Diospa llaqtanpim rurayniyoqllaña karqani

Kaytam willakun Vernon Zubko

WIÑARQANIM huk granjapi Stenen llaqtapa hichpallanpi, chayqa kachkan Canadá nacionpa Saskatchewan sutiyoq provinciapim. Fredwan Adella tayta-mamaymi mayor paniy Aurelliata, ñoqata hinaspa Alvin, Allegra chaynataq Daryl sullkaykunata iñiyniykupi allin kanaykupaq hinaspa necesitasqaykuta qowanankupaq anchata kallpanchakurqaku. Kunankamapas anchatam agradecekuniku cheqapta yachachiwasqankumanta.

Taytaymi mana manchakuspa predicaq, payqa hanaq pachaman riy suyakuyniyoqmi karqa. Allin llamkaqmi karqa, kallpanchakurqam Testigo kasqanta lliw yachanankupaq. Haykapipas cheqapmantam rimaq. Manam qonqasaqchu sonqomantawan mana manchakuspa predicasqanta. Niwaqmi: “Diospa llaqtanpi ocupasqallaña kaspaqa achka sasachakuykunamantam librakunki”, nispa.

Sapa kutim predicarqaniku Stenen llaqtapa hinaspa hichpanpi llaqtachakunapa callenkunapi, ñoqapaqqa sasam karqa. Sapa llaqtachakunapim karqa ñoqayku mozo-sipaskunamanta burlakuqkuna. Huk kutipim, 8 wataypi kachkaspay Llaqta Cuidaq hinaspa ¡Despertad! revistakunata esquinapi sayaykuspa aypuchkarqani hinaptinmi warmakuna chawpicharuwarqa. Mosoq sombreroyta qechuruwaspankum waqtaypi plantasqa qeruman churarurqaku. Ichaqa kusikunaypaqmi mayor iñiqmasinchik qawamuwachkasqa, asuykamuspanmi tapuwarqa: “¿Vern imanantaq?”, nispa. Warmakunaqa chayllam ayqekurqaku. Chayna pasawasqan mana gustawaptinpas kaytam yacharurqani: callekunapi predicaspaqa manam plantasqa qeru hinaqa chayllapiqa sayanachu. Warma kachkaptiy chaykuna pasawasqanmi yanapawarqa mana manchakuspa wasin-wasin predicanaypaq.

Wawqey Alvinwan kuskam 1951 watapi bautizakurqani 13 wataypi. Yuyachkaniraqmi bautizakuqkunapaq Jack Nathanpa discursonta, chaypim kallpanchawarqaku huk killallapas predicayta mana saqenaykupaq. * Familiaykupim precursor kayta qawarqaniku vidaykupi imamantapas aswan allin rurayta hina. Chaymi estudiayta tukuruspay 1958 watapi rirqani Winnipeg (Manitoba) llaqtaman, chaypi precursor kanaypaq. Taytayqa kusisqam tarikurqa maderata cepillaspayku negociopi llamkasqaykumanta, ichaqa mamaypiwanmi sapa kuti kallpanchawarqa tukuy tiempoywan Diosta servinaypaq, chaymi Winnipeg lawman rinaypaq yanapawarqa.

Mosoq llaqtaman risqaymantawan vidapasaqmasiy tarisqaymanta

1959 watapim Betel nirqa atiqkuna Quebec provinciaman rinankupaq, chaypiqa asllam predicaqkuna karqaku. Precursor kaspaymi Montrealpi servinaypaq rirqani. ¡Tukuymi  cambiarurqa! Yachanaymi karqa francés rimayta hinaspa chaypi runakunapa costumbrenkutapas. Yanapawarqam congregacionkuna watukuq ancianopa kayna niwasqan: “Amam haykapipas ninkichu: ‘Ñawpaq kasqaypiqa manam kaynatachu rurarqaniku nispaqa’” (1 Cor. 9:22, 23).

Quebecman chayaptiyqa manam compañeroy karqachu. Ichaqa 1961 wata febrero killapim tarirurqani vidapasaqmasiyta, payqa karqa Winnipeq lawpi reqsisqay Shirley Turcotte sipasmi, paywanmi casarakurqani. Familianpas Jehová Diostam kuyarqaku. Chay tiempopiqa manam yacharqanichu hamuq watakunapi imayna kallpanchawananmanta.

