Warmaykita yachachiy leeytawan estudiayta kuyananpaq

LEEYTAWAN estudiayta yachachiymi wawa-churikunata vidankupi allintapuni yanapan. ¡Maynatam llapanku kusikunku chayta ruraspankuqa! Achka runakunam kusikuywan yuyarinku tayta-mamanku leepusqankuta. Leeyqa kusikuyta tarichiwaspanchikpas, achkapim yanapawanchik. Astawanraqmi Dios serviqkunataqa, Bibliata estudiaptinchikmi Dioswan amistadninchik aswan allin tarikun. Churiyoq cristianom nirqa: “Leespa chaynataq estudiaspanchikmi imapas aswan chaninchasqanchiktaqa yachanchik”, nispa.

Sapa kuti allinta estudiaymi wawa-churikunata yanapanqa Jehová Diospa amistadnin kanankupaq (Sal. 1:1-3, 6). Manam leeytaraqchu yachananchik salvasqa kanapaqqa, ichaqa Dios servisqanchikpim anchata yanapawanchik, chaynatam Biblia nin. Ejemplopaq, Apocalipsis 1:3 nin: “Mayna kusisqam kay libro leeqkunaqa, Diospa revelasqanta leeptin uyariqkunapas”, nispa. Chaymantapas Dios yanapaptinmi Pabloqa Timoteoman consejasqanpi qawachirqa estudiasqanta allinta atiendenanpaq. Nirqam: “Chaytaqa sonqoykipiyá allinta takyachiy”, nispa. ¿Imapaq? “Chaynapim llapallanku qawanqaku imaynam aswan-aswan ñawpaqman risqaykita.” (1 Tim. 4:15.)

Manamá lliwchu allintaqa servichikun allin leeq otaq estudiaq kasqantaqa. Achkam allin leeq otaq estudiaq kanku, ichaqa tiemponkutam usuchinku mana ancha yanapaqnin kaqkunapi. Churi-wawayoq kaspaykiqa, ¿imatam rurawaq paykunapa allinninkupaq kaq yachachikuy estudiayta munanankupaq?

Kuyakuytawan ejemplota qoyqa allinmi

Warmakunaqa kusisqam kanqaku kuyakuywan estudiachiptikiqa. Owenwan Claudia iñiqmasinchikkunam yuyarinku warmanku imayna tarikusqankumanta: “Chay punchaw chayamunantañam munaqku. Paykunapaqmi sapaqchasqa tiempo karqa, allin hinaspa waqaychasqam sientekuqku. Kuyaspayku chayta rurasqaykumantam cuentata qokurqaku”, nispa. Chayna kuyakuywan yachachisqankum warmakunata yanapanqa mozo-sipasyay qallarisqanku sasa tiempopipas. Owenpawan Claudiapa warmankunam kunanqa precursorkuna kanku, kunanpas yanapachikunkum leeytawan estudiayta munanankupaq yachachisqankumanta.

Chaymantapas qanmi astawanqa allin ejemplo kanayki. Sapa kuti leesqaykitawan estudiasqaykita qawasuspaykiqa, paykunapas chaynatachá ruranqaku. Ichaqa, ¿leey qamta mana gustasuptikiqa? Chayna kaptinqa, allinmi kanman puntapi imata ruranaykipaq otaq imayna kasqaykita cambiayqa (Rom. 2:21). Sapa punchaw leenaykipaq tiempochakuspaykiqa allin ejemplotam  qonki. Paykunaqa qawanqakum Biblia leesqaykita, huñunakuypaq preparakusqaykita hinaspa familiawan estudiasqaykita, hinaspam cuentata qokunqaku chaykuna ruray ancha allin kasqanmanta.

Qawasqanchikman hinaqa, kuyakuywan yachachiyqa hinaspa allin ejemplo qoypas ancha allinmi. Ichaqa, ¿imatawanraqmi rurawaq leeyta munanankupaq?

