¿Imatam Jehová Diospa punchawnin qawachinqa?

‘Jehová Diospa punchawninmi hamunqa suwa hina, chaypiqa [. . .] kay pachapas chaynataq chaypi rurasqankupas rikusqam kanqa.’ (2 PED. 3:10, NM.)

1, 2. a) ¿Imaynatam puchukanqa kay pachapi mana allin ruraqkunaqa? b) ¿Ima tapukuykunamantam yachasunchik?

MANA allin ruraq runakunaqa piensankum Jehová Diospa mana yanapasqan kikillanku kay Pachata allin kamachiy atisqankuta, chayqa hatun llullam (Sal. 2:2, 3). ¿Imapas wiñaypaq takyanmanchu llullapi cimientasqa kaspanqa? Manamá. Ichaqa manam suyanachu Satanaspa munaychakusqan kikillanmanta chinkanantaqa. Jehová Diosmi puchukachinqa. Chaytaqa ruranqa tanteasqan tiempopi hinaspa munasqanman hinam, kuyakuq hinaspa allin ruraq kasqanta respetaspan (Sal. 92:7; Pro. 2:21, 22).

² Pedrom qellqarqa: “Diospa punchawninmi hamunqa suwa hina, chaypiqa cielokunam tukunqa hatun qapariywan, ichaqa cielopiwan kay pachapi kaqkunam llumpay rupasqanrayku chullunqa hinaspa kay pachapas chaynataq chaypi rurasqankupas rikusqa kanqa”, nispa (2 Ped. 3:10, NM). ¿Imawanmi tupachisqa kachkan ‘cielokunawan’ ‘kay pachaqa’? ¿Imataq ‘chulluchisqa’ kananpaq ‘cielopiwan kay pachapi kaqkunaqa’? ¿Imatam Pedro niyta munarqa ‘kay pachapas chaynataq chaypi rurasqankupas rikusqam kanqa’ nispan? Kaykunamantam yachananchik, chaynapim allin preparasqa kasun manchakuypaq tukuy ima pasakuptin atipanapaq.

Tukunanpaq kaq cielokunawan kay pacha

3. ¿Imataq ‘cielokunaqa’ 2 Pedro 3:10 nisqanman hina, chaynataq imaynatam chinkachisqa kanqa?

³ Wakinpim Bibliaqa kamachiqkunata tupachin ‘cielowan’, runakunata munaychakusqankurayku (Isa. 14:13, 14; Apo. 21:1, 2). Tukuq ‘cielokunaqa’ tupanmi Diosmanta karunchasqa gobiernokunawan. ¿Imanasqataq nin “hatun qapariywan” otaq huk Bibliapa nisqanman hinaqa “upayachikuq qapariywan hina” tukunanta? Yaqachá chaylla chinkachisqa kanan kaptin.

4. ¿Imataq ‘kay pachaqa’ hinaspa imaynatam chinkachisqa kanqa?

⁴ ‘Kay pacha’ nispanqa rimachkan Diosta mana kasukuq runakunamantam. Noeypa tiemponpipas runakunaqa mana allin ruraqllañam karqaku, chaymi Diospa nisqanman hina sinchi parawan puchukachisqa karqaku. “Kunan kaq cielokunatawan kay pachataqa Diospa rimarisqanmi waqaychachkan ninapaq hinaspa juicio punchawpaq chaynataq mana allin runakunapa puchukanan tiempopaq.” (2 Ped. 3:7, NM.) Sinchi parawanqa huk kutillapim mana allin ruraqkunata puchukachirqa, ‘hatu-hatun ñakariy’ tiempopiqa manam chaynachu kanqa (Apo. 7:14). Puntataqa, Diosmi kay pachapi kamachiqkunata kallpanchanqa cheqnisqan ‘Hatun Babiloniata’ otaq rurasqankuwan chuchumika warmi hina qachachakuq llapallan religionta puchukachinankupaq (Apo. 17:5, 16; 18:8). Tukuyninpiñataqmi Jehová Diosqa Armagedon guerranwan, Satanaspa munaychakusqan puchuq runakunata chinkachinqa (Apo. 16:14, 16; 19:19-21).

