Allinpim tukunqa qawan-qawanlla kasqaykiqa

¿HAYKAPIPAS qawan-qawanllachu kachkanki congregacionnikipa kasqan lawpi runakunata predicanaykipaq? Finlandia nacionpi lamar qochapa patanpi Turku sutiyoq llaqtapi iñiqmasinchikkunam qawan-qawanlla kanku pikunata predicanankupaq, chayna rurasqankum allinpi tukurqa.

Huk punchawmi, paykunaqa rikururqaku buquekunapa kanan hinaspa rurananku lawman hatu-hatun buque rurayta tukunankupaq Asia lawmanta runakuna chayaramusqankuta. Huk iñiqmasinchikmi yacharurqa llaqtapa chawpinpi kaq hotelkunapi samasqankuta, chaymantam llamkayninkuman sapa madrugaw huk carro aparqa. Utqaymanmi Turku llaqtapi ingles idiomapi kaq iñiqmasinchikkunaman willamurqa.

Congregacionpi ancianokunam cuentata qokurqaku huk nacionniyoqkuna chaypi kasqankurayku predicanapaq allin kasqanta, chaymi tantearurqaku paykunaman predicanankupaq. Chay semanallapi domingo punchawtam chunka predicaqkuna qanchis hora madrugawta huñunakurqaku carrokunapa sayanan sitiopi. Mana pitapas rikuspankum tapukurqaku: “¿Tardearamunchikchu? Icha ¿kay llaqtamantachu pasakunkuña?”, nispanku. Ichaqa qonqaymantam huknin runa esquinata rikuriykamurqa llamkananpaq hina pachasqa. Qatiqninpim huk-hukmanta chayaramurqaku... Chaymantam achkaña karqaku. Iñiqmasinchikkunam predicayta qallaykuspanku inglespi qellqakunata qorqaku. Paykunata apaq carrokunaqa manam imam horapichu lloqsirqa aswanqa huk hora qepatañam, chaymi tiempoqa karqa paykunawan rimanankupaq. Pasakuspankum apakurqaku 126 folletokunata hinaspa 329 revistakunata.

Predicasqanku allinpi tukuptinmi, iñiqmasinchikkunaqa tantearqaku qatiqnin semanapi congregacionta watukuq anciano hamuptin kaqmanta rinankupaq. Qanchis hora madrugawpaq media hora faltachkaptinmi, paramuchkaptinpas congregacionta watukuq predicacionpaq huñunakuyta rurarqa, hinaptinmi 24 iñiqmasinchikkuna rirqaku carrokunapa sayasqanman. Tagalo rimaypi qellqanchikkunatam aparqaku, punta predicasqankupim Filipinas nacionniyoq runakunata tarirqaku. Chay madrugawmi buquekunapa sayananman carrokuna pasaptin, llamkaqkuna apakurqaku 7 librokunata, 69 folletokunata hinaspa 479 revistakunatapas. Chay kutipi predicaq iñiqmasinchikkunaqa ancha kusisqam tarikurqaku.

Llamkaqkuna manaraq nacionninkuman kutichkaptinkum, iñiqmasinchikkunaqa samasqanku hotelkunapi achkaman watukurqaku Diospa Gobiernonmanta astawan willanankupaq. Achka llamkaqkunam willakurqaku huklaw nacionkunapipas Testigokunawan parlamusqankuta, hinaspam agredecekurqaku Finlandiapi kachkaptinku watukuspa predicasqankumanta.

¿Ima nichwantaq qanmanta? ¿Qawan-qawanllachu kachkanki congregacionnikipa kasqan lawpi pikunaman predicanaykimanta? ¿Kallpanchakunkichu hinaspa maskankichu huk castayoqkunata predicanaykipaq? Chayna kaptinqa Turku llaqtayoq iñiqmasinchikkunata hinachá pasasunki.

[32 kaq paginapi dibujo hinaspa mapa]

(Imayna kasqanmanta yachanapaq qaway kay qellqata)

FINLANDIA

HELSINKI

Turku

[Reqsikunchikmi]

STX Europa