Cosechapi aswan mastaraq llamkasun

‘Astawan llamkaychik Señorpa rurayninpi.’ (1 COR. 15:58.)

1. ¿Imata ruranankupaqmi Jesusqa qatiqninkunata nirqa?

JESUSMI Samaria lawninta richkaspan Sicarpa hichpanpi huk pozopa waqtanpi samarirqa, chayqa karqa 30 kaq watapa tukuyninpiñam, hinaspam qatiqninkunata nirqa: ‘Qawaychik tarpusqakunata, ñam kachkan poqosqaña cosechanapaq’, nispa (Juan 4:35). Manam kawsaykuna cosechaymantachu rimarqa, aswanqa allin sonqoyoq runakuna qatiqnin kanankupaq huñuymantam. Chaylla llamkanankupaqmi nirqa. ¡Achkam rurananku karqa tiemponkum ichaqa pisilla!

2, 3. a) ¿Imam qawachin cosecha tiempopi kasqanchikta? b) ¿Imamantam kay estudiopi qawasun?

² Jesuspa nisqantaqa kunan tiempopim astawan rurananchik, Diosmanta yachay munaq runakunaqa “cosechanapaq” hinañam kachkanku. Sapa watam millonnintin runakunaman Bibliamanta wiñay kawsay qoq yachachikuy willasqa kachkan, chayta uyarispankum waranqantin runakuna iñinku hinaspa bautizakunku. Ancha favorecesqam kanchik mana haykapipas rurakusqan hatun cosechapi otaq runata yachachiypi llamkananchikpaq, chaytaqa ruranchik Chakrayoq otaq Jehová Dios yanapawaptinchikmi. Chayrayku tapukusun: “¿‘Astawanchu llamkachkani’ kay cosecha tiempopi?”, nispa (1 Cor. 15:58).

³ Kimsa wata parten predicasqanpim Jesusqa qatiqninkunata yachachirqa allin cosechaq kanankupaq. Kay estudiopim qawasun 3 asuntokuna yachachisqanmanta. Sapakamam qawachichkan runakunata cosechaypi kallpanchakuqkunata imayna yanapawananchikmanta. Qawasunyá sapakamamanta.

Humilde kayqa ancha allinmi

4. ¿Imaynatam Jesus qawachirqa humilde kay ancha allin kasqanta?

⁴ Kaypi piensasun: Jesuspa qatiqninkunam atipanakuchkarqaku mayqanninku aswan reqsisqa kasqankumanta. Yaqachá hukmanyasqa hinaspa sientisqa kachkarqaku. Hinaptinmi Jesusqa huk warmachata qayaykuspan chawpinkupi sayaykachirqa. Hinaspam nirqa: “Kay warma hina humillakuqmi [otaq menoschakuqmi] Diospa munaychakusqanpiqa aswan allin reqsisqa kanqa”, nispa (leey Mateo 18:1-4). Achkam piensanku autoridadniyoq, apu hinaspa allin reqsisqa runakuna aswan allin kasqankuta, Jesuspa qatiqninkunam ichaqa kayta yachananku: aswan reqsisqa kanankupaqqa hukkunamanta “menoschakuqmi” kananku. Diospa bendicionninta chaskinankupaqwan munayninta rurayta munaspankuqa, sonqomantam humillakunanku.

5, 6. ¿Imaynatam humilde kayqa yanapawanchik cosechapi astawan llamkanapaq? Huk ejemplota willamuy.

⁵ Ñawpaqpi hinam, kunanpas runakunaqa puntata maskanku allin reqsisqa, apu hinaspa kamachikuq kayta. Chaymi Dioswan amistad ruranankupaq tiemponku manaña haypanchu (Mat. 13:22). Diosta serviqmi ichaqa kayta yachan: Chakrayoq otaq Dios bendecinanpaqwan favorecenanpaqqa hukkunamanta menoschakuqmi kanan. Munanmi humilde kayta (Mat. 6:24; 2 Cor. 11:7; Fili. 3:8).

⁶ Ejemplopaq, rimasun Franciscomanta, payqa sudamerica law congregacionpim anciano. Mozo kaspanmi universidadpi estudiasqanta saqerurqa precursor kananpaq. Ninmi: “Tiempo pasaptinmi casarakurqani. Allin  pagasqa llamkaytapas maskaymanmi karqa. Ichaqa tantearqanikum mana ancha imayoq kanaykupaq chaynapi tukuy tiempoykuwan Diosta hinalla servinaykupaq. Chaymantam churi-wawayoq karqaniku, hinaspam aswan sasachakuykunapi tarikurqaniku. Ichaqa Diosmi yanapawarqaku payta hinalla servinaykupaq. 30 wata masninmi anciano kani hinaspa Diospa llaqtanpi huk ruraykunapipas yanapakuni. Manam haykapipas ñakakunikuchu mana ancha imayoq kasqaykumantaqa.”

