Leeqkunapa tapukuyninkuna

¿Imanasqataq huchasapa warmita Jesus nirqa huchankuna pampachasqaña kasqanta? (Luc. 7:37, 48.)

Simon sutiyoq fariseopa wasinpi mikunanpaq mesaman tiyaykuspa Jesus kachkaptinmi, huk warmi paypa chakinta weqenwan nuyuchispan chukchanwan chakichirqa. Chakinta muchaykuspanmi miski asnaq aceitewan untarqa. Bibliam nin chay warmiqa “huchasapa” kasqanwan reqsisqa kasqanta. Lliwmi pantaq runakunaqa huchayoq kanchik, ichaqa Bibliam huchasapa nispanqa riman Diosta mana kasukusqankuwan reqsisqa kaqkunamanta. Chay warmiqa chuchumikachá karqa. Imayna kaptinpas, paytam Jesus nirqa: “Huchaykikunaqa pampachasqañam”, nispa (Luc. 7:36-38, 48). ¿Imatam chaywan niyta munarqa? Manaraq runakunapa rantinpi Jesus wañuchkaptinqa, ¿imaynataq pampachasqa kanman karqa?

Chakinta weqenwan nuyurachiptin hinaspa chay warmipa huchanta manaraq pampachachkaspanmi, Jesusqa Simonman huk rikchanachiywan allinta yachachirqa . Mana pagapuy atina achka qollqeman huchallikuq kayta tupachispanmi nirqa: ‘Qollqe prestaq runatam iskay runakuna debekurqa. Hukninmi debekurqa pichqa pachakta, hukninñataqmi debekurqa pichqa chunkallata. Kutichipunankupaq mana kaptinñataqmi paykunata pampachaykurqa. ¿Mayqannintaq pampachaqnintaqa aswanraq kuyanqa? nispa. Chaymi Simonñataq nirqa: “[. . .] Pichqa pachak qollqe debeqmi”, nispa. Hinaptinmi Jesusñataq nirqa: “Allintam rimarunki” ’, nispa. (Luc. 7:41-43). ¿Imatam Diosta llapallanchik debekunchik? Kasukuytam. Chaymi, haykapipas mana kasukuspanchik hinaspa pantaspanchikqa, mana pagachkanchikchu chayta chaskinanpaq derechoyoqman. Chaynapim debekusqanchikqa yapakun. Diosqa debekusqanchikta manaña mañawaqninchik runa hinam. Chaymi Jesusqa qatiqninkunata kallpancharqa Diosta kaynata mañakunankupaq: “Ñoqaykupa debekusqaykutayá pampachawayku, ñoqaykupas debewaqniykutam pampachaniku”, nispa (Mat. 6:12, NM ). Chay debekusqanchik hucha kasqantam Lucas 11:4 (NM) willawanchik.

¿Imata servichikuspataq Diosqa runakunapa huchanta ñawpaq tiempopi pampacharqa? Allin ruraq kasqanman hinam, payqa nirqa pipas huchallikusqanta wañuywan pagananpaq. Chaymi Adanqa mana kasukusqanmanta wañurqa. Ichaqa, Israel nacionman Leyta qosqanpim Diosqa sutillata qawachirqa animalta ofreceptinku huchankumanta pampachasqa kay atisqankuta. Pablom nirqa: “Leyman hinaqa yaqa llapallanmi yawarwan chuyanchasqa karqa. Yawar mana challasqa kaptinqa huchaqa manam pampachasqachu kanman”, nispa (Heb. 9:22). Judiokunaqa yacharqakum chayta ruraspalla pampachasqa kanankuta. Chaychiki Simonpa wasinpi convidoman riqkunaqa, mana allintachu qawarqaku chay warmiman Jesuspa nisqanta. Chaymi mesapi tiyaqmasinkuna nirqaku: “¿Pitaq kay runaqa huchakunatapas pampachananpaqqa?”, nispa (Luc. 7:49). Hinaptinqa, ¿imata servichikuspanmi chay warmipa achka huchankunata pampacharqa?

Punta tayta-mamanchik mana kasukusqanku qepatam, punta willakuypi Diosqa nirqaña munasqan rurakunanpaq huk mirayta rikurichiptin Satanaswan mirayninpas talonninpi kachunanmanta (Gen. 3:15). Chayqa pasakurqa Diospa enemigonkuna Jesusta wañurachiptinkum (Gal. 3:13, 16). Cristom yawarninwan pagarqa huchamantawan wañuymanta runakunata librananpaq. Manam imapas harkanmanchu munasqanta Dios ruranantaqa, Genesis 3:15 willakusqan tiempopim Diospa qawasqanman hinaqa huchamantawan wañuymanta precio pagakurqaña hinaspa promesanpi iñiqpas atinmanña karqa pampachasqa kayta.

Manaraq Cristo kay Pachaman hamuchkaptinmi, karqaña Diospa qawasqanman hina  mana huchayoq runakunaqa. Wakinkum karqa Enoc, Noey, Abraham, Rahab hinaspa Job, paykunam iñiywan suyarqaku Diospa nisqan cumplikunanta. Chaymi Santiago kaynata qellqarqa: “Diosman Abraham iñisqanraykum mana huchayoqpaqña chaskisqa karqa”. Nirqataqmi: “Rahab sutiyoq chuchumika warmim [. . .] allin rurasqanwan mana huchayoqpaqña chaskisqa karqa”, nispa (Sant. 2:21-25).

Ñawpaq Israelpim rey David hatun huchakunata rurarqa, chaywanpas Jehová Diospi allin iñiyniyoq kasqantam qawachirqa hinaspa sonqomanta wanakurqa. Hucha pampachasqa kasqanmantam Biblia nin: “Diosmi piñakuyninta amachananpaq Jesucristota churarqa wañuspa yawarnin chaqchusqanwan salvawananchikpaq, chaytaqa haypanchik iñispallam. Chaynatamá Dios qawachiwarqanchik justo kasqanta. Manaraq Jesucristo wañuchkaptinqa pacienciakuspam huchankumanta runakunata mana castigarqachu. Kunanmi ichaqa huchanchikkunata pampachawaspanchik Jesusllaman iñikuqkunata mana huchayoqpaqña Dios chaskiwanchik. Chaynapim justo kasqanta yachanchik” (Rom. 3:25, 26). Chaymi Diosqa allin ruraq kasqanta mana yanqachaspallan Davidta pampacharqa, chaypaqmi servichikurqa runakunapa rantinpi Jesuspa wañusqanta, chaytaqa hamuq tiempopiraqmi qonan karqa.

Chaynam Jesuspa chakin nuyuchiq warmipas pampachasqa karqa. Huchasapa kaspanpas rurasqanmantam wanakurqa. Yacharqam huchanmanta librasqa kananta, rurasqanwanpas qawachirqam hucha pampachasqa kananpaq Diospa qomusqan runamanta agradecekusqanta. Cristo manaraq wañuchkaptinpas, chayna pasakunanqa segurom karqa, chaymi runakunaqa chay warmi hina pampachasqaña kanmanku karqa. Chaymi Jesus nirqa: “Huchaykikunaqa pampachasqañam”, nispa.

Qawasqanchikman hinaqa, Jesusqa chaskirqam hinaspa haykapipas llakipayarqam huchasapakunataqa. Chaynataq, Jehová Diosqa ninmi huchankumanta wanakuqkunata pampachananpaq. ¡Maynatam consuelawanchik hinaspa kallpanchawanchik pantaq runakunata!

[7 kaq paginapi dibujo]

Mana huchayoqñam qawasqa karqaku