Jehová Diospa llaqtanmi amparawanchik

‘Qamllatamá gracias nisqayki hatun huñunakuypipas.’ (SAL. 35:18.)

1-3. a) ¿Imaynatam cristianoqa congregacionmanta karunchakurunman? b) ¿Imam amparawanchik Jehová Dios serviqkunataqa?

VACACIONNINPIM Joe sutiyoq runa señoranpiwan rirqaku lamar qochaman hinaspam yaykurqaku tukuy sayayniyoq hinaspa colorniyoq achka challwakunapa kasqanman. Mascarankuta hinaspa mana samaynin chinkarunanpaq yanapaqninta churakuspankum, lamar qochapa ukunpi suma-sumaq alhaja hina animalchakunapa kasqan sitiokama nadearqaku. Llumpay uku-ukumanña yaykuruptinkum señoranqa mancharisqallaña nirqa: “Llumpaytachusmi karunchakurunchik”, nispa. Payñataqmi nirqa: “Hawkalla kay, allinmi kachkanchik”, nispa. Chaymantam cuentata qokururqa challwakuna manaña chaypi kasqanta. Hinaptinmi mancharikurqa aswan ukumantaraq huk tiburon payman asuykamusqanta rikuruspan. Yacharqam mana ayqey atinanta. Chay manchakuypaq challwaqa asuykamurqam, ichaqa qonqayllatam muyurispan kutirirqa hinaspa chinkakuykurqa.

² Sichum Satanaspa munaychakusqanpi huk cristiano aysachikunman kusirikuywan, allin pagasqa llamkaywan hinaspa tukuy imayoq kananpaq munaywan hinaspaqa mana musyayllatam lamar qochapa uku-ukunpi hina hatun peligropi tarikunman. Joe sutiyoq cristianoqa congregacionpi ancianom, paymi nin: “Lamar qochapi pasawasqanmi kayta yachachiwan: seguro kanapaqqa Diospa llaqtanmantam mana karunchakunachu, manataqmi mana allin amistadkunataqa maskanachu”, nispa. Hinaptinqa, manam kay pachapi allinman rikchakuq kaqkunawanqa congregacionmanta karunchakunachu, chayna kaptinqa peligropim tarikuchwan. Chayna tarikuspaqa chayllam kutimunanchik congregacionpi seguro kanapaq, mana chayqa enemigonchikmi millpuruwanchikman.

³ Kay pachapi kaqkunaqa manam allinchu cristianokunapaqqa (2 Tim. 3:1-5). Satanasqa yachanmi pisi tiempoyoqllaña kasqanta, chaymi kallpanchakuchkan pitapas mana cuidakuqta millpurunanpaq (1 Ped. 5:8; Apo. 12:12, 17). Ichaqa manam sapallanchikchu kachkanchik, Jehová Diosqa congregacionnintam qowanchik amparasqa kananchikpaq.

4, 5. ¿Imaynatam hamuq tiempota achka runakuna qawanku, hinaspa imanasqa?

⁴ Seguro kanapaq runakunapa rurasqankuqa manam lliwpichu amparawanchik. Achkam mana librechu kanku wañuchisqa kaymanta, imakunapa precion wicharisqanmanta chaynataq tiempopa imayna cambiasqanmantapas. Chaymantapas llapanchikmi sasachakunchik yuyaqyaywan otaq onqoykunawan. Llamkayniyoq, wasiyoq, qollqeyoq hinaspa saludninpi allin kaqkunapas manam segurochu kanku chayna kanankumantaqa.

⁵ Achka runakunam mana tarinkuchu hawkayaytawan kusikuytapas. Ejemplopaq, achkam runakunam piensarqaku casarakuspanku otaq familiayoq kaspanku hawkayaytawan kusikuyta tarinankumanta, ichaqa manam chaynachu kanku. ¿Imatam nichwan Dios serviymanta? Achkam religioso kaspankupas iskayrayasqa tarikunku. Hukkunañataqmi hukmanyasqa kanku pastorninkupa  yachachisqanwan, astawanqa huchapakuq kasqankuta qawaspanku chaynataq Bibliapa nisqanpa contranpi yachachiptinku. Chaymi confianku yachaysapa runakunapa nisqankupi, runakunapa imapas allin kasqanmanta piensasqankupi hinaspa tanteasqallankupi. Chayraykum achka runakuna iskayrayasqa tarikunku otaq mana munankuchu hamuq tiempopi piensaytaqa.

6, 7. a) ¿Imanasqataq Jehová Dios serviqkunaqa mana hukkuna hinachu vidanchikmanta piensanchik? b) ¿Imamantam qatiqninpi yachasun?

