Imaynatam librawanchik Jesuspa wañukusqan

“Churipi iñiqqa wiñay kawsayniyoqmi, paypi mana iñiqmi [otaq mana kasukuqmi] ichaqa mana wiñay kawsayniyoqchu, mana iñiqpaqqa Diospa sinchi piñakuyninmi kachkan.” (JUAN 3:​36.)

1, 2. ¿Imanasqataq qallaykurqaku kay revista rurayta?

OCTUBRE 1879 watapim, tawa kaq lloqsimuq kayna revista nirqa: “Pikunapas Bibliata cuidadowan estudiaqkunaqa admirakunqachá Cristopa wañukusqan ancha valorniyoq kasqanmanta”. Tukuyninpim nirqataq: “Huchanchikrayku Cristopa wañusqanta negaqta otaq menosyachiqtaqa imatapas qepanchanam”, nispa (leey 1 Juan 2:1, 2).

² Jesus librawananchikpaq wañusqanmanta Bibliapa yachachisqanta qawachinanpaqwanmi, kay revistaqa rurakuyta qallaykurqa julio 1879 watapi. Yaqa 1900 watakunapim, cristiano tukuqkunaqa iskayrayarqaku huchamanta Jesuspa wañukusqan librawasqanchikmanta. Chaymi ‘imam horapi mikunapaq’ qosqa karqa chay revistapi yachachikuykunaqa (Mat. 24:45). Chay punchawkunapim, imapas kikillanmanta rikurimusqanpi achka creerqaku, chayna creesqankuqa manam tuparqachu mana pantaq runa huchallikuyman wichiykusqanwanqa. Chayna creesqankum runakunata piensachin kikillankumanta sapa kuti aswanraq allinyasqankuta hinaspa librasqa kaytapas manaña necesitasqankuta. Chaynata piensasqankuraykum, Timoteoman Pablopa kayna nisqanqa ancha allin: ‘Yachasqaykikunatayá sonqoykipi takyachiy, amayá uyariychu [. . .] yanqa rimaqkunataqa nitaq iñisqanchikpa contranpi: “Ñoqaykuqa yachaywanmi rimaniku” nispa yanqa rimaqkunatapas.  Chayna yachay tukuq runakunata qatispankum wakin iñiqkunapas Diosmanta karunchakururqaku’ (1 Tim. 6:20, 21).

3. ¿Ima tapukuykunamantam yachasun?

³ Manam pipas munanchikchu ‘Diosmanta karunchakuytaqa’. Chaymi tapukunanchik: “¿Imanasqataq necesitani librasqa kayta? ¿Imaynataq tarikurqaku Dioswan Jesusqa? ¿Imata ruraspaymi yanapachikusaq Diospa piñakuyninmanta librakunapaq rurasqanwan?”

Diospa piñakuyninmanta librakuqkuna

4, 5. ¿Imataq qawachin mana allin ruraqkunaqa Diospa piñakuyninpaq kasqankuta?

⁴ Bibliam niwanchik hinaspa tukuy imapa pasakusqanmi qawachin Adanpa huchallikusqan tiempomanta, runakunapaq ‘Diospa sinchi piñakuynin kasqanta’ (Juan 3:36). Chaymi pipas wañuymanta mana librakuyta atinchu. Diospa enemigon Satanas gobiernaspanqa manam runakunata ñakarisqanmanta librayta atirqachu, manataqmi ima gobiernopas runakunapa lliw necesitasqantaqa qorqachu (1 Juan 5:19). Runaqa hinallam kawsan guerrallapi, dañanakuyllapi hinaspa wakchayayllapi.

⁵ Sutillam qawakun mana allin ruraqkunata Diospa mana bendecisqanqa. Pablom nirqa: ‘Diosmi imayna piñakusqanta hanaq pachamanta qawachimun [. . .] mana allin kawsaqkunapaq’, nispa (Rom. 1:18-20). Hinaptinqa, mana allin rurasqanta mana saqey munaqqa otaq Diospa mana agradonpaq ruraspanqa, mana allin rurasqanmantam ñakarinqa. Kunanmi, runakunaqa Diospa piñakuyninmanta yachachkanku juzgananmanta willaptinchik, chayqa tupachisqam kachkan Satanaspa munasqan ruraqkunaman Diospa piñakuyninwan huntasqa 7 tazonkunata talliywan. Chayna willakuykunam lloqsimun achka qellqanchikkunapi (Apo. 16:1).

