¿Saqekunchikchu Jehová Dios tapuwananchikta?

BIBLIAPIQA tarinchikmi sonqokama chayaq achka tapuykunata. Kikin Diosmi servichikun allinta yachachiwananchikpaq. Cain mana allinta rurayta qallaykuptinmi, rurasqanta saqenanpaq achka tapukuykunata servichikurqa (Gen. 4:6, 7). Wakinpim ichaqa huk tapukuyllawan yanaparqa serviqninkuna allinkunata ruranankupaq. Chaymi “¿Pitataq kachasaq? ¿Pitaq willakamunqa ñoqaykumanta?”, niptin, Diosmanta willakuq Isaias nirqa: ‘Kayqaya ñoqa kaypi kachkani [. . .]. Ñoqatayá kachaway’, nispa (Isa. 6:8).

Allin Yachachiq Jesuspas tapukuytaqa servichikurqam. Paymanta willakuq 4 librokunapim rikurin 280 masnin tapukuy servichikusqan. Wakinpiqa chaytam ruraq contranpi kaqkunata upallachinanpaq, yaqa llapanpim ichaqa uyariqninkunapa sonqonman chayananpaq hinaspa Dioswan imayna kasqankupi yuyaymananankupaq (Mat. 22:41-46; Juan 14:9, 10). Apostol Pablopas tapukuykunatam servichikurqa uyariqninkunata piensachinanpaq, paymi griego rimaypi qellqasqa Diospa Palabranpa libronkunamanta 14 librokunata qellqarqa (Rom. 10:13-15). Romapi iñiqkunaman qellqasqanpim achka ejemplota tarinchik. Chaynata ruraspanmi leeqkunata yanaparqa Dios ‘yachayniyoq kaspan tukuy ima reqsiq’ kasqanta astawan chaninchanankupaq (Rom. 11:33).

Wakin tapuykunaqa kachkan rimaspa contestanapaqmi, wakinñataq tukuy sonqomanta piensanallapaq. Jesusmanta willaq 4 librokunapim tarinchik tukuy sonqomanta piensanapaq tapuykunata. Piensasun qatiqninkunaman Jesuspa kayna nisqanpi: “Fariseokunapa hinaspa Rey Herodespa qonchunmantayá cuidakuychik” (Mar. 8:15; Mat. 16:12). Paykunaqa manam entienderqakuchu nisqanta chaymi qaqchanakurqaku tanta qonqaramusqankumanta, Jesusqa nichkarqam paykunapa iskay uya kasqankumantawan llulla yachachisqankumanta cuidakunankuta. Chaymi Jesusqa kayna tapukuykunata rurarqa: “¿Imanasqataq rimachkankichik: ‘Manam tantanchik kanchu’ nispa? ¿Manaraqchu yachankichik ni entiendenkichik? ¿Sonqoykichikpas rumiyasqaraqchu kachkan? ¿Mana rikukuqchum kankichik, mana uyariqchum kankichik? [. . .] ¿Chaynaqa manaraqchum entiendenkichik?”, nispa. Chay tapuykunaqa karqa piensanankupaq hinaspa yuyaymanaspa ima niy munasqanta entiendenankupaqmi (Mar. 8:16-21).

“Ñoqam tapusqayki”

Jobta correginanpaqmi Jehová Diosqa tapuykunata rurarqa, chaywanmi Job cuentata qokurqa tukuy ima Unanchaqpa qayllanpi mana rikuy atina kasqanta (Job, 38-41 capitulokuna). ¿Rimaspa contestanantachu Dios suyachkarqa? Manachusmi. Tapuykunata ruraspaqa munarqachá piensachiyta hinaspa sonqonman chayayta, chaymi tapurqa: “¿Maypitaq karqanki kay pachata qallarichiptiyqa?”, nispa. Wakin tapuyllataraq rurachkaptinmi, Jobqa kaynallata nirqa: “¿Imataraqtaq nillaykimanqa? Upallakurusaqñayá ñoqaqa”, nispa (Job 38:4; 40:4). Entienderurqam, chaymi pantasqanta reqsikurqa. Humilde kaymanta Jehová Dios yachachispanpas, imayna piensasqantam cambiachirqa. ¿Imaynata?