⁶ Cheqap cristianokunaqa manam hukkuna hinachu vidanchikmantaqa piensanchik. Wakinkupa hina sasachakuyninchikkuna kaptinpas, manam paykuna hina ruraspachu allichanchik (leey Isaias 65:13, 14 hinaspa Malaquias 3:18). ¿Imanasqa? Bibliam willawanchik imanasqa runakuna chayna tarikusqanchikmanta hinaspa chayna sasachakuypi tarikuspa imata rurananchikmantapas. Chaymi mana preocupakunchikchu hamuq tiempomantaqa. Diosta serviq kasqanchikraykum waqaychasqa kanchik Bibliapa contranpi pantay yachachikuykunamanta, millakuypaq ruraykunamanta hinaspa chaykunata ruraspa ñakariykunamantapas. Chaymi runakunapa mana entiendey atinan hawkayayta tarinchik (Isa. 48:17, 18; Fili. 4:6, 7).

⁷ Bibliapim ejemplokunata tarinchik Jehová Diosta servisqanchikrayku waqaychasqa kasqanchikta chaninchanapaq. Chaykunamanta yachaymi yanapawasun imayna kasqanchiktawan portakusqanchikta qawakunapaq. Chaynapim astawan kasukusun waqaychasqa kanapaq Jehová Diospa niwasqanchikkunata (Isa. 30:21).

“Wikapakuq hinaraqmi yaqalla wichiykullarqani”

8. ¿Imatam Jehová Diospa serviqninkuna ñawpaqmantaraq rurarqaku?

⁸ Ñawpaq tiempomantaraqmi Diosta serviqkunaqa mana kuskanchakurqakuchu payta mana kasukuqkunawanqa. Jehová Diosqa nirqañam Satanaspa qatiqninkuna cheqniwananchikta (Gen. 3:15). Diospa nisqankunata respetasqankuraykum serviqninkunaqa  mana qatipakunkuchu runakunapa mana allin rurasqankutaqa (Juan 17:15, 16; 1 Juan 2:15-17). Chay rurayqa sasam. Chaymi wakinkuqa tapukunku: “¿Allinchu imatapas saqespa Diosta kasukuyqa?”, nispa.

9. ¿Imamantam tapukurqa Salmo 73 capitulota qellqaq?

⁹ Salmo 73 capitulota qellqaq, Diosta serviq Asaf sutiyoq runapa mirayninchusmi tapukurqa Diosta servinanpaq tanteasqanmanta. Manam entienderqachu imanasqa mana allin ruraq runakuna kusisqa allin kawsasqankumanta hinaspa imanasqa allin ruraqkuna ñakarisqankumantapas (leey Salmo 73:1-13).

10. ¿Imanasqam ancha allin kanman Salmo 73 qellqaqpa tapukusqanmanta yachayqa?

¹⁰ ¿Haykapipas tarikurqankichu Salmo 73 qellqaq hina? Chayna kaptinqa, manam hukmanyanaykichu nitaq piensanaykichu iñiynikipi mana allin tarikusqaykitaqa. Diosta serviqkunapas achkam chayna sientekurqaku, wakinkuqa Biblia qellqaqmi karqaku (Job 21:7-13; Sal. 37:1; Jer. 12:1; Hab. 1:1-4, 13). Dios agradayta munaqkunaqa kaynatam tapukunanku: ¿allinchu Diosta kasukuyqa?, nispa. Kay tapukuyqa tupanmi Diospa Llapallan Kamachiq kasqanta Eden huertapi Satanas iskayrayachisqanwan (Gen. 3:4, 5). Chaymi allin kanman Salmo 73 qellqaqpa tapukusqanmanta yachayqa. ¿Envidiakunanchikchu mana allin ruraq runakunapa allin kawsakusqankumanta nisqankuta? ¿Karunchakunanchikchu Jehová Diospa ñanninmanta paykuna hina ruranapaq? Chaytam Satanasqa munan.

11, 12. a) ¿Imam Salmo qellqaqta yanaparqa manaña iskayrayananpaq, hinaspa imatam yachachiwanchik? b) ¿Imataq yanapasurqanki Salmo qellqaq hina piensanaykipaq?

