynata kamachirqa: “Huñunkichikmá llapallan runakunata. Qaritapas-warmitapas, wawakunatapas [. . .] chaynapi leesqanku yachachikuykunata uyarinankupaq chaynapitaq yupaychasqanchik Tayta Diosta respetanankupaq chaynataq chay yachachikuykunata kasukunankupaq”, nispa (Deu. 31:12). ¿Yuyayniyoqkunallachu huñunakuspa Diosta yupaychananku karqa? Manam, warmachakunapas uyarinanku, yachananku hinaspa kasukunankum karqa Jehová Diostaqa.

2. ¿Imaynatam Jehová Diosqa punta pachak watapi qawachirqa mozo-sipaskunapi interesakusqanta?

² Punta pachak watapipas, Jehová Diosqa hinallam qawachirqa llaqtanpi kaq mozo-sipaskunapi interesakusqanta. Ejemplopaq, congregacionkunaman Pablopa qellqasqanpim paykunapaqpas kamachikuykunata qellqachirqa (leey Efesios 6:1 hinaspa Colosenses 3:20). Segurom kachwan, chay consejokunata kasukuq mozo-sipaskunaqa Jehová Diosta sonqomanta kuyasqankumantawan bendicionninta chaskisqankumantapas.

3. ¿Imaynatam achka mozo-sipaskuna qawachinku Dios serviy munasqankuta?

³ ¿Kunanpas Diosqa nichkanchu mozo-sipaskunata llaqtanwan kuska yupaychanankupaq? Arí, nichkanmi. Chaymi kusikunchik achkallaña mozo-sipaskuna huñunakuypi kasqankumanta. Pablopa kayna nisqantam kasukunku: “Ama qonqaruspayá kuyanakunapaq hinaspa allin ruranapaq yanapanakusunchik. Wakinkunapa costumbrasqanman hinaqa amayá huñunakuyman riyta dejasunchu aswanqa Señorpa chaylla kutimunanta yachaspayá kallpanchanakusunchik” (Heb. 10:24, 25). Wakinkuqa predicaqña kaspankum tayta-mamankuwan kuska Diospa Munaychakusqanmanta allin noticiata willachkanku (Mat. 24:14). Chaynataq sapa watam enteron pachapi waranqantin mozo-sipaskuna Jehová Dios kuyasqankuta qawachinku bautizakuspanku. Cristopa qatiqnin kaspankum achka bendicionkunata chaskinku (Mat. 16:24; Mar. 10:29, 30).

Nisusqaykitaqa kasukuyá

4. ¿Hayka watayoqtaq kanayki Jehová Diosta yupaychanaykipaq?

⁴ ¿Yachankichu hayka watayoqtaq kanayki Jehová Diosta yupaychanaykipaq? Bibliaqa manam ninchu, ichaqa kaynatam nin: ‘Mozollaraq kachkaspaykiyá Unanchaqnikimanta yuyariy’, nispa (Eclesiastes 12:1). Chaynaqa, ama piensaychu chaymanta tanteanaykipaq warmachallaraq kasqaykita. Hayka watayoq kaptikipas, kallpanchaykikum kunanpuni chayta ruranaykipaq.

5. ¿Imata ruraspankum achka tayta-mamakuna warmankuta yanapanku iñiyninkupi ñawparinankupaq?

⁵ Achka mozo-sipaskunam iñiyninkupi  ñawparinankupaq tayta-mamankumanta otaq hukllanmantapas yanapayta chaskirqaku. Paykunatam tupachichwan punta pachak watapi kawsaq Timoteowan. Maman Eunicewan abuelan Loidam, warmacha kasqanmanta Diospa Palabranmanta yachachirqaku (2 Tim. 3:14, 15). Yaqachá chaynata tayta-mamayki uywasuchkanki: qanwan kuska Bibliata estudiaspanku, orakuspanku, huñunakuykunamanwan asambleakunaman rispa hinaspa predicaspanku. Chaynapim cumplichkanku Jehová Diosmanta huknin kamachikuy chaskisqankuta: yachachisuchkankim munayninta ruranaykipaq. ¿Cuentata qokunkichu kuyasusqaykimantawan qanmanta interesakusqankuta? (Pro. 23:22.)

6. a) Salmo 110:3 nisqanman hina, ¿imayna servinaykitam Diosqa munan? b) ¿Imakunamantam qatiqninpi yachasun?

