Hinallayá kallpanchanakusunchik

‘Hinallayá kallpanchanakuychik hinaspa yanapanakuychik.’ (1 TES. 5:11.)

1. ¿Ima bendicionkunatam Diospa llaqtanpi chaskinchik, ichaqa imakunam hinalla sasachawanchik?

JEHOVÁ DIOSPA llaqtanpi kaspaqa achka bendicionkunatam tarinchik. Puntataqa, Dioswanmi allin amistad kanchik. Chaynataq, Bibliapa nisqanta kasukuspam ñakariykunamanta librakunchik. Chaymantapas, kapuwanchikmi kusisqa kananchikta munaq allin amistadkuna. ¡Mayna allinmi chayna bendecisqa kayqa! Chayna kaptinpas, yaqa lliw cristianokunam tukuy imawan sasachakunku: Bibliapi tarikuq sasa yachaykunata mana entiendesqankuwan, onqoyninkuwan, llumpay llakisqallaña kasqankuwan chaynataq mana allinta tanteaspanku rurasqankuwanpas. Llapanchiktaqmi ñakarinchik Satanaspa munaychakusqan runakunapa sasachawasqanchikwanpas.

2. ¿Imatam rurananchik iñiqmasinchikkuna sasachakuypi tarikuptinku, hinaspa imanasqa?

² Manam pipas munanchikchu iñiqmasinchik imawanpas llakisqa kananta otaq ñakarinantaqa. Pablopa nisqanman hinaqa, congregacionpi kaqkunaqa huk cuerpo hinam kanchik, chaymi ‘cuerpopa parten ñakariptinqa wakinkunapas ñakarin’ (1 Cor. 12: 12, 26). Pipas sasachakuykunapi tarikuptinqa yanapananchikmi. Yachasunchikyá Bibliapi tarikuq achka ejemplomanta, willawanchikmi iñiqmasinku sasachakuyninkunata atipanankupaq wakin cristianokuna imaynata yanapasqankumanta. Chaykunamanta yachaspa tapukusun: “¿Imaynatam ñoqapas iñiqmasiykunata yanapayman? ¿Imaynatam iñiyninkupi kallpanchayman Jehová Diosta hinalla servinankupaq?”, nispa.

“Uyariruspankum wasinkuman pusarqaku”

3, 4. ¿Ima yanapakuytam chaskirqa Apolosqa Aquilamantawan Priscilamanta?

³ Hechos librom willawanchik Apolos sutiyoq cristianomanta, payqa Efeso llaqtaman rispanqa tukuy sonqonmanta yachachiqñam karqa, ‘kusikuyllawanñam Jesusmanta hayka yachasqanta willakuq’. Ichaqa, ‘bautizaq Juanpa yachachisqan bautismollamantam yacharqa’, manam ‘Taytapa, Churipa hinaspa chuya espiritupa sutinpi’ bautismomantaqa. ¿Imanasqa? Uyarirqachá Bautizaq Juanpa qatiqninkunapa yachachisqanta otaq Pentecostes fiesta 33 watapi manaraq rurakuchkaptin Jesuspa qatiqninkunapa yachachisqanta. Tukuy sonqonmanta willaspapas, manaraqmi lliw yachachikuytachu allinta entienderqa. Wakin cristianokunam yanaparqaku. ¿Imaynata? (Hech. 1:4, 5; 18:25; Mat. 28:19.)

⁴ Judiokunapa huñunakunanku wasipi mana manchakuspa Apolospa yachachisqanta uyarispankum, Priscilawan qosan Aquila wasinkuman pusarqaku mana yachasqanmanta willanankupaq (leey Hechos 18:24-26). Chaynatam kuyakuyninkuta qawachirqaku. Segurom kachwan Apolosta sumaqllata hinaspa tukuy sonqonkumanta yanapasqankuta, chaytaqa rurarqaku mana sientichispallankum. Paytaqa faltarqa congregacionpa imayna qallarisqanmanta yachayllam. Agradecekurqachá mana yachasqanmanta willasqankutaqa. Mosoq yachaykunata entienderuspanmi Grecia (Acaya) lawpi iñiqmasinkunata “llumpayta yanaparqa” hinaspa allinta willakurqapas (Hech. 18:27, 28).

5. ¿Imaynatam Diospa Gobiernonmanta willaq millonnintin runakuna hukkunata kuyakuywan yanapanku, hinaspa imapim rurasqanku tukun?