Leeytaqa kuyanku leespam

Warmakuna leeyta astawan munanankupaqqa, taksacha kasqankumantam libronkuna kanan. Warmacha kaptin librokunata kuyananpaq yachachisqa huk ancianom nirqa: “Hapinankuta saqeychik. Amistadninkuta hinaspa vidankupi yanapaqninkuta hinaraqmi qawanqaku”, nispa. Manaraq leeyta yachachkaspankupas achka warmachakunam kuyanku Bibliamanta willakuq libroy hinaspa Aprendamos del Gran Maestro librokunata. Warmaykikunapaq leepuspaykiqa yanapankim allinta rimanankupaq, astawanqa yachanqaku Diosmanta kaqkunata hinaspa Bibliapa ‘yachachisqan rimaykunatam’ (1 Cor. 2:13).

Uyarikuqta sapa punchaw leepuy. Chaynata ruraspaykim yachachinki allinta rimanankupaq hinaspa leeyta munanankupaq. Kusisqam leepunayki, chaynata ruraptikiqa paykunapas leeytachá munanqaku. Munanqakuchá huk willakuyta sapa kuti leepunaykita. Munasqanta ruraychik. Cuentatachá qokunki huk willakuykunamanta yachay munasqanta. Ichaqa, chaykunata rurananpaqqa ama obligaychu. Jesuspa ejemplonta qatipakuy, payqa runakunatam “yachachirqa entiendey atinankukamalla” (Mar. 4:33). Ama hikutaychu. Chaynata ruraptikim leepunayki hora chayamunanta ganasllawanña suyanqaku hinaspa librokunata kuyanqaku.

Yanapay rimananpaq hinaspa leesqaykichikmantapas kuska rimaychik. Mana unaymantam kusikuywan qawanki taksachallaraq kaspankupas palabrakuna reqsisqankutawan rimasqankuta hinaspa ima ninanmanta entiendesqankutapas. Leesqaykichikmanta rimariptikichikqa astawanraqchá ñawparinqaku. Warmachakuna leeyta munanankupaq ima ruranamanta yanapaqmi nin, imaynam paykunawan rimayqa “yanapan leespanku palabrakunata reqsinankupaq hinaspa entiendenankupaqpas. [. . .] Leeytawan qellqayta chayllaraq yachaq warmapaqqa ancha allinmi paywan rimayqa, yanapaqnin kaqmantaqa [. . .] aswanraqmi”.

Leenanpaq niy hinaspa kallpanchay leesqanmanta tapukunankupaq. Otaq leesqanmanta tapukuykunata ruray hinaspa niy achka kutichiykunamanta hukninta akllananpaq. Chaynatam entiendenqaku librokunapi yachachikuykuna kasqanta hinaspa leesqan palabrakunapa ima ninanmantapas. Kayna yachachiyqa allinpunim, astawanraqmi Bibliamanta horqosqa qellqanchikkunawanqa, Bibliaqa ima libromantapas aswan allinmi (Heb. 4:12).

Allin leeq kanapaqqa tiempochakuspam ensayana. Chayrayku alabay warmaykichikkuna allin rurasqanmanta. Chaynata ruraptikim leeyta astawanraq munanqaku hinaspa kusikuywan chaytaqa sapa kuti ruranqaku.

Kusichikuq hinaspa allinninchikpaq ruraymi

Warmakuna estudiayta yacharuspankuqa leeytam astawan chaninchanku. Estudiaspaqa imakunamantapas yachananchikmi, entiendenataqmi estudiasqanchik wakin yachachikuykunawan imayna tupasqanta, hinaspa yuyana chaynataq servichikuna. Allin estudiayta yacharuq hinaspa chay rurasqan yanapasqanmanta cuenta qokuq warmaqa, estudiasqantam qawan kusikuywan hinaspa allinninpaq kasqantapas (Ecl. 10:10).

Allin estudiaq kananpaq yachachiy. Chaytam rurawaq Familiawan Diosta Yupaychanapaq Tutapi, sapa punchaw estudianapaq  qellqata leespaykichik hinaspa chayman rikchakuqta ruraspaykichikpas. Puntataqa, asllata estudianankupaq hawkalla tiyasqankum yanapanqa atencionwan uyarinankupaq, chayqa ancha allinmi yachanapaq. Tupachinankupaq yanapanapaqqa, niy leesqanwan yachasqankuna imapi tupasqanmanta willasunaykipaq. Kamachiy pisi rimayllapi yachamusqanmanta willananpaq, chayta ruraspanmi yachanqa hinaspa astawan yuyanqapas. Yachasqanmanta allin kaqkunata kaqmanta yuyarisqanmi mana qonqarunanpaq yanapanqa. Warmakuna taksallaraq kaspankupas atencionwan uyarinankupaqqa, yanapanqam estudiaptinku hinaspa huñunakuypipas uyarisqankuta qellqasqanku. Kay consejokunam qamtawan warmaykikunata yanapasunkichik estudiasqaykichikta mana amirunaykichikpaq hinaspa aswan allin kananpaqpas.