⁶ Diosqa munanmi wiñasqaykiman hina Timoteopa rurasqanta qatipakunaykita: yachanaykim Diospa munasqanmanta, allin rurayta hinaspa paypa agradonpaq kaqta ruraytapas (Rom. 12:2). Chaynapim cristianopa rurayninkunataqa sonqomanta ruranki, manam tayta-mamaykita kusichinallaykipaqchu. Chaynata ruraptikiqa Diospas kusikunqam (Sal. 110:3). Munachkankichá nisusqaykita uyarispa kasukuyta. ¿Imaynatam chayta rurawaq? Bibliata sapallayki estudiaspa, mañakuspa hinaspa allinta portakuspa. Chaykunamantayá sapakamamanta qatiqninpi yachasun.

Jehová Diosta reqsispam amistadnin kanki

7. a) ¿Imaynatam yachanchik Bibliata allintapuni Jesus estudiasqanta? b) ¿Pikunapa yanapaynintam chaskirqa?

⁷ Punta kaq: Jehová Dios serviyta munanaykipaqqa sapa punchawmi Bibliata leenayki, chaynatam Diosmanta yachay munasqaykita tarinki hinaspa allinkunata yachanki (Mat. 5:3). Chaynapim Jesuspa ejemplonta qatinki. 12 watanpi kachkaptinmi tayta-maman templopi tarirurqa “Diospa leynin yachachiqkunata uyarispan hinaspa tapuspan paykunawan tiyachkaqta” (Luc. 2:44-46). Kaymi qawachiwanchik, warmacha kaspanpas Diospa Palabranmanta yachay munasqanta hinaspa allinta entiendesqantapas. ¿Imaynatam chayta rurarqa? Achkanpiqa maman Maria hinaspa padrastron Joseymi yanaparqaku, paykunam Jehová Diosta tukuy sonqonkumanta kuyarqaku chaymi Jesustapas warmacha kasqanmanta yachachirqaku (Mat. 1:18-20; Luc. 2:41, 51).

8. a) ¿Haykapim tayta-mamakunaqa wawa-churinku yanapayta qallarinanku Bibliapa yachachikuyninkunata kuyanankupaq? b) Huk experienciawan willamuy wawa-churikunata nacesqanmantapacha yachachiy allin kasqanta.

⁸ Kunanpas Diosta kuyaq tayta-mamakunaqa wawa-churinku nacesqanmantapunim yanapanku Bibliapa yachachikuyninkunata kuyanankupaq (Deu. 6:6-9). Chaytapunim rurarqa Rubi sutiyoq cristiana, Joseph sutiyoq piwi warmanwan. Wawachallaraq kasqanmantam Bibliamanta willakuq libroy nisqa qellqata sapa punchaw leepurqa. Wiñasqanman hinam yanaparqa Bibliamanta textokunata umallamanta yachananpaq. ¿Chayna rurasqan Josephta yanaparqachu? Rimayta yacharuspallanmi, kikinpa rimayllanpi willarqaña chay libromanta yachasqankunata. 5 watachayoq kaspanñataqmi Diosmanta Yachachinapaq Escuelapi punta discursonta qorqa.

9. ¿Imanasqataq Bibliata leespa yuyaymanayqa ancha allin?

⁹ Dios servisqaykipi ñawparinaykipaqqa, sapa punchaw hinaspa tukuy vidaykipim Bibliata leenayki (Sal. 71:17). ¿Imaynatam chay rurayqa yanapasunki ñawparinaykipaq? Jehová Diosta astawan reqsinaykipaqmi yanapasunki. Jesusmi orakuspan taytanta nirqa: “Chay wiñay kawsayniyoqqa kanku sapallan cheqap Dios kasqaykita reqsiqkunam”, nispa (Juan 17:3). Allinta reqsiptikim, aswan cheqap qampaq kanqa hinaspa astawan  kuyankipas (Heb. 11:27). Chaymi Bibliata sapa kuti leespaykiqa kallpanchakunayki Diosmanta mosoq yachaykunata tarinaykipaq. Kaynatam tapukuwaq: “¿Imatam leesqay yachachiwan Jehová Diospa imayna kasqanmanta? ¿Imaynatam qawachiwan kuyawasqanta hinaspa ñoqamanta preocupakusqanta?”, nispa. Chay tapukuykunapi yuyaymanaspaykiqa astawanmi entiendenki Diospa imayna piensasqanta, sientesqanta hinaspa yachankitaq qanmanta ima suyasqantapas (leey Proverbios 2:1-5). Chaynapim, Timoteo hina ‘yachasqaykikunata umaykipi churanki’ otaq convencesqa tarikunki Bibliapa nisqankunamanta hinaspa tukuy sonqomanta serviyta munanki (2 Tim. 3:14).