⁵ Kunanpas millonnintin Testigokunam ancha agradecesqa tarikunku Bibliamanta yachachiqninwan, yaqa llapankum paykunaqa allin amistad kanku. Paykunaqa achka killakunapim imakunatapas saqespa estudiota kusisqa qorqaku, chaytaqa rurarqaku runakunapa vidan peligropi tarikusqanta yachaspankum (Juan 17:3). ¡Mayna kusisqachá karqaku Bibliamanta entiendeptinku, yachasqankuta kasukuptinku hinaspa Diospa munayninta ruranankupaq qokuptinkuqa!

‘Timoteomantam allinta rimaqku’

6, 7. a) ¿Imanasqataq Pabloqa Timoteota akllarurqa predicaqmasin kananpaq? b) ¿Imakunapim Timoteoqa ñawparirqa Pablo yanapaptin?

⁶ Llaqtakunaman predicanankupaq iskay kaq viajenpim Pablowan Silasqa watukurqaku Listra llaqtata. Chaypim paykunaqa  Timoteota astawan reqsirqaku. “Iconio llaqtapi hinaspa Listra llaqtapi iñiqkunam Timoteomanta allinta rimaqku” payqa yaqapaschá kachkarqa 20 watanpi. Abuelan Loida hinaspa maman Eunicepas cristianam karqaku, taytanmi ichaqa mana (2 Tim. 1:5). Pabloqa yaqapaschá iskay wata qepataraq punta kaq watukusqanpi kay familiataqa reqsirurqa. Kay kutipim ichaqa Timoteota allinta reqsiyta munarqa, payqa Dios serviypim allinta ñawparichkarqa. Listra lawpi kaq ancianokunam tantearqaku, llaqtakunapi apostol Pablopa predicasqanta Timoteo yanapananpaq (leey Hechos 16:1-3).

⁷ Timoteoqa achkatam yachanan karqa experienciayoq predicaqmasinmanta. Allintamá yacharurqa, chaymi Pablopas confianzawan kamachirqa paypa rantinpi congregacionkunata watukunanpaq. Yaqa 15 watam Pablopa predicaqmasin karqa, chaymi manaña manchakuqchu nitaq penqakuqchu, aswanqa ancha experienciayoq ancianoñam rikurirurqa (Fili. 2:19-22; 1 Tim. 1:3).

8, 9. ¿Ima yanapakuytam qochwan mozo-sipaskunaman? Huk ejemplowan willamuy.

⁸ Kunanpas achkam kachkanku allinkuna ruray atiq mozo-sipaskunaqa. Experienciayoq iñiqmasinkuna yanapaptinkuqa, Dios serviypi imapas ruranankupaqmi tanteanqaku hinaspa congregacionpi achka rurayniyoq kanmanku. Congregacionninchikpi piensasun. ¿Qawanchikchu Timoteo hina serviy munaq mozo-sipaskunata? Mayor iñiqmasin yanapaptin hinaspa kallpanchaptinqa, ichapas kanmanku precursor, Betelpi llamkaq, misionero otaq congregacionkuna watukuq ancianopas. ¿Imaynatam kallpanchachwan chayna serviyta tanteanankupaq hinaspa haypanankupaqpas?

⁹ Martinmi 20 wataña Betelpi llamkachkan, paymi kuyakuywan yuyarin yaqa 30 wata qepataraq congregacionkuna watukuq anciano imayna yanapasqanmanta. Huk punchawmi Martinwan kuska predicaq lloqsiptinku Betelmanta kusikuywan rimapayarqa, payqa mozollaraq kaspanmi chaypi llamkarqa. Kallpancharqam Betelpi servispan Jehová Diospa llaqtanta astawan yanapananpaq. Chayna rimasqankum anchata yanaparqa tiempo pasaptin ima ruray munasqanta tanteananpaq. ¡Manam yachanchikchu Diosta servinankupaq mozo-sipaskunata qampa kallpanchasqayki imapi tukunantaqa!

‘Hukmanyasqakunata kallpanchasun’

10. ¿Imaynam Epafrodito tarikurqa, hinaspa imanasqa?

¹⁰ Diospa munaynin rurasqanmanta Romapi presochasqa Pablo kachkaptinmi Epafrodito watukurqa, paymi iñiqmasinkunapa rantinpi Filipos llaqtamantaraq sasa rina ñanta hinaspa karu-karuta viajarqa. Pablopaqmi  apachirqaku qollqeta, hinaspapas huk tiempom qepakuyta munarqa payta yanapaykunanpaq. Ichaqa Romaman chayaruspanmi onqoruspa “yaqalla wañukurqa”. Mana allin rurasqanta piensaspanmi llumpay llakisqallaña tarikurqa (Fili. 2:25-27).

