Diospa munayninta rurayqa kallpatam qowanchik

‘Yugoyta apaychik, [. . .] chaynata ruraspaqa tarinkichikmi samayta.’ (MAT. 11:29.)

1. ¿Imatam Jehová Diosqa kamachirqa Sinai orqopi, hinaspa imapaqmi?

JEHOVÁ DIOSMI Sinai orqopi Leyninkunata qospan kamachirqa sabado punchawta samanankupaq. Moiseswanmi israelitakunata kaynata kamachirqa: “Soqta punchawmi ruraynikita ruranki, qanchis kaq punchawpiñataqmi samanki chaynapi bueyesnikipas, asnoykipas samananpaq. Chaynapim wasikipi naceq sirvientekipas hinaspa wasikipi samakuq forasteropas kallpata hapinqa”, nispa (Exo. 23:12). Israelitakunata kuyaspan hinaspa entiendeq kaspanmi, Diosqa kamachirqa semanapi huk punchawta samanankupaq chaynapi ‘kallpata hapinankupaq’.

2. ¿Imanasqataq israelitakunapaq ancha allin karqa sabado punchawpi samasqankuqa?

² ¿Samanallankupaqchu karqa sabado punchawqa? Manam. Diosta israelitakuna yupaychanankupaqmi ancha allin karqa. Chay punchawqa taytakunam yachachinanku karqa Jehová Diospa nisqankunata wasinpi kaqkuna kasukunankupaq hinaspa ‘allin kaqkunata ruranankupaqpas’ (Gen. 18:19). Chaymantapas allinmi karqa ayllunkuwan hinaspa amistadninkuwan huñunakuspa Jehová Diospa rurasqankunamanta yuyaymananankupaq hinaspa kuska kusikunankupaqpas (Isa. 58:13, 14). Astawanqa sabado punchawmi qawachirqaña Jesus Waranqa Wata Kamachiptin runakuna cheqap hawkayay tarinankuta (Rom. 8:21). ¿Imatam kunanqa nichwan? ¿Imaynatam cheqap cristianokuna kallpata tarichwan Diospa ‘munasqanman hina allin kaqta’ hinalla ruranapaq?

Iñiqmasinchikwan kuska kaymi kallpanchawanchik

3. ¿Imaynatam punta pachak watapi cristianokuna yanapanakuqku, hinaspa imapim tukurqa?

³ Pablom congregacionmanta nirqa ‘wasipa pilarnin hina’ chaynataq ‘cheqap kaqta takyachiq’ kasqanta (1 Tim. 3:15). Punta cristianokunaqa kikinkupuram yanapanakuqku. Llapankum kuyanakuspa kallpanchanakuqku (Efe. 4:11, 12, 16). Ejemplopaq, Efeso llaqtapi Pablo kachkaptinmi Corinto llaqtayoq iñiqmasinkuna watukurqaku. ¿Imaynatam watukusqanku yanaparqa? Pablom nin: ‘Kusikunim Estefanaspa, Fortunatopa chaynataq Acaico [sutiyoqpa] hamusqanwan [. . .]. Paykunamá kallpanchawarqa’, nispa (1 Cor. 16:17, 18). Chaynallataqmi Titopas sientekurqa Corintopi iñiqmasinkunata serviq rispan, chayna kasqanmantam paykunaman qellqaspan Pablo nirqa: “Llapallaykichikmi paypa sonqonta tiyaykachirqankichik”, nispa (2 Cor. 7:13). Chaynam kunanpas, Jehová Diospa testigonkunaqa kallpanchasqa tarikunchik iñiqmasinchikkunawan kuska kaspanchik.

4. ¿Imaynatam huñunakuykuna kallpanchawanchik?

⁴ Lliwmi yachanchik huñunakuykuna ancha kusichiwasqanchikta. Chaypim ‘iñisqanchikwan kallpanchanakunchik’ (Rom. 1:12). Iñiqmasinchikkunaqa manam reqsinakusqanchikwan wakin kutipi tupasqanchik runakuna hinallachu. Aswanqa cheqap amistadninchikkunam, chaymi kuyanchik hinaspa respetanchik. Huñunakuypi sapa semana tupasqanchikmi kusichiwanchik hinaspa kallpanchawanchik (File. 7).

5. ¿Imaynatam kallpanchanakuchwan asambleakunapi?