Diosta mañakuspaykim payta astawan kuyanki

10, 11. ¿Imaynatam mañakusqayki yanapasunkiman sonqomanta astawan Diosta servinaykipaq?

¹⁰ Iskay kaq: Jehová Diosta serviy munasqayki aswan kananpaqqa mañakunaykitaqmi. Salmo 65:2 kaynata nin: ‘Qamqa pipapas mañakusqanta uyariykuqmi kanki. Llapallanmi [. . .] qanman asuykamusunki’, nispa. Diospa akllasqan llaqtan Israelpa tiemponpiqa, Jerusalenpi templomanmi forasterokuna riyta atirqakuña Diosta mañakunankupaq (1 Rey. 8:41, 42). Diosqa manam pimanpas sayapakunchu, prometenmi kasukuqninkunata uyarinanpaq (Pro. 15:8). Segurom kanayki, ‘llapallan runakuna’ nispanqa qanmantapas nichkanmi.

¹¹ LLapanchikmi yachanchik allin amistadkuna sapa kuti rimasqankuta. Imayna tarikusqanchikmanta, piensasqanchikmantawan preocupacionninchikmanta amistadninchikwan rimaspaqa allinmi sientekunchik. Jehová Diosqa munanmi amistadniki kayta, paywanqa mañakuspam rimanki (Fili. 4:6, 7). Imayna sientekusqaykimanta willay yaqa tayta-mamaykiwan otaq amistadnikiwan rimachkaq hina. Imayna mañakusqaykim qawachin Jehová Diospaq ima sientesqaykita. Cuentatam qokunki paywan aswan amistad kaspayki, mana manchakuspa mañakusqaykita.

12. a) ¿Imaynam sonqomanta mañakuyqa? b) ¿Imataq yanapasunki Jehová Dios hichpallaykipi kasqanta yachanaykipaq?

¹² Orakuyqa manam imaynatapas mañakuyllachu. Diosman willay imayna sientekusqaykita. Niykuy kuyasqaykitawan respetasqaykita hinaspa paypi confiasqaykitapas. Mañakusqaykita uyarisuptikim kikiki yachanki ‘Diosqa llapallan qayakuqninkunapa hichpallanpi kasqanta’ (Sal. 145:18). Arí, qanmanmi asuykamunqa hinaspa kallpata qosunki Satanaspa toqllankunata atipanaykipaq hinaspa vidaykipi allinta tanteanaykipaqpas (leey Santiago 4:7, 8).

13. a) ¿Imaynatam huk sipasta Dioswan amistadnin yanaparqa? b) ¿Imaynatam Dioswan amistadniki yanapasunki estudiaqmasikikunapa hikutasusqaykita vencenaykipaq?

¹³ Qawasunchik imaynatam Cherie sutiyoq cristianata yanaparqa Dioswan amistadnin. Achka premiokunatam chaskirqa  escuelanpaq pukllasqanmanta hinaspa allin estudiaq kasqanmanta, chaymi mana qollqellawan huk lawpi estudiananpaq ofrecerqaku. Cheriem yuyarispa nin: “Munapayanapaq hinam karqa. Pukllanaypaq yachachiqniykunawan estudiaqmasiykunam hikutawarqaku ofrecewasqankuta chaskinaypaq”, nispa. Ichaqa cuentatam qokururqa chaynata estudiaspa hinaspa pukllananpaq preparakunanpaq yaqa lliw tiempon servichikunanmanta, hinaptin Diosta servinanpaq tiempon mana puchunanmanta. ¿Imatam rurarqa? Paymi nin: “Diospa yanapakuyninta mañakuspaymi, ofrecewasqankuta mana chaskirqanichu aswanqa precursora regularmi karqani”, nispa. Pichqa wataña Diosta chaynata servispanmi nin: “Manam ñakakunichu. Tanteasqayqa Jehová Diostam kusichin, chaymi ñoqatapas kusichiwan. Diospa Gobiernonta puntapi churaptikiqa, imapas necesitasqaykitaqa qoykusunkim”, nispa (Mat. 6:33).

Allin portakusqaykim qawachin chuya sonqoyoq kasqaykita

14. ¿Imatam Diosman qawachinki allinta portakuspayki?

¹⁴ Kimsa kaq: Jehová Diosta tukuy kallpaykiwan serviy munasqaykitaqa qawachinkitaqmi allinta portakuspaykipas. Yuyariy, allin kawsakuq mozo-sipaskunatam Diosqa bendecin (leey Salmo 24:3-5). Samuelmanta rimasun, payqa manam qatipakurqachu sacerdote Eliypa mana allinkuna ruraq churinkunataqa. Bibliam willawanchik paykuna huchapakuptinkupas, Samuelqa ‘Diosta chaynataq runakunatapas agradastin’ wiñasqanmanta (1 Sam. 2:26). Arí, allinkuna rurasqanqa sutillam karqa.