11. a) ¿Imanasqataq mana admirakunchikchu wakin iñiqmasinchikkuna sinchi llakisqa tarikuptinku? b) ¿Imatam Pablo nirqa Epafroditota imayna yanapanankumanta?

¹¹ Kunanpas imaymana sasachakuykunawanmi achka runakuna onqonku depresion nisqawan, chayqa sinchi llakisqa tarikuymi. Enteron Pachapi runakunapa saludninmanta qawaqkunapa (OMS) nisqanman hinaqa, 5 runakunamantam huk runa chaywanqa haykapipas onqonqaku. Jehová Diosta serviqkunapas chaywanqa onqochwanmi. Yaqapaschá hukmanyachiwanchik familiata mantienenapaq sasachakusqanchik, onqosqanchik hinaspa pantasqanchikkunapas. ¿Imaynatam Filipospi cristianokunaqa Epafroditota yanapanmanku karqa? Pablopa kayna nisqanta kasukuspankum: “Hatun kusikuywanyá chaskiykuychik Señorninchikman graciasta qostin, respetaychikyá pay hina kaqkunataqa. Cristo servisqanpim yaqalla wañukurqa, yanapawanaykichikmantam payña yanapawarqa wañuytapas mana manchakuspa” (Fili. 2:29, 30).

12. ¿Imaynatam sinchi llakisqakunata yanapachwan?

¹² Ñoqanchikpas kallpanchananchikmi hukmanyasqa tarikuq otaq sinchi llakisqa iñiqmasinchikkunata. Imallatapas niykuchwanmi Jehová Dios servisqanpi allinkuna rurasqanmantaqa. Yaqapaschá anchata kallpanchakurqaku bautizakunankupaq vidanku cambiaypi otaq tukuy tiemponkuwan Diosta servinankupaqpas. Nichwanmi rurasqankuta Jehová Dios hinaspa ñoqanchikpas anchata chaninchasqanchikta. Wakin iñiqmasinchikkuna onqospanku otaq yuyaq kaspanku manaña achkata ruraspankupas, merecenkum respetananchikta Diosta unay tiempoña servisqankumanta. Imayna tarikuptinkupas kasukunanchikmi Diospa kayna nisqanta: ‘Hukmanyasqakunatam kallpanchanaykichik, mana kallpayoqkunatam yanapanaykichik hinaspa llapallanwanpas pacienciakunaykichikmi’ (1 Tes. 5:14).

“Pampachaykuspayá kallpanchaykuychik”

13, 14. a) ¿Imatam Corintopi iñiqkuna rurarqaku huk iñiqmasinku huchapakusqanmanta, hinaspa imanasqa? b) ¿Imapim tukurqa huchapakuqta qarqosqanku?

¹³ Punta pachak watapim, Corinto llaqtapi iñiqkuna sasachakurqaku huk iñiqmasinku huchapakusqanmanta mana wanakuptin. Rurasqanmi congregacionpaq peligro karqa hinaspa Diospi mana iñiqkunapas manam allintachu qawarqaku. Chayraykum Pablo nirqa chayna runata congregacionmanta qarqonankupaq (1 Cor. 5:1, 7, 11-13).

¹⁴ Chayna rurasqankuqa allinpim tukurqa. Iñiqkunaqa mana allin ruraymantam amparasqa qeparqaku, payñataq rurasqanmanta cuentata qokuspan sonqomanta wanakusqanta qawachirqa. Chaymi Pabloqa qatiqnin cartanpi Corintopi kaqkunata nirqa kaqllamanta chaskiykunankupaq. Manam chaskinallankuchu karqa, kaynatawanmi nirqa: “Pampachaykuspayá kallpanchaykuychik manaña llumpa-llumpay llakisqa kananpaq”, nispa (leey 2 Corintios 2:5-8).

15. ¿Imaynatam qawananchik congregacionman kutimuqkunata?

¹⁵ Kay willakuypa imayna yanapawananchikmanta qawasun. Pipas qarqosqa kaptinqa llakikunchikmi. Yaqachá Diospa sutinta chaynataq congregacionpi kaqkunatapas penqaypi churarqa. Ichapas rurasqanqa ñoqanchiktapas sasachawarqanchik. ¿Imataq pasanman huchapakuq runa congregacionman kutimunanpaq niptinqa? Encargasqa ancianokunam chaytaqa qawanqaku Bibliapa nisqanman hina. Sonqomanta wanakusqanta hinaspa kaqmanta chaskisqa kananpaq  ancianokunapa tanteasqankum, qawachin Jehová Dios pampachasqanta (Mat. 18:17-20). Dios pampachaptinqa, ¿manachu ñoqanchikpas chayta rurachwan? Mana pampachayta munaspaqa Diospa contranpim churakuchwan. Cristianokunaqa munanchikmi congregacionpi hawkalla, huñulla hinaspa Diospa chaskisqan kayta. Huchallikuq wanakuspa congregacionman kutimuptinqa, ancha allinmi kanman ‘kuyakuyninchikta qawachiyqa’ (Mat. 6:14, 15; Luc. 15:7).