“Cielopiwan kay pachapi kaqkunam [. . .] chullunqa”

5. ¿Imataq cielopiwan kay pachapi kaqkunaqa?

⁵ Pedropa qellqasqanpi, ¿imataq ‘chulluchisqa’ kananpaq ‘cielopiwan kay pachapi  kaqkunaqa’? Chaykunaqa: Diospa munasqanpa contranpi runakunapa imayna kanankupaq, ruranankupaq, haypayta munanankupaqwan kawsanankupaq kallpanchaqkunam. ‘Cielopiwan kay pachapi kaqkunapitaqmi’ kachkan ‘kay pachapi kaq espiritu’ otaq runakunapa ruray munasqanku, chaymi “Diosta mana kasukuqkunataqa” controlachkan (1 Cor. 2:12; leey Efesios 2:1-3). Chay espiritum Diablopa munaychakusqanpiqa wayra hina maypipas kachkan. Chaymi “mana rikuy atinakunapi munaychakuqpa” otaq Satanaspa piensasqanman hina runakuna piensanku, tanteanku, rimanku hinaspa rurankupas.

6. ¿Imaynatam runakuna qawachinku kay pachapi kaq espirituman hina kawsasqankuta?

⁶ Kay pachapi kaq espirituman hina kawsaqkunam cuenta qokuspapas otaq manapas, Satanaspa munasqanman hina piensanku hinaspa munanku, chaymi qatipakunku paypa piensasqantawan rurasqanta. Hinaspa munasqallankuta ruranku, Diospa munasqanpiqa manam preocupakunkuchu. Sapa kutim hatunchakunku, kikillankupaq munanku, autoridadkunapa contranpi churakunku hinaspa ‘aychapa [. . .] chaynataq ñawipa munasqankunawan’ aysachikunku (leey 1 Juan 2:15-17).

7. ¿Imanasqataq sonqonchikta cuidananchik?

⁷ Ancha allinmi Bibliapa kayna nisqanta kasukuyqa: “Sonqoykitayá cuiday” (Pro. 4:23, NM). Chaypaqqa Diospa yachachiwasqanchikman hinam akllananchik amistadninchikta, kusirikuyta, leesqanchikta hinaspa Internetpipas. Pablom niwanchik: ‘Cuidakuychikyá, amayá engañachikuychikchu yachayninkumantawan [. . .] yanqakunalla rimaqkunawanqa, paykunaqa manam Cristomanchu hapipakunku aswanqa runakunapa costumbrenkunallamanmi hinaspa kay pachapi yachachikuykunallamanmi’ (Col. 2:8). Jehová Diospa punchawnin hichpallapiña kasqanraykum nisqantaqa kunan astawan kasukuna, chaypim ‘Satanaspa munaychakusqan’ ‘cielopiwan kay pachapi kaqkuna’ ninapi chulluchisqa kanqa. Ninata hinam Diospa piñakuyninta mana aguantanqakuchu. Malaquias 4:1 yaqa chaynata nin: “Ñam chayamuchkanña horno hina rupachkaq punchawqa, chay punchawpiqa llapallan hatunchakuq runakunapas chaynataq llapallan mana allin ruraq runakunapas lenguachkaq ninapim kañasqa kanqaku. Chaynaqa chay punchaw hamuqmá paykunataqa kañarunqa”, nispa.

‘Kay pachapas chaynataq chaypi rurasqankupas rikusqam kanqa’

8. ¿Imaynatam “kay pachapas chaynataq chaypi rurasqankupas rikusqa kanqa”?

