‘Ama manchakuychu, ñoqam yanapasqayki’

JESUSMI qatiqninkunaman willarqa: ‘Wakinnikichiktam Diablo hinachisunkichik carcelman pruebasunaykichikpaq’, nispa. Manaraq chaynata willachkaspanmi nirqa: ‘Amayá manchakuychikchu ñakarinaykichikmantaqa’, nispa. Kunanpas, Satanasqa predicaciontam harkayta munan presochawananchikpaq amenazawaspanchik. Chaymi cheqap cristianokunataqa wakin gobiernokuna qatikachaspa ñakarichiwasunchik (Apo. 2:10; 12:17). ¿Imaynatam preparakuchwan Satanaspa chayna sasachawasqanchikta Jesuspa nisqanman hina mana manchakuspa atipananchikpaq?

Yaqa llapanchikchá imawanpas manchakurqanchik, Bibliam ichaqa niwanchik Jehová Diospa yanapayninwan manchakuyta atipanapaq. ¿Imaynata? Chaypaqqa Diosmi preparawanchik Satanaspa chaynataq yanapaqninkunapa contranchikpi churakusqankuta imayna atipanamanta yachachiwaspanchik (2 Cor. 2:11). Chaymanta entiendenapaq yuyarisun ñawpaq tiempopi hinaspa kay tiempopi Diosta serviqkunapa ejemplonkumanta, paykunatam ‘wateqaqninchik Diablo mana urmachirqachu’ (Efe. 6:11-13).

Dios kasukuq reytam amenazan huk mana allin kamachiq

Cristianokunapa tiemponmanta 800 wata ñawpaqtaraqmi, Asiria nacionpa mana allin ruraq reynin Senaquerib nacionkunata qatinasninpi vencechkarqa. Chaynata rurasqanwan kikinpi confiaspanmi, munarqa Diospa llaqtanta hinaspa capitalnin Jerusalentapas munaychakuyta, chaypim Ezequias kamachirqa (2 Rey. 18:1-3, 13). Yaqachusmi Satanasqa chayna pasakusqanta servichikuspan, Senaqueribta kallpancharqa paypa munasqanta ruraspan kay Pachamanta cheqap religionta chinkachinanpaq (Gen. 3:15).

Senaqueribmi runakunata Jerusalenman kacharqa, paypa rantinpi rimananpaqñataq churarqa Asiria nacionpa tropankuna kamachiqta, chaynapi Jerusalenpi kaqkuna mana peleachkaspalla vencesqa kasqankuta reqsikunankupaq (2 Rey. 18:17). Tropakuna kamachiqqa munarqam judiokuna hukmanyanankuta hinaspa manaraq peleachkaspa vencesqa sientekunankuta. ¿Imakunatam servichikurqa mancharichinanpaq?

Karunchasqa kaspapas kasukunkum

Rey Ezequiaspa rantinpi lloqsimuq runakunawanmi tropakuna kamachiqqa payman kaynata willachirqa: “Asiria nacionpa ancha reqsisqa reyninmi nin: ‘¿Imaman hapipakuspaykitaq qamqa confiakuchkanki? [. . .] ¿Pakisqa soqos tawna hina Egipto nacionpichum confiakuchkanki? Chay soqos tawnaqa tawnapakuqninpa makintapas pakipakuruspanmi uchkurun’”, nispa (2 Rey. 18:19, 21). Chayna nisqanqa llullam karqa, Ezequiasqa manam  Egiptowanqa ima acuerdotapas rurarqachu, tropakuna kamachiqqa judiokunata kayna piensachiytam munarqa: “Sapallanku kasqankuta hinaspa mana pipa yanapasqan kanankutapas”.