“Yanapawananpaqmi paytaqa munachkani”

16. ¿Imanasqataq Pabloqa llumpay hukmanyasqa karqa Marcospaq?

¹⁶ Sientichiwaqninchikwan mana piñasqalla kanapaqmi huk ejemplo kachkan. Chayqa Pablota Juan Marcos sutiyoq mozo hukmanyachisqanmantam. Predicanankupaq Pablowan Bernabey punta kaq viajasqankupim, Marcosqa paykunawan rirqa yanapananpaq. Ichaqa qonqaymantam paykunata saqeruspan wasinman kutikurqa, manam yachanchikchu imanasqa chayna rurasqanmanta. Kutikusqanwanmi Pabloqa piñakururqa. Chaymi iskay kaq viajenta tanteachkaspan Bernabeywan piñanakururqaku, Pabloqa manam munarqachu Marcosta kaqmanta pusayta. Manam qonqarqachu punta kaq viajasqankupi rurasqanta (leey Hechos 13:1-5, 13 hinaspa 15:37, 38).

17, 18. ¿Imaynatam yachanchik Pablowan Marcos sasachakuyninku allichasqankumanta, hinaspa imatam yachachiwanchik?

¹⁷ Marcosqa manam llumpay llakisqachu karqa Pablopa mana pusay munasqanwanqa, payqa hinallam huk llaqtaman rirqa Bernabeywan predicananpaq (Hech. 15:39). Diosmanta allin willaq hinaspa confianza runam karqa, chaymi watakuna pasaptin Marcosta Pablo alabarqa. Romapi preso kachkaspanmi Timoteoman qellqasqanpi nirqa: “Marcoswanyá hamuychik, yanapawananpaqmi paytaqa munachkani” nispa (2 Tim. 4:11). Qawasqanchikman hinaqa, Pablom Marcospa ñawparisqanta anchata chanincharqa.

¹⁸ ¿Imatam yachachiwanchik? Pablopa mana pusasqanwan Marcos urmananmantaqa, kallpanchakurqam allin cristiano kaypi chaymi yanaparqa allin misionero kananpaq. Dioswan amistadninku iskayninkupa allin kasqanraykum, mana tukuy tiempochu piñanasqa karqaku. Aswanqa, tiempo pasaptinmi Marcosmanta Pablo nirqa allin yanapakuq kasqanta. Kunanpas, ¿imatam rurananchik ima sasachakuytapas iñiqmasinchikwan allicharuspaqa? Imapipas pantanakusqanchiktam qonqananchik hinaspa hukkunata hinalla yanapananchik iñiyninkupi ñawparinankupaq. Arí, allin piensaq kaspaqa congregaciontam yanapasunchik.

Congregacion hinaspa ñoqanchik

19. ¿Imaynatam llapallanchik yanapanakunanchik?

¹⁹ Kay “sasallaña” tiempopim astawan necesitanchik iñiqmasinchikpa yanapayninta, paykunañataq ñoqanchikmanta (2 Tim. 3:1). Ichapas iñiqmasinchikqa manapas yachanchu sasachakuynin imayna allichayta, Jehová Diosmi ichaqa yachan. Yanapanmanmi congregacionpi kaqkunawan, qanwanpas yanapanmanmi (Isa. 30:20, 21; 32:1, 2). Chaymi llapallanchik kallpanchakunanchik Pablopa qellqasqanta kasukunanchikpaq, nirqam: “Chaynaqa kunan rurasqaykichikpi hinayá kallpanchanakuychik hinaspa yanapanakuychik”, nispa (1 Tes. 5:11).

¿Imatam niwaq?

• ¿Imanasqataq iñiqmasinchikkunawan llapallanchik kallpanchanakunanchik?

• ¿Ima sasachakuykunapim iñiqmasinchikkunata yanapayta atichwan?

• ¿Imanasqam iñiqmasinchikkunapa yanapakuyninta necesitanchik?

[Kay yachachikuypa tapukuyninkuna]

[11 kaq paginapi dibujo]

Imawanpas sasachakuq iñiqmasinchikkunata yanapasun

[12 kaq paginapi dibujo]

Achka mozo-sipas cristianokunam allinkuna ruray atiq kanku