⁸ ¿Imatam Pedro niyta munarqa ‘kay pachapas chaynataq chaypi rurasqankupas rikusqam kanqa’ nispa? Kaywanqa nirqam hatu-hatun ñakariy tiempo chayamuptin kay mundo mana pakasqa kananmanta. Jehová Diosmi sutillata qawachinqa Satanaspa munaychakusqanqa Paypa chaynataq Gobiernonpa contranpi kasqantawan puchukanantapas. Isaias 26:21 willakun chay tiempo imayna kananmanta: ‘[Diosqa] maypi kasqanmantam lloqsimunqa. Mana allin rurasqankumanta castigananpaqmi hamunqa. Kay allpaqa qawachinqam wañuchisqakunapa yawarninta [. . .], manañam pakanqachu wañuchisqakunata’.

9. a) ¿Imakunatam mana qawanachu, hinaspa imanasqa? b) ¿Imaynatam kawsananchik, hinaspa imanasqa?

⁹ Jehová Diospa punchawninpiqa, kay pachapi kaq espiritupa munasqanman hina kawsaqkunam mana penqakuspa qawachinqaku imayna kasqankuta, kikinkupurapas wañuchinakunqakum. Kusirikusqankupi maqanakuykunata qawasqankum runakunata preparachkan ‘sapakama soldadomasinpa makinta hapispa’ tuksinakunanku punchawpaq (Zac. 14:13). Chaymi mana qawanachu hatunchakuyman apaq, maqakuq kayta yachachiq hinaspa Diospa cheqnisqan peliculata, librota chaynataq televisionpi otaq computadorapi pukllaykunatapas (2 Sam. 22:28; Sal. 11:5). Chaynataq chuya espirituman hinam kawsananchik,  chaymi yanapawasun Diospa piñakuyninpi aguantanapaq (Gal. 5:22, 23).

‘Mosoq cielokunawan mosoq allpa’

10, 11. ¿Imataq ‘mosoq cielokuna’ hinaspa ‘mosoq allpaqa’?

¹⁰ (Leey 2 Pedro 3:13.) ¿Imataq ‘mosoq cielokunaqa’? Diospa Gobiernonmi, 1914 watapim cielopi churasqa karqa ‘mana judio runakunapa munaychakusqan tiempo tukuruptin’ (Luc. 21:24). Chay gobiernopim kamachimunqaku Jesuswan 144.000 runakuna, paykunaqa yaqa llapankuñam cielopi kachkanku. Apocalipsis librom paykunamanta kaynata nin: ‘Chuya llaqtam otaq mosoq Jerusalenmi Diospa qayllanmanta uraykamurqa. Allichasqam karqa novionpaq sumaqllaña adornasqa novia hina’, nispa (Apo. 21:1, 2, 22-24). Ñawpaq Israel nacionpim Jerusalenmanta kamachiqku. Mosoq pachapiqa kamachimunqaku Jesuswan novianmi otaq mosoq Jerusalenmi. Kay llaqtaqa ‘Diospa qayllanmantam uraykamunqa’ otaq kay Pachata gobiernanqa.

¹¹ ‘Mosoq allpaqa’ kanqa Diospa Gobiernonta kasukuq mosoq pachapi kawsaq allin runakunam. Kunanpas Dios serviyninchikpiqa paraisopipas kachkanchikman hinam tarikunchik. Hamuq tiempopim, kunan chayna kasqanchikqa aswanraq kanqa ‘kay pacha mosoqyachisqa kaptin’ (Heb. 2:5). ¿Imatam rurananchik chaypi kawsanapaq?

Jehová Diospa hatun punchawninpaq preparakusun

12. ¿Imanasqam Diosta mana serviqkunaqa mancharisqa kanqaku Paypa punchawnin chayamuptin?