¹¹ ¿Imataq Salmo qellqaqta yanaparqa manaña iskayrayananpaq? Payqa reqsikurqam allin ruraymanta yaqalla karunchakurusqanta, ichaqa “Diospa santuarionman” otaq templonman yaykuruspanmi imayna piensasqanta cambiarurqa, chaypim Diosta kasukuq runakunawan kuskanchakurqa hinaspa yuyaymanarqa Diospa munayninmanta. Chaynapim entienderurqa mana allin ruraqkunata ima pasananmanta hinaspa mana munarqachu paykuna hina kaytaqa. Entienderqataqmi imayna kawsasqanku hinaspa tanteasqanku ‘lluchka-lluchka ñanpi’ hina tarichisqanta. Pipas mana allinta ruraspa Jehová Diosta saqeqqa ‘manchakuypa’ chawpinpim tukunqa. Serviqninmi ichaqa paypa amparasqan kanqa (leey Salmo 73:16-19, 27, 28). Ñoqanchikqa yachanchikmi chayna nisqan cheqap kasqanta. Yaqapaschá achka runakuna Diospi mana piensaspa munasqankuman hina kawsakuyta munanku, ichaqa manam librakuyta atinqakuchu chayna rurasqankumantaqa (Gal. 6:7-9).

¹² ¿Imatawanmi chaymanta yachachwan? Jehová Diospa llaqtallanpim tarichwan yachaytawan amparasqa kaytaqa. Diospa templonman rispanmi Salmo qellqaqqa allin piensayta atirqa. Ñoqanchikpas congregacionpim tarinchik Bibliamanta cheqap yachachikuyta hinaspa yachaywan consejo qoq cristianokunatapas. ¡Chaychiki Jehová Diosqa niwanchik mana faltakuspa huñunakuyman rinanchikpaq! Chaypim chaskinchik kallpatawan yanapakuyta allinkunata hinalla ruranapaq (Isa. 32:1, 2; Heb. 10:24, 25).

Allin amistadkunata akllasun

13-15. a) ¿Imataq Dinata pasarurqa, hinaspa imatam yachachiwanchik pasasqan? b) ¿Imanasqataq amparawanchik iñiqmasinchikkunawan amistad rurayqa?

¹³ Jacobpa warmi churin Dinata pasasqanmi, qawachiwanchik mana allin amistadkunaqa mana allin kasqanta. Genesis librom willawanchik familianpa hichpallanpi yachaq Canaan llaqtayoq sipaskunata sapa kuti qawananpaq lloqsisqanmanta. Ichaqa, chaypi kaq runakunaqa manam Diospa kamachisqanta kasukurqakuchu. Pasaq tiempomanta estudiaq runakunapa nisqanman hinaqa, llaqtankutam huntarachirqaku taytacha-mamacha  yupaychaywan, runa wañuchiywan hinaspa millakuypaq huchapakuykunawan (Exo. 23:23; Lev. 18:2-25; Deu. 18:9-12). ¿Imapim tukurqa chay sipaskunawan Dinapa amistad rurasqanqa?

¹⁴ Canaan llaqtayoq Siquem sutiyoq runam, ‘taytanpa familianpi [. . .] allin respetasqa’ kachkaspanpas Dinata “abusaruspan penqayman churarurqa” (Gen. 34:1, 2, 19). ¡Mayna llakikunapaqmi chayqa karqa! ¿Yaqachu Dinaqa piensanman karqa chayna pasarunanta? Ichapas chay llaqtapi mozo-sipaskunapa amistadllanta munarqa hinaspa allin kasqankuta piensarqa. Ichaqa, llumpaytam pantarurqa.

¹⁵ Kay willakuymi kayta yachachiwanchik: manam suyachwanchu Diospi mana iñiqkunawan amistad ruraspa allinlla kaytaqa. Bibliaqa niwanchikmi: “Mana allin amistadkunaqa urmachinmi allin kawsaqkunatapas”, nispa (1 Cor. 15:33). Ichaqa, iñiqmasinchikkunawan amistadta ruraspaqa amparasqam tarikunchik. Paykunaqa yanapawasunmi yachaywan imatapas rurananchikpaq (Pro. 13:20).

Qamkunataqa ‘Diosmi mayllasurqankichik’

16. ¿Imatam Pablo nirqa Corintopi kaq wakin cristianokunamanta?

¹⁶ Achka runakunatam Diospa llaqtan yanaparqa millakuypaq ruraykunata saqenankupaq. Corinto llaqtapi kaq cristianokunaman punta cartasqanpim, Pablo willakurqa Diospa munasqanman hina kawsanankupaq vidanku cambiasqankumanta. Wakinkuqa ñawpaqtam huchapakuypi puriqku, taytacha-mamachata adoraqku, casado kachkaspa hukwan pierdekuqku, qarimasinwan kakuqku, suwakuqku hinaspa sinkakuqkupas. Ichaqa, Pablom paykunata nirqa: ‘Diosmi mayllasurqankichik’, nispa (leey 1 Corintios 6:9-11).

