Kuyanakuspa sapa wata huñunakuymanta willakuy

ASAMBLEAKUNA Rurana Wasipim Jersey City (Nueva Jersey, Estados Unidos) lawpi ancha kusikuy karqa. 2009 watapi 3 punchaw octubre killa madrugawtam, 5.000 masnin runakuna huñunakurqaku Watch Tower Bible and Tract Society of Pennsylvania nisqapa 125 kaq huñunakuyninkupi. Chaynataq, 3 hawaqpim Estados Unidos nacionpi kaq Betelpi hinaspa Canadá Betelpipas waranqantin cristianokuna huñunakuyta televisionpi qawarqaku hinaspa uyarirqaku. 3 horatam uyarirqaku 13.235 cristianokuna, paykunataqa Jehová Dios kuyasqankum huñullata tarichirqa.

Huñunakuy qallarichiqmi karqa Diospa Llaqtanpi Punta Apaq Geoffrey Jackson, puntatam Betelpi llamkaq akllasqa cristianokuna mosoq takinanchik qellqamanta takirqaku. Takiqkunata dirigiqmi karqa Diospa Llaqtanpi Punta Apaq David Splane, paymi qawachirqa cheqap yupaychasqanchikpi takiy ancha allin kasqanta. Hamuqkunatam nirqa 3 mosoq takikunata takinankupaq: puntatam takirqaku Betelpi llamkaq akllasqa iñiqmasinchikkuna, chaymantañam llapanku takirqaku. Takinankupaq akllasqankuqa chay huñunakuyllapaqmi karqa, manam chaynatachu rurana huñunakuykunapiwan asambleakunapipas.

Betel wasikunamanta willakuykuna

Chaymantam Betelpi 5 punta apaqkuna servisqanku nacionpi rurakusqanmanta willakurqaku. Canadá nacionmanta Kenneth Little sutiyoqmi nirqa Estados Unidospaq hinaspa Canadapaq hamuq tiempopi yaqa llapan revistakuna ruranankumanta, chaypaqqa chunka chaynatawanraqmi rurasqanku yapakunqa. Chaypaqmi iskay turnopi revistakuna ruraq mosoq maquinakunata servichikunqaku, sapa punchawmi funcionanqa 16 horata.

Reiner Thompson sutiyoqmi willakurqa Diospa Gobiernonpaq llamkay República Dominicanapi imayna kasqanmanta, Albert Olih sutiyoqñataq Nigeria nacionmanta. Mozambique nacionmanta Emile Kritzinger sutiyoqmi willakurqa chay nacionpi Testigokuna unay tiempo qatikachasqa kasqankuta chayraq 1992 watapi reconocesqa kasqankumanta. Kay tiempokunapim chay 3 nacionkunapi predicaqkuna aswan yapakurun. Australiamanta Viv Mouritz sutiyoqmi willakurqa paykunapa atiendesqanku Timor Oriental lawpi Diospa munaynin imayna rurakusqanmanta.

Diospa Llaqtanpi Punta Apaqkunapa churasqan Encargakuqkuna

Testigokunapa rurasqankuta qawanankupaqmi 1976 watamantapacha, Diospa Llaqtanpi Punta Apaqkuna churarqaku 6 grupokunata otaq Encargakuqkunata. Watakuna pasaptinmi kay Pachapi kawsakuy suyakuyniyoqkunapas yanaparqakuña, paykunaqa kanku 23. Paykunamantam soqtata tapurqaku, 341 watañam llapankumanta tukuy tiemponkuwan Diosta servinku, sapakamaqa yaqa 57 watañam.

Puntatam tapurqaku Don Adams cristianota, payqa 1943 watamantam Betelpi llamkarqa. Willakurqam Encargakuqkunamanta Cuentallikuqkunapi, wakin 5 grupo otaq encargakuqkuna kasqanmanta, chaymi yanapan llapanku huk sonqolla yanapanakunankupaq. Kay cuentallikuqkunam imakunatapas tanteananku Diospa llaqtan qatikachasqa kaptin, juicio kaptin, desgraciakuna kaptin hinaspa allpantinpi Testigokunata qonqaymanta imapas pasaptin chaylla atiendena kaqkunatapas.

