Yuyaqkunata respetasun

CALIFORNIA lawpi lamar qochapa patanpim Sapallan Cipres sutiyoq huk sacha kachkan, chaytam huk sachakunamantaqa astawan fotota horqonku. Ninkum 250 masnin watayoq kasqanta. Kay sumaq hinaspa unay wata kawsaq sachatam allinta cuidanku, wataspanku hinaspa pampantapas rumiwan perqaspanku.

Kay sachaqa yaqapaschá yuyarichiwanchik Diospa llaqtanpi yuyaq iñiqmasinchikkunata, paykunam reqsichikunku Diosta unay tiempo servisqankupi, astawanqa predicasqankupi. Diosmanta willakuq Joelmi nirqaña “yuyaqkunapas” Diospa nisqankunata otaq Bibliamanta tukupay tiempokunapi willanankuta (Joel 2:28-32; Hech. 2:16-21). Chaynam karqa. Piensasun, achka horata “Diospa munaychakusqanmanta” allin noticia willakusqankupi (Mat. 24:14). Wakinkuqa achka watam qatikachaytawan huk sasachakuykunatapas aguantarqaku. Cipres sachataqa unay wata hinalla kawsaptinmi: admirakunku hinaspa mana kuchpakurunanpaq wataspa chaynataq rumikunawan takyachinku. Hinaptinqa, ¡astawanraqchá yuyaq iñiqmasinchikkunataqa aguantasqankumanta alabananchik hinaspa respetasqanchikta qawachinanchik!

Ñawpaq tiempopim Jehová Diosqa llaqtanta kaynata kamachirqa: “Yuyaqkunapa qayllanpi sayarispam paykunataqa respetanki”, nispa (Lev. 19:32). Kunanpas Dios serviqkunawan kuskam tarikunku yuyaq iñiqmasinchikkuna, allin ejemplotam qowanchik Diospa munasqanman hina  chunkantin watakunaña ‘kawsakuspanku’ (Miq. 6:8). Bibliapa nisqanta haykapipas kasukusqankuraykum nichwan ‘sumaq corona hina soqonku’ kasqanta (Pro. 16:31).

Pablom Timoteoman kaynata nirqa: “Amayá qaqchaychu mayorniki señorkunataqa. Paytaqa rimapayay taytaykita hinayá [. . .]. Payayaqkunatapas kuyakuywanyá rimapayay mamaykita hina”, nispa (1 Tim. 5:1, 2). Kaynata ruraspanchá Timoteoqa yuyaqkuna respetasqanta qawachirqa. Jehová Diosqa sutillatam qawachiwanchik yuyaqkunata respetowan rimapayananchikpaq.

Romanos 12:10 nin: “Respetanakuspayá wakinnikichikta imapipas aswan allinpaq hapiychik”, nispa. Chaymi ancianokuna puntataqa qawachinanku yuyaqkuna respetasqankuta. Ichaqa llapallanchikmi chayta rurananchik.

Kay kamachikuytaqa astawanmi kasukunanchik tayta-mamanchik hinaspa abuelonchikkuna kaptin. Chay cipresta allinta cuidanankupaq runakuna preocupakuptinkuqa, ¿manachu ñoqanchikpas preocupakunanchik tayta-mamanchikta hinaspa abuelonchikkunata allinta cuidananchikpaq? Chaytaqa rurasun manam munasqallanchikman hina imatapas ruraspachu aswanqa paykunapa piensasqanta respetaspam (Pro. 23:22; 1 Tim. 5:4).

Jehová Diosqa kuyanmi yuyaq serviqninkunataqa. Manam haykapipas saqenqachu (Sal. 71:18). Kallpatapas qonmi kasukuspa hinalla servinankupaq. Ñoqanchikpas yanapananchikmi hinaspa respetananchikmi.

[7 kaq paginapi dibujokuna]

Sapallan Cipres sachapas necesitanmi cuidanankuta, chaynam yuyaqkunapas necesitanku yanapananchiktawan respetananchikta

[Reqsikunchikmi]

American Spirit Images/age fotostock