¿Imanasqataq tiempowan chayananchik?

SASAM maymanpas mana tardeyaspa chayayqa. Wakinpiqa karutam rinanchik kanqa. Ichapas carreterapi achkallaña carrokuna kanman, otaq achka rurayniyoqpas kachwan. Chayna kaptinpas tiempowan chayayqa ancha allinmi. Llamkaypiqa, tiempowan chayaqkunam confianapaq hinaspa allin llamkaq kanku. Ichaqa, tarde chayaqkunam mana allinchu wakin llamkaqkunapaq chaynataq rurasqanku hinaspa imakuna ofrecesqankupas manam allinchu kanman. Escuelaman tardeyaqkunapas manam lliw yachachikuytachu uyarinku, chaymi sasachakunku yachanankupaq. Chaynataq doctorman rinapaq otaq kiruta hampichikunapaq tardeyaypas manam yanapawanchikchu allinta hampichikunapaq.

Ichaqa, wakin sitiokunapim tiempowan chayanankupaqqa mana preocupakunkuchu, ñoqanchikpas chayna piensaytam qallaykuchwan. Chayna kaspanchikqa kallpanchakunam cambiananchikpaq. Chaypaqmi yanapawasun imam horapi chayay imanasqa allin kasqanmanta entiendey. ¿Imanasqam imam horapi chayanapaq kallpanchakunanchik? ¿Imatam rurachwan? ¿Imakunapim yanapawasun tiempowan chayasqanchikqa?

Jehová Diosqa imam horapi ruraqmi

Puntataqa, Jehová Diosninchikta qatipakuyta munaspanchikmi tiempowan chayananchik (Efe. 5:1). Payqa allin ejemplom, nisqanta rurananpaqqa manam tardeyanchu.  Respetanmi munasqankunata haykapi rurananpaq tanteasqantaqa. Ejemplopaq, mana allin ruraqkunata sinchi parawan puchukachinanpaq tantearuspanmi, Noeyta kamachirqa maderamanta “hatu-hatun wasi kaqlla buqueta” rurananpaq. Tiempo cumplikuruptinmi nirqa buqueman yaykunanpaq hinaspa willarqa: ‘Qanchis punchawmantam parachimusaq kay pachapa hawanman tawa chunka punchaw tawa chunka tuta, llapallan kawsaqkuna rurasqaytam puchukachisaq’, nispa. Tiempollanpim chayna pasarqa: ‘Qanchis punchawmantam sinchi para kay pachaman chayaramurqa’ (Gen. 6:14; 7:4, 10). Imaraq pasanman karqa Noeywan familian arca ukupi mana tarikuptinkuqa. Yachasqanchikman hinaqa, imam horapim imatapas rurarqaku servisqanku Dios hina.

Yaqa 450 wata pasaruptinmi, Abrahanman Jehová Dios prometerqa churiyoq kananpaq, paynintakamam prometesqa Miray chayamunan karqa (Gen. 17:15-17). ¿Haykapim nacenan karqa? Nirqam: ‘Hamuq wata kunan hina tiempopim’, nispa. ¿Cumplirqachu nisqanta?  Bibliam nin: ‘Chaymi Sara wiksayakuruspan Diospa nisqan tiempopi wachakurqa Abrahampa machuyayninpiña churin [Isaacta]’, nispa (Gen. 17:21; 21:2).

Bibliapiqa achka ejemplokunam kachkan Diospa imam horapi imapas rurasqanmanta (Jer. 25:​11-13; Dan. 4:20-25; 9:25). Chaymi Bibliapa nisqanman hinaqa, Jehová Diospa juzganan punchawta rikchan-rikchanlla suyayqa ancha allin. Runapa qawasqanman hina unamuptinpas, Diosmi niwanchik: “Manam tardeyamunqachu”, nispa (Hab. 2:3, NM ).

Diosta servinapaqqa manam tardeyanachu

‘Diospa sapaqchasqan fiestakunata ruranankupaqmi’, Israelita qarikunaqa tiempowan chayananku karqa rurananku sitioman (Lev. 23:2, 4). Chaynataq, Diosmi nirqa imam horapi animalkunata ofrecenankupaqpas (Exo. 29:38, 39; Lev. 23:37, 38, NM ). ¿Manachu kaykuna qawachiwanchik imam horapi servinanchikta Dios munasqanta?

Punta pachak watapim, Pabloqa Corintopi cristianokunata explicarqa huñunakuyta imayna ruranankumanta. Nisqanmanta hukninmi kaynata nin: “Tukuy imayá rurasqa kachun respetowan hinaspa ordenninpi” (1 Cor. 14:40). Kaypi nisqanman hinaqa, huñunakuyqa imam horapim qallarinan karqa. Imam horapi ruranamanta Jehová Diospa piensasqanqa manam cambianchu (Mal. 3:6). Chaynaqa, ¿imatam rurananchik Huñunakuna Salonman tiempowan chayanapaq?