Kunanpas cheqap yupaychayta cheqniqkunam, Dios serviqkunata mancharichiyta munaspanku presochanku. Ejemplopaq, rimasun Dios servisqanrayku achka wata presochasqa hinaspa iñiqmasinkunamanta karunchasqa cristianamanta. ¿Imataq kallpancharqa manchakuywan mana atipachikunanpaq? Paymi willakun: “Diosta mañakuymi payman asuykachiwarqa [. . .]. Achka kutim yuyarirqani Isaias 66:2 nisqanta [. . .], chaypim nin ‘humillakuspa wanakuq runakunata’ Dios qawasqanta. Chaymanta yachasqaymi kallpatawan consuelota qowarqa”, nispa. Achka wata mana piwanpas rimananpaq presochasqa huk cristianopas ninmi: “Cuentatam qokurqani, carcelpi uchuy cuartochapas hanaq pacha sayaymi kanman Dioswan amistad kaptinchikqa”, nispa. Qawasqanchikman hinaqa, Jehová Dioswan amistad kasqankum iñiqmasinchikkunata kallpancharqa presochasqa kaspanku aguantanankupaq (Sal. 9:9, 10). Yacharqakum, presochasqa otaq familiankumanta, amistadninkumantawan iñiqmasinkunamanta karunchaspapas Jehová Diosmanta mana rakiy atinankuta (Rom. 8:35-39).

Chaynaqa, Dioswan amistadninchik aswan allin kananpaq yanapawaqninchik kaqkunatam allinta servichikunanchik (Sant. 4:8). Tapukunanchikmi: “¿Cheqapchu ñoqapaq Jehová Diosqa? ¿Imata ruranaypaqpas paypa nisqanman hinachu tanteani?”, nispa (Luc. 16:10). Paywan amistadninchik allin kananpaq kallpanchakuspaqa manam manchakusunchu. Llakisqa tarikuq judiokunapa rantinpi rimaspanmi Jeremias nirqa: ‘Dios Taytalláy, qamtam qayakamullarqayki. Pozopa ukunmantaraqmi qayakamullarqayki. [. . .] Qayakamusqay punchawpim asuykamuwarqanki. ‘Ama manchakuychu’ nispam niykullawarqanki’, nispa (Lam. 3:55-57).

Iskayrayanapaq rurasqankuqa yanqam

Sacre kaspanmi tropakuna kamachiqqa llaqtapi runakunata iskayrayachinanpaq nirqa: “¿Manachum moqokunapi chay Diospa capillankunatawan altarninkunataqa lliwta Ezequias chinkarachirqa? [. . .] ¿Manachum Tayta Dios kamachimuwarqa: ‘Chay nacionman rispayki tuñichimuy’ nispa?” (2 Rey. 18:22, 25.) Chaynata nispanmi entiendechirqa, paykunawan Jehová Dios piñasqa kaspa serviqninkunata mana defiendenanmanta. Diosmi ichaqa kusisqa karqa Ezequiaswan hinaspa cheqap yupaychayman kutimuq judiokunawanpas (2 Rey. 18:3-7).

Kunanpas qatikachawaqninchik runakunaqa sacrellañam kanku. Wakinpiqa paykunapi confiananchikpaqmi wakillanpi cheqapta rimanku hinaspa iskayrayananchikpaq mana musyayllata llullakunku. Ejemplopaq, presochasqa wakin cristianokunamanmi nirqaku nacionninpi punta apaq iñiqmasinku Diosta qepancharusqanta hinaspa paykunapas chaynata ruranankupaq. Chayna nisqankuqa manam engañanchu rikchan-rikchanlla tarikuq cristianokunataqa.

Allpantinpi iskay kaq guerra kaptin presochasqa cristianamanta rimasun. Punta apaq cristiano iñisqan qepanchasqanmanta willakuq documentotam payman aparqaku. Chay Testigopi creesqanmanta juez tapuptinmi pay nirqa: “Payqa pantaq runallam”, nispa. Payqa yacharqam Bibliapa nisqankunata  kasukusqan tiempopi Diospa servichikusqan kasqanta. Chaymantam nirqa: “Rimasqankuna Bibliapa nisqanwan mana tupasqanraykum kunanqa manaña turiyñachu”, nispa. Yachaywanmi cristianaqa Bibliapa kayna nisqanta kasukurqa: ‘Kamachikuqkunapiqa amayá confiakuychikchu. Runallapiqa amayá confiakuychikchu. Paykunaqa manam salvawanchikmanchu’ (Sal. 146:3).

