Jehová Diospa chuya espiritunta ama llakichisunchu

‘Amayá llakichiychikchu chuya espiritutaqa. [. . .] Diosmi sellachkaq hina qosurqankichik.’ (EFE. 4:30.)

1. ¿Ima invitaciontam Jehová Diosqa qowarqanchik millonnintin runakunaman, hinaspa imatam rurananchik?

KAY sasa tiempopim millonnintin runakuna Jehová Diosmanta huk sumaq invitacionta chaskirunchik: chayqa piwi Churintakama payman asuykunanchikpaqmi (Juan 6:44). Chay invitacionta chaskinapaqqa munayninta ruranapaqmi Diosman qokuspa cumplinanchik sapa punchaw. Chaypaqqa chuya espirituman hinam kawsananchik, sutinpim bautizakurqanchik (Mat. 28:19).

2. ¿Ima tapukuykunatam kutichisun?

² ‘Chuya espirituman hina tarpuqkunaqa’ kasukunchikmi mosoq runaña kanapaq kamachikuyta (Gal. 6:8; Efe. 4:17-24). Ichaqa kasukunanchikmi Pablopa wakin consejo qosqantapas, hukninmi kachkan chuya espirituta mana llakichinamanta (Efe. 4:25-32). Kay textopi Pablopa nisqanmanta astawan  yachasun. ¿Ima ninantaq ‘amayá llakichiychikchu chuya espirituta’ nisqanqa? ¿Imata ruraspanmi cristianoqa espirituta llakichinman? ¿Imaynatam mana llakichichwanchu?

¿Imamantam Pablo rimachkarqa?

3. ¿Imaynatam explicawaq Efesios 4:30 nisqanta?

³ Qallarisun Efesios 4:30 ima nisqanmanta yachayta, chaypim nin: ‘Amayá llakichiychikchu chuya espiritutaqa. [. . .] Diosmi sellachkaq hina qosurqankichik librasusqaykichik punchawpaq’, nispa. Pablom kuyasqan iñiqmasinkunata chaynata nirqa Dioswan amistadninkuta mana yanqacharunankuta munaspan. Yuyarichirqam librasqa kananku “punchawpaq” chuya espirituwan sellasqa kasqankuta. Diospa espiritunqa ñawpaqtapas hinaspa kunanpas sello hinam. Hanaq pachaman riy suyaqkunapaqqa ‘garantia hinam’ hamuq tiempopi kaqkunata chaskinankupaq (2 Cor. 1:22). Chay sellom qawachin Diospaq hinaspa hanaq pachapi kawsanankupaq suyakuyniyoq kasqankuta. Paykunaqa kanku 144.000 sellasqa runakunam (Apo. 7:2-4).

4. ¿Imanasqataq chuya espirituta mana llakichinachu?

⁴ Chuya espirituta cristiano llakichiptinqa, tiempo pasaptinmi Diospa kallpanqa manaña imaniraqllatapas yanapanmanchu. Chayna kasqanmantam qawachin Betsabeywan huchallikurusqan qepata Davidpa qellqasqan. Wanakuspanmi Diosta nirqa: ‘Amayá wischurullawaychu qampa qayllaykimantaqa. Amayá qechurullawaychu chuya espirituykitaqa’, nispa (Sal. 51:11). Hanaq pachaman riqkunaqa wañunankukamam ‘qaqa hina sayananku’ mana wañuchiy atina ‘kawsakuyta’ chaskinankupaq (Apo. 2:10; 1 Cor. 15:53). Kay Pachapi kawsakuy suyaqkunapas Cristopa wañukusqanpim iñinanku hinaspa Diosta kasukunanku wiñay kawsayta chaskinankupaq. Chaypaqpas espiritupa yanapaynintam necesitanku (Juan 3:36; Rom. 5:8; 6:23). Chaynaqa llapanchikmi cuidakunanchik Diospa espiritunta mana llakichinapaq.

¿Imata ruraspam llakichichwan chuya espirituta?

5, 6. ¿Imaynatam cristianoqa Diospa espiritunta llakichinman?

⁵ ¿Imaynatam cristianokunaqa chuya espirituta mana llakichisunchu? ‘Chuya espirituman hina kawsaspam’, chaynapim aychapa munasqanwanqa mana atipachikusunchu nitaq mana allintaqa rurasunchu (Gal. 5:16, 25, 26). Ichaqa mana cuentata qokuspapas Bibliapa nisqanta mana kasukuspaqa, chuya espiritutam llakichiyta qallaykuchwan.