Estudianapaq allin sitiota akllay. Atiendenankupaq yanapay allin hinaspa hawka tarikunankupaq sitiota maskaspa, chayqa kanan allin achkiyoq chaynataq wayrapa yaykunan sitiom. Chaymantapas estudiomanta allinta piensay. Wawayoq cristianam nin: “Leenapaq hinaspa familiantin estudianapaq tiempota rakispaqa cumplinam. Chaynapim wawa-churikunaqa yachanqaku imata ruranapaqpas chaypaq rakisqa tiempollapi rurana kasqanta”, nispa. Achka tayta-mamakunam mana munankuchu chay tiempopi imatapas hukta ruranankutaqa, chaymanta yachaq runapa nisqanman hinaqa allin estudiaq kanankupaqmi chayqa yanapan.

Allinninpaq kasqanmanta qawachiy. Chaymantapas qawachiy estudiasqaykichik kawsakuyninchikwan imapi tupasqanta, chaynapim entiendenqaku imanasqa chayta estudiasqankumanta. Huk mozo cristianom nin: “Leesqay imayna yanapawananmanta mana entiendeptiyqa, manam estudianayawanchu. Yanapawananmanta cuentata qokuspaymi ichaqa ganasllawanña rurani”, nispa. Arí, estudiasqanku yanapasqanmanta wawa-churikuna yacharuspankuqa estudiaytam munanku hinaspa chayta ruraspanku kusikunku. Imaynam chayllaraq leeyta yachaspanku leeyta munarqaku, chaynatam estudiayta munanqaku.

Aswan allin premio

Wawa-churikuna leeyta hinaspa estudiayta munanankupaq tukuy rurasqankuqa allinpim tukun, ejemplopaq: allin llamkaq hinaspa allin estudiaqmi kanqaku, allinllam hukkunawan kawsakunqaku, tukuy pasakusqanmantam allinta yachanqaku, tayta-mamankuwanpas allin amistadmi kanqaku hinaspapas leespa chaynataq estudiaspankum kusisqa kanqaku.

Astawanqa estudiay munasqankum wawa-churikunata yanapanqa Jehová Diosta servinankupaq, yuyayninkutawan sonqonkuta kicharispam entiendenqaku Bibliapa ‘mayna ancho, mayna largo, mayna uku hinaspa mayna hatun’ yachachikuyninkunata (Efe. 3:18). Achkaraqmi yachachinaykiqa kachkan. Tiempochakuspa yanapay hinaspa kallpanchakuy tukuyta ruranaykipaq, chaynapi Jehová Dios serviyta huk punchaw akllanankupaq. Sapa kuti estudianankupaq yanapaspaykiqa, iñiyninpiwan Jehová Diospa amistadnin kananpaqmi yanapanki. Arí, Jehová Diosqa mañakusqaykitam uyarisunki hinaspa bendecisunki warmaykikuna leeytawan estudiayta kuyanankupaq kallpanchakusqaykimanta (Pro. 22:6).

 [26 kaq paginapi dibujokuna hinaspa recuadro]

Leenankupaq kallpanchay

• librokunata qospa

• uyarikuqta leepuspa

• rimananpaq kallpanchaspa

• leepusqaykimanta kuska rimarispa

• leepusunaykipaq nispa

• tapukunankupaq kallpanchaspa

Estudianankupaq kallpanchay

• ejemplota qospa

• estudiayta yachachispa, yanapay:

○ atencionwan uyariyta

○ tupachiyta

○ pisillapi rimayta

○ kaqmanta yuyariyta

○ anotayta

• estudianapaq allin sitiota akllaspa

• yanapasqanmanta qawachispa