Imatam rurawaq qosayki otaq señorayki traicionasuptiki

MARGARITAM qosan Raulwan achka wataña tukuy tiemponkuwan Diosta servichkarqaku. * Raulmi ichaqa piwi churinpa nacesqan qepallata, Jehová Diosmanta karunchakuyta hinaspa huchapakuyta qallaykurqa, chaymi congregacionmanta qarqosqa karqa. Margaritam kaynata willakun: “Kaykuna pasaruptinmi piensarqani wañuytaña. Llumpay hukmanyasqa kaspaymi mana yacharqanichu ima ruraytapas”, nispa.

Yenytapas qosanmi traicionarurqa. Qawasun imaynata. Casarakusqanku qepallatam maqayta qallaykurqa. Paymi nin: “Puntata takaruwaptinmi cuerpoy chirirurqaraq, humillasqa hinaspa penqaypim karqani. Pampachanaypaq niwaptinmi pampacharqani. Chaynatam rurarqani chay kutipi hinaspa huk kutikunapipas, piensarqanim cristiana kasqayrayku pampachanayta hinaspa qonqanayta chaynataq hukkunaman otaq ancianokunaman willaspayqa pay qepanchasqayta. Chaynam karqa achka watakuna, maqawarqa ñoqañataq pampacharqani. Chaymantapas piensarqanim kuyawananpaq imatapas ruranayta. Ichaqa ñoqatawan wawayta saqeruwaptinkum, nikurqani mana servisqayta hinaspa imatawanpas ruraymanchiki karqa  otaq rimaymanchiki karqa casado viday chayna mana tukurunanpaq”, nispa.

Margarita hinaspa Yeny hinapaschá llumpay preocupasqa kachkanki qosayki saqesusqaykirayku imayna tarikusqaykimanta, Dios servinaykimanta hinaspa qollqemantapas. Otaq qari kaspaykipas llumpay llakisqachá hinaspa mana allinchá tarikunki señorayki hukwan pierdekusqanrayku. Bibliapa huknin willakuyninmi niwanchik “sasallaña” tiempopi kasqanchikta. Hina chayllapim niwanchik kay ‘tukupay tiempokunapi’ familiakuna sasachakuypi tarikunankumanta, kuyakuy manaña kananmanta hinaspa Diosta mana servisqankuta achka runakuna imayna kawsasqankuwan qawachinankumanta (2 Tim. 3:1-5). Cheqap cristianokunapas manam librechu kanchik chayna sasachakuykunamantaqa. Chayrayku, ¿imatam rurachwan qosanchik otaq señoranchik hukwan pierdekusqanrayku llakisqa kasqanchikta atipanapaq?

Jehová Diospa piensasqanman hina piensay

Qallariypiqa sasapaschá kanqa ancha kuyasqayki runapa chayna rurasusqaykimanta creeyqa. Yaqapaschá qosaykipa otaq señoraykipa mana allin rurasqanmanta tumpakunki.

Ichaqa ama qonqaychu, kikin Jesustam mana pantaq kachkaptinpas confiasqan amistadnin traicionarurqa. Payqa cuidadowan hinaspa unayta orakuspanmi 12 apostolninkunata akllarqa, paykunaqa paywan kuska kaqkuna hinaspa Diosta kasukuqmi karqaku. Chaymi llumpay llakisqa tarikurqa Judas ‘traicionaruptin’ (Luc. 6:12-16). Jehová Diosqa manam Churinmanchu tumparqa Judaspa rurasqanmantaqa.

Manamá mana pantaq qosaqa otaq señoraqa kanchu. Iskayninkum imapipas pantanku. Diospa yanapayninwanmi Salmo qellqaq kaynata nirqa: “Señor Diosnilláy, mana allin rurasqaykuta yuyaptikiqa llapallaykuchiki castigasqa kallaymanku karqa”, nispa (Sal. 130:3). Chaymi Jehová Diosta iskayninku qatipakuspanku pantasqankuta pampachanakunanku (1 Ped. 4:8).

‘Sapakamam Diosninchikmanqa cuentata qosunchik’ (Rom. 14:12). Mayqanninkupas sapa kuti maqaq otaq nanay simiwan rimaq kaspanqa, Jehová Diosmanmi cuentata qonqa. Payqa cheqninmi runamasin maqaqta hinaspa insultaqta, manam imanasqapas qawachinanchu qosanta otaq señoranta mana respetasqanta hinaspa mana kuyasqantaqa (Sal. 11:5; Efe. 5:33; Col. 3:6-8). Diosta serviq kachkaspan qaripas otaq warmipas sapa kuti mana controlakuspa piñakuq kasqanta mana cambiaspanqa, congregacionmantam qarqochikunqa (Gal. 5:19-21; 2 Juan 9, 10). Qosanpa otaq señoranpa chayna kasqanmanta ancianokunaman willakuqqa manam piensananchu willasqanwan huchayoq kasqantaqa. Jehová Diosqa llakipayanmi pipas chayna ñakariptinqa.