 ⁵ Chaymantapas, Diospa llaqtanpi asambleakunaman risqanchikmi kallpanchawanchik. Diosmanta cheqap yachachikuykunata qowaspanchikpas, asambleakunaqa yanapawanchikmi hukkunawan amistad rurananchikpaq (2 Cor. 6:12, 13). Ichaqa, ¿imatam rurachwan hukkunawan rimayta penqakuspaqa? Ofrecekunanchikmi imapipas yanapakunapaq, chaynapim achka iñiqmasinchikkunata reqsisun. Huk law nacionniyoqkunapaqwan asambleapi yanapakuq huk cristianam nin: “Familiaymantawan iskay-kimsa amistadniymantaqa manam pitapas reqsirqanichu. Pichaypi yanapaspaymi ichaqa achka iñiqmasinchikkunata reqsirqani. Kusikunapaqmi karqa”, nispa.

6. Vacacionpi, ¿ima ruraymi yanapawasun Diosta serviypi kallpanchakunanchikpaq?

⁶ Israelitakunam watapi kimsa kutita Jerusalenman riqku Diosta yupaychanankupaq (Exo. 34:23). Achka kutipim chakrankuta hinaspa negocionkuta saqeqku hinaspa polvollaña ñanninta achka punchaw chakiwan riqku. Allinmi chay rurasqankuqa karqa, templopi kaqkunawan kuskam ‘hatun kusikuywan Tayta Diosta alabaqku’ (2 Cro. 30:21). Kunanpas, Diosta serviqkunaqa cuentatam qokunku Betelta watukunankupaq familiantin risqanku llumpay kusikunapaq kasqanta. ¿Manachu tanteawaq Betelta vacacionnikipi watukunaykipaq?

7. a) ¿Imaynatam kusirikunapaq huñunakuykuna yanapawanchik? b) ¿Imaynam chay huñunakuykuna kanan mana qonqanapaq hinaspa allin kananpaq?

⁷ Familiapiwan amistadkunawan kusirikunapaq huñunakuypas kallpanchawanchikmi. Yachayniyoq rey Salomonmi qellqarqa: “Runapaq allinqa kanman mikukuyllam, tomakuyllam chaynataq llamkasqanmanta kusikuyllam”, nispa (Ecl. 2:24). Chayna huñunakuypi iñiqmasinchikkunawan kallpanchanakuspapas, paykunatam astawan reqsinchik hinaspa amistadta ruranchik. Chay huñunakuy  kallpanchaq hinaspa mana qonqanapaq kananpaqqa, allinmi asllata invitayqa hinaspa allin rurakunanpaq qawayqa. Kay consejoqa aswan allinmi vinota otaq chayman rikchakuqta imatapas chaypi serviptinkuqa.

Predicasqanchikmi kallpanchawanchik

8, 9. a) ¿Imapitaq Jesuspa yachachisqanqa mana chaynallachu karqa fariseokunapa chaynataq Diospa leynin yachachiqkunapa nisqankuwanqa? b) ¿Imaynatam yanapawanchik Diospa Gobiernonmanta willakuyqa?

⁸ Jesusqa tukuy sonqonmantam yachachirqa, qatiqninkunatapas kallpancharqam chaynata ruranankupaq. Nirqam: ‘Achkam kachkan cosechanapaq, cosechaqkunam ichaqa aslla. Chaynaqa mañakuychikyá chakrayoqta cosechaqkunata kachananpaq’, nispa (Mat. 9:37, 38). Willasqanmi karqa rupaypi chiri yaku hina, lliw runapaq ‘allin noticia’ kasqanrayku (Mat. 4:23; 24:14). Fariseokunam ichaqa llasaq qepita qepichichkaq hina runakunata kamachiqku (leey Mateo 23:4, 23, 24).

⁹ Diospa Gobiernonmanta willaspaqa manam runakunallatachu Diosmanta yachay munasqankupi yanapanchik, ñoqanchikpas yuyayninchikpiwan sonqonchikpim yachasqanchikkunata astawan takyachinchik. Chayraykum Salmo qellqaq kaynata nirqa: “¡Tayta Diosta yupaychaychik! ¡Mayna allinmi alabaspa Diosninchikman takiyqa! ¡Mayna miskillañam pay alabayqa!”, nispa (Sal. 147:1). ¿Atiwaqchu predicanaykipaq astawan kallpanchakuspa Jehová Dios alabayta?

10. ¿Imanasqataq ninchik Diosta servisqanchik allin kananpaqqa manam runakunapa uyariy munasqankumantachu nispa?

¹⁰ Wakin sitiopim predicasqanchikta uyarinku, wakinpiqa manam (leey Hechos 18:1, 5-8). Mana uyariy munaq runakunapa kasqan lawpi kaspaykiqa, piensay predicasqayki allin kasqanta. Yuyariy, manam yanqachu Diosmanta hinalla willanaykipaq kallpanchakusqaykiqa (1 Cor. 15:58). Chaymantapas, Diosta servisqanchik allin kananpaqqa manam runakunapa uyariy munaq kasqanmantachu kanqa. Segurom kachwan, Diosqa yanapanqam allin sonqoyoq runakuna paypa Gobiernonmanta uyarinankupaq hinaspa payman asuykamunankupaqpas (Juan 6:44).