⁶ Chuya espirituman hina sapa kuti mana kawsaspaqa llakichichwanmi. Chayqa kanman Jehová Diosta llakichiymi, paymi qowanchik espiritutaqa. ¿Imaynatam kawsananchik mana llakichinapaq? Efesios 4:25-32 versiculokunapim chaymanta contestawasun.

¿Imaynatam espirituta mana llakichisunchu?

7, 8. ¿Imanasqataq haykapipas cheqapta rimananchik?

⁷ Haykapipas cheqapta rimasun. Efesios 4:25 versiculopim Pablo qellqarqa: “Chaynaqa amaña llullakuspayá cheqaptapuni rimaychik runamasikichikwan, lliwchanchikmi kanchik huk cuerpopa partenkuna hinalla”, nispa. ‘Huk cuerpopa partenkuna hina’ huklla kasqanchikraykum, mana imatapas ruranachu engañanapaq otaq iñiqmasinchikkuna mana imam kaqta entiendenankupaqqa, chayqa llullakuymi. Sapa kuti chayna ruraqqa manam Diospa amistadninñachu kanman (leey Proverbios 6:16, 17).

⁸ Rimasqanchikwan hinaspa rurasqanchikwan mana confiana kaspaqa, congregacionpi huñulla kaytam mana atisunchu. Chaymi Danielta qatipakunanchik, payqa confianza runam karqa chaymi imamantapas mana acusarqakuchu (Dan. 6:4). Yuyarisun hanaq pachaman riy suyaqkunaman Pablopa nisqanta: paykunaqa ‘Cristopa cuerponpa’ parten kaspankum wakinkupa parten kanku, chaymi huklla kananku Jesuspa llapan  wawqenkunawan, paykunaqa cheqap rimaqmi kanku (Efe. 4:11, 12). Kay Pachapi wiñay kawsayta munaq cristianokunapas cheqapta rimaspam yanapakunanchik Diospa llaqtan huñulla kananpaq.

9. ¿Imanasqataq Efesios 4:26, 27 nisqanta kasukuyqa ancha allin?

⁹ Diablopa contranpi qaqa hina sayasun hinaspa ama saqesunchu Dioswan amistadninchikta yanqacharunanta (Sant. 4:7). Chuya espirituqa yanapawasunmi Satanaspa contranpi kananchikpaq. Paypa contranpiqa churakuchwanmi piñakuymanta controlakuspa. Pablom qellqarqa: ‘Piñakuspaqa amataqyá huchallikuychikchu, amayá inti seqaykunankamaqa piñakuruychikchu. Amayá [. . .] dejakuychikchu Diablo huchallichisunaykichiktaqa’, nispa (Efe. 4:26, 27). Piñakunapaq razon kaptinpas, chayllam Diosta sonqollapi mañakuna. Chaynapim ‘mana chayllaqa hukmanyasunchu’ nitaq imatapas rurasunchu chuya espirituta llakichinapaqqa (Pro. 17:27). Manam piñasqallaqa kananchikchu, Satanasmi chayna kasqanchikta servichikuspa huchallichiwachwan (Sal. 37:8, 9). Contranpiqa churakuchwantaqmi, iñiqmasinchikkunawan imapas kaptin Jesuspa nisqanman hina allinyanakuspa (Mat. 5:23, 24; 18:15-17).

10, 11. ¿Imanasqataq mana suwakunachu otaq engañanachu?

¹⁰ Ama suwakusunchu nitaq engañowanqa imatapas rurasunchu. Pablom qellqarqa: “Pipas ñawpaqta suwa kaspaqa amañayá suwakuchunchu, aswanqa imatapas allinta ruraspañayá llamkachun chaynapi imallawanpas muchuqkunata yanapaykunanpaq”, nispa (Efe. 4:28). Huk cristiano suwakuspaqa ‘Diospa sutintam penqayman churanman’ (Pro. 30:7-9). Wakcha kaspanpas manam suwakunanchu. Diostawan runamasinkuta kuyaqkunaqa chaytam allinta yachanku (Mar. 12:28-31).

¹¹ Pabloqa ninmi imata mana ruranamanta hinaspa imata ruranamantapas. Espirituman hina kawsaspaqa llamkasunmi familianchikta mantienenapaq hinaspa imallanchikpas kanqam ‘muchuqkunata yanapanapaqpas’ (1 Tim. 5:8). Manam Judas Iscariote hinachu kasun, payqa wakchakunata yanapanapaq Jesuswan apostolkunapa huñusqanku qollqetam suwakurqa (Juan 12:4-6). Jesusta traicionaq runaqa manam espirituman hinachu kawsarqa. Ichaqa, chuya espirituman hina kawsaqkunam Pablo hina ‘tukuy imapi allinta portakunchik’ otaq confianza runa kanchik (Heb. 13:18). Chaynapim Diospa espiritunta mana llakichinchikchu.