7. ¿Imaynatam Romanos 12:16 nisqanpi consejokunata kasukurqanki?

⁷ Mana ‘imamantapas hatunchakuspa’ chaynataq ‘humillakuspa kawsakuspanchikqa’, cosechapim achka bendicionkunata chaskisun hinaspa achka rurayniyoq kasun (Rom. 12:16; Mat. 4:19, 20; Luc. 18:28-30).

Allin llamkaqpaq bendicionkuna

8, 9. a) Pisillapi willamuy wayqapi qollqemanta rikchanachiyta. b) ¿Pikunatam kay rikchanachiyqa kallpanchan?

⁸ Allin llamkaq kasqanchikpas yanapawasunmi Diosmanta runakunaman astawan yachachinanchikpaq. Chaytam Jesus qawachirqa wayqapi qollqemanta rikchanachisqanpi. * Chaypim rimachkan illananpaq kachkaspan kimsa sirvientenkunaman achka qollqen saqeykuq apu runamanta. Punta kaqmanmi qorqa pichqa wayqa qollqeta, hukninmanñataq iskayta, hukninmanñataq hukllata. Chay runa ripukuptinmi 2 sirvientekuna allinta llamkarqaku. Chayllam qollqe chaskisqankuta ‘negociarqaku’. Huk wayqa chaskiqmi ichaqa allpata toqoruspan chaypi pakarurqa, “mana allin sirviente” otaq qella kasqanrayku. Patronnin kutiramuspanmi, iskaynin sirvientenkunaman ‘achkataraq confiaykurqa’. Kimsa kaqtam ichaqa qollqen qosqanta qechururqa hinaspa wasinmantapas qarqorurqa (Mat. 25:14-30).

⁹ Llapanchikmi munanchik Jesuspa rikchanachisqanpi 2 allin llamkaq sirvientekunaman rikchakuyta hinaspa Diosmanta yachachiypi aswan mastaraq kallpanchakuytapas. Ichaqa, ¿imayna tarikusqanchik achkata ruranapaq mana saqewaptinchikqa? Ichapas qollqe mana haypawaptinchik familiata mantienenapaq achka horata llamkananchik otaq yuyaqña chaynataq onqoq kaspanchik manaña mozo-sipaskuna hinañachu kanchik. Chayna kaptinqa, wayqapi qollqemanta rikchanachiymi kallpanchawasun.

10. ¿Imaynatam rikchanachiypi runaqa qawachirqa entiendeq kasqanta, hinaspa imanasqam kallpanchawanchik?

¹⁰ Qollqemanta rikchanachiypiqa patronqa entienderqam 3  sirvientenkuna mana chaynalla kasqankuta, chaymi ‘sapakamaman atisqankuman hina qorqa’ (Mat. 25:15). Punta kaq sirvientem astawan ganarurqa iskay kaqmantaqa. Chayna kaptinpas, iskayninkutam alabarqa allin rurasqankumanta, chaymi sapakamata nirqa ‘confianza allin sirviente kasqankuta’ hinaspa achkataraq confiaykurqa (Mat. 25:21, 23). Chaynataqmi Jehová Diosqa yachan sapakamapa imayna tarikusqanchikta hinaspa hukkuna hina payta servisqanchikpi mana ruray atisqanchiktapas. Payqa qawachkanmi tukuy sonqonchikwan servinapaq kallpanchakusqanchikta, haykapipas bendeciwasunmi (Mar. 14:3-9; leey Lucas 21:1-4).

11. ¿Ima ejemplom qawachin allin llamkaq runakunapa imayna tarikusqanku sasa kaptinpas bendicionkuna chaskinanmanta?

¹¹ Selmiramanta rimasun, payqa Brasilmanta iñiqmasinchikmi. Ejemplonmi kayta qawachiwanchik: Dios serviypi astawan ruranapaqqa manam imayna tarikusqanchikpi allin kaytaraqchu suyananchik. 20 wata qepatam suwakunaqa qosanta balawan wañurachirqaku, chaymi 3 warmi wawankunawan sapallan qeparurqa. Payqa runakunapa wasinpim achka horata llamkapakurqa hinaspa runakunawan ñiti-ñitiraq carrokunapi viajarqa. Chayna kaptinpas precursora kananpaqmi tiempochakurqa, chaymantañam 2 wawankunapas precursora karqaku. Selmiram willakun: “Kay watakunapim 20 masnin runakuna ñoqawan Bibliata estudiarqaku, paykunaqa kanku ‘familiay’ hinam. Kunankamapas manam qonqanichu kuyakuyninkutawan amistadninkutaqa. Chaytaqa manam enteron pachapi qoriwanpas rantiyta atiymanchu”, nispa. Arí, Selmirataqa chayna rurasqanmantam Chakrayoq otaq Jehová Dios bendecirqa.