Mayqanninkupas hukwan pierdekuspanqa, manam runamasinpa contrallanpichu huchallikun aswanqa Jehová Diospa contranpim (Mat. 19:4-9; Heb. 13:4). Bibliapa nisqanman hina kawsananpaq kallpanchakuqqa, manam huchayoqchu sientekunan qosanpa otaq señoranpa pierdekusqanmantaqa.

Diosqa yachanmi imayna sientekusqaykita. Palabranpim willakun Israel nacionpaq qosan hina kasqanta hinaspa achka kutita nin huk dioskunata llaqtan yupaychaptin ancha llakisqa tarikusqanmanta (Isa. 54:5, 6; Jer. 3:1, 6-10). Segurom kanayki, Jehová Diosqa allintam yachan traicionasusqaykimanta tuta-punchaw waqasqaykitaqa (Mal. 2:13, 14, NM). Yachantaqmi consuelana hinaspa kallpanchana kanaykitapas.

¿Imaynatam Jehová Diosqa consuelan?

Jehová Diosqa llaqtanwanpas consuelawanchikmi. Yenym chayna kasqanmanta nin: “Pasaypaq llakisqa kachkaptiymi congregacionta watukuq anciano wasiyman hamurqa. Payqa yacharqam divorciakunaypaq qosay niwasqanrayku sinchi llakisqa tarikusqayta.  Chaymi tiempochakuspan yuyaymanachiwarqa Bibliapa nisqanwan, hukninmi 1 Corintios 7:15. Bibliata leepuwasqanwan kuyakuywan rimapayawasqanmi mana huchayoq kasqaypi piensanaypaq yanapawarqa hinaspa hawkayachiwarqa”. *

Margaritam yuyarin Jehová Dios congregacionwan imayna yanapasqanmanta, ninmi: “Qosaypa mana wanakusqanmanta yacharuspaymi wawaykunawan ripukurqani huklaw llaqtaman. Chaypim iskay cuartokunata arriendarurqani. Paqarinnintintam, sonqoypi llakikuspa allichachkarqani imaykuna apasqayta. Qonqaymantam punkuta takaykamurqaku. Piensarqanim wasiyoq kasqanta, payqa waqtallaypim yacharqa. Ichaqa manam paychu kasqa. ¡Aswanqa mamayta hinaspa lliw familiayta Bibliamanta yachachiq cristianam kasqa! Payqa manam piensarqachu chaypi tariwaytaqa, wasiyoq señorata Bibliamanta yachachinanpaqmi hamusqa. Rikuykuspaymi kusikuymanta waqayta qallarirqani. Willarqanim ima pasawasqankuta, hinaptinmi iskayniyku waqarqaniku. Chay punchawpuni huñunakuyman rinaykupaqmi yanapawarqaku. Congregacionpim allinta chaskiykuwarqaku, ancianokunapas Diosta servinaykupaq yanapawanankupaqmi tantearurqaku”.

¿Imaynatam hukkunapas yanapachwan?

Llapallanchikmi congregacionpi kaqkunaqa iñiqmasinchikkunata imaynatapas yanapachwan. Ejemplopaq, Margarita llamkanan kaptinmi, wawankuna escuelamanta kutimuptinku mana pipas cuidaqnin kaptin huk familia ofrecekurqa cuidanankupaq.

Margaritam nin: “Astawanqa agradecekuni ñoqatawan wawaykunata predicanaykupaq pusawasqankumantam”, nispa. Chaynata ruraqkunaqa, ‘ima sasachakuykunapipas yanapanakuspankum’ ‘Jesucristopa kamachikuyninwan cumplichkanku’ (Gal. 6:2).

Hukpa huchallikusqanwan ñakariqkunaqa agradecekunkum chayna yanapasqa kasqankumanta. Monica sutiyoq cristianam, qosan saqeruptin uywanan karqa 4 wawanta hinaspa paganan karqa debekusqanku 15.000 dolarta, paymi willakun: “Iñiqmasiykunaqa kuyakuqllañam karqaku. Mana paykuna kaptinqa imatach rurayman karqa. Diospa qowasqan iñiqmasiykunaqa admirakuypaqmi karqa, wawaykunapaqmi achkata tiempochakurqaku hinaspa yanaparqaku. Paykunapa yanapasqanwanmi rikurqani Diosta servisqankupi wawaykuna iñiyninkupi puntarisqanta. Consejaykuwananpaq ancianokunata  mañakuptiyqa yanapawarqakum. Llakiyta willakunay kaptinpas uyariwarqakum” (Mar. 10:29, 30).