6, 7. ¿Ima ruraypim hanaq pachaman riy suyaqkuna puntarinku, hinaspa ima punkum hinalla kichasqa kachkan Satanaspa makinpi kaqkunapaq?

⁶ Chaynaqa, ¿llumpay tardeñachu Diablopa munaychakusqanmanta librakunapaq hinaspa Diospa favorninta tarinapaq? Manam, Diosqa iska-iskaytam punkuta kichan allinyanakunanchikpaq. Cristopa rantinpi kaqkuna otaq hanaq pachaman riqkunam, lliw runakunapa allinninpaq predicacionpi puntarinku. Chayta ruraspankum invitanku ‘Dioswan allinyanakunankupaq’ (2 Cor. 5:20, 21).

⁷ Pablom nirqa ‘hamuq tiempopi’ piñakuymanta Jesus librawananchikta (1 Tes. 1:10). Piñakuynintam Jehová Diosqa qawachinqa, huchankumanta mana wanakuy munaqkunata wiñaypaq puchukachispan (2 Tes. 1:6-9). ¿Pitaq librakunqa? Bibliam nin: “Churipi iñiqqa wiñay kawsayniyoqmi, paypi mana iñiqmi ichaqa mana wiñay kawsayniyoqchu, mana iñiqpaqqa Diospa sinchi piñakuyninmi kachkan”, nispa (Juan 3:36). Qawasqanchikman hinaqa, Diospa piñakuynin chayamuptin hinaspa mana allin ruraqkuna puchukachisqa kaptinqa Jesuspi chaynataq librawananchikpaq wañukusqanpi iñiqkunam salvakunqaku.

Imaynataq librawananchikpaq Jesuspa wañukusqanqa

8. a) ¿Imayna kawsakuytam tarinmanku karqa Adanwan Eva? b) ¿Imaynatam qawachisqa karqa Jehová Dios haykapipas allin ruraq kasqan?

⁸ Adantawan Evatam Diosqa mana huchayoqta unancharqa. Hinalla kasukuspankuqa,  enteron Pacha kunan paraiso kaptinmi churi-wawankuwan kuska kusisqa kawsakuchkanmanku karqa. Ichaqa, Diostam mana kasukurqakuchu, chaymi wiñaypaq wañunankupaq sentenciasqa hinaspa Eden huertamanta qarqosqa karqaku. Pantaqña kaspankum, huchallikuq runakunapa tayta-mamanña karqaku. Chaymantañataq yuyaqyaruspanku wañururqaku, chaywanmi Jehová Diosqa qawachirqa rimasqan cumpliq hinaspa haykapipas allin ruraq kasqanta. Adantaqa nirqañam chay mana mikuna ruruta mikuspaqa wañunanmanta, chaynapunim pasarqa.

9, 10. a) ¿Imanasqam Adanpa mirayninkunaqa wañunchik? b) ¿Imaynatam wiñaypaq wañuymanta librakuchwan?

⁹ Adanmanta miraqkunaqa herenciata hinam chaskirqanchik pantaq cuerpota, mana allin ruray munaqta hinaspa wañunanpaq sentenciasqata. ¿Imanasqa? Adan huchallikuruptinqa, lliwmi yaqa paypa ukunpipas tarikunchikman hina karqanchik, chaymi llapanchik wañuypaq sentenciasqa kanchik. Hinaptinqa, librawananchikpaq mana pagasqa kachkaptin yuyaqyaymantawan wañuymanta librawaspanchikqa nisqantachá Diosqa qepancharunman karqa. Cheqaptapunim Pablo kaynata nirqa: “Yachasqanchik hinam kamachikuykunaqa Diosmanta. Ñoqam ichaqa [. . .] huchapa munaychakusqan kani. [. . .] ¡Imapiñataq rikukuni! Kay wañuyman apaqniy aychaymantaqa ¿pitaq libraykuwanqa?”, nispa (Rom. 7:14, 24).