Familiawan Diosta Yupaychanapaq Tutam kallpanchawanchik

11. ¿Imata ruranankupaqmi Jehová Diosqa tayta-mamakunata kamachin, hinaspa imaynatam chayta ruranmanku?

¹¹ Tayta-mamakuna, qamkunaqa wawa-churikichiktam rimapayanaykichik Jehová Diosmantawan munayninmanta (Deu. 11:18, 19). ¿Tiempota rakirunkichikñachu kuyakuq Diosninchikmanta yachachinaykichikpaq? Paymi yanapasunkichik, familiaykichikman Bibliamanta yachachiywan cumplinaykichikpaq. ¿Imaynata? Qosunkichikmi iñiy kallpanchaq librokunata, revistakunata, videokunatawan grabasqa yanapakuykunatapas.

12, 13. a) ¿Imaynatam yanapan Familiawan Diosta Yupaychanapaq Tuta? b) ¿Imatam tayta-mamakuna rurananku chayna estudiasqanku kallpanchaq kananpaq?

¹² Chaynataq, allin yuyayniyoq confianza sirvientem kamachirqa Familiantin Diosta Yupaychanapaq Tutapi, sapa semana akllasqanku punchawpi Bibliata estudianankupaq. Achka tayta-mamakunam ninku chayna rurasqanku familiapi kuyanakuspa huñulla kanankupaq hinaspa Diosman astawan asuykunankupaq yanapasqanta. ¿Imaynatam rurana allin kallpanchaq kananpaq?

¹³ Familiawan Diosta Yupaychanapaq Tutaqa manam aminapaq hinachu nitaq huñunakuypi rurakusqanman hinachu kanan. Ñoqanchikqa ‘kusisqa Diostam’ servinchik, payqa munanmi kusisqa yupaychananchikta (1 Tim. 1:11, NM; Fili. 4:4). Bibliata estudiananchikpaq huk tuta kapuwasqanchikqa allin bendicionmi. Tayta-mamakunaqa entiendeqmi kananku hinaspa estudiasqanku sumaqllaña kananpaqqa imaynata ruranankupaqmi piensananku. Ejemplopaq, 10 watachayoq Brandon sutiyoq warmachatam nirqaku wasinpi kaymanta rimananpaq:  “¿Imanasqataq Bibliaqa Satanasta culebrawan tupachin?”. Culebrakuna gustasqanraykum, Satanasta culebrawan tupachisqankuta mana allintachu qawarqa, chaymi yachayta munarqa. Wakin familiakunañataqmi Bibliapa huk partenta akllanku hinaspa kamachinku sapakama leenankupaq otaq chay runakuna hina ruranankupaq. Chayna rurasqanku kusikunapaq kaspanpas, wawa-churikunatam yanapan entiendenankupaq hinaspa yachasqankuta sonqonkuman churanankupaqpas. *

Mana allin kaqkunamanta karunchakusun

14, 15. a) ¿Imanasqataq seguro kanamantawan imamantapas preocupakuyqa tukupay tiempopi yapakurun? b) ¿Imakunawanraqmi cristianokunaqa sasachakunchik?

¹⁴ Tukupay tiempopim astawan yapakuchkan seguro kanamantawan imamantapas preocupakuyqa. Millonnintin runakunam qollqemanta llumpayta sasachakunku otaq mana llamkayniyoq kachkanku. Llamkayniyoq kaqkunapaqpas qollqenkum chaylla tukurun yaqa uchkuyoq wayqamanpas hinachkanmanku hina, familiankuta mantienenankupaqpas ñaka-ñakaytam haypachinku (tupachiy Hageo 1:4-6). Politicokunawan allpantinpi kamachiqkunapas manam ima ruraytapas atinkuchu runapura wañuchinakuptinku hinaspa huk sasachakuykunawanpas. Huk runakunañataqmi mana allin rurasqankumanta llakisqallaña tarikunku (Sal. 38:4).

¹⁵ Jesuspa qatiqninkunaqa manam librakunchikchu ñakariykunamanta nitaq Satanaspa munaychakusqanpi sasachakuykunamantapas (1 Juan 5:19). Wakinpiqa, astawanraqmi ñakarinchik Jehová Dios kasukusqanchik pruebasqa kaptin. Jesusqa nirqañam: “Ñoqatam perseguiwarqaku, chaynaqa qamkunatapas perseguisunkichikmi”, nispa (Juan 15:20). Ichaqa, ‘qatikachawaptinchikpas manam sapallanchikchu kanchik’ (2 Cor. 4:9). ¿Imanasqataq chaynata ninchik?