¹² Pablopas Pedropa nisqanman hinam willawanchik Diospa punchawninqa “suwa” hina hamunanta, mana musyayllata otaq qonqayllamanta (leey 1 Tesalonicenses 5:1, 2). Rikchan-rikchanlla tarikuq cheqap cristianokunapas admirakusunchá qonqaymanta chayaramuptin (Mat. 24:44). Jehová Diosta mana serviqkunaqa manam mancharisqallachu kanqaku. Pablom qellqarqa: ‘“Hawkañam, seguroñam kachkanchik” nichkaspankum [. . .] qonqayllamanta puchukarunqaku, dolorwan hapichikuq warmi hinam kanqaku, manapunimá lluptinqakuchu’, nispa (1 Tes. 5:3).

13. ¿Imatam rurananchik runakunapa “hawkañam, seguroñam kachkanchik” nisqankuwan mana engañachikunapaq?

¹³ Runakunapa “hawkañam, seguroñam kachkanchik” nisqankuqa demoniokunapa llullakuspa creechisqankum, Jehová Dios serviqkunataqa manam engañanqachu. Pablom nirqa: ‘Qamkunam ichaqa mana tutapichu kachkankichik, chayna hamunan punchawqa manam suwata hinachu tarimusunkichik. Qamkunaqa kanchaymanta hinaspa punchawmanta kaqmi [. . .] kankichik’, nispa (1 Tes. 5:4, 5). ¡Kallpanchakunanchikmi Diosmanta hinalla yachananchikpaq hinaspa Satanaspa kay pachapi mana allin rurasqankunamanta karunchakunapaqpas! Congregacionpi pantay yachachiqkuna rikurimunanmantam Pedroqa qellqarqa: “Ñawpaqmantaraq kaykunata yachachkaspaqa cuidakuychikyá mana allin runakuna pantachisunaykichikmanta chaynapi qaqa hina sayachkaspaqa ama wichiykunaykichikpaq” (2 Ped. 3:17).

14, 15. a) ¿Imatam Jehová Diosqa ñawpaqmantaraq willawarqanchik? b) ¿Ima willakuykunatam kasukunanchikpuni?

 ¹⁴ Jehová Diosqa manam “cuidakuychikyá” otaq qawan-qawanllayá kaychik nispallachu niwanchik. Aswanqa favorecewanchikmi “ñawpaqmantaraq” hamuq tiempopi ima pasananmanta llapanta willawaspanchik.

¹⁵ Rikchan-rikchanlla kanamanta congregacionpi yuyarichiwaptinchikmi, wakinkuqa kaqpaqpas hapinkuchu otaq burlakunku. Ichapas ninku: “Chunkantin watañam hina kaqllata uyarini”, nispa. Ichaqa yachanankum, chaynata nispankuqa manam confianza sirvientepa contrallanpichu rimachkanku aswanqa Jehová Diospa chaynataq Churinpa contranpim. Diosmi sapakamata niwanchik ‘suyanapaq’ otaq rikchan-rikchanlla kanapaq (Hab. 2:3). Chaynataqmi Jesuspas niwanchik: “Qawan-qawanllayá kaychik, manam yachankichikchu ima punchawmi Señornikichik kutimunaytaqa”, nispa (Mat. 24:42). Pedropas nintaqmi: “¡Mayna chuya sonqom Diosta servispa kawsanaykichik! Diospa punchawnin chayamunantayá suyaychik”, nispa (2 Ped. 3:11, 12). Yuyayniyoq sirvientemanta Diospa Llaqtanpi Punta Apaqkunaqa manam haykapipas chay willakuytaqa yanqata hinaqa qawanqakuchu.

16. ¿Imaynam mana kananchikchu, hinaspa imanasqa?