¿Imatam rurana mana tarde chayanapaq?

Chaypaqqa yanapawasun tiempowan ruranapaq tanteaymi (Pro. 21:5, NM ). Piensariy imapas ruranaykipaq huk sitioman rinaykipi. ¿Yachaywan ruraychu kanman hayka tiempo chayman chayanaykipaq faltachkaptillanña lloqsiyqa? ¿Manachu aswan allinqa kanman tiempowan lloqsiy ima pasakuptinpas tiempowan chayanapaq? (Ecl. 9:11.) Mana tardeyaspa chayaq huk mozo cristiano Josey sutiyoqmi nin: “Hayka tiempopi chayanapaq allinta tanteaymi yanapawan mana tardeyanaypaq”, nispa. *

Wakinkuqa llamkayninkumantam tiempowan lloqsinanku kanqa Huñunakuna Salonman mana tardeyanankupaq. Chaytam rurarqa Etiopía nacionniyoq huk Testigo, llamkasqanpi turno cambiaruptin 45 minuto pasaruptinña huñunakuyman chayananmanta yacharuspan. Huknin llamkaqmasintam mañakurqa huñunakuynin punchawpi aswan temprano reemplazaykuptin 7 horata paypa rantinpi llamkananpaq.

Warmayoqkunapaqmi huñunakuykunaman tiempowan chayayqa aswan sasa. Yaqa llapanpim warmakunata maman alistan, ichaqa lliwmi yanapanakunanku. México nacionmanta Esperanza sutiyoq cristianam, 8 wawankunata sapallan uywan (5 hinaspa 23 watayoqkunam kanku), paymi nin imaynata tiempowan chayasqankumanta: “Mayor warmi wawaykunam yanapawan sullkankunata alistaypi. Chaynapim tiempo haypawan wasiypi ruranaykunata tukunaypaqwan allichakunaypaq hinaspa imam horapi lloqsinaykupaqpas”, nispa. Paykunaqa yachankuñam wasinkumanta imay hora lloqsinankuta, chaypaqqa llapankum yanapanakunku.

Huñunakuyman tiempowan chayayqa yanapawanchikmi

Huñunakuyman tiempowan chayasqanchik yanapawasqanchikmanta entiendespaqa, kallpanchakusunmi aswan tiempowan chayanapaq. Huñunakuna Salonman temprano chayananpaq kallpanchakuq Sandra sutiyoq sipasmi nin: “Astawanqa gustawan temprano chayaspay iñiqmasiykunata saluday hinaspa paykunawan rimaspa astawan reqsiymi”, nispa. Arí, sapa kuti chayta ruraymi yanapawanchik iñiqmasinchikkunapa aguantasqankumantawan tukuy  sonqonkuwan kasukusqankumanta yachanapaq. Ñoqanchikpas paykunataqa kallpanchachwanmi paykunawan rimaspa; chaynatam kallpanchasun ‘kuyanakunapaq hinaspa allinta ruranapaqpas’ (Heb. 10:24, 25).

Huñunakuyta qallarinapaq takiwan oracionqa Dios yupaychasqanchikpa partenmi (Sal. 149:1). Takispaqa Jehová Diostam alabanchik, imayna kanamanta yuyanchik chaynataq kallpanchawanchik kusisqa predicanapaqpas. ¿Imatam nichwan qallariyninpi oracionmanta? Ñawpaq tiempopim Jehová Diosqa templota suticharqa: ‘Mañakuwananku wasi’, nispa (Isa. 56:7). Kunanpas, huñunakunchiktaqmi Diosta mañakunapaq. Qallariypi orakuyqa manam yanapawananchikpaq hinaspa espiritunta qowananchikpaq mañakuyllachu, yanapawanchiktaqmi yachachikuyta entiendenapaq yuyayninchiktawan sonqonchikta preparanapaqpas. Chaymi kallpanchakunanchik qallariypi takipaq chaynataq oracionpaq tiempowan chayanapaq.

Iskay chunka kimsa watanpi, Helen sutiyoq cristianam nin imanasqa huñunakuyman tiempowan chayasqanmanta: “Piensasqayman hinaqa chayta ruraspaymi Jehová Dios kuyasqayta qawachini, paymantam hamun tukuy yachachikuykuna, qallariypi takiwan oracionpas”. ¿Manachu pay hina piensananchik? ¡Chaynamá! Chaynaqa, kallpanchakusunyá imata ruranapaqpas tiempowan chayanapaq, aswanqa Jehová Diosta yupaychasqanchikpi.

[Willakuy]

[26 kaq paginapi dibujo]

Tiempowan allichakuy

[26 kaq paginapi dibujo]

Qonqaymanta ima pasakuptinpas tiempoyki kananpaq tanteay

[26 kaq paginapi dibujokuna]]

Huñunakuyman tiempowan chayayqa yanapawanchikmi