16. ¿Imataq yanapawanchik hinalla kusikunanchikpaq?

¹⁶ Jesusmi nirqa: “Hamuychik ñoqaman llapallan pisipasqakuna hinaspa qepichkaq hina ñakariqkuna, ñoqam samachisqaykichik”, nispa (Mat. 11:28). Cristopa wañusqanpi sonqomanta iñispanchikmi Jehová Diospa makinpi churakunchik, paymi ‘hatun atiyta’ qowanchik (2 Cor. 4:7). Chaynataq chuya espiritum iñiyninchikta kallpanchan. Chaymi ñakariykunata aguantaspapas hinalla kusisqa kanchik (Juan 14:26; Sant. 1:2-4).

17, 18. a) ¿Runakunapa imayna kasqantam cristianokunaqa mana qatipakunachu? b) ¿Imataq pasanman munasqallanchikpi afanakuptinchikqa?

¹⁷ Jehová Diosta serviqkunaqa manam qatipakunanchikchu kusikuyllapi piensaq runakunapa rurasqankutaqa (leey Efesios 2:2-5). Mana cuidakuptinchikqa ‘aychapa munapayayninkuna, ñawipa munarusqankuna hinaspa tukuy imamanta hatunchakuymi’ toqllaruwanchikman (1 Juan 2:16). Otaq Diospa mana munasqanta ruraspa kusisqa kanamanta piensayta qallaykuchwan (Rom. 8:6). Wakinkunaqa aswan allin sientekuyta piensaspankum drogakunku, sinkakunku, millakuypaq kaqkunata qawanku, vidankuta peligropi churaspa pukllanku chaynataq huk mana allin ruraykunatapas ruranku. Satanasqa munachkanmi toqllankunapi ‘urmananchikta’  hinaspa mana allinta ruraspa kusisqa kanamanta creechiytapas (Efe. 6:11).

¹⁸ Manamá huchachu mikuyqa, aslla tomayqa otaq allin kaqwan kusirikuypas. Ichaqa, manam chaykunallapichu afanakunanchik. Ancha allinmi controlakuq kananchikpaq kallpanchakuyqa aswanraq tukupay tiempopi kawsasqanchikrayku. Munasqallanchikta haypanapaq kallpanchakuptinchikqa, iñiyninchikpim chiriyaruchwan hinaspa ‘Jesucristota reqsisqanchikpas’ ‘vidanchikpiqa yanqapaq kanman’ (2 Ped. 1:8).

19, 20. ¿Imatam rurananchik kallpanchasqa kananchikpaq?

¹⁹ Jehová Dios hina piensaqkunaqa, entiendenkum kay pachapi tukuy mana allin munaykuna tukuruqlla kasqanta. Chaytaqa Moisespas yacharqam, ñoqanchikpas yachanchikmi (Heb. 11:25). Kallpanchasqa hinaspa kusisqa tarikuyta munaspaqa, Jehová Diospa munaynintam rurananchik (Mat. 5:6).

²⁰ Diospa nisqankunata ruraspam kallpanchasqa tarikusun. Chaynapim ‘mana allin ruraytawan mana allin munapayaykunata cheqnisun [. . .]. Chaynataqa kawsasun suyakuyninchiktawan atiyniyoq Diospa chaynataq Salvaqninchik Cristo Jesuspa atiywan ruranankuta kusisqa suyaspanchikmi’ (Tito 2:12, 13, NM). Jesuspa kamachiq kasqanta reqsikuspa niwasqanchikta haykapipas kasukusun. Chay ruraymi cheqaptaqa kallpanchawasun hinaspa astawan kusichiwasun.

[Willakuy]

¿Ima niwaqtaq?

• ¿Imaynatam cristianokunaqa kunan tiempopi kallpata tarichwan?

• ¿Imaynatam predicasqanchikqa kallpanchawanchik ñoqanchiktawan uyariwaqninchikkunatapas?

• ¿Imatam ruranmanku tayta-mamakuna Familiawan Diosta Yupaychasqanku Tuta allin kallpanchaq kananpaq?

• ¿Ima ruraykunataq iñiyninchikta chiriyarachinman?

[Kay yachachikuypa tapukuyninkuna]

[26 kaq paginapi dibujokuna]

Jesuspa kamachisqanta kasukuyqa tukuy imapim kallpanchawanchik