Tukuy engañowan mana iskayrayanapaqqa, Diospa Palabranmantam allinta yachananchik hinaspa kallpanchakunanchik yachasqanchikta kasukunapaq (Efe. 4:13, 14; Heb. 6:19). Enemigonchik sasachawaptinchik allinta piensanapaqqa, kunanmi kallpanchakunanchik Bibliata sapa punchaw leenapaq hinaspa sapanchikpi estudianapaqpas (Heb. 4:12). Kunanmi mastaraq yachananchik hinaspa iñiyninchikta kallpanchananchik. Achka wata presochasqa tarikuq huk cristianom nirqa: “Lliwtam kallpanchayta munayman iñiyninchikpi yanapawaqninchik Diospa tukuy qowasqanchikta allinta servichikunapaq, manam yachanchikchu imaynata yanapawananchikta”. Chaynaqa, sichu kunan estudiasun Diospa Palabranta hinaspa confianza sirvientepa qowasqanchik qellqakunata, hinaptinqa sasachakuy kaptinchá chuya espiritu ‘yuyarichiwasun [. . .] tukuy ima’ necesitasqanchikta (Juan 14:26).

Mana manchakunapaq harkaqninchik

Asiria nacionpa tropankuna kamachiqmi judiokunata mancharichiyta munarqa reyninkuta kaynata nispa: ‘Kunanyá Asiria nacion reyniywan apuestay hinaptinqa ñoqapas qosqaykim iskay waranqa caballokunata, qosqaykiqa partekimanta sillakuqkunata qoptikim [. . .]. ¿Imaynataq atiwaq reyniypa serviqnin capitanninkunamanta eqoneq kaqllawanpas peleayta?’ (2 Rey. 18:23, 24.) Runapa piensasqanman hinaqa, Ezequiaswan llaqtaqa manam Asiriapa achkallaña tropankunataqa venceyta atinmankuchu karqa.

Kunanpas contranchikpi kaqkunaqa mana vencey atinamanmi rikchakunku, aswanraq gobierno yanapaptinqa. Chaynam karqa Alemania nacionpi, allpantinpi iskay kaq guerra tiempopim Dios serviqkunata achkata amenazarqaku. Chay tiempopi achka wata presochasqa cristianom willakun ima pasasqanmanta. Huk guardiam nirqa: “¿Rikurqankichu wawqekita balawan wañuchisqankuta? ¿Imatam kaymanta yacharunki?”, nispa. Hinaptinmi pay nirqa: “Jehová Diospa testigonmi kani manam imawanpas saqesaqchu”, nispa. Guardiam kaqmanta nirqa: “Hinaptinqa qampas balawan wañuchisqam kanki”, nispa. Guardiaqa manam nisqanwanqa cumplirqachu. Chay cristianom willakurqa ima yanapasqanmanta: “Ñoqaqa Diospa sutinpim confiarqani”, nispa (Pro. 18:10, NM).

Diospi iñisqanchikqa harkachikuna hinam, iñiyninchikta yanqacharunanpaq Satanaspa tukuy rurasqankunamantam amparawanchik (Efe. 6:16). Chaymi Diosta mañakunanchik iñiyninchikta kallpanchananpaq (Luc. 17:5). Chaymantapas servichikunanchikmi confianza sirvientepa tukuy ima qowasqanchikkunata. Mana kasukuq llaqtaman Ezequiel willananpaq Diospa yanapasqanmanta yuyariymi, yanapawasun ima sasachakuy kaptinpas kallpata tarinapaq. Diosmi nirqa: “Ñoqam qamtapas tikrarusqayki paykuna hina qara uyaman chaynataq urkuykipas mana hukmanyaqman. Urkuykitaqa tikrarusaq nina rumiman hinañam”, nispa (Eze. 3:8, 9). Necesitaptinchikqa, Ezequielta hinam Diosqa yanapawasun.