‘Mana huchallikuspa [Diospa] munasqanman hina allinta ruraspanpas’, Jobpa pantaq kasqanmi qawakurqa mana allin rimasqanpi. Chaymi Eliuqa Jobpa contranpi piñakururqa ‘mana huchayoqpaq hapikuspan Diosta culpaptin’ (Job 1:8; 32:2; 33:8-12). Jehová  Diospa tapuykuna rurasqanmi yanaparqa allinta entiendenanpaq. Sinchi wayra ukumantam nirqa: “¿Pitaq qamqa kanki tanteasqaykunata yanqachanaykipaqqa? [. . .] Peleananpaq kaq qari hinayá alistakuy [. . .]. Ñoqam tapusqayki hinaptinmi contestawanki sumaqta”, nispa (Job 38:1-3). Chayna tapuykunata ruraspanmi qawachirqa, admirakuypaq unanchasqankunapi mana tupachiy atina yachaynin hinaspa atiyninpas rikukusqanta. Chaynapim Jobqa astawan confiarqa Jehová Diospa juicionkunapi hinaspa rurasqankunapipas. ¡Mayna admirakunapaqchá chayqa karqa! ¡Kikin Jehová Diospunim tapurqa!

Imaynatam saqekunchik Jehová Dios tapuwananchikta

Ñoqanchikqa, ¿yanapachikuchwanchu Bibliapi tarikuq tapukuykunawan? Yanapachikunanchikmi. Tapukuykunapi piensaspaqa, Dios servisqanchikpi yanapakuykunatam tarisunchik. Tapukuykuna Bibliapi tarikusqanraykum allinta yanapawanchik. Diospa palabranqa ancha “atiyniyoqmi” hinaspa runapa ‘piensasqankunatawan munapayasqankunatapas reqsichinmi’ (Heb. 4:12). Chay tapukuykuna allinta yanapawananchikpaqqa, Diospa tapuwasqanchikta hinam rurakunanchik (Rom. 15:4). Qawasun wakinmanta.

“Tukuy kay pachapa Jueznin kachkaspaqa ¿manachum allin kaqta mana rurawaq?” (Gen. 18:25.) Piensanapaq kayna tapuytam Jehová Diosta Abraham rurarqa Sodomatawan Gomorrata castigananmanta yacharuspan. Mana entiendey atinapaqmi rikchakurqa allin ruraqkunatawan mana allin ruraqkunata Diospa castigananqa. Chaynata nispanqa qawachichkarqam Diospa allin ruraq kasqanpi confiasqanta.

Wakinkuqa Diospa hamuq tiempopi rurananmantam tukuy imata rimanku, ninkum Armagedonta pikuna kawsaqlla pasananta hinaspa pikuna kawsarimunankutapas. Chaykunamanta preocupakunamantaqa yuyarinanchikmi Abrahampa tapukusqanta. Pay hinam confianchik Diosninchik sumaq sonqo, allin ruraq hinaspa llakipayakuq kasqanpi. Chaymi librawanchik preocupakuymanta, iskayrayaymantawan atipanakuymanta, chaykunapiqa kallpatawan tiempotam usuchichwan.

‘¿Mayqannikichiktaq afanakuspa huk kuchusta wiñaruwaqchik [otaq vidaykichikman yaparuwaqchik]?’ (Mat. 6:27.) Chaynatam Jesus rimarqa achka runakunapa qayllanpi, chaypim qatiqninkunapas karqa. Kaywanmi qawachirqa Jehová Diosqa taytanchik hina cuidawasqanchikpi confianata. Sasam  kay mana allin tukupay tiempopi kawsayqa. Kanqam imamantapas preocupakuyqa, ichaqa yanqam chay rurayqa, chaywanqa manam vidanchikta yapasunchu nitaq allinyachisunchu.

Ñoqanchikmanta otaq familianchikmanta preocupakuspaqa Jesuspa nisqantam yuyarina hinaspa Diospa munasqanman hina piensananchik. Chaynapim controlasun preocupakusqanchikta hinaspa mana hukmanyasqachu tarikusun cuerponchikpi, piensayninchikpiwan imayna kasqanchikpipas. Cristoqa niwanchikmi tukuy ima necesitasqanchikta hanaq pacha Taytanchik yachasqanmanta, paymi plantakuna pachachiq hinaspa alton pawaq urpikuna mikuchiq (Mat. 6:26-34).