Betelpi Llamkaqkunamanta Encargakuqkunapa rurasqanmantam Dan Molchan sutiyoq willamurqa, paykunam qawanku llapan Betelpi  llamkaqkunapa (19.851) iñiyninkupiwan saludninkupi imayna kasqankuta. David Sinclairñataq willarqa Betel wasikunapaq necesitasqankuta rantinankupaq Qellqakuna Ruraypi Encargakuqkuna qawasqankumanta. Yaqa 60 wataña Betelpi llamkaq Robert Wallen willarqa, predicacion apakunanpaq hinaspa congregacionpi rurakusqanta Allpantinpi Predicacionmanta Encargakuqkuna qawasqankumanta. Chaymantam William Malenfant willarqa Yachachikuymanta Encargakuqkuna, 3 punchaw asambleapaq yachachikuykunata preparaq kasqankumanta. John Wischukñataq willarqa qellqanchikkunapi lloqsimuq yachachikuykuna rurakusqanta, Yachachikuykuna Qellqaymanta Encargakuqkuna qawasqankumanta. *

2010 watapaq textom kuyakuymanta rimachkan

Qatiqninpim yachachirqaku Diospa Llaqtanpi 3 Punta Apaqkuna. Puntatam Gerrit Lösch iñiqmasinchik kayna tapukuywan qallaykurqa: “¿Munankichu kuyasqa kayta?”, nispa. Hinaspam nirqa runakuna kuyasqa kayta necesitasqankuta chaynataq imapas ruray atisqanchikkunata aswan allinta ruranapaq yanapasqanmanta. Mana imatapas suyaspa kuyawasqanchikraykum, Jehová Diosqa unanchawarqanchik. Ñoqanchikpas payta kuyaspam predicanchik hinaspa yachachinchik.

Cristianopa kuyakuyninqa Diospa kamachisqanman hinam, kuyananchikmi runamasinchiktawan enemigonchiktapas (Mat. 5:43-45). Chay yachachikuywanmi kallpancharqa ñoqanchikrayku Jesuspa ñakarisqanpi yuyaymananankupaq. Cristoqa azotesqa, penqayman churasqa, tuksipasqa hinaspa runakuna toqaykuptinpas qerupi warkuqnin soldadokunapaqmi mañakurqa. ¿Manachu chayrayku astawan kuyanchik? Chaymantam Gerrit Lösch iñiqmasinchik willarqa 2010 watapaq textomanta, chayqa horqosqam kachkan 1 Corintios 13:7, 8: ‘Kuyakuyqa tukuytam aguantan. Kuyakuyqa wiñaypaqmi’. Manam wiñaypaq kawsayllatachu suyanchikqa, aswanqa wiñaypaq kuyaytawan kuyasqa kaytam.

¿Tukuruchkanñachu gasolinanchik?

Samuel Herdmi kayna rikchanachiywan yachachiyta qallaykurqa: chakiwan yaqa huk punchaw purina sitiokama amistadniki carronpi apasunkiman. Qamñataq musyaruwaq manaña gasolinan kasqanta. Willaptikim nisunkiman huk galonraq kasqanrayku ama llakikunaykipaq. Manapas unaymantam qonqayta sayarunman. ¿Allinchu kanman yaqa mana gasolinayoqtaña carrota manejay hinaspa risqanpi wischusqa qeparuy? Allinqa kanman karqa gasolinata huntachispa riymi. Diosta serviypipas chaynam: “gasolinata huntachichkaq” hinam Diospa yachayninwan yuyayninchiktawan sonqonchikta huntachinanchik.

Mana gasolinayoq carro hina mana kanapaqqa, yuyayninchiktawan sonqonchiktam Diospa yachayninwan sapa kuti huntachinanchik. Chaypaqqa tawatam rurananchik. 1) Estudiananchikpaq  tiempo rakisqanchiktam respetana hinaspa Bibliata sapa punchaw leena. Manam leeyllachu-leena, aswanqa Bibliatam allinta reqsinanchik hinaspa entiendenanchik. 2) Familiawan Diosta Yupaychanapaq Tutatam allinta servichikunanchik. ¿Tiempochakunchikchu sapa semana allinta huntachinapaq, icha pisillatachu hinaykunchik? 3) Huñunakuykunamanmi rinanchik, chaypim iñiqmasinchikkunawan kuska Bibliata estudianchik. 4) Diospa yachachiyninkunapi yuyaymananapaqmi hawka kanapaq sitiota maskananchik. Salmo qellqaqtam qatipakuyta munanchik, paymi nirqa: “Pasaq tiempokunamantam yuyarillani. Llapa rurasqaykunapim yuyaymanani”, nispa (Sal. 143:5).