¿Imatawanmi rurana espirituta mana llakichinapaq?

12, 13. a) Efesios 4:29 nisqanman hinaqa, ¿imaynatam mana rimananchikchu? b) ¿Imaynatam rimananchik?

¹² Imayna rimasqanchikta  cuidasun. Pablom nirqa: “Rimaspaykichikqa amayá qacha simichu kaychik, aswanqa allin kaqkunallatayá rimaychik chaynapi uyariqnikichikkunapas allinninpaq kaptin aswan-aswan wiñanankupaq”, nispa (Efe. 4:29). Kaqllamantam Pabloqa imata mana rurananchikmanta willawaspanchikpas niwanchik imata ruranapaq. Diospa espiritun yanapawaptinchikmi allinta rimananchik uyariqninchikkunata yanapananpaq. Manam haykapipas ‘qacha simiqa kananchikchu’. Griego idiomapi “qacha” niq rimaytaqa servichikuqkum ismusqa frutamanta, aychamanta otaq challwamanta rimaspanku. Imaynam imapas ismuruptinqa millakunchik, chaynam Diospa qawasqanman hina mana allin rimaytaqa millakunanchik.

¹³ Haykapipas kuyakuywan hinaspa respetowanmi rimananchik. Rimasqanchikqa ‘kachiyoq [. . .] hinam sumaqllaña kanan’ (Col. 3:8-10; 4:6). Uyariwaqninchikkunaqa cuentatam qokunanku hukkuna hina mana rimasqanchikmanta. ‘Allin kaqkunata rimaspam’ yanapayta atisunchik. Salmos qellqaq hinam ninanchik: ‘Dios Taytalláy, qamqa kanki rumi hina amparaykuqniymi [. . .] tukuymanta libraykuqnillaymi. Rimasqaykunawan [. . .] piensasqaykunapas qampa agradoykipaqyá kachun’, nispa (Sal. 19:14).

14. Efesios 4:30, 31 nisqanman hina, ¿imaynam mana kananchikchu?

¹⁴ Ama piñakuqqa, rabiakuqqa, insultakuqqa nitaq ima mana allin ruraqpas kasunchu. Diospa espiritunta cristianokuna mana llakichinankupaq consejota qospanmi, Pablo qellqarqa: ‘Amañayá kaychikchu piñakuqqa, rabiakuqqa, cheqnikuqqa, qaqchanakuqqa, insultanakuqqa nitaq ima mana allin ruraqpas’, nispa (Efe. 4:30, 31). Pantaq kaspanchikmi chayta kasukunapaqqa anchata kallpanchakunanchik. Piensasqanchiktawan rurasqanchikta mana controlaptinchikqa mana allinta munaspam ‘piñakuqllaña, rabiakuqllaña’ hinaspa ‘cheqnikuqllaña’ rikuriruchwan, chaynapim chuya espirituta llakichichwan. Chaynallataqmi kanman hukkunapa faltankunata hinalla yuyaptinchikqa otaq hukkunawan mana pampachanakuyta munaptinchikqa. Bibliapa nisqanta sapa kuti mana kasukuspanchikqa, imatapas ruraspanchikmi chuya espiritupa contranpi huchallikuruchwan, chayqa pasaypaq mana allinpim tukunman.

15. ¿Imatam rurana pipas sientirachiwaptinchik?

¹⁵ Sumaq sonqo, kuyapayakuq hinaspa pampachanakuq kasun. Pablom consejarqa: ‘Sumaq sonqo kaspayá kuyanakuychik, Diospas Cristoraykum pampachasurqankichik, chaynayá qamkunapas pampachanakuychik’, nispa (Efe. 4:32). Pipas llumpayta sientirachiwaptinchikqa, Diospa rurasqanman hinam pampachaykunanchik (Luc. 11:4). Piensariy huk iñiqmasiki contraykipi mana allin rimasqanta. Allichanaykipaqmi paywan rimawaq, payñataq mana allin rimasqanmanta llakisqa tarikuspan pampachaykunaykipaq mañakusunkiman. ¿Pampachayllachu allin kanman? Manam. Levitico 19:18 nin: ‘Amam vengakunkichu nitaq cheqninkichu runamasikitaqa. Kuyay runamasikita kikikita hina.  Ñoqa Tayta Diosmi chaynata nini’, nispa. Chayna nisqantawanmi rurananchik.

Hinalla cuidakusun

16. ¿Ima rurasqanchiktam saqenanchik chuya espirituta mana llakichinapaq?