Gaspé lawpi predicasqaykumanta

Iskay wata casarasqa kachkaptiykum nombrawarqaku Rimouski (Quebec) llaqtapi precursor especial kanaykupaq. Canadapi plantakunapa waytariy qallarisqan tiempopim Betel wasi niwarqaku lamar qochapa muyurisqan Gaspé lawpi predicanaykupaq, chayqa tarikun Canadamanta Intipa qespimunan lawpim. Kamachisqaqa karqaniku tarpuchkaq hina cheqapmanta chaypi lliw runakunaman willanaykupaqmi (Ecl. 11:6). Carroykupim aparqaniku 1.000 masnin revistakunata, yaqa 400 librokunata chaynataq aslla mikunaykutawan pachaykutapas, hinaspam chaypi huk killa predicanaykupaq rirqaniku. Chay lawpi llaqtachakunata ordenninpi predicastinmi rirqaniku. Chay llaqtapi radiom runakunaman willarqa Testigokuna chayaramusqanta hinaspam nirqa qellqanchikkunata mana chaskinankupaq. Yaqa llapankum noticiata mana allintachu entienderqaku, aswanmi entienderqaku qellqanchikkuna chaskinankupaq nisqanta chaymi chaskirqaku.

Chay tiempopaqqa, Quebec lawpi wakin llaqtachakunapim autoridadkuna chayllaraq saqerqaku predicanaykuta, chaymi mana admirakuypaqchu karqa policiakunapa harkawasqankuqa. Chaynam pasarqa huk llaqtapi predicachkaptiyku, yaqa lliw wasipim qellqanchikkunata saqechkarqaniku hinaptinmi huk guardia hamuruspan niwarqaku comisariaman rinaykupaq. ¿Imataq pasarusqa? Llaqtapa abogadonmi kamachikuyta horqorusqa predicayta saqenaykupaq. Guardiakunapa jefen chay punchaw mana chaypi tarikuptinmi abogadoman qawachirqani Canadapi (Toronto) tarikuq Betel wasipi allin rurasqa cartata, chaypim explicarqa predicanaykupaq derechoyoq kasqaykuta. Leespanmi chaylla nirqa: “Ñoqaqa manam munanichu sasachakuykunata. Curam niwarqa chaynata ruranaypaq”, nispa. Autoridadkunapa permisonwan predicasqaykuta chay lawpi runakuna yachanankupaqmi, policiapa harkawasqanku lawman kutirqaniku hinaspa kaqlla predicarqaniku.

Policiakunapa jefenwan paqarinnintinta rimanaykupaq kutiptiykum telefonowan qayaspan payqa llumpay piñasqa karqa abogadopaq. Chaymantam niwarqaku imapas kaptin payña encargakunanpaq qayanaykuta. Mana chay llaqtayoq kaspayku hinaspa francés idiomata mana yachaptiykupas, runakunaqa sumaq sonqo hinaspa chaskikuykuqmi karqaku. Chaywanpas tapukurqanikum: “¿Haykapillapas Jehová Diosta servinqakuchu?”, nispa. Chaymantam yacharurqaniku achka watakuna qepataña, Gaspé lawman Huñunakuna Salonkunata ruranaykupaq rispayku. Cuentatam qokurqaniku predicasqayku achka runakuna Testigoña kasqankumanta. Jehová Diosmi ‘wiñachirqa’ (1 Cor. 3:6, 7).

Huk herenciatam chaskirqaniku

Lisa sutiyoq warmaykum 1970 watapi nacerqa. Payqa Jehová Diospa qowasqanku herenciam karqa, anchatam kusichiwarqaku. Lisawan Shirleymi achka Salonkunata ruraypi ñoqawan llamkarqaku. Estudionta tukuruspanmi Lisaqa niwarqaku: “Qamkunaqa Jehová Diosta tukuy tiempoykichikwan servisqaykichiktam ñoqarayku saqerqankichik, chaymi tantearuni precursora kanaypaq”. 20 wata masnin pasaruptinpas Lisaqa hinallam precursora kachkan, kunanqa qosan Sylvainwan kuska. Iskayninkum huk nacionkunapi Salonkuna ruraypi yanapakunku. Familiaywanmi  tantearqaniku mana llumpay imayoq kanaykupaq, chaynapi Diospa servicionpaq haykapipas listo kanaykupaq. Manam haykapipas qonqanichu precursora kayta qallaykuspan Lisapa niwasqanta. Paymi kallpanchawarqa tukuy tiempoywan serviyta 2001 watapi kaqmanta qallarinaypaq, kunankamam hinalla precursor kachkani. Precursor kasqaymi hinalla yanapawachkan tukuy ima rurasqaypi Jehová Diospi confianaypaq hinaspa mana llumpay imayoq kaspaypas kusisqa kanaypaq.

