¿Imaynatam Dios qawan mana ruranapaq nisqanchikta?

QARIM nirqa: “Compañawananpaq kay warmi qowasqaykim qoykuwarqa chay sachapa rurunta hinaptinmi mikururqani”, nispa. Chayna acusasqa kasqanmantam warmi contestarqa: “Culebram engañaruwarqa chaymi mikururqani”, nispa. Adanpawan Evapa Diosta kayna nisqankumantapacham, runakunaqa chayna niqllaña kanku (Gen. 3:12, 13).

Punta tayta-mamanchikta Jehová Diospa sentenciasqanmi qawachin mana kasukusqankumanta chayna nisqankuta mana allinpaq qawasqanta (Gen. 3:16-19). Chaynaqa, ¿manachu Diosqa chaskinman imatapas mana ruranapaq nisqanchikta? Icha, ¿wakinqa allinchu kanman? Chayna kaptinqa, ¿imaynatam yachachwan mayqan allin otaq mana allin kasqanta? Chaykunamanta yachanapaqqa puntatam entiendenanchik imatapas mana rurananchikpaq nisqanchik ima kasqanta.

Chayqa kanman rurasqankumanta otaq rurachkaspa imanasqa saqerusqankumanta chaynataq mana ruray munasqankumanta nisqankum. Wakinpiqa mana allin rurarusqanmanta pampachanapaq allin razonta qospa willakuykunam. Ichaqa, Adanpawan Evapa rurasqankuman hinam, wakinpiqa kanman imarayku rurasqankumanta pakanankupaq tukuy ima nisqankupas. Yaqa llapanku chayna nisqankuraykum, wakinkupa disculpakusqankuta achka mana creenkuchu.

Cristianokunaqa cuidakunankum imatapas nispa Dios serviypi rurayninkuta mana cumplinanmantaqa, mana chayqa ‘kikinkutam engañakunmanku’ mana allin pensamientokunawan (Sant. 1:22). Chayrayku yuyarisun Bibliapi wakin ejemplokunatawan ima yachachisqankunata, chaynapi ‘Señorpa agradonpaq’ kaqkunamanta seguro kanapaq (Efe. 5:10).

¿Imatam Jehová Dios suyan ñoqanchikmanta?

Bibliapim kachkan Diosta serviqkuna kasukunanchikpaq kamachikuykuna. Ejemplopaq, Jesuspa punta pachak watapi kamachisqantaqa lliw qatiqninkunam kunanpas kasukunanku, nirqam: “Llapallan nacionpi runakunaman rispayá willamuychik qatiqniykunaña kanankupaq”, nispa (Mat. 28:19, 20). Chayta cumpliy ancha allin kasqantam Pablo qawachirqa kaynata nispan: “¡Imaynaraq kayman allin noticiata mana willakuspayqa!” (1 Cor. 9:16.)

Ichaqa kanmi Diospa Gobiernonmanta predicanankupaq mana tanteakuqkuna, Bibliata ñoqanchikwan achka wataña estudiaspankupas (Mat. 24:14). Wakinqa predicachkaspankupas saqerunkum. ¿Imakunatam ninku manaña predicasqankumanta? Qawasunyá Diospa wakin serviqninkuna kamachisqanta mana cumpliy atisqankuta piensaptinku, ñawpaq tiempopi paypa ima rurasqanmanta.

¿Imakuna nisqanchiktam Diosqa mana chaskinmanchu?

“Llumpay sasam.” Predicayqa mana ruray atinapaqchá rikchakuwachwan, astawanqa manchakuqkunapaq. Ichaqa, Jonasta pasasqanmantam achkata yachachwan. Diosmi kamachirqa Asiria nacionpa capitalnin  Ninive puchukachisqa kananmanta willakunanpaq, chaymi mancharikurqa. Payqa yacharqam chaypi runakuna ñakarichiq hinaspa llumpay mana allin rurasqankuwan reqsisqa kasqankuta. Jonasqa tapukurqachá: “¿Imaraq pasawanqa riptiyqa? ¿Yaqachu imatapas ruramuwanqaku?”, nispa. Chaymi kamachisqanta cumplinanpaq Niniveta rinanmantaqa huk lawman pasakurqa. Diosmi ichaqa mana chaskirqachu mana risqanmanta Jonaspa ima nisqantaqa, chaymi kaqmanta kamachirqa ninivitakunaman willamunanpaq. Chay kutipim ichaqa valorchakuspan Jonasqa rurananta cumplirqa, hinaptinmi Dios bendecirqa (Jon. 1:1-3; 3:3, 4, 10).

Yaqapaschá qampas piensanki predicayqa llumpay sasa kasqanta. Chaynaqa kayta yuyariy: ‘Diospaqqa tukuymi atinallan’ (Mar. 10:27). Chayrayku, ama saqeychu yanapakuynin mañakuytaqa. Segurom kachwan necesitasqanchik kallpata lliwman qowananchikmanta. Valorchakuptinchikqa bendeciwasunmi (Luc. 11:9-13).