17. ¿Imaynatam Bibliapa nisqanqa achka runakunapa vidanta cambiarqa?

¹⁷ Mana iñiyniyoq runakunaqa manam kasukunkuchu Bibliapa nisqantaqa. Paykunaqa munasqankuman hinam kawsanku otaq mana allin ruraqkunata qatipakunku, chaynam karqaku Corintopi kaqkunapas manaraq cristiano kachkaspankuqa (Efe. 4:14). Diospa munayninmanta hinaspa Bibliamanta allinta yachayqa ancha atiyniyoqmi. Kasukuqkunapa vidantam tukuypi cambiachin (Col. 3:5-10; Heb. 4:12). Achka iñiqmasinchikkunam Jehová Diosta manaraq reqsispankuqa munasqallankuta ruraqku. Ichaqa reqsikunkum mana kusisqa kasqankumanta, hawkayaytaqa chayraqmi tarirqaku Diospa llaqtanman yaykumuspanku chaynataq Bibliapa nisqanman hina kawsaspanku.

18. ¿Ima sasachakuykunapim tarikurqa huk sipas, hinaspa imatam pasasqanmanta yachachwan?

¹⁸ Ichaqa, congregacionpi amparasqa kasqankuta saqeruqkunam anchata ñakakunku chay rurasqankumanta. Chaynam pasarqa huk cristianata, paytam sutichasun Taniawan, paymi willawanchik warmacha kasqanmantapacha cheqap yachayta reqsisqanta, ichaqa 16 watanman chayaruspanmi kay pachapi kaqkunawan aysachikurqa. Rurasqanwanmi ñakarirqa, mana piensachkaspanmi wiksayakururqa hinaspa huk kutipi abortarurqa. Paymi nin: “Jehová Diospa llaqtanmanta hawapi 3 wata tarikusqaymi, sentimientoypi sasa-sasa hampina heridasqata saqeruwarqa. Manam qonqayta atinichu wawaytapuni wañuchisqaytaqa. [. . .] Yachanim, achka mozo-sipaskuna kay pachapi mana allin ruraykunata malliykuy munasqankuta.  Ñoqaqa niymanmi: ‘¡Amayá chaytaqa ruraychikchu!’. Qallariypiqa gustasunkichikchá, tukuyninmi ichaqa qatqellaña. Kay mundopa imapas munachisqanqa ñakariyllapim tukunqa. Kikiytam chayna pasaruwarqa. Ama lloqsiychikchu Jehová Diospa llaqtanmanta. Chaynapim kusikuyta tarinkichik”.

19, 20. ¿Imaynatam congregacionqa amparawanchik, hinaspa chaypaqqa imatam rurananchik?

¹⁹ ¿Imaraq ñoqanchikmanta kanman congregacionpi amparasqa kasqanchikta saqeruptinchikqa? Achka cristianokunam chaymantaqa piensayllatapas munankuchu, yuyarinkum Bibliamanta manaraq yachaptinku vidanku yanqapaq kasqanta (Juan 6:68, 69). Hinalla amparasqa kananchikpaq hinaspa Satanaspa munaychakusqanpi mana ñakarinanchikpaqqa, iñiqmasinchikkunamantam mana karunchakunachu. Amistadninkuta maskaymi hinaspa huñunakuykunaman riymi yanapawanchik Diospa kamachikuynin allin kasqanta mana qonqanapaq hinaspa kasukunapaqpas. ¡Achka razonmi kachkan ‘hatun huñunakuypi’ Jehová Diosta Salmo qellqaq hina hatunchananchikpaq! (Sal. 35:18.)

²⁰ Lliw cristianokunam Jehová Diosta kasukunankupaqqa imakunawanpas sasachakunku. Chayna kaptinqa, yaqapaschá necesitanku pipas yanapaykunanta ¿Imatam congregacionpi sapakama rurananchik paykunata yanapanapaq? Qatiqninpim yachasunchik iñiqmasinchikta imayna consuelanamanta hinaspa kallpanchanamantapas (1 Tes. 5:11).

¿Imaynatam kutichiwaq?

• ¿Imatam yachachiwanchik Salmo 73 qellqaqpa pasasqan?

• ¿Imatam yachanchik Dinata pasasqanmanta?

• ¿Imaynatam congregacionqa amparawanchik?

[Kay yachachikuypa tapukuyninkuna]

[7 kaq paginapi dibujokuna]

Amayá uku-ukumanqa yaykuychu: congregacionmantayá ama karunchakuychu