Tanteay atiq kasqanchikta sapa kuti servichikusun

TUKUY imaymana ejerciciota ruraq runakunapa cuerponkuta imayna controlasqankuta qawaspaqa admirakunchikmi. ¡Maynatachá preparakurqaku! Chayna rurasqankutam Bibliaqa tupachin tanteay atiq kasqanchikta imayna yachachinamanta rimaspa.

Pablopas Hebreo casta runakunaman cartaspanmi nirqa: “Mikuyqa yuyayniyoqkunapaqmi, paykunaqa tanteay atiq kasqankuta servichikuspam preparasqata [otaq tukuy imaymana ejerciciota ruraq runakuna hina imatapas musyaqta] tarichinku chaynapi allin kaqtapas hinaspa mana allin kaqtapas yachanankupaq”, nispa (Heb. 5:14, NM). Imaynam ejerciciota ruraqpas ankunkunata preparanan, chaynata Hebreo casta cristianokuna tanteay atiq kasqankuta tarichinankupaqmi Pablo kallpancharqa. ¿Imanasqam chaynata nirqa hinaspa imaynatam chayta ruranmanku?

‘Hukkunatapas yachachinankuñam’ karqa

Sacerdotekunapa jefen “Melquisedecman rikchakuq” Cristo kasqanmanta rimaspanmi, Pablo qellqarqa: “[Jesusmantaqa] achkaraqmi yachachinaypaq kachkan aswanqa qamkunaqa sasa entiendeqmi kankichik. Qamkunaqa unayña iñisqaykichikraykum hukkunamanpas yachachinaykichikña aswanqa qallariyninpi Diospa palabranmanta facil kaqkunalla uyariytam yapamanta munachkankichik. Qamkunaqa wawakuna hinam lechellamantaraq kachkankichik, manaraqmi mikuyta atinkichikchu”, nispa (Heb. 5:10-12).

Punta pachak watapim judio cristianokunaqa cheqapmanta entiendesqankupi wawa hina qeparurqaku, chaymi mana ñawparirqakuchu. Ejemplopaq, Leymantawan señalachikuymanta imaynata chay tiempopi entiendekusqantam mana kasukurqakuchu (Hech. 15:1, 2, 27-29; Gal. 2:11-14; 6:12, 13). Wakinkum mana saqeyta munarqakuchu samana punchawta hinaspa Hucha Pampachana Punchawpi costumbrekunatapas (Col. 2:16, 17; Heb. 9:1-14). Chaymi Pablo kallpancharqa tanteay atiq kasqankuta preparanankupaq, chaynapi allin kaqtapas hinaspa mana allin kaqtapas reqsinankupaq hinaspa ‘yuyayniyoq kanankupaq’ (Heb. 6:1, 2). Achka cristianokunatachá nisqanqa yanaparqa tanteay atiq kasqankuta imayna servichikusqankupi yuyaymananankupaq, chaynapi iñiyninkupi ñawparinankupaq. Hinaptinqa, ¿imatam nichwan ñoqanchikmanta?

Tanteay atiq kasqanchikta preparasun

¿Imaynatam tanteay atiq kasqanchikta preparachwan chaynapi ñawparinapaq? Pablopa nisqanman hinaqa, ‘tanteay atiq kasqanchikta servichikuspam’. Imaynam ejerciciota ruraqkunapas anchata preparakunku cuerponkuta manejananpaq hinaspa altopiwan pampapi sasa ruraykunata ruranankupaq, chaynatam tanteay atiq kasqanchikta preparananchik chaynapi imam allin kaqtapas hinaspa mana allin kaqtapas yachananchikpaq.

Harvard Universidadmanta John Ratey sutiyoq profesormi nin: “Cerebronchikta cuidanapaqqa ancha allinmi llamkachiyqa”, nispa. George Washington Universidadmanta Centro de Envejecimiento, Salud y Humanidades nisqapa, Gene Cohen sutiyoq directorpas ninmi: ‘Cerebronchikta astawan llamkachiptinchikmi aswan allinta yanapawasun’, nispa.

 Tanteay atiq kasqanchikta preparayqa hinaspa Bibliamanta astawan yachayqa allinmi. Chaynapim preparasqa kasun “Diospa munasqanta” ruranapaq (Rom. 12:1, 2).

Munasun astawan yachayta

‘Yuyayniyoq kayta’ munaspaqa tapukusunchik: “¿Kallpanchakuchkanichu Bibliamanta astawan entiendenaypaq? ¿Yuyayniyoq kasqaytachu hukkuna qawawanku?”, nispa. Kaypi piensasun: huk mamam warmachanta kuyaspan lechetawan wawapaq mikuyta qospan atiendenman, ichaqa ¿imaynataq tarikunman watakuna pasaptin yuyayniyoqkunapa mikunanta mana mikuyta munaptinqa? Bibliamanta yachaywanpas chaynam pasanman. Kusikunchikmi runakuna ñoqanchikwan Bibliata estudiaspanku Diosman qokuspa bautizakuptinkuqa. Ichaqa, ¿imataq pasanman Bibliamanta yachasqanpi manaña ñawpariptin? ¿Manachu llakikuchwan? (1 Cor. 3:1-4.) Yachachiqqa munanmi estudiachisqan runa tiempo pasaptin allin yachachiq kananta.

Sasam tanteay atiq kasqanchikta servichikuspa aswan allin kaqkunamanta yuyaymanayqa (Sal. 1:1-3). Chaypaqqa manam harkachikunanchikchu: television qawaywan, imapas gustonchikkuna ruraywan otaq yuyayninchikta mana yanapaq ruraykunawanpas. Tanteay atiq kanapaqqa, Bibliatawan ‘allin yuyayniyoq confianza sirvientepa’ rurasqan qellqakuna estudiaytam munananchik allin gustoyoq mikuyta hina (Mat. 24:45-47). Bibliata sapa punchaw leespapas tiempochakunanchikmi Familiawan Diosta Yupaychana Tutapaq hinaspa Bibliapi sasa entiendena yachachikuykunata estudianapaqpas.

México nacionpi congregacionkuna watukuq Jeronimo sutiyoq cristianom Llaqta Cuidaq revistata chaskiykuspallan estudian. Chaynataq, señoranwan kuska estudianankupaq tiempota rakirunku. Paymi nin: “Sapa punchawmi Bibliata kuska leeniku hinaspa servichikuniku Veamos ‘la buena tierra’ sutiyoq folletota”, nispa. Ronald sutiyoq iñiqmasinchikpas congregacionpi sapa semana Biblia leenanchik textokunatam sapa kuti leen hinaspam huk otaq iskay sasa yachachikuykunata unay tiempo estudian. Paymi nin: “Kayna rurasqaymi yanapawan sapa kuti estudiasqayta ganaswan suyanaypaq”, nispa.

¿Ñoqanchikpas tiempota rakinchikchu Bibliata leenapaq hinaspa yuyaymananapaq? ¿Preparachkanchikchu tanteay atiq kasqanchikta? ¿Bibliapa nisqanman hinachu sapa kuti tanteachkanchik? (Pro. 2:1-7.) Astawan yachaytam munanchik yuyayniyoq cristiano kananchikpaq. Chaynaqa kasun allin kaqtapas hinaspa mana allin kaqtapas yachananchikpaq tanteay atiq kasqanchikta preparaspam.

[23 kaq paginapi dibujo]

‘Tanteay atiq kasqanchikta servichikuspam’ yuyayniyoq kasun