¹⁰ Jehová Diosllam allin ruraq kasqanrayku, atinman karqa huchanchik pampachayta hinaspa wiñaypaq wañuy castigomanta libraytapas. ¿Imata servichikuspanmi chayta rurarqa? Hanaq pachamanta kuyasqan Churinta mana huchayoq nacenanpaq hinaspa rantinchikpi wañunanpaq kachamuspanmi. Adanmantaqa Jesusmi mana pantaq karqa. “Payqa manam ima huchatapas rurarqachu.” (1 Ped. 2:22.) Chayraykum atinman karqa mana pantaq mirayniyoq kayta. Ichaqa, saqekurqam Diospa enemigonkuna wañuchinanta, chaynapim Adanpa mirayninkunata churichakurqa hinaspa paypi iñiqta wiñay kawsayman pusanman. Bibliam nin: ‘Hukllam Diosqa, hukllataqmi Diosninchikwan runakunata allinyanachiqpas, chay allinyanachiqqa Jesucristom, [. . .] llapallanchikta salvawananchikpaqmi kikinmanta entregakurqa hinaspa rantinchikpi wañupuwarqanchik’, nispa (1 Tim. 2:5, 6).

11. a) ¿Imawantaq tupachichwan librawananchikpaq Jesuspa wañukusqanta? b) ¿Pikunatawanmi yanapan librawananchikpaq Jesuspa wañukusqan?

¹¹ Librawananchikpaq Jesuspa wañukusqanta entiendenanchikpaq kaywan tupachisun: huk mana allin bancom runakunata engañaruspan paykunapa qollqenta hapikurunman hinaspa manuyasqata saqerunman. Chaymi bancopa dueñonkunaqa achka wata carcelpi kanankupaq sentenciasqa kanmanku. Ichaqa, ¿imataq pasanman engañachikuq runakunawanqa? Suyanmankuchá huk apu runa paykunata llakipayaspa bancota rantiruspan qollqenku kutichinanta chaynapi debekusqankuta paganankupaq. Chaynatam Dioswan Churinpas Adanpa mirayninkunata rantirunku hinaspa Cristopa yawarnin chaqchusqanta servichikuspanku runakunapa huchankumanta pagarunku. Chaymi Bautizaq Juanqa Jesusmanta nirqa: “Qawaychik, paymi Diosmanta Hamuq Carneroqa, wañuspanmi runakunapa huchanta pampachanqa”, nispa (Juan 1:29). Huchankumanta pampachasqa runakunapim tarikun kawsaqkunawan wañuqkunapas.

Imaynataq tarikurqaku Dioswan Jesusqa

12, 13. ¿Ima yachaytam tarinchik Isaacta Abraham wañuchinanpaq kaspan imayna tarikusqanmanta?

¹² Librawananchikpaq Jesuspa wañusqanmanta Diosninchik hinaspa kuyasqan Churin imayna tarikusqankumanta mana entiendeyta atiptinchikpas, Bibliapim chaymanta entiendenapaq willakuykunata tarinchik. Ejemplopaq, yuyaymanasun Abrahampa imayna sientekusqanpi. Kimsa punchawmi Moriah lawman rispan Diospa kayna nisqanta ruranan karqa: “Sapallan kuyasqayki churiki Isaacta pusaspa riy Moriah lawman hinaspa wañuchispa kañasqa ofrendata ofrecemuway ñoqapa nisqay kaq moqopi” (Gen. 22:2-4).