Allin ruraqkunam “kancharinqaku”

John Barr iñiqmasinchikmi tukupaynin yachachikuypi trigowan mana allin qorawan Jesuspa rikchanachisqanmanta rimarqa (Mat. 13:24-30, 38, 43, NM). Kay rikchanachiymi riman ‘cosechamanta’, chay tiempopim “Diospa munaychakusqanpa churinkuna” huñusqa kanku hinaspa mana allin qoratañataq rakinku kañanankupaq.

Nirqataqmi cosecha tiempo tukunanta. Mateo 24:34 nisqanmantam rimarqa, ninmi: ‘Kaykunam cumplikunqa manaraqpas kay miray runakuna chinkachkaptin’, nispa. Hinaspam iskay kutita leerqa: “Lliwmi qawachin (Cristopa ñoqanchikwan kasqanpa qallarisqanpi) 1914 watapi kawsaq hanaq pachaman riy suyaqkunawan, hatu-hatun ñakariypa qallarisqanta rikuq wakin hanaq pachaman riy suyaqkunapas huk tiempopi kawsasqankuta”, nispa. Manam yachanchikchu hayka wata chay “miray” kananta, ichaqa yachanchikmi iskayninku huk tiempopi kawsasqankuta. Hanaq pachaman riqkunaqa manam wiñaypurallachu kanku, ichaqa tukupay tiempopim ‘miraypa’ parten kaqkunaqa huk tiempopi kawsanku. ¡Mayna kusikunapaqmi hatu-hatun ñakariy tiempopi hanaq pachaman riqkunamanta manaraq llumpay yuyaq kaqkunapa hinalla kawsanankumanta yachayqa, paykunaqa kanku tukupay tiempo 1914 watapi qallaykusqanta cuenta qokuq hanaq pachaman riqkunapa wiñaymasinkuna hinam!

‘Diospa munaychakusqanpa churinkunaqa’ suyachkankum hanaq pachaman riyta. Ichaqa, lliwmi cristianokunaqa maypi kawsakuyta suyaspapas tukupaykama kancharistin kasukunanchik. ¡Mayna favorecesqam kanchik ‘trigopa’ huñukusqan tiempopi kawsaspa!

Takiyta tukuruptinkum, Diospa Llaqtanpi Punta Apaq Theodore Jaracz oracionwan tukurqa. ¡Kallpanchakuq huñunakuymi karqa!

[Willakuy]

[5 kaq paginapi recuadro]

ANCIANOKUNAPAQ ESCUELA

Chay sapa wata huñunakuy rurakusqanpim, Diospa Llaqtanpi Punta Apaq Anthony Morris willarqa ancianokunapaq huk escuela kananta. 2008 wata qallariytam Estados Unidos lawpi ancianokunapaq chay escuela qallarirqa Patterson lawpi (Nueva York). 72 kaq grupom tukurqaña, chaykamaqa 6.720 ancianokunañam yachachisqa karqaku. Achkaraqmi faltachkan, Estados Unidosllapim 86.000 masnin ancianokuna kanku. Chaymi Diospa Llaqtanpi Punta Apaqkuna tantearunku Brooklyn (Nueva York) llaqtapi huk escuela kananpaq, qallaykurqam 2009 wata 7 punchaw diciembre killapi.

Congregacionta watukuq 4 ancianokunam 2 killapi preparasqa kanqaku Patterson lawpi, chaymantañam yachachiq rinqaku Brooklyn lawman. Chaymantam tawata preparanqaku qallariypi 4 yachachiqkunapa rantinpi kanankupaq, qallariypi yachachiqkunam rinqaku Asambleakuna Rurana Wasipi hinaspa Huñunakunanchik Salonkunapi chaynallata yachachinankupaq. Chaynatam rurakunqa 12 preparasqa kanankukama, chaynapim ingles idiomapi sapa semana 6 escuelakuna apakunqa Estados Unidospi. Chaymantam tawata preparanqaku castellanopi yachachinankupaq. Kayna yachachiyqa manam Ancianokunapaqwan siervo ministerialkunapaq Escuelapa rantinpichu kanqa. Aswanqa ancianokunatam yanapanqa cheqapmanta yachaypi ñawparinankupaq. Allpantinpim kayna escuelaqa qallarinqa septiembre 2010 watamanta agosto 2011 watapi, chayqa rurakunqa Huñunakunanchik Salonpiwan Asambleakuna Rurana Wasikunapim.

[4 kaq paginapi dibujokuna]

Jehová Diospaqyá takisun sutichasqa mosoq qellqanchikmanta takiwanmi kay huñunakuyqa qallarirqa