12. ¿Imaynatam predicacionpi aswan allin llamkaq kasqanchikta qawachichwan?

¹² Diosmanta yachachiypiqa manam lliwchu achka rurayta atisun. Ichaqa kallpanchakuchwanmi rurasqanchik aswan allin kananpaq. Diosta Servinapaq Huñunakuypi yachachikuykunata kasukuspaqa aswan allin yachachiqmi kasun hinaspa maypipas predicaytam atisun (2 Tim. 2:15). Chaymantapas, yaqapaschá mana yanapawaqninchik kaqkunata manaña ruranapaq tanteachwan otaq huk tiempopaq saqechwan, congregacionwan astawan predicanapaq (Col. 4:5).

13. ¿Imamantam kanqa aswan allin llamkay munasqanchik?

¹³ Ama qonqasunchu: aswan allin llamkay munasqanchikqa Diosta kuyasqanchikmantam kanqa (Sal. 40:8). Qollqemanta Jesuspa rikchanachisqanpi kimsa kaq sirvientem, patronninta manchakurqa chaynataq mana entiendeqta hinaspa mana allin runata hina qawarqa. Chaymi patronninpa qollqenta mirachinanmantaqa pakarurqa. Chay qella sirviente hina mana kanapaqqa kallpanchakunanchikmi Dioswan amistadninchik sapa punchaw aswan allin kananpaq. Jehová Dios kuyakuq, pacienciakuq, llakipayakuq kasqanmanta chaynataq wakin sumaq kayninkunamanta yuyaymananapaqwan estudianapaq tiempochakuspaqa, munasunmi tukuy kallpanchikwan serviyta (Luc. 6:45; Fili. 1:9-11).

‘Chuyam kananchik’

14. ¿Imawantaq cumplinanku cosechapi llamkay munaqkunaqa?

¹⁴ Hebreo rimaypi qellqasqa Diospa Palabranta servichikuspanmi Pedroqa explicarqa serviqninkunapaq Diospa munaynin ima kasqanmanta, nirqam: ‘Qayasuqnikichik Diospas chuya kasqanraykuyá payllapaqña kawsaychik chuyakuna hina. Bibliam nin: “Chuya kaychik ñoqapas chuya kasqayrayku”’, nispa (1 Ped. 1:15, 16; Lev. 19:2; Deu. 18:13). Kay textom qawachin Diosta yupaychaypiwan kawsakuyninchikpi cosechaqkuna limpio kananchikta. Kaywanqa cumplisun limpio kanapaq niwasqanchikta ruraspam. ¿Imataq chuyanchawasun? Diospa cheqap palabranmi.

15. ¿Imaynatam yanapawachwan Diospa cheqap palabran?

¹⁵ Bibliapim Diospa cheqap palabranta tupachin  chuyanchaq yakuwan. Ejemplopaq, Pablom qellqarqa Cristo novianta otaq hanaq pachaman riy suyaq cristianokunata ‘yachachikuyninwan [otaq palabrawan] yakuwan mayllachkaq hina limpiasqanta’, chaynapi ‘mana imaniraqpas huchayoq’ kanankupaq, chaymi Diospaqqa chuya kanku (Efe. 5:25-27). Punta watakunataraqmi Jesusqa nirqa Diospa palabran chuyanchaq kasqanta, chaymantaqa kikinmi willakurqa. Paymi qatiqninkunata nirqa: “Qamkunaqa rawmasqa hinañam [otaq limpioñam] kankichik rimapayasqaykunawan”, nispa (Juan 15:3). Chaynaqa, cheqap palabraqa chuyanchawanchikmanmi Dios yupaychasqanchikpiwan kawsakuyninchikpipas. Servisqanchikta Dios chaskinanta munaspaqa cheqap palabranwanmi chuyanchasqapuni kananchik.

16. ¿Imaynatam Dios serviyninchikpiwan kawsakuyninchikpi hinalla limpio kachwan?

¹⁶ Diosmanta yachachiypi yanapakuyta munaqkunaqa, kawsakuyninkupiwan yupaychayninkupi imapas qacha kaqkunatam puntata saqenanku. Diosta hinalla serviyta munaspaqa, kallpanchakunanmi Paypa munasqanman hina kawsananpaq hinaspa yupaychananpaqpas (leey 1 Pedro 1:14-16). Imaynam cuerponchik limpio kananpaq sapa kuti bañakunchik, chaynam Dios serviyninchikpi limpio kanapaqpas palabranwan sapa kuti yanapachikunanchik. Chaytaqa rurasun Bibliata leespa, huñunakuyman rispa chaynataq Diospa kamachikuyninkunata kasukunapaq kallpanchakuspa. Chaynapim huchallichiq kaqkunamantawan mana allinman tanqawaqninchik ruraykunamanta karunchakuyta atisun (Sal. 119:9; Sant. 1:21-25). ¡Maynatam hawkayachiwanchik cheqap palabrapa yanapayninwan hatun huchakunamantapas ‘mayllasqa’ kananchikmanta yachayqa! (1 Cor. 6:9-11.)