 ¹³ Piensasuntaq, astawanchá llakikurqa chay sitioman chayaruspa, altarta ruraspan hinaspa churinpa makintawan chakinta wataruspan altarpa hawanman siriykachispanqa. ¡Mayna llakikuywanchá wañurachinanpaq cuchillota hoqariykurqa! Kunanñataq Isaacpi piensasun. Cuchillowan aychanta kuchuptin nanaypiwan wañuypi piensaspaqa, ¿imaynaraq sientekurqa altarpa hawanpi kaspan? Diospa angelninmi Abrahamta harkarurqa, chayna kaptinpas Abrahanwan churin Isaacpa rurasqankum yanapawanchik, Satanaswan runankuna Jesusta wañuchinankupaq saqespan Dios imayna sientekusqanta entiendenapaq. Isaacpa rurasqanñataqmi tupan ñoqanchikrayku ñakarispan Jesuspa wañuy munasqanwan (Heb. 11:17-19).

14. ¿Jacobta ima pasasqanmi entiendechiwanchik librawananchikpaq Churinpa wañusqanwan Dios imayna tarikusqanmanta?

¹⁴ Diospa imayna tarikusqanmanta entiendenapaqmi yanapawasuntaq Jacobta imakuna pasasqanpas. Joseymi ancha kuyasqan churin karqa, wakin churinkunam ichaqa envidiakuspanku cheqnirqaku. Huk punchawmi Jacob kacharqa wawqenkunata qawaq rinanpaq, paykunaqa yachasqanku Hebron llaqtamanta yaqa 100.000 metropi hinam ovejankuta norte lawpi michirqaku. Joseyta wawqenkuna cheqnichkaptinpas payqa chayllam kasukurqa. ¡Mayna llakisqachá Jacob tarikurqa Joseypa pachanta churinkuna yawarwan chapusqata aparamuptinku! Chayta qawaykuspanmi qaparispa nirqa: ‘¡Churiypa pachanmi kayqa, ima purun animalchiki paytaqa mikurun! ¡Joseypa cuerponqariki llikipasqach kachkan!’, nispa. Chaymi churinmanta achka punchaw waqarqa (Gen. 37:33, 34). Dios llakikuyninta runakuna hina mana qawachiptinpas, Jacobpa pasasqanmi kaypi piensachiwanchik: kuyasqan Churinta kay Pachapi ñakarichispa wañuchiptinku Jehová Dios imayna tarikusqanmanta.

Yanapawanchikmi librawananchikpaq Jesuspa wañukusqanqa

15, 16. a) ¿Imaynatam librawananchikpaq Jesuspa wañukusqan chaskisqanta Dios qawachirqa? b) ¿Imaynatam yanapasunki Jesuspa wañukusqan?

¹⁵ Diosqa Churintam kawsarichirqa mana  rikuy atina cuerpoyoqtaña (1 Ped. 3:18, NM ). Hinaptinmi, Jesusqa 40 punchaw rikuriykurqa qatiqninkunaman, iñiyninkuta kallpancharqa hinaspa astawan predicanankupaq yachachirqa. Chaymantañam hanaq pachaman kutirqa, wañusqanpi iñiq qatiqninkunarayku yawar chaqchusqanpa chaninninta Taytanman ofrecenanpaq. Diosqa chaskirqam Jesuspa qosqanta, chaskisqantam qawachirqa 33 watapi Jesuspa qatiqninkuna Jerusalenpi huñunasqa kachkaptinku chuya espirituta qonanpaq payta encargaspan (Hech. 2:33).

¹⁶ Chayllam hanaq pachaman riy suyaq qatiqninkunaqa runakunaman willarqaku Diospa piñakuyninmanta librakunankupaq Jesuspa sutinpi bautizakunankuta, chaynapi huchankumanta pampachasqa kanankupaq (leey Hechos 2:38-40). Chay tiempomantam Diosqa tukuy nacionniyoq millonnintin runakunata amistadnin kananpaq pusamurqa, chaytam rurarqa Cristo librawananchikpaq wañusqanpi iñiptinku (Juan 6:44). Kaykunamanta yacharuspaqa allinmi kanman 2 tapukuymanta yachayninchikraq: ¿Yaqachum mayqanllanchikpas allin rurasqanchikrayku wiñay kawsay suyakuyta chaskirunchik? Chaskiruspanchikqa, ¿chinkarachichwanchu?