15. ¿Imanasqataq kallpanchakunayki allinta portakunaykipaq?

¹⁵ Pablopa nisqanman hinaqa, kunan tiempopi runakunaqa kanku: kikillanpaq munaqkuna, hatun tukuqkuna, tayta-maman mana kasuqkuna, mana reqsikuqkuna, runamasin traicionaqkuna, mana controlakuqkuna hinaspa Diosta qepanchaspa kusirikuy kuyaqkunam (2 Tim. 3:1-5). Yachanchikmi mana allin ruraq runakunapa chawpinpi allin portakuy qampaq sasa kasqanta. Ichaqa, sapa kuti mana allin ruraymanta karunchakuspam, qawachinki Jehová Dios Llapallan Kamachiq Kasqanta otaq paylla tukuy hinastinpi kamachinanpaq derechoyoq kasqanta (Job 2:3, 4). Chaynataq, kusisqam tarikunki kuyakuywan kayna nisusqaykita kasukuspa: ‘Churilláy yachayniyoq kaspayá kusiriykachiy sonqoyta. Chayna kaptikiqa contestasaqmi insultaqniyta’ (Pro. 27:11). Manam chayllachu. Diosmi chaskisunki, chaymi astawan kallpanchasqa tarikunki sonqomanta servinaykipaq.

16. ¿Imaynatam Jehová Diospa sonqonta huk sipas kusichirqa?

¹⁶ Carolmanta rimasun, sipasyasqan tiempopim concienciantawan Bibliapa nisqanta haykapipas kasukuq. Chayna kasqanmantam estudiaqmasinkunapas cuentata qokurqaku, wakinkum ichaqa nacionpaq imatapas yuyarispa ruraptinku mana chaqrukusqanmanta burlakuqku. Chayna kaptinpas, wakin kutipiqa atirqam willayta imanasqa chaykuna mana rurasqanmanta. Achka wata pasaruptinmi, estudiaqmasin kayna niq cartata apachimurqa: “Unayñam qanwan tupayta munarqani agradecekunaypaq. Cuentatam  qokurqani allin portakusqaykimanta hinaspa mana manchakuspa creesqaykita defiendesqaykimantapas. Qanmi karqanki punta reqsisqay Testigoqa”, nispa. Admirasqam qeparqa Carolpa portakusqanwan chaymi watakuna pasaptin Biblia estudiayta qallarirqa. Chay cartata qellqaspanqa yaqa 40 watañam bautizasqa karqa. Creesqaykita Carol hina defiendeptikiqa, yaqapaschá allin sonqoyoq runakuna Jehová Diosmanta yachayta munanqaku.

Diosta alabaq mozo-sipaskuna

17, 18. a) ¿Imatam piensanchik congregacionpi achka mozo-sipaskunamanta? b) ¿Ima suyakuymi kachkan Diosta kasukuq mozo-sipaskunapaq?

¹⁷ Enteron Pachapi waranqantin mozo-sipaskuna tukuy sonqonkumanta Jehová Dios serviqta qawaspam ancha kusisqa tarikunchik. ¿Imataq yanapan chayta hinalla ruranankupaq? Diospa Palabranta sapa punchaw leesqanku, Diosta mañakusqanku hinaspa allin portakusqankuwan Jehová Diosta kusichisqankumanta yachasqankum. Paykunaqa tayta-mamankutawan lliw iñiqmasinkunatam kusichinku (Pro. 23:24, 25).

¹⁸ Kay kasukuq mozo-sipaskunam achkallaña runakunawan kuska yaykunqaku Diospa prometesqan mosoq pachaman (Apo. 7:9, 14). Chaypim achka bendicionkunata chaskinqaku, Jehová Diosta sapa punchaw astawan reqsinqaku hinaspa wiña-wiñaypaq alabanqaku (Sal. 148:12, 13).

¿Atiwaqchu contestayta?

• ¿Imakunatam ruranmanku congregacionpi mozo-sipaskunaqa?

• ¿Imanasqataq Bibliata leeyqa hinaspa yuyaymanayqa ancha allin?

• ¿Imaynatam orakuyqa yanapawanchik Jehová Diosman astawan asuykunapaq?

• ¿Imapim tukunman mozo-sipaskunapa allin portakusqanku?

[Kay yachachikuypa tapukuyninkuna]

[5 kaq paginapi dibujo]

¿Sapa punchawchu Bibliata leenki?