“Ruranaypaqmi mana ganasniy kanchu.” ¿Imatam rurawaq Dios serviypi ruraynikita cumplinaykipaq mana ganasniyoq kaspayki? Yuyariy, Jehová Diosqa yachanmi sonqonchikpi kaqta, chaymi yanapawanchikman imayna kasqanchikta cambianapaq. Pablom qellqarqa: ‘Diosmi munasqanman hina allin munayta qosuspaykichik allinkunata ruranaykichikpaq yanapasunkichik’, nispa (Fili. 2:13). Chayrayku, Diosta mañakusun serviyta munananchikpaq. Rey Davidpas yaqa chaynatam mañakurqa: “Yachaykachillawayá cheqap kaqnikiman hina pusawaspayki”, nispa (Sal. 25:4, 5). Chaynaqa, Diostayá mañakusun agradayta munananchikpaq.

Wakin kutipi pisipasqa otaq hukmanyasqa tarikuspanchikmi obligakunanchik huñunakuyman rinapaqwan predicaq lloqsinapaqpas. Chaywanqa, ¿qawachichkanchikchu Jehová Diosta mana kuyasqanchikta? Manam. Diospa ñawpaq tiempopi kasukuq serviqninkunapas tukuy sonqonkuwanmi kallpanchakurqaku paypa munayninta ruranankupaq. Ejemplopaq, Pablom nirqa Diosta kasukunanpaqqa, sirvienteta hina ‘cuerponta kasuchisqanta’ (1 Cor. 9:26, 27). Dios servisqanchikpi rurayninchikkunata cumplinapaq wakinpi obligakuptinchikpas Diosqa bendeciwasunmi, pay kuyasqanchikrayku chayna rurasqanchikmanta. Chaynatam qawachisun Satanas llulla kasqanta, payqa nichkanmi sasachakuypi kaspa Dios serviyta saqerunanchikta (Job 2:4).

“Manam tiempoy kanchu.” Predicananpaq pipas mana tiempoyoq kasqanta piensaspanqa, qawakunanmi imakunata vidanpi puntapi churasqanta. Jesusmi qawachirqa imayna kawsanamanta, nirqam: ‘Puntataqa maskaychik Diospa munaychakusqanta’, nispa (Mat. 6:33). Chayta ruranapaqqa yaqapaschá imayna kawsasqanchikta cambiana otaq kusirikunapaq tiempo rakisqanchikta menosyachina kanqa, chaynapi astawan predicanapaq. Kusirikunapaq otaq ima munasqanchikta ruranapaqqa  kanmi tiempo, ichaqa chaykunawanqa manam saqerunachu Dios serviypi rurayninchikkunataqa. Lliw cristianopa vidanpiqa puntapim kanan Dios serviypi ruraykuna.

“Manam atisaqchu.” Ichapas piensanki allin noticiamanta predicayta mana atisqaykita. Ichaqa amayá hukmanyaychu, Diosta ñawpaq tiempopi serviqkunamanta wakinkupas piensarqakum ruranankuwan mana cumpliy atinankuta. Moisesmanta rimarisun. Dios kamachiptinmi nirqa: “¡Ay Señorlláy! Ñawpaqpas-kunanpas ñoqaqa manam rimaysapa runachu kani, kay serviqnikiqa mana rimakuy atiqmi kani”, nispa. Yanapananpaq Dios niptinpas Moisesqa huk runata kachananpaqmi nirqa: “¡Ay Señorllay! Pim kachanaykitayá kachayqa”, nispa (Exo. 4:10-13). ¿Imatam Diosqa rurarqa?

Manam Moisestaqa librarqachu rurananmanta, aswanqa Aarontam nombrarqa yanapananpaq (Exo. 4:14-17). Chaymantapas Diosqa qatiqnin watakunapipas manam saqerqachu, aswanqa tukuy ima necesitasqantam qorqa rurayninta cumplinanpaq. Kunanpas, Diosqa experienciayoq cristianokunatam kallpanchanman predicacionpi yanapawananchikpaq. Astawanqa, Palabranpim segurawanchik kamachiwasqanchikta cumplinapaq preparawananchikmanta (2 Cor. 3:5; qawariy kayna niq recuadrota:  ‘Vidaypi aswan kusikusqay watakuna’).

“Sientisqam kachkani rurawasqankumanta.” Wakinkuqa predicayta otaq huñunakuyman riytam saqenku paykunapa contranpi iñiqmasinchikpa rurasqanwan piñakuspanku. Chayna tarikunapaq razon kaptinpas,  ¿yaqachu Diospaq allin kanman servisqanchikpi rurasqanchikkunata chayrayku saqesqanchik? Piensarisun Pablotawan Bernabeyta ima pasasqanpi. Yaqachá mana acuerdopi kasqankumanta ‘llumpayta piñanakuruspanku’ sientisqa karqaku (Hech. 15:39). Ichaqa, ¿predicayta saqerurqakuchu? Manam.

Mayqan iñiqmasinchikpas pantaq kaspan sientichiwaptinchikqa kaytam yuyarina: payqa manam enemigonchikchu. Enemigonchikqa Satanasmi, paymi millpuruytaqa munawachkanchik. Amayá vencechikusunchu, aswanqa ‘paypa contranpiyá qaqa hina sayasunchik iñiyninchikpi’ (1 Ped. 5:8, 9; Gal. 5:15). Allin iñiyniyoq kaspaqa sientisqa kasqanchiktam atipasun (Rom. 9:33).