Amistadkunaqa yachankum chayna sasachakuymanta rimay wakinpiqa mana allin kasqanta (Ecl. 3:7). Margaritam nin: “Yaqa llapanpim mosoq congregacionpi cristianakunawan rimarqani predicacionmanta, estudio qoymanta, warmakunamanta..., ichaqa manam sasachawaqniy kaqmantaqa. Anchatam agradecekuni entiendewasqankumanta, chaynapi mana imapas pasanmanchu hina tarikunaypaq.”

Ama vengakuychu

Wakinpiqa qaripas otaq warmipas yachanmi traicionasqa kasqanmanta mana huchayoq kasqanta. Ichaqa manam allinchu tarikunku hukpa huchanrayku anchata ñakarisqanmanta. Chaywan piñasqallaña kaspanqa, qonqarunmanpaschá Jehová Dios kasukuy ancha allin kasqanmanta. Ejemplopaq, ichapas vengakuyta munanman.

Vengakuy munay sonqonpi huntaptinqa, allinmi kanman Josueypa chaynataq Calebpa ejemplonpi yuyaymanayqa. Vidanku peligropi kaptinpas paykunaqa Diospa Prometesqan Allpata wateqaqmi rirqaku. Wakin wateqaqkunam ichaqa pisi iñiyniyoq karqaku, chaymi llaqtapi runakunapas Jehová Diosta mana kasukurqakuchu. Wakin israelitakunaqa Josueytawan Calebtam rumiwan choqaparuyta munarqaku, Diosta hinalla kasukunankupaq kallpanchaptinku (Num. 13:25–14:10). Iskayninku mana huchayoq kachkaspankupas, wakin israelitakunapa mana allin rurasqankumantam chunniqpi 40 wata karqaku.

Josueytawan Calebta israelitakunapa rurasqanku mana gustaptinpas, manam piñasqallachu karqaku llaqtamasinkupa huchallikusqankuwanqa. Aswanqa Dios servisqanku allin kananpaqmi kallpanchakurqaku. Chunniqpi 40 wata kasqanku tukuytam wiñaymasinkumantaqa, levitakunawan kuska Prometesqa Allpanman paykunalla yaykurqaku (Num. 14:28-30; Jos. 14:6-12).

Qampas ñakarichkankichá qosaykipa otaq señoraykipa traicionasusqaykiwan. Ichapas divorciakurunki hinaptin sasachakuy kanman hukmanyasqa kasqaykiwan chaynataq qollqemantapas. Mana allin piensaykuna yana puyu hina taparusunaykimantaqa, kayta yuyariy: Jehová Diosmi yachan nisqanta mana kasukuqkunata ima ruraytaqa, mana kasukuq israelitakunawan chunniqpi rurasqanman hina (Heb. 10:30, 31; 13:4).

¡Atiwaqmi allin tarikuytaqa!

Amayá ñitirachikuychu mana allin piensaywanqa. Aswanqa yuyaynikita huntachiy Jehová Diospa nisqankunawan. Yenyqa ninmi: “La Atalaya hinaspa ¡Despertad! revistakuna grabasqata uyariymi yanapawarqa allin tarikunaypaq. Huñunakuykunapas kallpatam qowarqa. Atisqayman hinam huñunakuykunapi rimarqani, chaymi yanapawarqa llakiykunata qonqanaypaq. Chaynam tarikurqani predicaq rispaypas. Runakunata Jehová Diospi iñinanpaq yachachiptiymi, iñiyniypas kallpanchasqa karqa. Biblia estudiaqkuna yanapaypi ocupasqa kaspaymi, allin kaqkunallapi piensarqani.”

Monicapas kaynatam nin: “Mana faltakuspa huñunakuyman risqay hinaspa atisqayman hina predicasqaymi yanapawarqa mana hukmanyarunaypaq. Kunanqa aswan huñullam tarikuniku wawaykunawan hinaspa iñiqmasiykunawanpas. Sasachakuyta pasasqaymi yanapawarqa imapi mana allin kasqaymanta yachanaypaq. Chayqa hatun pruebam karqa, ichaqa Jehová Diospa yanapayninwanmi atiparqani”.

Qampas chayna tarikuspaykiqa atinkim atipaytaqa. Traicionasusqaykimanta llumpayta ñakarispaykipas Pablopa kayna nisqanta kasukuy: “Amayá amirusunchu imapas allin ruraytaqa, mana amiruspaqa tiempo chayaramuptinmi cosechata hina premiota chaskisunchik” (Gal. 6:9).

[Willakuykuna]

[31 kaq paginapi dibujo]

Qosanpa otaq señoranpa traicionasqan kaqkunaqa agradecekunkum predicacionpi yanapasqamanta