17. ¿Imaynatam qawachinanchik Dioswan amistad kasqanchikta?

¹⁷ Manam pipas merecenchikchu librawananchikpaq Jesuspa wañukusqanwan yanapachikuytaqa. Ichaqa, paypi iñisqankuraykum Diospa amistadnin millonnintin kanku hinaspa Paraisopi wiñaypaq kawsakuyta suyanku. Ichaqa, Jehová Dioswan amistadninchiktaqa chinkarachichwanmi. Piñakuynin punchawpi salvawananchikta munaspaqa, sapa punchawmi qawachinanchik ‘Cristo Jesus wañuspa librawasqanchikmanta’ agradecekusqanchikta (Rom. 3:24; leey Filipenses 2:12).

Hinalla qawachisun librasqa kaypi iñisqanchikta

18. ¿Imaynatam qawachinchik librawananchikpaq Jesuspa wañukusqanpi iñisqanchikta?

¹⁸ Kay estudiopa qallariyninpi tarikuq textom otaq Juan 3:36 niwanchik Señor Jesucristopi iñisqanchikta kasukuspa qawachinamanta. Librawananchikpaq Jesuspa wañusqanta chaninchasqanchikmi kallpanchawananchik Cristopa yachachisqanman hina kawsananchikpaq (Mar. 7:21-23). ‘Huchapakuyta’, ‘tupa-tupaykachispa rimaykunata’ hinaspa qalalla kaqkunata sapa kuti qawaspa millakuypaq kaqkunata saqeyta mana munaqkunataqa Diospa piñakuyninmi suyachkan (Efe. 5:3-6).

19. ¿Imakunata ruraspam librawananchikpaq Jesuspa wañusqanpi iñisqanchikta qawachinchik?

¹⁹ Jesuspa wañukusqanmanta agradecekuspaqa ‘Dios serviypim’ aswan ocupasqa kananchik (2 Ped. 3:11). Anchatam tiempochakuna hinaspa kallpanchakuna orakunapaq, Bibliata sapakama estudianapaq, huñunakuykunaman rinapaq, familiawan Diosta yupaychanapaq hinaspa Diospa Gobiernonmanta willakunapaqpas. ‘Allin ruraytawan kapuqninchikwan yanapanakuytapas amayá qonqasunchu, chaynata ruraspam kañasqa ofrendawan hina Diosta agradanchik’ (Heb. 13:15, 16).

20. ¿Ima bendiciontam chaskinqaku librawananchikpaq Jesuspa wañukusqanpi tukuyninkama iñiqkunaqa?

²⁰ Mana allin runakunapaq Diospa piñakuynin chayamuptinqa, ¡mayna kusisqachá kasun librawananchikpaq Jesuspa wañusqanpi iñisqanchikmantawan chaninchasqanchikmantapas! Paraisopiqa wiñaypaq agradecesqam kawsasunchik, piñakuyninmanta Dios librawananchikpaq Churinta qomusqanmanta (leey Juan 3:16 hinaspa Apocalipsis 7:9, 10, 13, 14).

Kay tapukuykunata contestasun

• ¿Imanasqam necesitanchik librawananchikpaq Jesuspa wañukusqanta?

• ¿Imaynataq librawaspanchik tarikurqaku Jehová Dioswan Jesusqa?

• ¿Imakunapim yanapawanchik librawananchikpaq Jesuspa wañukusqan?

• ¿Imaynatam qawachinchik Jesuspa wañukusqanpi iñisqanchikta?

[Kay yachachikuypa tapukuyninkuna]

[13 kaq paginapi dibujo]

Dioswan allinyanakunapaq punkukunaqa hinallam iska-iskay kichasqa kachkan

[15 kaq paginapi dibujokuna]

Abrahampa, Isaacpa hinaspa Jacobpa imayna sientekusqankupi yuyaymanaspam, allinta entiendesun Jesus wañukusqanmanta mayna llakikuy kasqanta