Imayna tarikusqanchikrayku mana achkata ruraspanchik

Qawasqanchikman hina, Bibliaqa manam ima razontapas qonchu predicacionta nitaq Dios servisqanchikpi huk rurayninchikkunata saqenanchikpaqqa. Ichaqa, cheqaptam imapas kanman manaña achkanpi predicanapaq. Ichapas achka tiempota necesitanchik Bibliapa kamachiwasqanchikkunata cumplinapaq. Wakinpiqa ichapas llumpay pisipasqa otaq onqosqa tarikusqanchikrayku munaspapas achka rurayta mana atinchikchu. Chayna kaptinqa consuelawanchikmi tukuy sonqomanta kallpanchakusqanchikta hinaspa imapas harkawasqanchikta Dios yachasqanmanta Palabranpi niwasqanchik (Sal. 103:14; 2 Cor. 8:12).

Chaynaqa, amayá mana kuyakuywanqa pitapas nitaq kikinchiktapas juzgakusunchu. Yuyarisun Pablopa nisqanta: “¿Pitaq qamqa kanki hukpa sirviententa juzganaykipaqqa? Señorninchikmi [. . .] juzganqa allin otaq mana allin kasqanmantapas” (Rom. 14:4). Iñiqmasinchikpa rurasqanwan tupachikunamantaqa, ama qonqasunchu: ‘sapakamam Diosmanqa cuentata qosun’ (Rom. 14:12; Gal. 6:4, 5). Yuyasuntaq, Diosta mañakuspa hinaspa imamantapas willakuspaqa “allin concienciayoqmi” kananchik (Heb. 13:18).

Diosta serviyqa kusichiwanchikmi

Imayna tarikuspanchikpas Diosta servisqanchikmantam llapanchik kusisqa kachwan, payqa entiendewanchikmi hinaspa atisqallanchiktam mañawanchik. ¿Imaynatam chayta yachanchik?

Bibliam niwanchik: “Ama recelaspayá qoykuy mañakusuqnikimanqa. Qoykuypuniyá qoykunaykipaq kachkaptinqa”, nispa (Pro. 3:27). ¿Cuentata qokurqankichu “qoykunaykipaq kachkaptinqa” nisqanmanta? ¿Imatam yachachiwanchik ñoqanchikmanta Dios ima suyasqanta? Payqa mañawanchik qoykunanchikpaq kaqllata qonanchiktam, manam niwanchikchu hukkuna hina rurananchikpaqqa. Arí, cristianokunaqa lliwmi achkata otaq pisillata ruraspankupas Diosta tukuy vidankuwan serviyta atinmanku (Luc. 10:27; Col. 3:23).

[14 kaq paginapi dibujo hinaspa recuadro]

 ‘Vidaypi aswan kusikusqay watakuna’

Llumpayta onqospa otaq hukmanyasqa kaspapas manam chayllaqa piensananchikchu tukuy sonqonchikmanta predicayta mana atisqanchiktaqa. Chaytam qawachin Canadá nacionniyoq Ernest iñiqmasinchikpa rurasqan.

Payqa rimaypi sasachakuq hinaspa llumpay manchakuqmi karqa. Wasanmanta onqosqanraykum wasikunata ruraspa llamkasqanta saqerurqa. Ichaqa chayna tarikusqantam servichikuyta munarqa astawan predicananpaq. Precursor auxiliar kanapaq huñunakuypi uyarisqanmi sonqonman chayarurqa, ichaqa piensarqam mana ruray atisqanta.

Piensasqan cheqap kasqanta qawachinanpaqmi huk killallapaq precursor auxiliar kananpaq solicitudta entregarqa. Ichaqa admirakurqam hayka hora predicananwan cumpliruspan. Hinaspanmi nirqa: “Kaqmanta ruraytaqa manam atisaqchu”, nispa. Piensasqan cheqap kasqanta qawachinanpaqmi huk killapaqwan solicitudta entregarqa. Chay kutipipas cumplirurqam.

Ernestqa precursor auxiliarmi karqa huk wata. Ichaqa nirqam: “Precursor regular kaytaqa manam haykapipas atisaqchu”, nispa. Huktawanmi chayna nisqan cheqap kasqanta qawachiyta munarqa. ¡Llumpay admirasqam karqa precursor kasqanwan huk watata cumpliruspan! Hinallam precursor kaspan 2 watakunatawan kusisqa servirqa, onqosqanrayku wañukunankama. Manaraq wañukuchkaspanmi watukuqninkunata waqaspan nirqa: “Vidaypi aswan kusikusqay watakunaqa karqa precursor kaspay Jehová Diosta servisqaymi”, nispa.

[13 kaq paginapi dibujo]

Predicanapaq imapas harkawaqninchiktaqa vencechwanmi

[15 kaq paginapi dibujo]

Diosqa kusikunmi imayna tarikuspanchikpas tukuy sonqomanta serviptinchikqa