Leeqkunapa tapukuyninkuna

Taytacha-mamachakunata Jehová Dios cheqnichkaspanqa, ¿imanasqataq Aarontaqa mana castigarqachu toroman rikchakuq taytachata ruraruptin?

Exodo 32 capitulopa nisqanman hinaqa taytacha-mamacha yupaychay mana allin kachkaptinmi Aaronqa toroman rikchakuq taytachata rurarurqa (Exo. 20:3-5). Chayraykum ‘Aaronpa contranpi Tayta Dios anchata piñakuspan wañurachiyta munarqa’. Ichaqa wawqen Moisesmi Aaronpaq Diosta mañakurqa (Deu. 9:19, 20). Hinaptinqa, ¿cumplikurqachu, “justo runapa tukuy sonqonwan mañakusqanqa llumpay atiyniyoqmi” nispa Bibliapa nisqan? (Sant. 5:16.) Arí, Moises mañakusqanraykum Jehová Diosqa Aarontaqa mana wañuchirqachu. Ichaqa manamá chayraykullachu pampachaykurqa.

Aaronqa chaykamaqa achka tiempoñam Diosman sonqo karqa. Egipto nacionmanta llaqtanta horqomunanpaq Moisesta kamachispanmi, Aarontapas kamachirqa riysispan wawqenpa rantinpi rimananpaq (Exo. 4:10-16). Iskayninkum Jehová Diospa kamachisqanta kasukuspanku achka kutita faraonman rirqaku, faraonñataqmi rumi sonqo kaspam mana allintachu chaskirqa. Egiptomanta Aaron lloqsispanqa ñam Diosman sonqo kasqantaqa qawachirqaña (Exo. 4:21).

Chaymantapas entiendenanchikmi imanasqa toroman rikchakuq taytachata rurarusqanmanta. Yuyarisun, Moisesmi 40 punchawña Sinai orqopi kachkarqa. Chaymi ‘orqomanta Moises manaña kutimuptin’ runakunaqa Aaronta hikutarurqaku taytachata rurananpaq, hinaptinmi payqa rurarurqa (Exo. 32:1-6). Ichaqa qatiqninpi rurasqanmi qawachirqa taytacha-mamacha yupaychayta sonqonmantapuni cheqnisqanta, chay taytachataqa rurarurqa runakuna hikutaruptillanmi. Chay runakunata chinkachinanpaq Moises niptinmi, llapallan Leviy castakuna hinaspa Aaronpas Jehová Diospa favorninpi churakurqa. Hinaptinmi llapallan hikutaqkuna wañuchisqa karqaku, llapanpim wañurqaku kimsa waranqa israelitakuna (Exo. 32:25-29).

Tiempo pasasqanman hinam israelitakunata Moises nirqa: “Qamkunam hatunta huchallikurunkichik”, nispa (Exo. 32:30). Hinaptinqa manamá Aaronllachu huchayoqqa karqa. Chaymantapas paywan wakin israelitakunam Diospa kuyapayakuyninta tarirqaku.

Chaykuna pasaruptinmi Jehová Diosqa Moisesta kaynata kamachirqa: “Serviwananpaq pachakunawan Aaronta pachachispaykim paymanpas aceiteta tallinki, chaynapim sapaqchapuwanki sacerdotey kananpaq”, nispa (Exo. 40:12, 13). Sutillamá Jehová Diosqa Aaronta pampachaykurqa, taytacha-mamachakunamantaqa Jehová Diostam sonqomantapuni yupaycharqa.