17. ¿Bibliapi ima consejokunatam kasukunanchik hinalla limpio kananchikpaq?

¹⁷ ¿Saqekunchikchu Diospa cheqap palabran vidanchikta hinalla limpiananta? Kaykunapi piensasun: ¿Imaynam sientekunchik mana allin kusirikuymanta cuidakunapaq consejawaptinchik? (Sal. 101:3.) ¿Kallpanchakunchikchu Diospi mana iñiq llamkaqmasinchikwan otaq estudiaqmasinchikwan yanqapas-yanqa mana kuskanchakunapaq? (1 Cor. 15:33.) ¿Kallpanchakunchikchu mana allinkunata atipanapaq chaynapi Diospa qawasqanman hina chuya kanapaq? (Col. 3:5.) ¿Karunchakunchikchu gobiernokunapa contranpi runakunapa chaqwa rurasqankumantawan nacionninkuta kuyaspanku pukllaykunapi atipanakusqankumanta? (Sant. 4:4.)

18. ¿Imaynatam Dios serviyninchikpiwan kawsakuyninchikpi limpio kayqa yanapawanchik?

¹⁸ Kaykunapi kasukuptinchikqa rurasqanchikmi allinpi tukunqa. Hanaq pachaman riy suyakuyniyoq qatiqninkunata uvas plantapa kallmanwan tupachispanmi Jesus nirqa: “Mana ruruptinqa paymi [otaq Taytaymi] kuchun ñoqapi kaq kallmakunata, ruruq kallmatañataqmi rawmapaykun [otaq limpian] aswanraq rurunanpaq”, nispa (Juan 15:2). Chaynaqa, Bibliapi yachachikuyninkunawan pipas yanapachikuspanqa astawanmi rurunqa.

Kunanpiwan hamuq tiempopi bendicionkuna

19. ¿Ima bendicionkunatam Jesuspa qatiqninkuna chaskirqaku Diosmanta astawan yachachiypi kallpanchakusqankumanta?

¹⁹ Jesuspa yachachisqanta kasukuq qatiqninkunam Pentecostes 33 watapi chuya  espirituta chaskirqaku, chaymi kallpata qorqa “kay pachapa cantonkama” willanankupaq (Hech. 1:8). Paykunaqa allintam kallpanchakurqaku ‘allin noticiata [. . .] kay pachapi llapallan runakunaman’ willaypi, wakinkuqa tiempo pasaptinmi karqaku Diospa Llaqtanpi Punta Apaq, nacionkunapi predicaq hinaspa congregacionkunata watukuqpas (Col. 1:23). ¡Achka bendicionkunatamá chaskirqaku hinaspapas runakunatam kusichirqaku!

20. a) ¿Ima bendicionkunatam chaskirqanki cosechapi astawan llamkasqaykimanta? b) ¿Imata hinalla ruranapaqmi kallpanchakunanchik?

²⁰ Humilde, allin llamkaq hinaspa vidanchikpi chuya kanapaq Diospa nisqankunata kasukuspaqa hinallam cosechapi otaq Diosmanta yachachiypi astawan llamkasun. Runakunaqa aychapa munasqallanpi hinaspa qollqe maskayllapim afanakunku, ñoqanchikmi ichaqa sasachakuykunamantawan hukmanyasqa kaymanta librakunchik hinaspa kusisqa kanchik (Sal. 126:6). Chaynataq, imamantapas puntataqa yachanchikmi ‘Señorpaq llamkasqanchikqa mana yanqa kasqanta’ (1 Cor. 15:58). Chakrayoq otaq Jehová Diosqa llamkasqanchikmanta hinaspa ‘pay kuyasqanchikmantam’ wiñaypaq bendeciwasun (Heb. 6:10-12).

[Willakuy]

¿Entienderunchikchu kaykunamanta?

• ¿Imanasqam humilde kananchik cosechapi astawan llamkananchikpaq?

• ¿Imatam rurachwan Diosmanta yachachiypi allin llamkaq kanapaq chaynataq hinalla chayta ruranapaq?

• ¿Imanasqam cosechaqkunaqa Dios serviyninchikpiwan kawsakuyninchikpi hinalla limpio kananchik?

[Kay yachachikuypa tapukuyninkuna]

[17 kaq paginapi dibujo]

Humilde kaymi yanapawanchik mana tukuy imayoq kaspa Diospa munayninta astawan ruranapaq