¹⁶ Diospa cheqnisqantaqa sapanchikpipas ruraruchwanmi. Ichapas amañaruchwan mana allin takita uyarinapaq. Piensasun chayna takita sapa kuti uyariq cristianopi. Conciencianmi acusayta qallaykunman, payqa yachanmi ‘yuyayniyoq confianza sirvientepa’ ruramusqan qellqakunapi Bibliapa consejonkuna mana kasukusqanta (Mat. 24:45). Chaymi mañakunanpaq tantearun hinaspa yuyarin Efesios 4:30 nisqanta. Tantearuntaqmi chayna takikunata manaña uyarinanpaqpas, chaynapi Diospa espiritunta mana llakichinanpaq. Jehová Diosqa bendecinqam chayna rurasqantaqa. Llapallanchikmi cuidakunanchik chuya espirituta mana llakichinapaq.

17. ¿Imataq pasaruwachwan mana cuidakuptinchik hinaspa orakuyta saqeruptinchikqa?

¹⁷ Mana cuidakuspa chaynataq orakuyta saqeruspanchikqa, mana allinkunatawan millakuypaq kaqkunatam ruraruchwan, chaynapim chuya espirituta llakichichwan. Yuyarisun, chuya espirituqa Diospa munaynin rurakunanpaq servichikusqan kallpanmi. Hinaptinqa, chuya espirituta llakichiyqa Jehová Diosta llakichiymi, manamá haykapipas munanchikchu chay ruraytaqa (Efe. 4:30). Punta pachak watapim, Diospa leynin yachachiqkuna mana allinta munaspanku Jesusmanta nirqaku Satanaspa atiyninwan milagrokuna rurasqanta (leey Marcos 3:22-30). Chaywanmi ‘chuya espirituta kamirqaku’, chaynatam mana pampachana huchata rurarqaku. ¡Amayá haykapipas chayqa pasawasunchu!

18. ¿Imaynatam yachachwan mana pampachana huchata mana rurasqanchikmanta?

¹⁸ Mana pampachana huchata mana rurayta munaspanchikqa, yuyananchikmi chuya espirituta mana llakichinamanta Pablopa consejasqanta. Ichaqa, ¿hatun huchata ruraruspanchikqa? ¿Wanakurunchikñachu hinaspa ancianokunapa yanapayninta maskarunchikñachu? Chayna kaptinqa nichwanmi Jehová Dios pampachaykuwasqanchikta hinaspa espiritupa contranpi mana huchallikusqanchikta. Chaymantapas, Diospim hapipakuchwan kallpata qowananchikmanta seguro kaspa, chaynapi espiritun llakichiqta imatapas kaqmanta mana ruranapaq.

19, 20. a) ¿Imakunatam mana rurananchikchu? b) ¿Imata ruranapaqmi kallpanchakunanchik?

¹⁹ Diosqa espiritunwanmi yanapawanchik llaqtanpi kuyanakuspa, kusikuspa hinaspa huñulla kananchikpaq (Sal. 133:1-3). Chaymi chuya espirituta mana llakichinanchikchu cuento qepi kaspa otaq espirituwan nombrasqa cristianokunapa contranpi rimaspa (Hech. 20:28; Jud. 8). Aswanqa huñulla kanapaq hinaspa congregacionpi respetanakunapaqmi yanapakunanchik. Manam allinchu kanman wakinkunallawan hukllawakuyninchikqa. Pablom kaynata qellqarqa: “Wawqe-panikuna, ruegakuykichikmi Señorninchik Jesucristopa sutinpi hukllata piensaspa ama rakinasqa kanaykichikpaq. Qamkunaqa kaychik huk sonqollayá hinaspa huk piensamientoyoqllayá”, nispa (1 Cor. 1:10).

²⁰ Diosqa atinmi hinaspa munanmi espiritunta mana llakichinanchikpaq yanapaytaqa. Ñoqanchikmi ichaqa kallpanchakunanchik espiritunta manapuni llakichinapaq. Chaypaqqa Diosta hinalla mañakusun kallpanta qowananchikpaq hinaspa ‘chuya espirituman hina’ kawsasun, chaynapim kunanpas hinaspa wiña-wiñaypaqpas yanapachikusun.

¿Imatam niwaq?

• ¿Ima ninantaq ‘amayá llakichiychikchu chuya espirituta’ nisqanqa?

• ¿Imaynatam cristianoqa chuya espirituta llakichinman?

• ¿Imatam rurananchik chuya espirituta mana llakichinapaq?

[Kay yachachikuypa tapukuyninkuna]

[30 kaq paginapi dibujo]

Sientichinakuspaqa chaylla allinyanakusun

[31 kaq paginapi dibujo]

¿Mayqen frutakunamanmi rikchakun rimasqayki?