Runapa munachisqankutam qepanchanku

Wakinpiqa munasqanchiktam enemigonchikkuna servichikunku Diosta qepancharunanchikpaq. Chaynatam rurarqa tropakunata kamachiq. Jerusalenpi kaqkunatam nirqa: “Asiria nacionpa reyninmi kaynata nin: ‘Ñoqawan contratota ruraspayá ñoqamanña humillakuychik [. . .]. Kikiypuni hamuspaymi pusasqaykichik  kay yachasqaykichik allpaman hina kawsaypapas vinopapas kasqan allpaman, mikuypapas, uvas huertapapas kasqan allpaman, aceitunas sachapa chaynataq mielpapas kasqan allpaman, chaypi kawsaspaykichikqa manam wañunkichikchu’” (2 Rey. 18:31, 32). Munarunapaq hinachá karqa mikuypa hinaspa vinopa kasqanpi kawsakuyqa, judiokunaqa tarikurqaku enemigonkunapa muyurisqan llaqtapim.

Huk kutipim guardiakuna chayman rikchakuqta rurarqaku iñiyninta huk misionero qepanchananpaq. Nirqakum “sumaqllaña huertayoq allin wasipi” 6 killa kananpaq, chaynapi iñiyninmanta yuyaymanananpaq. Payqa tukuy tiempom Diosta kasukurqa hinaspa iñiyninta mana qepancharqachu. ¿Imataq yanaparqa munachisqankuta qepanchananpaq? Paymi willakurqa: “Yuyaymanarqanim Diospa Gobiernollan imatapas allichananmanta. [. . .] Chay Gobiernomanta yachasqaymi kallpata qowarqa, manam huk ratollapas iskayrayarqanichu. Manam vencewarqakuchu”, nispa.

¿Cheqapchu ñoqanchikpaq Diospa Gobiernon? Abrahampas, Pablopas hinaspa Jesuspas Diospa Gobiernon cheqap kasqanmanta convencisqa kaspankum tukuy pruebakunata aguantarqaku (Fili. 3:13, 14; Heb. 11:8-10; 12:2). Ñoqanchikpas Diospa Gobiernonta puntapi churaspa chaynataq wiñaypaq bendicionkunata mana qonqaspaqa, Diosmanta karunchawananchikpaq runapa munachiwasqanchiktam qepanchasun (2 Cor. 4:16-18).

Diosqa manam haykapipas serviqninkunataqa saqenchu

Asiria nacionpa tropankuna kamachiq tukuyta ruraspanpas, manam hukmanyachirqachu Ezequiasta nitaq kamachisqan runakunatapas, paykunaqa Jehová Diospim confiarqaku (2 Rey. 19:15, 19; Isa. 37:5-7). Paykunapa orakusqankutam Dios uyarirqa, chaymi huk tutallapi huk angel wañurachirqa 185.000 Asiriamanta soldadokunata. Paqarinnintintam Senaqueribqa Ninive llaqtaman humillasqa kutirqa puchuq aschallaña tropankunawan (2 Rey. 19:35, 36).

Jehová Diosqa manam haykapipas paypi confiaqkunataqa saqerqachu. Chaynam karqa tukuy tiempopi, chaytam qawachin pruebakuna kaptinpas kay tiempopi cristianokunapa aguantasqanku. Cheqapmi Unanchaqninchikpa kayna nisqanqa: “Ñoqa Tayta Diosmi alleq makikichikmanta hapiqnikichik kani. ‘Ama manchakuychikchu, ñoqam yanapasqaykichik’ niqnikichikmi kani” (Isa. 41:13).

[13 kaq paginapi suti rikuylla kaq willakuy]

Diosqa Palabranpim 30 masnin kutita serviqninkunata hawkayachinanpaq nin mana manchakunankupaq

[12 kaq paginapi dibujo]

¿Imapim enemigonchikkunapa rurasqan rikchakun Asiria nacionpa tropankuna kamachiq runapa rurasqanwan?

[15 kaq paginapi dibujokuna]

Jehová Dioswan amistadninchikmi yanapawanchik pruebakuna kaptinpas kasukunapaq