¹⁶ Patronniymi unamuchkan niqqa ‘mana allin sirvientem’ (Mat. 24:48). Paykunaqa kanku 2 Pedro 3:3, 4 nisqanpi runakunapa partenmi, chaypim nin: ‘Qepa punchawkunatam hamunqa burlakuqkuna hinaspa [. . .] munasqallankupi purinqaku’, nispa. Paykunaqa burlakunkum Diospa punchawninta suyaspa kawsaq hinaspa kasukuq cristianokunamanta. Diospa Gobiernonpaq ruranankumantaqa kikillankupi piensaspankum munasqallankuta ruranku. ¡Amayá chaynaqa kasunchu nitaq vidanchiktapas peligropi churasunchu! Aswanqa ‘ama qonqasunchu, Señorpa pacienciakusqan salvakunapaq’ kasqanta chaynataq hinalla tukuy tiemponchikwan predicasun hinaspa runakunata yachachisun. Manam preocupakunanchikchu haykapi imakuna pasananmantaqa, Jehová Diosllam chaytaqa tanteanan (2 Ped. 3:15; leey Hechos 1:6, 7).

Salvawaqninchik Diospi confiasun

17. ¿Imaynam cristianokunaqa Jerusalenmanta lloqsirqaku Jesuspa kamachisqanta kasukuspa, hinaspa imanasqam chaynata rurarqaku?

¹⁷ Romamanta tropakunam 66 watapi Judeaman purmachinankupaq yaykurqaku. Kasukuq cristianokunaqa yacharqakum Jesuspa kamachisqanta kasukuspa Jerusalenmanta chaylla lloqsinankuta, chaynatam rurarqaku (Luc. 21:20-23). ¿Imanasqam mana iskayrayaspa chaylla lloqsirqaku? Paykunaqa manam  qonqarqakuchu Jesuspa nisqanta. Payqa willarqañam lloqsispanku sasachakuypi kanankuta, ichaqa segurom karqaku kasukuptinku Jehová Dios mana saqenanmanta (Sal. 55:22).

18. Lucas 21:25-28 nisqanman hina, ¿imaynatam qawanayki hatu-hatun ñakariy tiempo chayamunanta?

¹⁸ Ñoqanchikpas Jehová Diospim confiananchik, payllam salvawanchikman kay pachapi hatu-hatun ñakariy kaptin, chayna ñakariyqa manam haykapipas karqachu. Mana allin ruraqkunamanta puchuq runakunata Dios manaraq chinkachichkaptinmi, hatu-hatun ñakariy tiempopi mana kasukuq runakunaqa huk punchaw ‘wañuypa patanpi hina kanqaku mancharikuymanta kay pachapi tukuy imapa pasasqanwan’. Ichaqa, Jehová Diosta serviqkunam manchakuymantaqa mana katkatatanqakuchu. Aswanqa kusisqam kanqaku librasqa kananku hichpallapiña kasqanmanta yachaspanku (leey Lucas 21:25-28).

19. ¿Imamantam yachasun qatiqnin estudiopi?

¹⁹ Mana allin ruraqkunamanta hinaspa ‘cielopiwan kay pachapi kaqkunamanta’ karunchakuqpaqmi sumaq suyakuy kachkan. Ichaqa, wiñay kawsayta chaskinapaqqa mana allinkunamanta karunchakuspapas kallpanchakunam rurayninchikwan hinaspa sumaq kayninchikwanpas Diosta agradanapaq, chaymantam qatiqninpi yachasun (2 Ped. 3:11).

¿Explicayta atiwaqchu?

• ¿Imawanmi tupachisqa kachkan kunan ‘cielokunawan’ ‘kay pachaqa’?

• ¿Imataq ‘cielopiwan kay pachapi kaqkunaqa’?

• ¿Imataq ‘mosoq cielokuna’ hinaspa ‘mosoq allpaqa’?

• ¿Imanasqataq tukuy imapi Diospi confianchik?

[Kay yachachikuypa tapukuyninkuna]

[5 kaq paginapi dibujo]

¿Imaynatam sonqonchikta waqaychachwan hinaspa kay pachapi kaqkunamanta karunchakuchwan?

[6 kaq paginapi dibujo]

¿Imaynatam qawachinchik ‘Señorpa pacienciakusqan salvakunapaq’ kasqanta?