“¿Pipas marqayninpi ninata aparunmanchu pachanta mana kañachikuspa?” (Pro. 6:27, NM.) Proverbios libropa qallariyninpi 9 capitulokunapim, kachkan huchapakuyman churin mana wichiykunanpaq huk taytapa yachaywan consejokuna qosqan (Pro. 6:29). Haykapipas ñoqanchikpi mana allin munaykuna kaptinqa, puñuqkunata rikchachiq reloj hinam kay tapukuyqa piensayninchikpi qaparinan. Chay textoqa allinmi huk tentacionkuna kaptinpas. Bibliapa nisqanman hinam ‘runaqa imapas tarpusqanta cosechanqa’ (Gal. 6:7).

“¿Pitaq qamqa kanki hukpa sirviententa juzganaykipaqqa?” (Rom. 14:4.) Romapi kaqkunaman qellqaspanmi, punta pachak watapi cristianokunata Pabloqa nirqa imakuna sasachasqanmanta. Wakinkuqa manam respetaqkuchu hukkunapa costumbrenkuta, chaymi iñiqmasinkupa tanteasqankumantawan imayna kawsasqankumanta mana allinta rimaqku. Chaynata tapuspanmi Pabloqa iñiqmasinkunata yuyarichirqa kuyakuywan chaskinakunankupaq hinaspa Jehová Dios juzgananta saqenankupaqpas.

Kunanpas Testigokunaqa mana chaynalla costumbreyoq hinaspa tukuy hinastinmantam kanchik. Jehová Diosmi ichaqa yanapawanchik huñulla kaspa kusikunanchikpaq. ¿Sapakama yanapanchikchu chayna kanapaq? Iñiqmasinchikpa allin conciencianman hina rurasqanta juzgaq kaspanchikqa, allinmi kanman Pablopa chayna nisqanta yuyariyqa.

Diosman asuykachiwaqninchik tapukuykuna

Chay ejemplokunam qawachin Bibliapi kaq tapuykuna ancha allin kasqanta. Haykapi chayna tapukuy rurakusqanmanta yachaptinchikqa, manam sasachu kanqa imayna tarikusqanchikpi kasukuyqa. Bibliata leespam kayna yanapakuq huk tapukuykunatapas tarisunchik (qaway 14 paginapi recuadrota).

Kallpanchakusun tapukuykuna sonqonchikman chayananpaq, chaynapim piensasqanchikwan sonqonchikpi kaqkunaqa Diospa munasqanman hina kanqa. Diospa tapukuyninta uyariruspanmi Job nirqa: “Ñoqaqa uyayllam-uyarirqani qanmanta. Kunanmi ichaqa ñawiywanpuni qawaykullayki qamtaqa”, nispa (Job 42:5). ¿Imaynatam Jehová Diosta qawarqa? Paypaqqa aswan cheqapmi karqa. Pachaknintin watakuna pasaruptinmi Santiagopas nirqa: “Diosman asuykuptikichikqa paypas asuykusunkichikmi”, nispa (Sant. 4:8). Bibliapi tarikuq tapuykunata allinta servichikuspaqa, Dios servisqanchikpim ñawparisun hinaspa aswan allinta “qawasun” otaq reqsisun hanaq pachapi Taytanchikta.

[14 kaq paginapi recuadro]

¿Imaynatam yanapawachwan qatiqnin tapuykuna Jehová Dios hina piensanapaq?

▪ ‘Diosmi nin: ¿Imapaqtaq valen achkallaña animalkuna wañuchipuwasqaykichikqa?’ (Isa. 1:11.)

▪ ‘Ñawi ruraq Diosqa, ¿manachum rikunqa?’ (Sal. 94:9.)

▪ “Kikikichikpuralla alabanakuchkaspaqa [. . .] ¿imaynataq iñiyta atiwaqchik?” (Juan 5:44.)

▪ “¿Allintachum rurachkanki chaynata piñakuspaykiqa?” (Jon. 4:4.)

▪ “Runaqa ¿imatataq horqokunman lliw kay pachapi kaqkunata ganaruspan vidantañataq pierderuspaqa?” (Mat. 16:26.)

▪ “¿Pitaq imatapas niwaspanchik contranchikpi sayarinman?” (Rom. 8:33.)

▪ “Pay qosuchkaptikiqa ¿imanasqataq alabakunki mana chaskiq hina?” (1 Cor. 4:7.)

▪ “¿Manachu yachankichik kay pachapi kaqkunallata kuyaruspaqa Diospa enemigon kasqaykichikta?” (Sant. 4:4.)

[15 kaq paginapi dibujo]

¿Imatam Job yacharurqa Jehová Diospa tapusqanwan?