Huñunakunapaq wasikuna ruranapaqqa kuyakuq hinaspa kasukuqmi kana

Jehová Diosta servisqaypim kayta yacharuni: payta servinapaq listo kaspa chaynataq kamachiwasqanchikta kasukuspaqa, achka bendicionkunatam chaskisun. Anchatataqmi chaninchani Comité Regional de Construcción nisqapi servisqayta hinaspa achka iñiqmasiykunawan Huñunakuna Salonkunata lliw Quebec provinciapi chaynataq huk lawkunapipas ruraypi yanapasqayta.

Ichapas chay ruraypi yanapakuq cristianokunamanta wakinqa manapas alli-allin discurso qoqchu kanku, ichaqa huñunakunapaq wasikuna ruraypiqa reqsisqam kanku allin llamkaq kasqankuwan. Kay kuyasqanchikkunaqa tukuy kallpankuwanmi llamkanku hinaspa ima ruray yachasqankupas sutillam qawakun. Diosmi servichikun payta yupaychanapaq sumaq Salonkunata ruranankupaq.

Wakinqa tapuwarqakum: “¿Imaynataq kananku Huñunakuna Salonkunata ruraypi yanapakuqkunaqa?”, nispa. Experienciawanmi niyman, puntataqa Jehová Diostawan Churintam kuyananku chaynataq allpantinpi iñiqmasinchikkunatapas (1 Cor. 16:14). Kasukuqtaqmi kananku. Imapas munasqanchikman hina mana kaptinpas, kasukuq cristianoqa hinallam Diospa llaqtanta yanapanqa. Kasukuq kasqanmi kallpanchanqa hamuq tiempopi chayna ruraypi llamkananpaq.

Jehová Diostam agradecekuni

Taytaymi wañukurqa 1985 watapi, ichaqa Diospa llaqtanpi rurayniyoqllaña kanaypaq niwasqantaqa manam qonqanichu. Segurom kachkani, payqa hinallachá llamkachkan hanaq pachapi llamkanankupaq akllasqa wakin cristianokunawan kuska (Apo. 14:13). Mamaymi 97 watayoqña, umanpi venachan toqyaruptinmi allintaqa mana rimanñachu. Bibliatam ichaqa allintapuni reqsin. Cartankunapim Bibliapa textonkunata churamun hinaspa kallpanchawanku Jehová Diosta tukuy sonqoykumanta kasukunaykupaq. ¡Mayna agradecesqam wawqe-paniykunapiwan tarikuniku kuyakuq tayta-mamaykumanta!

Diostapas agradecekunim kuyakuq vidapasaqmasiy Shirleymanta. Payqa yuyanmi mamanpa kayna nisqanta: “Qosaykiqa llumpay ocupasqam kanqa Diosta servisqanpi, chaymi yachanayki hukkunapaqpas tiempon qosqanmanta entiendeyta”. Casarakusqaymantam 49 wataña pasarun, chaypim rimarqaniku Diosta servispa kuskayku yuyaqyanaykupaq hinaspa Diospa piñakuynin chayamuptin hinalla kawsaspaykuqa kuska mozo-sipasyanaykupaqwan wiñaypaq servinaykupaqpas. Niymanmi “Señorpa rurayninpi” kunankama achka llamkayniyoq kasqaykuta (1 Cor. 15:58). Diosqa haykapipas cuidawarqakum hinaspa imapas necesitasqaykutam qowarqaku.

[Willakuy]

[31 kaq paginapi dibujo]

“Familiaywanmi tantearqaniku mana llumpay imayoq kanaykupaq, chaynapi Diospa servicionpaq haykapipas listo kanaykupaq”